Matiu 15 - Ika

Isi Nke Mmisẹn Ọdịnalị Ndị-akan

¹ Ya ndị Itu-Farisi lẹ ndị-nkuzi Iwu nọ gha Jerusalẹm bịa d'e kunrun Jizọsị, sị a,

² “Kị haịn ndị nsọnmazụụn ị gilẹni a gbaye ọdịnalị ndị nẹdi ẹnyi kanị? W'a ra kwọ ẹka ri ihiẹn-oriri.”

³ Jizọsị nọ za wẹ, sị, “Kị haịn ụnụ gi a dan iwu Osolobuẹ kẹni ụnụ kwadọn ọdịnalị ụnụ?

⁴ Osolobuẹ ye iwu, sị, ‘Gbaye nẹdi i lẹ nnẹ i,’ sịzị, ‘Onyẹ kuja oku nẹdi ẹ mọbụ nnẹ ẹ, wẹ gbu ẹ.’

⁵ Kanị ụnụ sị, ‘Onyẹ sị nẹdi ẹ mọbụ nnẹ ẹ, “E wegụọ m ihiẹn nkẹ m'e ye i ye Osolobuẹ,”

⁶ ọ rịzịnị mkpa n'o gi ihiẹn o nwọn gbaye nẹdi ẹ mọbụ nnẹ ẹ.’ Ụnụ e gi ufiri ọdịnalị ụnụ e nu oku Osolobuẹ e ye ụsụọ.

⁷ Ndị ihunnaị! Amụma Azaya gi ku oku ụnụ wụ ezioku! Azaya sị nị Osolobuẹ sị,

⁸ ‘Ọnụnụ-ire sụọ kẹ ndịnị gi a gbaye m, obi wẹ arị ebe m rị.

⁹ Wẹ rị e fe m mmaka; ọdịnalị ịhịan tumẹ kẹ w'a kuzi nọkẹ sị Iwu Osolobuẹ rọ.’ ”

Ihiẹn Ndị Hụn E Mẹrụ Ịhịan

¹⁰ Jesu nọ kpọzụnhan igunrun hụ, sị wẹ, “Gọn ni ntịn; ghọta nị!

¹¹ Ẹlẹ ihiẹn ban ịhịan ọnụ e mẹrụ a, kanị ihiẹn gha a ọnụ pụha, ịya e mẹrụ a.”

¹² Ya ndị nsọnmazụụn a nọ bịa d'e kunrun ẹ, sị a, “Y'a marịnghọ nị iwe we ndị Itu-Farisi ogẹn wẹ gi nụ ihiẹnni i ku?”

¹³ Ọ nọ za, sị, “Ohuepụ kẹ wẹ k'e huepụ ihiẹn ọwụlẹ Nẹdi m rị elu-igwee kụnlẹni.

¹⁴ Hatu ni wẹ, wẹ wụ ndị-ndu ẹnya-ishi: onyẹ ẹnya-ishi dumẹ onyẹ ẹnya-ishi, wẹ ẹbụbụọ k'a danye mgbugbu.”

¹⁵ Ya Pita nọ sị a, “Kọwa nị ẹnyi ilu hụ.”

¹⁶ Ya ọ nọ sị, “Ụnụ nwẹn e ke ghọtakwọ nwan?

¹⁷ Ụnụ aghọtanị nị ihiẹn banye ọnụ e shi ẹfọ, a gha wẹ ebẹhụ nyụnpụ a azụụn-ụlọ?

¹⁸ Kanị ihiẹn gha ọnụ pụha gha obi pụha; ịya e mẹrụ ịhịan.

¹⁹ Makẹni, obi kẹ ihiẹn ndịnị gha pụha: eje-iroro, igbu-ọchụn, ịna-nwunyẹ-ịhịan lẹ ịzọ-ụkụ-ye-ọfịa, ughẹrẹ ichẹn-ichẹn, Izun-ohin, ịshịa ẹri-ntụ lẹ ikuja oku ịhịan.

²⁰ Ihiẹn ndịnị nwọn e mẹrụ ịhịan. Kanị, igi ẹka wẹ kwọlẹni ri ihiẹn-oriri ara mẹrụ ịhịan.”

Kẹ Okukwe Nnẹ Dọn Zụọ Nwa A

²¹ Ya Jizọsị nọ gha ebẹhụ pụ, shi ẹgbẹrẹ Taya-lẹ-Sidọnụ.

²² Ogẹn hụ hụra, okpoho onyẹ Kenaanị hụn wụ onyẹ ẹgbẹrẹ ahụn wẹ rị nọ pụha, e yi, “Dodo, mẹ omikẹn m, Di-nwọnni-ẹnyi, Nwa Defidi! Eje-mmọn rị imẹ nwa m okpoho; ọ rị e sọngbu ẹ ọda-ọda!”

²³ Kanị Jesu azan'a kaka. Ndị nsọnmazụụn a nọ bịa, rịọma a, sị a, “Gwa a lama, n'ọ rị e yisọn ẹnyi oro.”

²⁴ Jesu nọ sị, “Wẹ zi m d'e kunrun atụnrụn Izrẹlụ huni sụọ.”

²⁵ Kanị okpoho hụ nọ bịa, gbun'ẹ osekpu, sị, “Di-nwọnni-ẹnyi, yeni m ẹka.”

²⁶ Jesu nọ sị, “Ọ rịnị mma nị wẹ narịn ụmụẹka brẹdi wẹ tụyeni nkitẹ.”

²⁷ Okpoho hụ nọ sị a, “Ezioku rọ, Di-nwọnni-ẹnyi; kanị, nkitẹ e rikwọ ifunfun ihiẹn-oriri rị a dannahịn ndị nwọnni wẹ.”

²⁸ Ya Jizọsị nọ yi, “Euu okpoho, y'e nwọnkẹ okukwe! Ihiẹn i chọ ya ru i ẹka.” Ya kẹ nwa a hụ nọ dịnhịn ozigbo.

Jizọsị A Zụọ Ndị-emu Bu ọda

²⁹ Jizọsị nọ gha ebahụn pụ, shi mkpẹnrẹn Ohimin Galili. Ọ nọ nyinrin elu òke, nọdị alị ebahụn.

³⁰ Ịhịan hụ e ruhẹ d'e kunrun ẹ, e wẹhẹn'ẹ ndị ngụrọ, ndị ẹnya-ishi, ndị ọrọ, ndị odin lẹ imẹrinmẹ ndị ọzọ, e bu wẹ a tọ ụkụ a. Ọ nọ zụọchanrịn wẹ ile,

³¹ nke wụnị ọ tụ igunrun hụ ẹnya kẹ wẹ dọn rị a hụn ndị odin rị e ku oku, ndị ọrọ ẹhụ rị a rị mma, ndị ngụrọ rị e jẹn ijẹn, ndị ẹnya-ishi rị a hụn ụzọ; wẹ nọ ja Chuku Izrẹlụ mma.

Jizọsị E Yezi Igunrun Hi-ogbe Ihiẹn-oriri

³² Ya Jizọsị nọ kpọzụnhan ndị nsọnmazụụn a, sị wẹ, “Omikẹn igunrunni rị e mẹ m makẹni mmẹ lẹ wẹ a nọpụgụọ akpọhịn ẹtọ, kanị ihiẹn wẹ sikọ d'e ri arị a; achọnị m nị wẹ bu ẹgụn lama, amamgbe w'a dantọsọnmẹ ụzọ.”

³³ Ndị nsọnmazụụn a nọ sị a, “Elebe kẹ ẹnyi a nọ nwan wẹhẹ brẹdi imẹ atụ ebeni hụn k'e zu igunrunni ri?”

³⁴ Jizọsị nọ sị wẹ, “Ogbe brẹdi ole kẹ ụnụ gi?” Wẹ nọ sị a, “Ogbe ẹsa lẹ azụn mẹ ẹkẹrẹ-ẹkẹrẹ bulẹni ọda.”

³⁵ Ọ nọ sị igunrun hụ nọdị akpakalị.

³⁶ Ọ nọ weri ogbe brẹdi ẹsa hụ lẹ azụn ndị hụ; ọ kpanmịngụ Osolobuẹ, ọ nọ bebe wẹ ye ndị nsọnmazụụn a. Ndị nsọnmazụụn a nọ we wẹ ye igunrun hụ.

³⁷ Wẹ ile nọ rijunchanrịn ẹfọ: wẹ nọ tụtụkomẹ ifunfun ẹ họdụnị, o jun ụkpalị ẹsa.

³⁸ Ikẹnnyẹ nnụ-iri nchaịn ri ihiẹn-oririni. Agụnnị wẹ ikpoho lẹ ụmụẹka.

³⁹ Jesu a gbashịagụ igunrun hụ, ọ nọ banye ụgbọ-mirin, shi ẹgbẹrẹ Magadanị.