Matiu 22 - Ika

Isi Nke Ẹbụọ-kwasị-ọgụn Jesu E Gi Oriri-agbamẹkụkwọ Kuzi

¹ Jizọsị nọ tazịnị wẹ ilu, sị,

² “Alị-eze elu-igwee nọ kẹ ebe eze ohu nọ kpọnị nwa a oriri-agbamẹkụkwọ.

³ O zi idibo ẹ d'a kpọ ndị wẹ kpọ oriri-agbamẹkụkwọ hụ, kanị achọnị wẹ nị wẹ bịa.

⁴ O zizi idibo ọzọ, sị, ‘Gwa nị ndị hụ wẹ kpọ oriri, sị, “Lee n'ẹ, a kwademẹgụọ m oriri m; e gbuọlẹ m okẹn-efin m lẹ ụmụ-efin m zụntọ. A kwademẹgụọ m ihiẹn ile; bịa nị oriri-agbamẹkụkwọ hụ.” ’

⁵ “Kanị egọndẹni wẹ ntịn, onyẹ-onyẹ nọ jẹnmẹ ebe o jẹnkọ: onyẹ ohu e jẹnmẹ ugbo ẹ, onyẹ ọzọ e shi afịa a,

⁶ ndị họdụnị nọ nwụnrụn ndị idibo ẹ, gbe ifẹnrẹn ye wẹ ihun, gbu wẹ.

⁷ Eze hụ nọ gi olulu zijẹn ndị-agha a, wẹ nọ gbupụ ndị izighẹ hụ, dụn obodo wẹ ọkụn.

⁸ “Eze nọ sị idibo ẹ, ‘Ẹnyi e mẹmẹgụọ oriri-agbamẹkụkwọ, kanị ndị wẹ kpọ oriri efuruni ndị w'a kpọ.

⁹ Jẹnsọnmẹ ni nwan ọgbara-ogbe d'a kpọ ndị ile ụnụ sikọ d'a hụn; sị nị wẹ bịa oriri-agbamẹkụkwọ.’

¹⁰ Idibo ẹ nọ jẹnsọnmẹ ọgbara-ogbe, wẹhẹ ndị ile wẹ hụn, kẹ ezigbo ịhịan kẹ eje-ịhịan, ọbịa e jun ebahụn wẹ nọ e ri oriri-agbamẹkụkwọ.

¹¹ “Kanị, ogẹn eze hụ gi bịa d'a hụn ndị ọbịa a, ọ nọ hụn onyẹ ohu yilẹni ẹwuru wẹ gi e jẹn agbamẹkụkwọ.

¹² Ọ sị a, ‘Di-ẹnyi; nanị ị dọn banhan ebeni bụ y'e yi ẹwuru agbamẹkụkwọ?’ Ọ hụnnị ọnụ shịarị a.

¹³ Eze nọ sị idibo ẹ, ‘Kẹnmẹ n'ẹ ụkụ lẹ ẹka, tụ a ye ishi ahụn rị ezi, ebe ịhịan jẹnkọ d'a nọ a kwan ẹkwan, a ta nkwẹnrẹn-eze.’

¹⁴ Makẹni ndị wẹ kpọ bu ọda, kanị ndị wẹ họrị ebuni ọda.”

Ajụ Wẹ Jizọsị Oku Ụgwọ-isi

¹⁵ Ndị Itu-Farisi nọ jẹn umẹ nị wẹ gi oku-ọnụ Jizọsị nwụndọn ẹ.

¹⁶ Wẹ nọ zijẹn ndị nsọnmazụụn wẹ lẹ ndị itu Hẹrọdụ d'a jụ a ụtaanị: “Onyẹ-nkuzi, ẹnyi a marịnghọ n'ị wụ onyẹ ezioku, nị ị rị a kuzi ụzọ Osolobuẹ k'o furu, nị egun ịhịan ara tụ ị, y'a ra lee ịhịan ẹnya ihun.

¹⁷ Gwa nwan ẹnyi: O furughọ nị ẹnyi kụ eze-kanị wụ Siza ụgwọ-isi ra o furuni?”

¹⁸ Kanị Jizọsị a marịngụọ nị wẹ rị a chọ ihiẹn rị a ọnụ. Ọ nọ sị, “Kị ụnụ rị a chọnị ihiẹn rị m ọnụ; ndị ihunnaị?!

¹⁹ Ghọsịdẹle ni m egho wẹ gi a kụ ụgwọ-isi hụ.” Wẹ nọ wẹhẹn'ẹ akpụrụ egho dinarịọsụ ohu.

²⁰ Jizọsị nọ sị wẹ, “Isi onyẹ lẹ ẹfan onyẹ wụ ndịnị?”

²¹ Wẹ nọ sị, “Nke Siza rọ.” Ya ọ nọ sị wẹ, “We ni nwan ihiẹn Siza ye Siza, ụnụ e we ihiẹn Osolobuẹ ye Osolobuẹ.”

²² A nụ w'a, ọ tụ wẹ ẹnya, wẹ nọ la a tọ, pụ.

A Jụ Wẹ Jizọsị Oku Ịgha Ọnwụn Lihi

²³ Ụhụọhịn ohu hụ, o nwọn ndị Itu-Sadusi bịa d'e kunrun Jesu. Ndị itu-Sadusi sị nị ndị nwụnnị ara lihi. Wẹ nọ jụ a ụtaa,

²⁴ sị, “Onyẹ-nkuzi, Mozizi sị, ‘Okẹnnyẹ nwụnhụn bụ ọ mụnị nwa, nwẹnẹ ẹ ya lụma nwunyẹ ẹ, kẹni ọ mụdọnni nwẹnẹ ẹ nwụnhụnnị ụmụ.’

²⁵ Ẹnyi te nwọn ikẹnnyẹ ẹsa wụ umunẹ imẹ ẹnyi; nke ibuzọ a lụgụ nwunyẹ, ọ mụnị nwa n'o d'a nwụnhụn, nwẹnẹ ẹ sọnn'ẹ nọ lụma nwunyẹ ọ nwụnnahịn.

²⁶ Ẹrịra kẹ hụn ẹbụọ ahụn mẹ, lẹ nke ẹtọ, d'e ru hụn mẹ wẹ ẹsa; wẹ ile a nwụnhụnchanrịn.

²⁷ Omẹgụ, okpoho hụ nkẹ nọ nwụnhụn.

²⁸ Ogẹn ndị nwụnhụnnị e gi nwan lihi, nwunyẹ onyẹ k'o jẹnkọ d'a wụ imẹ mmadụ ẹsa hụ, ebe o mẹ ni wẹ ile lụgbarị a?”

²⁹ Kanị Jizọsị nọ za wẹ, sị, “Ụnụ e fiegụọ ụzọ makẹni ụnụ amarịn Ẹkụkwọ-nsọ, ụnụ amarịn kẹ ikẹn Osolobuẹ han.

³⁰ Ogẹn ndị nwụnhụnnị sikọ d'e gi gha ọnwụn lihi, alụkọ wẹ di lẹ nwunyẹ; wẹ jẹnkọ d'a nọ kẹ ndị mmọn-ozi ghalẹni a lụ di lẹ nwunyẹ.

³¹ O mẹ nke iweli ndị nwụnhụnnị, ụnụ e ke gụntu ihiẹn Chuku gwa ụnụ imẹ Ẹkụkwọ-nsọ?

³² Ọ sị, ‘Mmẹ wụ Chuku Ebraham, Chuku Aziki, Chuku Jekọpụ.’ Osolobuẹ ẹlẹ Chuku ndị nwụnnị, kanị Chuku ndị rị ndụn k'ọ wụ.”

³³ Igunrun hụ a nụ a, nkuzi ẹ a tụ wẹ ẹnya.

Iwu Kachanrịnnị

³⁴ Ogẹn ndị Itu-Farisi gi nụ nị Jesu e kpukingụọ ndị Itu-Sadusi ọnụ, wẹ nọ zu, buru ẹ,

³⁵ onyẹ ohu imẹ wẹ wụ ọka iwu nọ gi ụtaa shin'ẹ ọnyan, sị

³⁶ “Onyẹ-nkuzi, elee iwu kachanrịn imẹ Iwu Mozizi?”

³⁷ Ọ nọ sị a, “ ‘Gi obi i ile, enwẹn i ile lẹ uche i ile nwọn ihiẹn-ọsụsụọ Di-nwọnni-ẹnyi wụ Osolobuẹ i.’

³⁸ Ọnwan wụ iwu kachanrịnnị lẹ nke ibuzọ.

³⁹ Nke ẹbụọ nọzị kẹ nke ibuzọnị: ọ sị, ‘Ihiẹn ibe i sikọ d'a sụọrịrị ị kẹ ihiẹn enwẹn i dọn a sụọ ị.’

⁴⁰ Iwu ẹbụọnị gi Iwu Mozizi ile lẹ ihiẹn ile ndị-amụma ku.”

Nwa Onyẹ Kẹ Ụnụ Sị Nị Ya Kẹ Kraịstị Wụ?

⁴¹ Ogẹn ndị Itu-Farisi gi rị ụzọ ohu, Jizọsị nọ jụ wẹ ụtaa,

⁴² sị, “Ẹlẹ ẹnya kẹ ụnụ gi e lee Onyẹ nzụọpụha ahụn Osolobuẹ tumẹ? Nwa onyẹ k'ọ wụ?” Wẹ nọ sị a, “Nwa Defidi.”

⁴³ Ọ nọ sị wẹ, “Nanị Mmọn-nsọ dọn nwan mẹ Defidi kpọ a ‘Di-nwọnni m’ ebẹhụ Ẹkụkwọ-nsọ nọ sị,

⁴⁴ ‘Di-nwọnni-ẹnyi sị Di-nwọnni m; nọdị alị ẹka-nni m, d'e ru mgbe m bugụ ndị iṅẹnrẹn i che okpuru ụkụ ị?’

⁴⁵ “O mẹ nwan nị Defidi kpọ a ‘Di-nwọnni m’, nanị o dọnzi wụrụ nwa Defidi?”

⁴⁶ Onwọnni onyẹ saẹka za ihiẹn ọwụlẹ. Onwọnzini onyẹ egun nị jụzị a ụtaa gha ụhụọhịn hụ jẹnmẹ.