Matiu 21 - Ika

Isi Nke Ohu-kwasị-ọgụn Jizọsị A Banhan Jerusalẹm Nọkẹ Eze

¹ Ogẹn wẹ gi nọkunmẹmẹ Jerusalẹm, pụha Ugu Olivu rị Bẹtifeji, Jizọsị nọ zi ndị nsọnmazụụn a ẹbụọ,

² sị wẹ, “Banye ni nwa-alịnị rị ụnụ ihun, ụnụ jẹnkọ d'a hụn Jaki wẹ limẹ ebẹhụ lẹ nwa a nọdịyenin'ẹ. Tọpụ nị wẹ wẹhẹni m.

³ Onyẹ sị ụnụ ihiẹn ọwụlẹ, sị n'a hụ, ‘Onyẹ-nwọnni-ẹnyi chọ wẹ’, o sikọ d'a sị ụnụ weri wẹ ozigbo.”

⁴ Ọnwan kẹ wẹ gi mẹzu ihiẹn Osolobuẹ gi onyẹ-amụma ku: Ọ sị,

⁵ “Sị nị ndị obodo Zayọnụ, lee ẹ, eze ụnụ lala d'e kunrun ụnụ, o welụa enwẹn ẹ alị: ọ nyinla Jaki lẹ nwa-jaki.”

⁶ Ndị nsọnmazụụn a ẹbụọ hụ nọ jẹn d'e mẹ kẹ Jizọsị dọn zi wẹ.

⁷ E wẹhẹ wẹ Jaki hụ lẹ nwa-jaki hụ, gi ẹwuru w'e yiye elu ẹ gbama elu wẹ, Jizọsị nọ nọdị elu wẹ.

⁸ Imẹrinmẹ ndị rị imẹ igunrun hụ nọ gi ẹwuru wẹ gbama ụzọ, ndị ọzọ a kpagiri agalaba osisi ndị rị ebẹhụ gbama ụzọ.

⁹ Igunrun hụ rị a ihun lẹ ndị sọnkọn'a hụ e yi oro, a sị, “Ọjịja-mma ya rịnị Nwa Defidi! Ngọzi ya rịnị Onyẹ hụ gi ẹfan Di-nwọnni-ẹnyi lala! Ọjịja-mma ya rị nị Osolobuẹ imẹ ebẹhụ kachanrịn elu-igwee.”

¹⁰ Ogẹn o gi nwan banye Jerusalẹm, ọ rịkẹ sị wẹ kpasu obodo hụ ile: Wẹ hụ a jụ, “Onyẹ wụ onyẹni?”

¹¹ Igunrun ahụn nọ sị, “Onyẹni wụ Jizọsị, onyẹ-amụma ahụn gha Nazarẹtị rị Galili bịa.”

Jizọsị A Chụpụ Ndị Rị A Zụ Afịa Imẹ Ụlọ-nsọ

¹² Ya Jizọsị nọ banye Ụlọ-nsọ, chụpụ ndị ile rị a zụ afịa imẹ Ụlọ-nsọ — kẹ ndị rị e reni kẹ ndị rị e ṅọnni; o hukpumẹ teburu ndị a gbahutọ egho lẹ oche ndị e re oluikuku.

¹³ Ọ sị wẹ, “Wẹ de ẹ imẹ Ẹkụkwọ-nsọ, sị, ‘Wẹ k'a kpọ Ụlọ m ụlọ ekpere’, kanị ụnụ e gigụọ a họnrin ebe ndị ohin a warị!”

¹⁴ Ndị ẹnya-ishi lẹ ndị ngụrọ a bịa d'e kunrun ẹ imẹ Ụlọ-nsọ, ọ nọ zụọ wẹ.

¹⁵ Kanị ogẹn ndị-isi nchụn-ẹjan lẹ ndị-nkuzi Iwu gi hụn ihiẹn ndị a tụ ẹnya ọ rị e mẹ, hụnzị kẹ ụmụ-ndu rị imẹ Ụlọ-nsọ rị e yi oro, a sị, “Ọjịja-mma ya rịnị nwa Defidi,” iwe nọ wemẹ wẹ.

¹⁶ Wẹ nọ sị a, “Ị hụ a nụ ihiẹn ụmụ-nduni rị e ku?” Jizọsị nọ sị wẹ, “Ẹghẹẹ, m hụ a nụ. Ụnụ e ke gụntu ebẹhụ Ẹkụkwọ-nsọ nọ sị, ‘Y'e gigụọ ọnụ ụmụẹka lẹ ndị rị a ra ẹran kwademẹ ịja-mma zu oke’?”

¹⁷ Ọ nọ la wẹ tọ, gha imẹ obodo hụ pụ, shi Bẹtani d'a nọdị uhinhin hụ.

Jizọsị A Bụ Osisi Figi Ọnụ

¹⁸ Eki e fọn ụzụtụntụn, ebe o kinkọ Jerusalẹm, ẹgụn hụ a gụn a.

¹⁹ Ọ nọ hụn osisi figi mkpẹnrẹn ụzọ; o ru ukun ẹ, onwọnni ihiẹn ọ hụn elu ẹ mmanị ẹhụhụọ sụọ. Ọ nọ sị osisi hụ, “Amịzịlẹ mkpụrụ jẹnrin ejẹn.” Ya kẹ Osisi hụ nọ kpọpụ nkụn ozigbo.

²⁰ Ndị nsọnmazụụn a a hụn ihiẹnni, ọ tụ wẹ ẹnya, wẹ nọ sị, “Nanị osisi hụ dọn kpọpụ nkụn ozigbo?”

²¹ Jizọsị nọ sị wẹ, “M rị a gwa ụnụ ezioku, omẹni ụnụ nwọn okukwe, nị ụnụ enwọnni obi-ẹbụọ, ụnụ k'a saẹka mẹ ihiẹn wẹ mẹ osisi figi hụ. Ẹlẹdẹ ọhụn sụọ, ọsụọn'a nị ụnụ sị uguni, ‘Jẹn d'a tụ enwẹn i ye imẹ ohimin,’ o jẹnkọ d'e mẹ.

²² Ihiẹn ọwụlẹ ụnụ mẹ ekpere rịọ, kweri ni ụnụ k'e nwọnhẹn ẹ, ụnụ k'e nwọnhẹn ẹ.”

A Jụ Wẹ Jizọsị Kẹ Onyẹ Zi Ẹ

²³ Ogẹn o gi nwan banye Ụlọ-nsọ, ndị-isi nchụn-ẹjan lẹ ndị-isi nọ bịa d'e kunrun ẹ ebe ọ rị a kuzi, sị a, “Onyẹ sị ị mẹ ihiẹn ndịnị ị rị e mẹ? Onyẹ zi i?”

²⁴ Jizọsị nọ sị wẹ, “Mmẹ lẹ enwẹn m jẹnkọ d'a jụ ụnụ akpụ ụtaa ohu: ụnụ za m'a, a gwa m ụnụ onyẹ sị m mẹ ihiẹn ndịnị.”

²⁵ “Onyẹ sị Jọnụ mẹ Mirin-Chuku o mẹ? Chuku rị elu-igwee zi ẹ, ra ịhịan?” Wẹ nọ jẹn umẹ, sị, “Ẹnyi sị, ‘Chuku rị elu-igwee zi ẹ,’ o sikọ d'a sị, ‘Kị haịn ụnụ gilẹni nwan gi oku ẹ dọn?’

²⁶ Kanị egun igunrunni anịkọ ẹnyi sị, ‘Ịhịan zi ẹ,’ makẹni ịhịan ile weri ẹ nị Jọnụ wụ onyẹ-amụma.”

²⁷ Ya wẹ nọ sị Jizọsị, “Ẹnyi amarịn.” Ọ nọ sị wẹ, “Mmẹ nwẹn agwakọ ụnụ onyẹ sị m mẹ ihiẹn ndịnị.

Onyẹ Hụn Mẹ Ihiẹn Chuku Ku Kẹ Chuku Marịn

²⁸ “Kị ụnụ ro? Okẹnnyẹ ohu mụ ikẹnnyẹ ẹbụọ. O jẹn d'e kunrun nke ibuzọ, sị a, ‘Nwa m, jẹn d'a rụn ọrụn imẹ ugbo vaịnị tannị.’

²⁹ Ọ nọ sị, ‘Ejẹnkọ m.’ Kanị, omẹgụ, o rohutọ, jẹnmẹ.

³⁰ Okẹnnyẹ hụ nọ jẹn d'e kunrun hụn-ẹbọ, gwazị a ẹrịra. Ọ nọ sị, ‘Baba, m sikọ d'e jẹn.’ Kanị o jẹnni.

³¹ Onyẹ imẹ wẹ mẹ ihiẹn nẹdi ẹ chọ? Wẹ nọ sị, ‘Nke ibuzọ.’ “Jizọsị nọ sị wẹ: M rị a gwa ụnụ ezioku, ndị a na Ụgwọ-isi wẹ gi njọ wẹ marịn lẹ ndị ịgbaraja hụ e buni ụnụ ụzọ a banye Alị-eze Osolobuẹ.

³² Makẹni, Jọnụ hụn e mẹ mirin-Chuku bịa d'a ghọsị ụnụ ezigbo ụzọ ahụn Osolobuẹ chọ, kanị, ụnụ egini oku ẹ dọn. Kanị ndị a na ụgwọ-isi wẹ gi njọ wẹ marịn lẹ ndị ịgbaraja gi ẹ dọn; ogẹn ụnụ gidẹ hụn ihiẹn rị e mẹni ụnụ egin'ẹ rogharị, kweri ihiẹn o ku.

Ilu Jesu Gi Ndị Wẹ Ye Ugbo Rụn Ta

³³ “Nụ nị ilu ọzọ: O nwọn onyẹ ohu nwọn alị, ọ nọ kụn a vaịnị, tụnhunmẹ ẹ mgbọn, guye ebe wẹ nọ a pịnpụha manya-vaịnị imẹ ugbo hụ, tụnzịkwọ ụlọ-nche ye ẹ, bu ẹ che ẹka ndị sikọ d'a gha a rụn a e-gbu-e-ke. Ọ nọ shi alị ọzọ.

³⁴ Ogẹn vaịnị e rumẹ, ọ nọ zi idibo ẹ jẹnni ndị hụ ugbo hụ rị ẹka d'a nahan wẹ ihiẹn vaịnị a mị.

³⁵ Ndị hụ ugbo hụ rị ẹka nọ kwọndọn idibo ẹ, gbu onyẹ ohu ili, gbu onyẹ ohu ozun, ma onyẹ ohu ọmụma.

³⁶ O zijẹnzi idibo ẹ ọzọ bu ọda karị ndị ibuzọ. E mẹzi wẹ wẹ ihiẹn wẹ mẹ ndị ibuzọ.

³⁷ Omẹgụ, ọ nọ zijẹn nwa a, sị, ‘Wẹ sikọ d'a gbaye nwa m.’

³⁸ Kanị, ogẹn ndị hụ ugbo hụ rị ẹka gi hụn nwa a, wẹ nọ sị ibe wẹ, ‘Onyẹni wụ hụn jẹnkọ d'e nwọnrin ebeni omẹgụ; nị ẹnyi gbupụn'a nwan weri ihiẹn ẹ!’

³⁹ Ya wẹ nọ kwọndọn ẹ, gha ugbo-vaịnị hụ dọkpụnpụ a, gbu ẹ.

⁴⁰ “Onyẹ nwọn ugbo-vaịnị hụ bịa nwan, k'o k'e mẹ ndị hụ ugbo hụ rị ẹka?

⁴¹ Wẹ nọ za, sị, ‘O jẹnkọ d'e gbu ndị-ẹti hụ, gbu wẹ la iwi, we ugbo-vaịnị hụ ye ndị ọzọ hụn jẹnkọ d'a rụnn'a, e ye ẹ ihiẹn-ugbo ẹ ogẹn ihiẹn-ugbo.’

⁴² “Jizọsị nọ sị wẹ: Ụnụ e ke gụntu ihiẹn Ẹkụkwọ-nsọ ku? Ẹkụkwọ-nsọ sị, ‘Ọmụma hụ ndị a tụn ụlọ jụ, a wụrụọlẹ hụn gi ụlọ; Ẹka Di-nwọnni-ẹnyi mẹ ihiẹnni, ọ tụka ẹnyi ẹnya!’

⁴³ “M rị nwan a gwa ụnụ nị wẹ jẹnkọ d'a narịn ụnụ Alị-eze Osolobuẹ, we ẹ ye ndị alị ọzọ jẹnkọ d'a mị mkpụrụ a.

⁴⁴ Onyẹ danye elu ọmụmanị jẹnkọ d'e tigungwọn, kanị ọ dankwasị ịhịan, o gwerinrin ẹ!”

⁴⁵ Ogẹn ndị-isi nchụn-ẹjan lẹ ndị Itu-Farisi gi nụ ilu ndịnị, wẹ nọ marịn nị uwẹ k'ọ rị e ku.

⁴⁶ Wẹ te chọ nị wẹ nwụnrụn a, kanị egun igunrun rị ebahụn anịnị wẹ, makẹni wẹ weri ẹ nị onyẹ-amụma k'ọ wụ.