Matiu 23 - Ika

Isi Nke Ẹtọ-kwasị-ọgụn Jizọsị Sị Wẹ Elerilẹ Ndị Farisi Lẹ Ndị nkuzi Iwu

¹ Ya kẹ Jizọsị nọ sị igunrun hụ lẹ ndị nsọnmazụụn a,

² “Ndị-nkuzi Iwu lẹ ndị Itu-Farisi rị nwan Ocho-Mozizi a kuzi Iwu Mozizi.

³ E mẹ ni nwan ihiẹn ọwụlẹ wẹ gwa ụnụ, e gi n'ẹ e dọn; ka esọnkwọlẹ ni wẹ mẹ ihiẹn wẹ rị e mẹ. Makẹni, w'a kuzi bụ w'a ra mẹ ihiẹn wẹ rị a kuzi.

⁴ “W'e kẹnmẹ ibu nyịnnị hụn a fụ ọrụn obubu e che ịhịan isi-uvun, kanị w'a ra kweri tịnpụdẹ mkpịnsịn-ẹka ohu bu wẹ.

⁵ “W'e mẹ ihiẹn ile w'e mẹ kẹni ịhịan legha wẹ: wẹ chọ nị wẹ yiri mkpọ filatrị ahụn w'e deye oku-Chuku w'e yi ezimezi ihun, e yiri wẹ hụn hi ogbe. Wẹ gha a kwaye tasẹlụ ahụn w'a kwaye ẹkwa ekpere, e mẹmẹ nke wẹ n'o sue, kẹni ịhịan hụn wẹ.

⁶ “Ọ sụọ wẹ nị w'a nọdị isi-ocho wẹ gha e ri oriri lẹ nị w'a nọdị oche pụ-ichẹn imẹ ụlọ-ofufe;

⁷ ọ sụọ wẹ nị w'e kele wẹ ọhụnma ogbe ebe ịhịan jun lẹni w'a kpọ wẹ ‘Onyẹ-nkuzi.’

⁸ Ka anịlẹ ni ịhịan kpọ ụnụ ‘Onyẹ-nkuzi,’ makẹni Onyẹ-nkuzi ohu sụọ kẹ ụnụ nwọn; umunẹ kẹ ụnụ ile wụ.

⁹ Akpọlẹ ni ịhịan ‘Nẹdi ẹnyi,’ elu-ụwanị makẹni Nẹdi ohu sụọ kẹ ụnụ nwọn, elu-igwee k'ọ rị.

¹⁰ Anịlẹ nị ịhịan kpọ ụnụ ‘Di-nwọnni-ẹnyi’ makẹni Di-nwọnni ụnụ wụ ohu sụọ: Ya wụ Kraịstị.

¹¹ Onyẹ kachanrịnnị imẹ ụnụ k'a wụrụ odibo ụnụ.

¹² Onyẹ bushi enwẹn ẹ elu, e wetu w'ẹ alị; kanị onyẹ welụa enwẹn ẹ alị, e bushi w'ẹ elu.

Jizọsị A Bannị Ndị Nkuzi Iwu Lẹ Ndị Farisi Mban

¹³ “Kanị nsọngbu rị e che ụnụ ndị-nkuzi Iwu lẹ ndị Itu-Farisi, ndị ihunnaị! Makẹni ụnụ a kpọkin ụzọ Alị-eze elu-igwee: ụnụ abanyeni, ụnụ eyekọ ndị chọ nị wẹ banye efe banye.

¹⁴ [Nsọngbu rị e che ụnụ ndị-nkuzi Iwu lẹ ndị Itu-Farisi, ndị ihunnaị! Ụnụ e rigbu ikpoho di wẹ nwụnhụn, e gi ekpere sueni e kpumẹ ẹ. Afụnfụn Osolobuẹ k'e ye ụnụ k'a ka nke ndị ọzọ.]

¹⁵ “Nsọngbu rị e che ụnụ, ndị-nkuzi Iwu lẹ ndị Itu-Farisi, ndị ihunnaị! Makẹni ụnụ e jẹnsọnmẹ alị ichẹn-ichẹn, e fetudẹ ohimin, chọkọ onyẹ sikọ d'e kweri femẹ ofufe ụnụ — ọsụọn'a nị akpụ onyẹ ohu sụọ rọ, kanị onyẹ kweri nwan sọnmẹ ụnụ, ụnụ e mẹ ẹ wụrụ nwa ọkụn-mmọn karịdẹ ụnụ nwẹn.

¹⁶ “Nsọngbu rị e che ụnụ ndị ẹnya-ishi rị e du ịhịan, a sị, ‘Onyẹ kun Ụlọ-NSỌ, onwọnni ihiẹn ọ wụ; kanị, o kun goru rị imẹ Ụlọ-NSỌ, o jẹnkọ d'e mẹzurịrị ihiẹn o kunn'ẹ.’

¹⁷ Ndị nzuzu ẹnya kpu ishi! Elee hụn ka? Goru ra Ụlọ-NSỌ hụn mẹ goru hụ rị nsọ?

¹⁸ Ụnụ a sị nị ‘Ịhịan kun ukpo nchụn-ẹjan, onwọnni ihiẹn ọ wụ; kanị o kun oyiye rị elu ẹ, o sikọ d'e mẹzurịrị ihiẹn o kunn'ẹ.’

¹⁹ Ndị ẹnya-ishi! Elee hụn ka? Oyiye ra ukpo nchụn-ẹjan hụn mẹ oyiye hụ rị nsọ?

²⁰ “Onyẹ kun ukpo nchụn-ẹjan e kungụọ kẹ ukpo nchụn-ẹjan kẹ oyiye ile rị elu ẹ.

²¹ Onyẹ kun Ụlọ-NSỌ e kungụọ kẹ Ụlọ-NSỌ kẹ Osolobuẹ hụn bi imẹ ẹ.

²² Onyẹ kun elu-igwee e kungụọ ukpo Osolobuẹ lẹ onyẹ hụn nọdị alị ukpo hụ.

²³ “Nsọngbu rị e che ụnụ ndị-nkuzi Iwu lẹ ndị Itu-Farisi, ndị ihunnaị! Ụnụ a kụ ohu-imẹ-ụzọ-iri: kẹ nke arabasị-minti kẹ dilụ kẹ kumini — a latọ ihiẹn ndị ka mkpa imẹ Iwu hụn wụ imẹ ịhịan k'o furu lẹ omikẹn lẹ okukwe. Ihiẹn ndịnị ka mkpa furu ụnụ k'a gha e mẹ, e mẹzikwọ ndị ọzọ hụ.

²⁴ Ndị ndu ẹnya-ishi! Ụnụ e shiẹnpụ ịwawa, e luepụ anyịnyan-mkpukpuke!

²⁵ “Nsọngbu rị e che ụnụ ndị-nkuzi Iwu lẹ ndị Itu-Farisi, ndị ihunnaị! Makẹni ụnụ a chanchan azụụn mkpu lẹ afẹrẹ hụn w'e legha, kanị ihiẹn jun imẹ wẹ wụ ẹnya-uku lẹ imẹ ihiẹn sụọnị ụnụ.

²⁶ Onyẹ Farisi ẹnya-ishi! Bu ụzọ chanchan imẹ mkpu lẹ imẹ afẹrẹ — nị azụụn wẹ nwunghọ!

²⁷ “Nsọngbu rị e che ụnụ ndị-nkuzi Iwu lẹ ndị Itu-Farisi, ndị ihunnaị! Ụnụ nọ kẹ ili wẹ te nzụn: ị hụn a, ọ magbu enwẹn ẹ mma, kanị ọkpụkpụ ndị nwụnhụnnị lẹ ihiẹn ile rụnị e jun imẹ wẹ.

²⁸ Ẹrịra kẹ ụnụ nọ: ụnụ nọ kẹ ezigbo ịhịan ẹnya ịhịan, kanị ụnụ a kuzi ihiẹn ọzọ e ro ọzọ, eje-ihiẹn eje-ihiẹn kẹ ụnụ e ro.

Jizọsị Sị Ikpe-ọmụma Lalanị Wẹ

²⁹ “Nsọngbu rị e che ụnụ ndị-nkuzi Iwu lẹ ndị Itu-Farisi, ndị ihunnaị! Ụnụ e dọnzi ili ndị-amụma akan, a chọ ihiẹn wẹ gi a nyanhan ndị mbụ mẹ uche Osolobuẹ mma;

³⁰ a sị, ‘Omẹni ẹnyi te rị a ogẹn ndị nẹdi ẹnyi wẹ kanị, ẹnyi eke sọn wẹ gbu ndị-amụma!’

³¹ Ọhụn kẹ ụnụ gi a shịagbu enwẹn ụnụ ẹri nị ụnụ wụ ụmụ ndị gbu ndị-amụma!

³² Mẹchanrịn nị nwan ihiẹn ndị nẹdi ụnụ kanị bidọn!

³³ Agwọ kẹ ụnụ wụ! Igunrun ẹjụ-alị! Nanị ụnụ e dọn wanahịn afụnfụn ọkụn-mmọn?

³⁴ “M jẹnkọ nwan d'e zihẹni ụnụ ndị amụma lẹ ndị marịn ihiẹn lẹ ndị marịn Iwu Mozizi ọhụnma. Ụnụ jẹnkọ d'e gbu ụfọdụ, kpọma ụfọdụ ye osisi gbu, fịan ụfọdụ mkpịnsịn imẹ ụlọ-ofufe ụnụ; ụnụ sikọ d'a gha a chụ wẹ gha obodo pụ obodo,

³⁵ kẹni Osolobuẹ jụ ụnụ ukwere ẹdeke ndị ezi-omumẹ ile wẹ gbu elu-ụwa — gha ẹdeke Ebẹlụ onyẹ ezi-omumẹ d'e ru ẹdeke Zẹkaraya nwa Barakaya, hụn ụnụ gbutọ imẹ Ụlọ-nsọ, ẹgbata Ebe rị nsọ lẹ Ukpo nchụn-ẹjan.

³⁶ M rị a gwa ụnụ ezioku, agbọnị jẹnkọ d'e gi isi buru ihiẹn ndịnị ile.

Ẹkwan Jesu Kwannị Jerusalẹm

³⁷ “Euu Jerusalẹm! Jerusalẹm!! Obodo hụn e gbu ndị-amụma, e gi ọmụma a magbu ndị wẹ zihẹn'ẹ! Mgbe ole-lẹ-ole kẹ m chọpụ nị m kpumẹ ụmụ ị kẹ nneku-ọhụhụ dọn e gi nku e kpumẹ ụmụ a, bụ y'a nịnị m!

³⁸ Lee ẹ, ụlọ ị sikọ nwan d'a gban'ị okpokoro!

³⁹ M rị a gwa ị nị y'a hụnkọzị m d'e ru ogẹn i sikọ d'a sị, ‘Ngọzi ya rịnị onyẹ hụ gi ẹfan Di-nwọnni-ẹnyi lala.’ ”