Matiu 16 - Ika

Isi Nke Mmisin A Sị Wẹ Jizọsị Ghọsị Wẹ Ahịma W'e Gi Kwerin'ẹ

¹ Ndị Itu-Farisi lẹ ndị Itu-Sadusi nọ wịrị d'a chọ ihiẹn rị Jizọsị ọnụ, sị a ghọsị wẹ ahịma gha elu-igwee bịa.

² Kanị Jizọsị nọ za wẹ, sị, “O ru ẹnyasị, ụnụ sị, ‘Mirin ezuekọ, makẹni igwere fọn efọn.’

³ Ụtụntụn, ụnụ sị, ‘Mirin jẹnkọ d'e zue tannị makẹni igwere efọnni.’ Ụnụ ma gi igwere kọwa ihiẹn jẹnkọ d'e mẹni, kanị ụnụ ama lee ihiẹn rị e mẹ ogẹnni gi ẹ kọwa ihiẹn ọ ghọsị.

⁴ Eje-agbọ ẹnya rịlẹni ụzọ ohu rị a chọ ahịma. Kanị, onwọnni ahịma wẹ jẹnkọ d'a ghọsị wẹ wezụka ihiẹn mẹ Jona onyẹ-amụma.” Ọ nọ la wẹ tọ, gha ebẹhụ pụ.

Yisti Ndị Farisi Lẹ Ndị Sadusi

⁵ Ogẹn ndị nsọnmazụụn a gi fetu mirin Galili, anyanhannị wẹ weri brẹdi,

⁶ Jizọsị nọ sị wẹ, “Kpachanpụ nị ẹnya makẹ yisti ndị Itu-Farisi lẹ ndị Itu-Sadusi.”

⁷ Wẹ nọ sị ibe wẹ, “Ọ rị e ku ihiẹnni makẹni ẹnyi ewerini brẹdi.”

⁸ Jizọsị a marịngụọ ihiẹn wẹ rị e ku; ọ sị wẹ, “Kị ụnụ rị e kuni oku brẹdi ụnụ zọ? Ndị okukwe nta!

⁹ Ụnụ eke ghọtakwọ nwan? Ụnụ anyanhannị ogbe brẹdi isẹn hụ madụ nnụ-uku isẹn (5,000) ri lẹ ụkpalị ole ụnụ kpọnjun ifunfun ẹ?

¹⁰ Ra ụnụ anyanhannị ogbe brẹdi ẹsa madụ nnụ-iri (4,000) ri lẹ ụkpalị ole ụnụ kpọnjun ifunfun ẹ?

¹¹ Kị haịn ụnụ gilẹni ghọha nị ẹlẹ brẹdi mmaka kẹ m rị e ku oku ẹ? Kpachanpụ nị ẹnya makẹ yisti ndị Itu-Farisi lẹ ndị Itu-Sadusi!”

¹² Ya wẹ nọ ghọha nị ẹlẹ yisti brẹdi gi a fụ k'ọ sị wẹ kpachanpụnị ẹnya, kanị n'o gi ẹ e ku oku nkuzi ndị Farisi lẹ ndị Sadusi.

Pita E Ku Onyẹ Jizọsị Wụ

¹³ Ogẹn Jizọsị gi banye ẹgbẹrẹ Sizaria-Filipi, ọ nọ jụ ndị nsọnmazụụn a sị, “Onyẹ kẹ wẹ sị nị ya kẹ mmẹ wụ Nwa nke Ịhịan wụ?”

¹⁴ Wẹ nọ za, sị, “O nwọn ndị sị ị wụ Jọnụ hụn e mẹ mirin-Chuku; ndị ọzọ sị ị wụ Ẹlaịja; ndị ọzọ sị ị wụ Jerimaya mọbụ onyẹ ohu imẹ ndị-amụma mbụ.”

¹⁵ Kanị ọ nọ sị wẹ, “Onyẹ kẹ ụnụ nwẹn sị nị ya kẹ m wụ?”

¹⁶ Saịmọnụ wụ Pita nọ za, sị, “Yụ wụ Kraịstị hụn wụ nwa OSOLOBUẸ RỊ NDỤN.”

¹⁷ Jizọsị nọ sị a, “Onyẹ wẹ gọzi agọzi k'ị wụ Saịmọnụ nwa Jona! Makẹni ẹlẹ ịhịan ghọsị ị ihiẹnni; Nẹdi m rị elu-igwee ghọsị ị ya.

¹⁸ M rị a gwa ị, ẹfan ị wụ Ọmụma; m jẹnkọ d'a tụn ụka m ye elu ọmụmanị, ọnwụn asaẹka mẹri ẹ.

¹⁹ M jẹnkọ d'e ye i ịsanhan Alị-eze elu-igwee: ihiẹn ọwụlẹ ị sị, ‘Mba,’ elu-ụwa elu-igwee sikọ d'a sị, ‘Mba.’ Ihiẹn ọwụlẹ ị sị, ‘Ẹghẹẹ,’ elu-ụwa, elu-igwee jẹnkọ d'a sị, ‘Ẹghẹẹ.’ ”

²⁰ Ya Jizọsị nọ dọ ndị nsọnmazụụn a ẹka-ntịn, wẹ agwakwọlẹ onyẹ ọwụlẹ nị ya wụ Kraịstị.

Jizọsị E Ku Oku Afụnfụn O Sikọ D'a Ta Lẹ Ọnwụn A

²¹ Gha ogẹn hụ jẹnmẹ, Jizọsị nọ gwama ndị nsọnmazụụn a n'o k'e jẹnrịrị Jerusalẹm, nị ndị-isi lẹ ndị-isi nchụn-ẹjan lẹ ndị-nkuzi Iwu k'e mẹshi ẹ ikẹn, gbu ẹ, nke akpọhịn ẹtọ, Osolobuẹ a gha ọnwụn weli ẹ.

²² Kanị Pita nọ weri ẹ shi ụsụọ, jụgbọ a, sị, “Di-nwọnni-ẹnyi, Osolobuẹ a jụ! Onwọnni ogẹn ihiẹnni e gi mẹ i!”

²³ Kanị Jesu e gbehutọ, ọ nọ sị Pita, “Ekwensụ, pụ nị m! Ị rị e mẹ m uke, makẹni y'a rị e ro nke Osolobuẹ kanị nke ịhịan.”

²⁴ Ya Jizọsị nọ sị ndị nsọnmazụụn a, “Onyẹ chọ n'o sọn m, ya jụkwọ enwẹn ẹ, buru obe ẹ, sọnmẹ m.

²⁵ Makẹni onyẹ chọ n'o ghe isi, isi ẹ a tọ a; kanị onyẹ hụn gi ufiri m tuhu ndụn a k'a hụn a.

²⁶ Elee erere k'ọ ban nị ịhịan e nwọnchanrịngụ ụwa ile, umẹ-ndụn a a nahịn a? Kị ịhịan sikọ d'e gi gbarị umẹ-ndụn a?

²⁷ “Ẹghẹẹ, Nwa nke Ịhịan k'e gi ọghọ Nẹdi ẹ bịa, ya lẹ ndị mmọn-ozi ẹ k'a wị; ogẹn hụ, o k'a kụ onyẹ ọwụlẹ ụgwọ ihiẹn o mẹ.

²⁸ M rị a gwa ụnụ ezioku, o nwọnghọ ndị rị ebeni jẹnkọlẹni d'a nwụnhụn d'e ru ni a hụn wẹ Nwa nke ịhịan k'ọ lala kẹ eze.”