Matiu 17 - Ika

Isi Nke Mmẹsa Kẹ Jizọsị Dọn Nwọnhutọ

¹ Akpọhịn isin a ghafegụ, Jizọsị nọ weri Pita lẹ Jemisi lẹ Jọnụ nwẹnẹ Jemisi, kịrị wẹ shi elu-ugu jẹn elu ọda-ọda. Ya lẹ wẹ sụọ wị.

² Ya Jizọsị nọ nọ idẹnya wẹ nwọnhutọ: ihun ẹ e nwunmẹ kẹ ẹnyanwụn, ẹwuru ẹ hụ e gbukepụ kẹ ukpẹ.

³ Idẹnmizi, Mozizi lẹ Ẹlaịja nọ pụha, wẹ lẹ Jizọsị nọ kumẹ oku.

⁴ Pita nọ sị Jizọsị, “Di-nwọnni-ẹnyi, ọ hụghọ mma nị ẹnyi hụ ebeni. Omẹni y'a chọghọ, m jẹnkọ d'a tụn ọdụ ẹtọ ebeni: ohu wụ nke i, ohu nke Mozizi, ohu nke Ẹlaịja.”

Ẹlẹ Ẹlaịja Mọbụ Mozizi, Kanị Jizọsị

⁵ Ebe ọ rị e ku ihiẹnni, orukpu rị e gbukeni nọ kpumẹ wẹ idẹnmizi. Olu nọ gha imẹ orukpu hụ sị, “Ọnwan wụ ezi Nwa m hụn ihiẹn ẹ a sụọ m; gọn n'ẹ ntịn!”

⁶ Ogẹn ndị nsọnmazụụn a ahụn gi nụ olu hụ, okẹn egun nọ tụma wẹ, wẹ nọ dan alị, bu ihun kọma alị.

⁷ Kanị Jizọsị nọ bịa d'e mẹtụ wẹ ẹka, sị, “Lihi ni; atụlẹ ni egun.”

⁸ Ogẹn wẹ gi weshi ihun elu, onwọnzini onyẹ wẹ hụn mmanị Jizọsị sụọ.

⁹ Ogẹn wẹ gi hidanla ugu hụ, Jizọsị nọ gba wẹ mkpịnsịn-ẹka ẹnya ọhụnma-ọhụnma, sị wẹ, “Agwakwọlẹ ni onyẹ ọwụlẹ ihiẹnni ụnụ hụn d'e ru nị Osolobuẹ a gha ọnwụn weligụ mmẹ wụ Nwa nke Ịhịan.”

¹⁰ Ndị nsọnmazụụn a nọ sị, “Kị haịn nwan ndị-nkuzi Iwu gi a sị nị Ẹlaịja sikọ d'a bịagụ?”

¹¹ Ọ nọ za wẹ, sị, “Eziẹ rọ nị Ẹlaịja sikọ d'a bịagụ d'e dọnkwama ihiẹn ile.

¹² Kanị m rị a gwa ụnụ nị Ẹlaịja a bịagụọlẹ bụ amarịnnị w'a, e mẹ w'ẹ ihiẹn sụọnị wẹ. Ẹrịra kẹ mmẹ wụ Nwa nke Ịhịan jẹnkọ nwan d'a ta afụnfụn ẹka wẹ.”

¹³ Ya ndị nsọnmazụụn a nọ ghọta nị Jọnụ hụn e mẹ mirin-Chuku k'ọ rị e ku.

Jizọsị A Zụọ Nwata Eje-mmọn Rị Imẹ Ẹ

¹⁴ A pụha wẹ ebe igunrun gbakikomẹ e che ẹ, okẹnnyẹ ohu nọ bịa d'e kunrun Jizọsị, gbun'ẹ osekpu, sị,

¹⁵ “Diọkpa, mẹ omikẹn nwa m! Ibobo rị a kụ a. Ọ rị a ta okẹn afụnfụn; ọ danyesọnmẹ ọkụn lẹ mirin.

¹⁶ M wẹhẹni ndị nsọnmazụụn ị ya, kanị asanị wẹ ẹka zụọ a.”

¹⁷ Jesu nọ sị, “Heuu, agbọ nwọnlẹni okukwe! Agbọ zinlẹni! Nanị mmẹ lẹ ụnụ k'a nọhan? Nanị m'e dihannị ụnụ?! Wẹhẹ ni ni m'ẹ.”

¹⁸ Ya Jizọsị nọ jụgbọ eje-mmọn hụ, ọ nọ gha imẹ nwata-okẹnnyẹ hụ pụha, ọ nọ dịnhịn ozigbo.

¹⁹ Ya ndị nsọnmazụụn Jizọsị nọ bịa d'e kunrun Jizọsị ụsụọ, jụ a, sị, “Kị haịn ẹnyi gilẹni saẹka chụpụ eje-mmọn hụ?”

²⁰ Ọ nọ za wẹ, sị, “Makẹni okukwe ụnụ ehini. M rị a gwa ụnụ ezioku, omẹni ụnụ nwọn okukwe handẹ kẹ mkpụrụ mọstadị, ụnụ k'a s'ẹka sị uguni, ‘Gha ebeni pụ shi ebahụn!’ O jẹn. Onwọnni ihiẹn jẹnkọ d'a karị ụnụ ẹka!

²¹ Kanị ụdịnị ara pụ wezụka nị wẹ bu ọnụ, mẹ ekpere.”

Jizọsị E Kuzi Oku Ọnwụn A

²² Ogẹn Jizọsị lẹ ndị nsọnmazụụn a gi zu imẹ Galili, Jizọsị nọ sị wẹ, “Wẹ jẹnkọ d'e re mmẹ wụ Nwa nke Ịhịan ye ẹka ịhịan;

²³ wẹ k'e gbu m; hụn m'ẹ akpọhịn ẹtọ, Osolobuẹ e weli m.” Ọ nọ fụ wẹ ọda-ọda.

Ịtụ Ụtụ Ụlọ-nsọ

²⁴ Ogẹn wẹ gi ru Kapanọm, ndị ụgwọ-isi Ụlọ-nsọ nọ jẹnburu Pita, sị a, “Onyẹ-nkuzi ụnụ ara tụdẹ ụtụ Ụlọ-nsọ ra?”

²⁵ Pita nọ sị, “Ọ tụ a tụ.” Pita a banhan, Jizọsị nọ bu ẹ ụzọ kumẹ, sị a, “Saịmọnụ, gwadẹle m? Onyẹ kẹ ndị-nze ụwanị a na ụtụ ichẹn-ichẹn w'a na? Ụmụ wẹ ra ndị ọzọ?”

²⁶ Pita a sị, “Ndị ọzọ.” Jizọsị nọ sị a, “Ya wụ nị ụmụ wẹ ara kụ.

²⁷ Kanị, amamgbe ẹnyi e wiwi okukwe wẹ, shi iyi, y'a tụye ukpo i; y'e weri azụn ibuzọ i k'e gbu, shịapụ a ọnụ; ị sikọ d'a hụn akpụrụ egho shẹkẹlụ ohu. We ẹ kụ ụgwọ-isi mmẹ lẹ yụ.”