Matiu 14 - Ika

Isi Nke Mmẹnọ Kẹ Jọnụ Hụn E Mẹ Mirin-Chuku Dọn Nwụnhụn

¹ Ogẹn hụ, Hẹrọdụ hụn rị a kị Galili nọ nụ ihiẹn Jizọsị rị e mẹ.

² Ọ nọ sị ndị idibo ẹ, “Onyẹni wụ Jọnụ hụn e mẹ mirin-Chuku. Ọ ghagụọ ọnwụn lihi, ya haịn o gi nwọn ikẹn o gi e mẹ ihiẹn atụmẹnya ndịnị.”

³ Hẹrọdụ nwụnrụn Jọnụ, kẹn ẹ ẹgbụn, tụ a ngan makẹ ufiri Hẹrọdịasị nwunyẹ Filipu nwẹnẹ Hẹrọdụ.

⁴ Makẹni, o tegụọ Jọnụ gwama Hẹrọdụ oku, a sị a, “Ị rị a dan Iwu hụnnị ị rị a lụ a.”

⁵ Hẹrọdụ te chọ n'o gbu Jọnụ, kanị egun ndị alị anịn'a makẹni wẹ weri ẹ nị Jọnụ wụ onyẹ-amụma.

⁶ Kanị, o ru ụhụọhịn wẹ gi a nyanhan ọmụmụ Hẹrọdụ, nwa Hẹrọdịasị okpoho nọ tẹnni wẹ egu hụn sụọ Hẹrọdụ ụsụọ,

⁷ nke wụnị Hẹrọdụ e kwe ẹ nkwa, kun iyi, n'o sikọ d'e y'ẹ ihiẹn ọwụlẹ ọ rịọ.

⁸ Nnẹ nwata hụ nọ dụnja a, ọ nọ sị Hẹrọdụ, “Gi afẹrẹni ye m isi Jọnụ hụn e mẹ mirin-Chuku.”

⁹ Ọ fụka eze wụ Hẹrọdụ nị nwata ahụn rịọ ihiẹnni, kanị ọ nọ gi ufiri iyi o kun lẹ ndị ọbịa a sị wẹ ye nwata-okpoho hụ ya.

¹⁰ O zi wẹ d'e bepụ Jọnụ isi imẹ ụlọ-ngan.

¹¹ Wẹ nọ gi afẹrẹ buhẹ isi Jọnụ, we ẹ ye nwata-okpoho hụ, ọ nọ w'ẹ jẹnni nnẹ ẹ.

¹² Ndị nsọnmazụụn Jọnụ nọ bịa, buru ẹhụ a d'e li, ya wẹ nọ jẹn d'a gwa Jizọsị.

Jizọsị E Ye Igunrun Hi-ogbe Ihiẹn-oriri

¹³ Ogẹn Jizọsị gi nụ ihiẹnni, ya sụọ nọ gi ụgbọ-mirin fetu mirin shi ebe ịhịan rịlẹni d'a nọdị. Kanị ndị rị ebahụn a nụ n'ọ pụgụọ, wẹ nọ gi ụkụ gha obodo ndị hụ sọnmẹ ẹ.

¹⁴ Ogẹn o gi ru mkpẹnrẹn mirin, ọ hụn igunrun hi-ogbe. Ọ nọ mẹ omikẹn wẹ, zụọ ndị emu rị a kụ.

¹⁵ O ru ẹnyasị, ndị nsọnmazụụn a nọ bịa d'e kunrun ẹ, sị, “Onwọnni onyẹ bi ebeni, bụ eki e gigụọ. Sị igunrunni lama, nị wẹ jẹn ụmụ-alị ndị rị ebeni d'e ṅọnrin ihiẹn-oriri.”

¹⁶ Jizọsị nọ sị, “Ẹlẹ hụn w'e gi lama; ye ni wẹ ihiẹn-oriri.”

¹⁷ Wẹ nọ sị a, “Onwọnkwọnị ihiẹn ẹnyi gi ebeni mmanị ogbe brẹdi isẹn lẹ azụn ẹbụọ sụọ.”

¹⁸ Ọ sị wẹ, “Wẹhẹ ni ni m wẹ.”

¹⁹ Ya ọ nọ sị igunrun hụ nọdị alị elu irurue rị ebahụn. Ọ nọ weri ogbe brẹdi isẹn hụ lẹ azụn ẹbụbụọ hụ; o lee ẹnya elu-igwee, kpanmịn Osolobuẹ; o bebe brẹdi ndị hụ ye ndị nsọnmazụụn a, wẹ nọ ye igunrun hụ.

²⁰ Wẹ ile nọ rijunchanrịn ẹfọ. Ya wẹ nọ tụtụkomẹ ifunfun ẹ họdụnị, o jun ụkpalị mmẹbụọ.

²¹ Ikẹnnyẹ nnụ-uku isẹn (5,000) nchaịn ri ihiẹn-oririni. Agụnnị wẹ ikpoho lẹ ụmụẹka.

Jizọsị Lẹ Pita E Jẹn Ijẹn Elu Mirin

²² Ya Jizọsị nọ sị ndị nsọnmazụụn a banye ụgbọ-mirin ozigbo-ozigbo fetu iyi Galili hụ, n'ọ lala. Ya nwẹn nọ nọdị gbashịa igunrun hụ.

²³ Ọ gbashịagụ wẹ, ya sụọ nọ nyinrin ugu d'e mẹ ekpere. O ru ama ẹnyasị, ya sụọ hụ ebẹhụ.

²⁴ Ogẹn hụ, ụgbọ-mirin hụ e jẹntegụọ ọda-ọda; ẹbiri-mirin hụ e ti ụgbọ hụ, e tikin ẹ azụụn, makẹni ufere rị a gha ibe ihun a kpọha.

²⁵ Ụzụtụntụn biribiri, Jesu nọ jẹnhẹn ijẹn elu mirin Galili hụ.

²⁶ Ndị nsọnmazụụn a a hụn a k'o jẹnla ijẹn elu mirin hụ, egun nọ tụma wẹ. Wẹ nọ sị, “Onyẹ-mmọn rọ!” Wẹ nọ gi egun yi oro.

²⁷ Kanị, Jizọsị nọ kuyeni wẹ oku ozigbo, sị, “Kwọndọn ni obi ụnụ, mmẹ rọ; atụlẹ ni egun.”

²⁸ Pita nọ sị a, “Di-nwọnni-ẹnyi, omẹni ịyụ rọ, sị m bịa d'e kunrun i elu mirin ebẹhụ.”

²⁹ Jesu nọ sị a, “Bịa nwan.” Ya Pita nọ gha imẹ ụgbọ-mirin hụ pụha, jẹnmẹ ijẹn elu mirin, burukọ Jizọsị.

³⁰ Kanị ogẹn Pita gi lemẹ okẹn ufere hụ, egun nọ bịa a, ọ nọ rubanma imẹ mirin. Ya ọ nọ yi, “Di-nwọnni-ẹnyi, zụọpụha m!”

³¹ Jizọsị nọ tịnpụ ẹka ozigbo kwọndọn ẹ, sị, “Onyẹ okukwe nta! Kị nwọnni obi-ẹbụọ?”

³² Ogẹn wẹ gi banye ụgbọ-mirin hụ, okẹn ufere hụ nọ kpọbehi.

³³ Ndị hụn rị imẹ ụgbọ-mirin hụ nọ gbun'ẹ osekpu, sị, “Ezioku-ezioku, ịyụ wụ Nwa Osolobuẹ.”

Ndị Jizọsị Zụọ Emu Imẹ Gẹnẹsarẹtị

³⁴ Ogẹn wẹ gi fetugụ mirin, wẹ nọ pụha obodo Gẹnẹsarẹtị.

³⁵ Ogẹn ndị obodo hụ gi marịn nị Jesu rọ, wẹ nọ zi ozi ghagbarị ẹgbẹrẹ hụ ile, wẹhẹsọnmẹn'ẹ ndị ile emu rị a kụ.

³⁶ Wẹ nọ rịọ a nị wẹ mẹtụdẹ ntịn ẹwuru ẹ ẹka; ndị ile mẹtụn'a nọ dịnhịn.