Matiu 13 - Ika

Isi Nke Mmẹtọ Ilu Jizọsị Gi Onyẹ-ugbo Ta

¹ Ụhụọhịn hụ, Jizọsị nọ gha imẹ ụlọ pụ, jẹn d'a nọdị alị mkpẹnrẹn mirin Galili.

² Igunrun hi-ogbe nọ ruhẹ, nke wụnị ọ banye imẹ ụgbọ, nọdị alị, igunrun hụ ile e turu mkpẹnrẹn mirin.

³ Ọ nọ gi ilu gwa wẹ ihiẹn bu ọda. Ọ sị, “Gọn ni ntịn! O nwọn onyẹ-ugbo jẹn d'a gha mkpụrụ imẹ ugbo.

⁴ “Ogẹn o gi rị a gha a, o nwọn mkpụrụ ndị danye ọkpụzọ, nnụnụ nọ bịa d'e ripụ wẹ.

⁵ O nwọnzi mkpụrụ ndị danye alị mẹ ọmụma-ọmụma ẹjan rịlẹni ọhụnma, wẹ nọ pupụha ozigbo makẹni ẹjan arị a ọda.

⁶ Kanị anwụn a wahụ, ma wẹ, wẹ nọ shinwụn, makẹni enwọn wẹ nkpọgụn.

⁷ O nwọnzi mkpụrụ ndị danye ebe ogun rị, ogun ndị hụ e sue, dụngbu wẹ.

⁸ Kanị, o nwọn mkpụrụ ndị danye alị rị mma, mị mkpụrụ — ndị hụ a mị ọgụn isẹn, ndị hụ ọgụn ẹtọ, ndị hụ iri kwasị ọgụn.

⁹ Onyẹ nwọn ntịn, ya nụ!”

Ihiẹn Haịn Jesu Gi A Tasọnmẹ Ilu

¹⁰ Ya kẹ ndị nsọnmazụụn Jizọsị nọ bịa d'e kunrun ẹ, sị, “Kị y'e gini ilu-ilu a gwa wẹ oku?”

¹¹ Ọ sị wẹ, “Nke ụnụ, e yegụọ wẹ ụnụ oghere ịmarịn banyeni ihiẹn-nzuzue Alị-eze elu-igwee, kanị eyeni wẹ wẹ oghere hụ.

¹² Makẹni onyẹ hụn nwọnni kẹ wẹ e yecheni, kẹni o nwọn mmagi-mmagi; kanị wẹ k'a narịndẹ onyẹ hụn nwọnlẹni hụn o te nwọn.

¹³ Ya haịn m gi e gi ilu a gwa wẹ oku; makẹni wẹ rị e lee ilee, kanị a rị w'e legha ụzọ; w'e gọn ntịn, kanị a rị w'a nụ, a rị w'a ghọha.

¹⁴ Ihiẹn onyẹ-amụma wụ Azaya ku e mẹgụọ wẹ. Azaya sị, ‘Ụnụ jẹnkọ d'a nụ ọnụnụ nke-esi, kanị onwọnni ogẹn ụnụ e gi ghọha; ụnụ jẹnkọ d'e lee ilee, kanị onwọnni ogẹn ụnụ e gi legha ụzọ,

¹⁵ makẹni ndịnị ara ghọha, ntịn wẹ a kpọkingụọ, a nyụnmagụọ wẹ ẹnya, amamgbe w'e gi ẹnya wẹ legha ụzọ, gi ntịn wẹ nụ ihiẹn, gi obi wẹ ghọha, e rogharị wẹ d'e kunrun m, a zụọ m wẹ. Ya kẹ Osolobuẹ ku.’

¹⁶ “Kanị ẹnya ụnụ nwẹn wụ ihiẹn wẹ gọzi agọzi, makẹni wẹ hụ a hụn ụzọ; ntịn ụnụ wụzị ihiẹn wẹ gọzi agọzi, makẹni wẹ hụ a nụ ihiẹn.

¹⁷ Ezioku kẹ m rị a gwa ụnụ, ndị-amụma bu ọda lẹ ndị ezi-omumẹ e te chọghọ nị wẹ hụn ihiẹn ụnụ rị a hụn, ahụnnị wẹ; a chọ wẹ nị wẹ nụ ihiẹn ụnụ rị a nụ, anụnị wẹ.

Ihiẹn Jesu Gi Ilu Onyẹ-ugbo Hụ Kuzi

¹⁸ “Nụ nị nwan nkọwa ilu onyẹ-ugbo hụ m ta:

¹⁹ Onyẹ nụ ozi Alị-eze bụ ọ ghọhan'a, Eje-onyẹ hụ a bịa d'a jụnarịn a ihiẹn hụ wẹ kụnye ẹ obi. Ọhụn wụ mkpụrụ ndị hụn wẹ ghaye ọkpụzọ.

²⁰ Mkpụrụ hụ wẹ ghaye alị-ọmụma wụ onyẹ nụ ozi hụ, gi ịghọghọ nabanhan a ozigbo,

²¹ kanị, makẹni ọ gbanị nkpọgụn, ọ tọhụ ẹkẹrẹ. Ozi hụ wẹhẹ nsọngbu mọbụ ukpokpo, ọ danpụ ozigbo.

²² Mkpụrụ wẹ ghaye imẹ ogun wụ onyẹ hụn nụ ozi hụ, kanị oku elu lẹ ẹkpịrị akụ-lẹ-ụba a kpangbu ozi hụ, ọ mịnị mkpụrụ.

²³ Kanị, mkpụrụ wẹ ghaye alị rị mma wụ ndị hụ hụn nụ oku hụ, ghọha a, sue, mẹ ọhụnma-ọhụnma: ụfọdụ a mị ọgụn-isẹn, ụfọdụ a mị ọgụn-ẹtọ, ụfọdụ a mị iri-kwasị-ọgụn.”

Ilu Jesu Gi Ata-witi Ta

²⁴ Ọ nọ tazịnị wẹ ilu, sị, “Alị-eze elu-igwee rị kẹ ebe ịhịan nọ kụn mkpụrụ rị mma ugbo ẹ.

²⁵ Kanị, ebe ịhịan rị ụran, eṅẹnrẹn nọ bịa d'a kụn ata ye imẹ ọka-witi ndị hụ, pụ.

²⁶ Ogẹn ihiẹn-ugbo ndịnị gi nwan suegụ, mịma mkpụrụ, ata ndị hụ nọzịkwọ pụha.

²⁷ Ya idibo rị iwe okẹnnyẹ hụ nwọn ugbo nọ sị a, ‘Diọkpa, ẹlẹ mkpụrụ rị mma k'ị kụn ugbo i? Nanị ata dọnzi ban a?’

²⁸ Ọ sị wẹ, ‘Eṅẹnrẹn mẹ ihiẹnni.’ Idibo ndị hụ nọ sị a, ‘Ị sị nwan ẹnyi jẹn d'e huepụ ata ndị hụ?’

²⁹ Kanị ọ nọ sị, ‘Mba, amamgbe ụnụ e huepụ ọka-witi ebe ụnụ rị e huepụ ata.

³⁰ Nị nị wẹ ẹbụbụọ suegbama d'e ru ogẹn ọka-witi. O ru ogẹn ahụn, a sị m ndị jẹnkọ d'e ben'ẹ wẹ bu ụzọ huepụ ata kẹnmẹsọnmẹ ukun-ukun d'a dụn ọkụn, bepụha ọka-witi bucheni m ebe m'e buche ihiẹn-ugbo.’ ”

Ilu Jesu Gi Mkpụrụ Mọstadị Ta

³¹ Jesu nọ tazịnị wẹ ilu, sị, “Alị-eze elu-igwee nọ kẹ akpụrụ mọstadị ịhịan kụnye ugbo ẹ.

³² Ịya kachanrịn ntịn imẹ mkpụrụ ile, kanị o suegụ, ịya ka ihiẹn ugbo ile ogbe; o họnrindẹ osisi, nke wụnị nnụnụ a bịa d'a kpa ẹkụụ e ye agalaba a.”

Ilu Jesu Gi Yisti Ta

³³ Jesu nọ tazịnị wẹ ilu, sị, “Alị-eze elu-igwee nọ kẹ ẹkẹrẹ yisti hụn okpoho buche gi gwọ ọka wẹ gweriẹn k'e jun adana ẹtọ hụn ọ chọ n'o gi shi brẹdi, ọ nọ ghagbarị ogbe brẹdi hụ ile.”

Ihiẹn Haịnzị Jizọsị Gi E Gi Ilu A kuzi

³⁴ Ilu-ilu kẹ Jizọsị gi gwa igunrun hụ ihiẹn ndịnị ile. Onwọnni ihiẹn o gilẹni ilu gwa wẹ.

³⁵ Ịya kẹ ihiẹn onyẹ-amụma ku imẹ Ẹkụkwọ-nsọ gi mẹzu. Onyẹ-amụma sị, “M jẹnkọ d'a shịapụ ọnụ m lu ilu; m jẹnkọ d'a gha e ku ihiẹn zuerini, ihiẹn zueri kete wẹ gbelẹ iyetọ ụwa.”

Ihiẹn Jizọsị Gi Ilu Ata Hụ Ku

³⁶ Ya kẹ Jizọsị nọ la igunrun hụ tọ, shi imẹ ụlọ. Ndị nsọnmazụụn a nọ bịa d'e kunrun ẹ, sị a, “Dodo, kọwa nị ẹnyi ilu ata hụ wẹ kụnye imẹ ugbo.”

³⁷ Ọ nọ za, sị, “Onyẹ hụ kụn mkpụrụ rị mma wụ Nwa nke Ịhịan.

³⁸ Ugbo hụ wụ ụwa; mkpụrụ hụ hụn rị mma wụ ụmụ Alị-eze; ata hụ wụ ụmụ Eje-onyẹ hụ.

³⁹ Eṅẹnrẹn ahụn kụn ata wụ Ekwensụ; ogẹn ihiẹn-ugbo hụ wụ ọgụgụ ogẹnni; ndị ahụn jẹnkọ d'a ghọn'a wụ ndị mmọn-ozi.

⁴⁰ “Kẹ wẹ dọn huepụ ata hụ, wegbama wẹ dụn ọkụn, ẹrịra k'o jẹnkọ d'a rị ọgụgụ-ogẹnni.

⁴¹ Nwa nke Ịhịan jẹnkọ d'e zi ndị mmọn-ozi ẹ, e huepụ wẹ ndị ile e buhẹ njọ lẹ ndị ile e bi k'ọ sụọ wẹ imẹ Alị-eze ẹ,

⁴² tụ wẹ ye okẹn ọkụn hụ. Ebẹhụ, ịhịan jẹnkọ d'a rị a kwan ẹkwan, a ta nkwẹnrẹn-eze.

⁴³ Ogẹn hụ, ndị ezi-omumẹ k'a gha gbukepụ kẹ ẹnyanwụn imẹ Alị-eze Nẹdi wẹ. Onyẹ hụn nwọn ntịn ya nụ.

Ilu Jesu Gisọnmẹ Ihiẹn Rị Okẹn Mkpa Zuerini Ta

⁴⁴ “Alị-eze elu-igwee rị kẹ ihiẹn rị okẹn mkpa zueri imẹ alị imẹ ugbo, hụn onyẹ ohu hụn, ọ nọ zuemẹzi ẹ, gi ịghọghọ jẹn d'e rechanrịn ihiẹn ile o nwọn, ọ nọ bịa d'e ṅọnrin alị hụ.

⁴⁵ “Ọzọzị, Alị-eze elu-igwee nọ kẹ ebe onyẹ-afịa hụn e ṅọntọ ihiẹn nọ chọkọ ihiẹn mma pụ-ichẹn o k'e ṅọntọ.

⁴⁶ Ọ hụn hụn ṅanran ọda-ọda, ọ nọ jẹn d'e rechanrịn ihiẹn ile o nwọn, bịa d'e ṅọnrin ẹ.

Ilu Jesu Gi Ọga Ta

⁴⁷ “Alị-eze elu-igwee nọzị kẹ ọga wẹ tụye imẹ ohimin, ọ nọ nwụndọn azụn ile rị ichẹn-ichẹn.

⁴⁸ O jun, wẹ nọ dọkpụnpụha a mkpẹnrẹn mirin; a nọdị wẹ alị, họpụha ndị rị mma buche imẹ ụkpalị, kpọn ndị rịlẹni mma tuhu.

⁴⁹ Ẹrịra k'o jẹnkọ d'a rị o ru ọgụgụ-ogẹn. Ndị mmọn-ozi jẹnkọ d'a pụha, họpụ ndị-njọ imẹ igunrun ndị ezi-omumẹ,

⁵⁰ kpọn wẹ ye okẹn ọkụn hụ. Ebẹhụ, ịhịan jẹnkọ d'a rị a kwan ẹkwan, a ta nkwẹnrẹn-eze.”

Ezioku Ọhụn Lẹ Ezioku Akan

⁵¹ Jizọsị nọ sị ndị nsọnmazụụn a, “Ụnụ a ghọtagụọ ihiẹn ndịnị ile?” Wẹ nọ sị a, “Ẹghẹẹ.”

⁵² Ọ nọ sị wẹ, “Ya wụ nị ọka-iwu Mozizi, hụn wẹ zụn ọzụnzụn Alị-eze elu-igwee, nọ kẹ onyẹ nwọn ụlọ, hụn gha ebe o dọnmẹ ihiẹn e wepụha kẹ ihiẹn ọhụn kẹ ihiẹn akan.”

A Jụ Wẹ Jizọsị Imẹ Obodo Ẹ Wụ Nazarẹtị

⁵³ Ogẹn Jizọsị gi tagụ ilu ndịnị wẹ, ọ nọ gha ebahụn pụ,

⁵⁴ shi obodo ọ nọ sue. Ọ nọ kuzimẹ wẹ imẹ ụlọ-ofufe wẹ, nke wụ nị nkuzi ẹ nọ tụ wẹ ẹnya, wẹ nọ sị, “Elebe kẹ onyẹni nọ nwọnhẹn amamihiẹnni lẹ ikẹn o gi a rụn ọrụn-atụmẹnya ndịnị?

⁵⁵ Ẹlẹ nwa Kapịnta rọ? Ẹlẹ nnẹ ẹ kẹ w'a kpo Meri? Ẹlẹ nwẹnẹ Jemisi lẹ Josẹfụ lẹ Saịmọnụ lẹ Judasị k'ọ wụ?

⁵⁶ Ẹlẹ ẹnyi lẹ umunẹ ẹ ikpoho rị ebeni? Ebe ọ gha nwan nwọnhẹn ihiẹn ndịnị ile?!”

⁵⁷ Ya wẹ nọlẹni kwerin'ẹ. Jizọsị nọ sị wẹ, “Onwọnni ebe wẹ ghalẹni a gbaye onyẹ-amụma wezụka imẹ alị a lẹ iwe ẹ.”

⁵⁸ Ọ rụnnị nwan ọrụn-atụmẹnya bu ọda ebẹhụ makẹni ekwerinini w'ẹ.