Matiu 2 - Ika

Isi Nke Ẹbụọ Ndị Ibuzọ Bịa D'a Kụnị Jizọsị Isi alị Kẹ Wẹ Mụ A

¹ Wẹ mụ Jesu imẹ Bẹtilẹhẹm hụn rị Judia ogẹn Hẹrọdụ gi wụ eze. Ogẹn hụ, ndị marịn ẹnya kokisẹ nọ gha alị rị azụụn ọwụwa-ẹnyanwụn bịa Jerusalẹm,

² a jụ, “Elebe kẹ onyẹ hụ wẹ mụ nke ọhụn hụn wụ eze ndị Ju rị? Makẹni, ẹnyi a hụnọlẹ okokisẹ hụn ku oku ẹ k'ọ pụha azụụn ọwụwa-ẹnyanwụn ebe ẹnyi gha bịa; ẹnyi bịa d'a kụn'a isi alị.”

³ Ogẹn eze wụ Hẹrọdụ gi nụ ihiẹnni, obi eruzin'ẹ alị, kẹ ya kẹ ndị Jerusalẹm ile.

⁴ Ọ nọ kpọgbama ndị-isi nchụn-ẹjan lẹ ndị-nkuzi Iwu, jụ wẹ, “Elebe kẹ Ẹkụkwọ-nsọ ku nị ya kẹ wẹ k'a nọ mụ Onyẹ Nzụọpụha hụ Osolobuẹ tumẹ?”

⁵ Wẹ nọ sị a, “Bẹtilẹhẹm hụn rị Judia rọ, makẹni onyẹ-amụma de, sị,

⁶ ‘Bẹtilẹhẹm hụn rị imẹ Juda, ẹlẹ yụ kachanrịn ntịn imẹ obodo ndị rị a kị Juda; makẹni onyẹ-ọkịkị jẹnkọ d'a gha imẹ i pụha, hụn k'a kị ndị nke m wụ Izrẹlụ.’ ”

⁷ Ya kẹ Hẹrọdụ nọ kpọ ndị hụ marịn ihiẹn kokisẹ rị e ku, gi nzuzue jụ wẹ ogẹn wẹ gi hụn kokisẹ hụ daị.

⁸ Ya ọ nọ zi wẹ jẹn Bẹtilẹhẹm, sị wẹ, “Jẹnmẹ ni nwan; chọkpọ nị nwata hụ. Hụn ụnụ gihụ hụn a, ụnụ a gwa m, kẹni mmẹ nwẹn jẹnzi d'a kụn'a isi-alị.”

⁹ A nụgụ wẹ ihiẹn eze ku, ya wẹ nọ jẹnmẹ ebe wẹ jẹnkọ. Kokisẹ hụ wẹ hụn alị wẹ tegbu enwẹn ẹ ẹbamịn ọwụwa-ẹnyanwụn nọ pụhazị idẹnmuzi, buruni wẹ ụzọ d'e rukwọrị ebe nwata hụ rị imẹ Bẹtilẹhẹm, ya ọ nọ wuzo.

¹⁰ Ogẹn wẹ gi hụn kokisẹ hụ, wẹ nọ ghọghọ ọda-ọda!

¹¹ A banye wẹ imẹ ụlọ ahụn, hụn nwata hụ lẹ nnẹ ẹ wụ Meri, wẹ nọ kụnị nwata hụ isi-alị. Ya wẹ nọ kpọpụ ẹkpẹti wẹ buche ihiẹn rị mma, ye ẹ goru lẹ frankisẹnsị lẹ maa.

¹² Makẹni Osolobuẹ a dọgụọlẹ wẹ ẹka-ntịn imẹ nrọ sị wẹ ekinlẹ azụụn d'e kunrun Hẹrọdụ, wẹ nọ gha ụzọ ọzọ lashi alị wẹ.

Josẹfụ E Gi Abalị We Jesu Lẹ Mẹri Gbashi Ijiptu

¹³ Ogẹn ndị hụ marịn ẹnya kokisẹ gi lamagụ, mmọn-ozi Di-nwọnni-ẹnyi nọ bịa d'e kunrun Josẹfụ imẹ nrọ, sị a, “Lihi ọtọ! Weri nwata hụ lẹ nnẹ ẹ gbashi Ijiptu; nọdị nị ebahụn d'e ru nị a sị m'ị kinhẹn, makẹni Hẹrọdụ chọ n'ọ chọ nwata hụ kẹni o gbu ẹ.”

¹⁴ Ya Josẹfụ nọ lihi, gi abalị weri nwata hụ lẹ nnẹ ẹ shi Ijiptu.

¹⁵ Wẹ nọ nọdị ebẹhụ d'e ru ni Hẹrọdụ a nwụnhụn. Ọnwan kẹ ihiẹn ahụn Di-nwọnni-ẹnyi gi onyẹ-amụma ku gi mẹzu, nị “A gha m alị Ijiptu kpọpụha nwa m.”

Hẹrọdụ A Sị Wẹ Gbu Ụmụẹka ikẹnnyẹ Bẹtilẹhẹm

¹⁶ Ogẹn Hẹrọdụ gi hụn nị ndị hụ marịn ẹnya kokisẹ e mẹọlẹ ẹ ẹro, eje-olulu nọ bu ẹ. Ọ nọ zi ndị o zi, wẹ nọ jẹn d'e gbupụ ụmụẹka ikẹnnyẹ ile rị Bẹtilẹhẹm lẹ ẹgbẹrẹ hụ ile, ikẹnnyẹ ndị hụn rị gha ahụa ẹbụọ lụa alị. Ogẹn hụn ndị hụ marịn ẹnya kokisẹ gwa a k'o kwọndọn ẹka mẹ ihiẹnni o mẹ.

¹⁷ Ya kẹ ihiẹn Osolobuẹ gi onyẹ-amụma wụ Jerimaya ku gi mẹzu, nị

¹⁸ “Olu ẹkwan rị a pụ imẹ Rama: a kwan, e goo ntan, e goo imọn. Rechẹlụ rị a kwan ụmụ a; ọ nịnị wẹ hụhụ a, makẹni a nwụnchanrịngụọ wẹ.”

Josẹfụ A Gha Ijiptu Welụa Jizọsị Lẹ Mẹri

¹⁹ Ogẹn Hẹrọdụ gi nwụnhụngụ, mmọn-ozi Di-nwọnni-ẹnyi nọ bịa d'e kunrun Josẹfụ imẹ nrọ imẹ alị Ijiptu,

²⁰ sị a, “Lihi n'i weri nwata hụ lẹ nnẹ ẹ shi alị Izrẹlụ, makẹni ndị rị a chọ nị wẹ gbu nwata hụ a nwụnhụngụọ.”

²¹ O tẹnhin, weri nwata hụ lẹ nnẹ ẹ shi alị Izrẹlụ.

²² Kanị, ogẹn o gi nụ nị Akịlawusu rikin nẹdi ẹ wụ Hẹrọdụ eze, a kị Judia, egun anịn'a jẹn ebẹhụ. A dọgụzị w'a ẹka-ntịn imẹ nrọ, ọ nọ shi ẹgbẹrẹ Galili.

²³ Ọ nọ jẹn d'e biri imẹ obodo w'a kpọ Nazarẹtị. Ẹrịra kẹ ihiẹn ahụn ndị-amụma ku nị “Wẹ jẹnkọ d'a kpọ a onyẹ Nazarẹtị” dọn mẹzu.