Matiu 19 - Ika

Isi Nke Mmitenẹi Mkpechan

¹ Ogẹn Jizọsị gi kuchanrịngụ ihiẹn ndịnị, ọ nọ gha Galili pụ, shi ẹgbẹrẹ Judia hụn rị nfetu Iyi Jọdanị.

² Igunrun hi-ogbe nọ sọnmẹ ẹ, ọ nọ zụọ wẹ ebẹhụ.

³ O nwọn ndị Itu-Farisi bịa d'e shin'ẹ ọnyan, sị a, “Iwu e kwerighọ nị ihiẹn ile kẹ okẹnnyẹ gi e kpechan nwunyẹ ẹ?”

⁴ Jizọsị nọ za, sị, “Ụnụ e ke gụn a imẹ Ẹkụkwọ-nsọ nị Onyẹ hụn keni wẹ ke wẹ okẹn lẹ onyẹnnyẹ ogẹn mbidọn?

⁵ N'ọ sị, ‘Ufiri ẹ, okẹnnyẹ sikọ d'a latọ nẹdi ẹ lẹ nnẹ ẹ, kwọnkẹnmẹ nwunyẹ ẹ, wẹ ẹbụbụọ a wụrụ ẹhụ ohu’?

⁶ Ya wụ, ẹlẹzi wẹ mmadụ ẹbụọ, kanị, ẹhụ ohu. Ihiẹn Osolobuẹ wegbamagụ, ịhịan y'e kebelẹ ẹ.”

⁷ Ndị Itu-Farisi hụ nọ jụzị a, “Kị haịn nwan Mozizi gi ye iwu imẹ Ẹkụkwọ-nsọ nị okẹnnyẹ nwọn ikẹn ye nwunyẹ ẹ ẹkụkwọ-mkpechan, kpechan a?”

⁸ Jizọsị nọ za, sị, “Obi ụnụ e zekẹ haịn Mozizi gi hatu ụnụ nị ụnụ e kpechan inyẹnmẹ ụnụ; kanị ẹlẹ ẹrịra k'ọ rị gha alị lala.

⁹ M rị a gwa ụnụ, onyẹ kpechan nwunyẹ ẹ bụ ẹlẹni nwunyẹ ẹ zọ ụkụ ye ọfịa, ọ lụrụ nwunyẹ ọzọ, ọ ghẹrẹọlẹ.”

¹⁰ Ndị nsọnmazụụn a nọ sị, “Omẹni ẹrịra kẹ oku di-lẹ-nwunyẹ nọ, ọ kakwọ mma nị ịhịan alụnị.”

¹¹ Kanị Jesu nọ sị wẹ, “Ẹlẹ ịhịan ile jẹnkọ d'a nabanhan okuni mmanị ndị wẹ gi ufiri wẹ ku ẹ.

¹² O nwọn ndị ghalẹni a lụ di-lẹ-nwunyẹ makẹni enwọn wẹ ẹhụ kete wẹ mụlẹ wẹ; o nwọn ndị ghalẹni a lụ di-lẹ-nwunyẹ makẹni wẹ wara wẹ awara; o nwọn ndị sị nị alụkọ wẹ makẹ ufiri Alị-eze elu-igwee. Onyẹ k'a saẹka nabanhan okuni ya nabanhan a.”

Jizọsị A Gọzi Ụmụ-ndu

¹³ O nwọn ndị wẹhẹni Jizọsị ụmụ-ndu n'o bu ẹka kwasị wẹ, mẹ ekpere, kanị ndị nsọnmazụụn a nọ jụgbọ ndị hụ.

¹⁴ Kanị Jizọsị nọ sị, “Hatu ni ụmụ-ndu nị wẹ d'e kunrun m; egbọndọnlẹ ni wẹ, makẹni Alị-eze elu-igwee wụ nke ndị nọ ẹrịra.”

¹⁵ O bugụ ẹka kwasị ụmụẹka hụ, ọ nọ gha ebahụn pụ.

Okorọbịa Ọdanfịn Hụ

¹⁶ Ya kẹ okẹnnyẹ ohu nọ bịa d'e kunrun Jizọsị, sị, “Onyẹ-nkuzi, kị wụ ihiẹn rị mma m sikọ d'e mẹ nị m nwọnrin ndụn itẹbitẹ?”

¹⁷ Jizọsị nọ sị a, “Kị rị a jụnị m oku ihiẹn rị mma? Onyẹ ohu sụọ rị mma. Kanị ị chọ n'ị banye ndụn, mẹ ihiẹn ndị hụ Iwu ku.”

¹⁸ Ọ nọ sị, “Elee ndị?” Jizọsị nọ sị, “Egbulẹ ọchụn; aghẹrẹlẹ; ezunlẹ ohin; ebuokinlẹ ịhịan ọnụ;

¹⁹ gbaye nẹdi i lẹ nnẹ i; ihiẹn ibe i ya sụọ ị kẹ enwẹn i dọn a sụọ ị.”

²⁰ Okorọbịa hụ nọ sị, “M hụ e mẹ ihiẹn ndịnị ile; kị họdụzị m jẹnkọ d'e mẹ?”

²¹ Jizọsị nọ sị a, “Ị chọ n'i zu oke, jẹnmẹ, repụ ihiẹn i nwọn, y'e we egho ẹ ye ndị igbẹnnyẹ, gi ẹ nwọn akụ-lẹ-ụba imẹ elu-igwee, y'a bịa d'e sọnmẹ m.”

²² Ogẹn okorọbịa hụ gi nụ ihiẹnni, ọ nọ sụkụrụ (gbusuru) pụ, makẹni o nwọnkẹ ihiẹn.

²³ Jizọsị nọ sị ndị nsọnmazụụn a, “M rị a gwa ụnụ ezioku, Alị-eze elu-igwee k'a fụ ọdanfịn ọrụn ọbanye.

²⁴ M rịzị a gwa ụnụ, ọ ka nfe nị anyịnyan-mkpukpuke wụ kamẹlụ ghafe ẹnya olodẹn karị nị ọdanfịn banye Alị-eze Osolobuẹ.”

²⁵ Ogẹn ndị nsọnmazụụn a gi nụ ihiẹnni, ọ tụ wẹ ẹnya ọda-ọda, wẹ nọ sị, “Onyẹ jẹnkọ d'a sazị nwan ẹka nwọn nzụọpụha?”

²⁶ Kanị Jizọsị e lee wẹ ẹnya, ọ nọ sị wẹ, “Ebe ịhịan rị, ọ sakọ ẹka mẹ, kanị ebe Osolobuẹ rị, onwọnni ihiẹn ghalẹni a saẹka e mẹ.”

²⁷ Ya Pita nọ sị, “Lee ẹ, ẹnyi a lagụọ ihiẹn ile tọ sọnmẹ i, kị ẹnyi jẹnkọ nwan d'e nwọnhẹn?”

²⁸ Jizọsị nọ sị wẹ, “M rị a gwa ụnụ ezioku, ụwa ọhụn lalanị, ogẹn hụ Nwa nke Ịhịan k'a nọdị okẹn ukpo ẹ, ụnụ ndị hụn sọnni m sikọ d'a nọdịsọnmẹ ukpo mmẹbụọ, a hannị ebọn mmẹbụọ Izrẹlụ eṅẹn.

²⁹ Onyẹ gi ufiri m latọ ezi-lẹ-ụlọ mọbụ umunẹ-ikẹnnyẹ mọbụ umunẹ-ikpoho mọbụ nẹdi mọbụ nnẹ mọbụ ụmụ mọbụ alị o nwọn jẹnkọ d'e nwọnhẹn wẹ mmagi-mmagi ụzọ ọgụn-isẹn, nwọnhẹnzikwọ ndụn itẹbitẹ.

³⁰ Kanị, imẹrinmẹ bu ụzọ jẹnkọ d'a kpanrịn azụụn, ndị kpan azụụn e buru ụzọ.