Matiu 20 - Ika

Isi Nke Ọgụn Ihiẹn Jesu Gi Ndị Wẹ We Ọrụn Kuzi

¹ “Makẹni Alị-eze elu-igwee nọ kẹ ebe onyẹ ohu nọ pụ ụzụtụntụn d'e we ndị k'a rụnn'a ọrụn imẹ ugbo-vaịnị.

² Ya lẹ wẹ e kugụ nị egho ọrụn akpọhịn k'o k'a kụ, ọ nọ zi wẹ d'a rụnma ọrụn imẹ ugbo-vaịnị hụ.

³ “Ihiẹn nọkẹ ọkụrọkụ itenẹi nke ụtụntụn, ọ pụzị, ọ nọ hụn ndị-ọrụn wuzo mmaka imẹ afịa.

⁴ Ọ nọ sị wẹ, ‘Ụnụ nwẹn, d'a rụnnị ni m ọrụn imẹ ugbo-vaịnị, nị m kụghọ ụnụ ụgwọ ọhụnma.’

⁵ Wẹ nọ jẹnmẹ. “Ọ pụzị ọkụrọkụ mmẹbụọ anwụn rị isi lẹ ọkụrọkụ ẹtọ efinnaị, mẹzikwọ ẹrịra.

⁶ “Ibẹka ọkụrọkụ isẹn ogẹn ẹnyasị, ọ nọ pụzị: ọ nọ hụn ndị turusọnmẹ mmaka; ọ nọ sị wẹ, ‘Kị ụnụ turuni ebeni mmaka kete ụtụntụn?’

⁷ “Wẹ nọ sị a, ‘O ke nwọn onyẹ we ẹnyi ọrụn.’ Ọ nọ sị wẹ, ‘Ụnụ nwẹn jẹnmẹzikwọ nị d'a rụnnị m ọrụn imẹ ugbo-vaịnị m.’

⁸ “O ru ogẹn ẹnyasị, onyẹ hụ nwọn ugbo-vaịnị nọ sị onyẹ hụn e lepụn'a ugbo-vaịnị hụ ẹnya, ‘Kpọ ndị ọrụn hụ n'ị kụ wẹ ụgwọ wẹ, gha ndị ikpanzụụn kụma.’

⁹ Ogẹn ndị ikpanzụụn hụ gha ọkụrọkụ isẹn anwụn rọmagụ rụnma gi bịa, ọ nọ kụ onyẹ-onyẹ egho-ọrụn akpọhịn.

¹⁰ “Ogẹn ndị ibuzọ gi bịa, wẹ ro ni o jẹnkọ d'a kụkarị wẹ egho-ọrụn akpọhịn; kanị ọ kụzị onyẹ-onyẹ egho-ọrụn akpọhịn.

¹¹ Ogẹn wẹ gi kụgụ ndị ibuzọ hụ ụgwọ, wẹ nọ dẹnwịnnwịnmanị onyẹ nwọn ọrụn,

¹² a sị, ‘Ndị ikpanzụụnnị rụn mgbahunmẹ ọkụrọkụ ohu sụọ, kanị ẹnyi nwẹn bu ọrụnnị isi kete ụtụntụn, ma anwụn, ị nọ nwan kụ ẹnyi lẹ wẹ ahanmahan.’

¹³ “Kanị onyẹ nwọn ọrụn nọ shịarị onyẹ ohu imẹ wẹ, sị a, ‘Di-ẹnyi, arị m e mẹgbu i; ẹlẹ egho-ọrụn akpọhịn kẹ mmẹ lẹ yụ ku?

¹⁴ Weri nwan nke i lama; mmẹ chọ nị m ye onyẹ ikpanzụụnnị ihiẹn m ye i.

¹⁵ Iwu gizi m nị m gi ihiẹn m mẹ ihiẹn m chọ? Ra iwe rị e we i nị m rị a ha ẹka?’

¹⁶ “Ẹrịra kẹ ndị kpan azụụn k'a dọn bu ụzọ, ndị bu ụzọ a kpanrịn azụụn.”

Hụn M'ẹ Mgbe Ẹtọ Jesu Ku Oku Ọnwụn A

¹⁷ Ya Jizọsị nọ jẹnmẹ Jerusalẹm. Ebe wẹ jẹnkọ, ọ nọ we ndị nsọnmazụụn a mmẹbụọ shi ụsụọ, sị wẹ,

¹⁸ “Lee n'ẹ, ẹnyi jẹnkọ nwan Jerusalẹm; ẹnyi ru ebahụn, wẹ sikọ d'e re Nwa nke Ịhịan ye ndị-isi nchụn-ẹjan lẹ ndị-nkuzi Iwu, a ma w'a ikpe-ọnwụn,

¹⁹ bu ẹ che ẹka itumunyẹ nị wẹ gi ẹ gu egu, fịan a mkpịnsịn, kpọma a elu obe o we nwụn; kanị hụn m'ẹ akpọhịn ẹtọ, Osolobuẹ jẹnkọ d'e weli ẹ.”

Ihiẹn Nnẹ Ohu Rịọnị Ụmụ A

²⁰ Ogẹn ahụn, nnẹ Jemisi lẹ Jọnụ, ụmụ Zẹbẹdi, wẹhẹ wẹ d'e kunrun Jesu. O gbuni Jesu osekpu, rịọ a n'o mẹn'ẹ ọhụnma.

²¹ Jesu nọ sị a, “K'ị chọ?” Ọ nọ sị a, “Ku ẹ ni ụmụ m ẹbụbụọnị jẹnkọ d'a nọdị, onyẹ ohu ẹka-nni i, onyẹ ohu ẹka-ekpẹn i imẹ alị-eze i.”

²² Kanị Jizọsị nọ sị, “Ụnụ amarịn ihiẹn ụnụ rị a rịọ. Nị ụnụ s'ẹka ra ihiẹn rị imẹ mkpu m jẹnkọ d'a ra?” Wẹ nọ sị, “Nị ẹnyi saghọ ẹka.”

²³ Ọ nọ sị wẹ, “Ezioku-ezioku, ụnụ jẹnkọ d'a ra ihiẹn rị imẹ mkpu m, kanị ẹlẹ mmẹ nwọn ku onyẹ k'a nọdị m ẹka-nni lẹ ẹka-ekpẹn; kama, ndị hụn Nẹdi m kwademẹn'ẹ wụ ndị k'a nọdị n'a.”

²⁴ Ndị nsọnmazụụn iri họdụnị a nụ ihiẹnni, wẹ nọ bumẹni umunẹ ẹbụọ hụ olulu.

²⁵ Ya Jizọsị nọ kpọzụnhan wẹ, sị wẹ, “Ụnụ a marịnghọ nị imẹ ndị alị ọzọ, ndị isi wẹ a kị wẹ nkịgbu, ndị uku a ghọsị wẹ nị uwẹ ka wẹ.

²⁶ Kanị, nke ụnụ arịkọ ẹrịra. Kama, onyẹ chọ n'ọ wụrụ okẹn ịhịan imẹ ụnụ, ya wụrụ odibo ụnụ;

²⁷ onyẹ chọ n'ọ wụrụ ibuzọ imẹ ụnụ, ya wụrụ igbọn ụnụ —

²⁸ nọkẹ kẹ mmẹ Nwa nke Ịhịan dọn bịa, ẹlẹ ni wẹ gbanị m odibo, kama, kẹni m gba odibo, yezikwọ ndụn m, gi ẹ gbapụha ndị bu ọda.”

Jizọsị A Zụọ Ndị Ẹnya-ishi Ẹbụọ

²⁹ Ogẹn Jesu lẹ ndị nsọnmazụụn a gi gha Jẹriko pụkọ, igunrun hi-ogbe nọ sọnmẹ ẹ.

³⁰ Hụn ikẹnnyẹ ẹbụọ ẹnya kpu ishi nọdị alị mkpẹnrẹn ụzọ hụ gi nụ nị Jizọsị ghafekọ, wẹ nọ yimẹ oro, sị, “Di-nwọnni-ẹnyi! Nwa Defidi!! Mẹ omikẹn ẹnyi!!”

³¹ Igunrun hụ nọ jụgbọ wẹ, sị wẹ gba nkịtịn; kanị wẹ nọ yikẹnmẹdẹ, “Di-nwọnni-ẹnyi! Nwa Defidi!! Mẹ omikẹn ẹnyi!!”

³² Jizọsị a kụsị, kpọ wẹ, sị, “Kị ụnụ chọ nị m mẹni ụnụ?”

³³ Wẹ nọ sị a, “Di-nwọnni-ẹnyi, ẹnyi chọ nị ẹnyi leghama ụzọ.”

³⁴ Jizọsị nọ mẹ omikẹn mẹtụ wẹ ẹka ẹnya. Wẹ nọ leghama ụzọ ozigbo, sọnmẹ ẹ.