Matiu 12 - Ika

Isi Nke Mmẹbụọ Ajụjụ Banyeni Ụhụọhịn Ezumikẹn

¹ Ogẹn hụ, ebe Jizọsị ghafekọ alị ọka-witi Ụhụọhịn Ezumikẹn, ẹgụn hụ a gụn ndị nsọnmazụụn a. Ya kẹ wẹ nọ ghọrịma ọka-witi, a ta.

² Ndị Itu-Farisi a hụn ihiẹnni, wẹ nọ sị a, “Y'a hụn a, ndị nsọnmazụụn ị rị e mẹ ihiẹn iwu sị w'e mẹlẹ Ụhụọhịn Ezumikẹn.”

³ Ọ nọ sị wẹ, “Ụnụ eke gụntu ihiẹn Defidi mẹ kẹ ẹgụn rị a gụn ya lẹ itu ẹ?

⁴ K'o dọn banye ụlọ Osolobuẹ, ri brẹdi-nsọ ahụn w'e butọ ihun Osolobuẹ, hụn iwu sị onwọnni onyẹ e rin'ẹ: kẹ Defidi kẹ itu ẹ, mmanị ndị nchụn-ẹjan sụọ.

⁵ Ra ụnụ eke gụntu imẹ Iwu k'o dọn wụrụ nị, o ru Ụhụọhịn Ezumikẹn, ndị nchụn-ẹjan rị ọrụn imẹ Ụlọ-nsọ a dan iwu Ezumikẹn bụ ikpe amanị wẹ?

⁶ “M rị nwan a gwa ụnụ nị ihiẹn ka Ụlọ-nsọ rị ebeni!

⁷ Omẹni ụnụ te marịn alị okuni: ‘Omikẹn kẹ m chọ, ẹlẹ ịchụn-ẹjan,’ ụnụ e ke gha a ma onyẹ nwọnlẹni ihiẹn o mẹ ikpe.

⁸ Makẹni, mmẹ wụ Nwa nke Ịhịan nwọn ku ihiẹn w'e mẹ Ụhụọhịn Ezumikẹn.”

Okẹnnyẹ Ẹka Ohu Nwụnhụn

⁹ Jesu nọ gha ebahụn pụ, banye ụlọ-ofufe wẹ.

¹⁰ O nwọn okẹnnyẹ ohu rị ebẹhụ ẹka ohu nwụnhụn. Ụfọdụ ndị Itu-Farisi chọkọ ihiẹn w'e gi ma Jesu ikpe nọ sị a, “Iwu e kwerighọ nị wẹ zụọ ndị emu rị a kụ Ụhụọhịn Ezumikẹn?”

¹¹ Ọ nọ sị wẹ, “Imẹ ụnụ ile, onyẹ kẹ atụnrụn ohu o nwọn k'a danban imẹ olu Ụhụọhịn Ezumikẹn, o zuni ẹka ye ẹ, wepụha a?

¹² Ọrịwụzị ịhịan hụn ka mkpa ọda-ọda karị atụnrụn. Ya wụ, iwu e kwerighọ nị w'e mẹ ihiẹn rị mma Ụhụọhịn Ezumikẹn.”

¹³ Ya ọ nọ sị okẹnnyẹ hụ, “Tịnpụ ẹka ị.” Ọ tịnpụ a, ọ nọ rị mma kẹ hụn-ẹbọ.

¹⁴ Kanị, ndị Itu-Farisi ahụn nọ pụ d'e zun'ẹ umẹ ni wẹ gbu ẹ.

Jesu wụ Odibo Hụ Osolobuẹ Tumẹ

¹⁵ Ogẹn Jizọsị gi marịn ihiẹn ndị Itu-Farisi ahụn romẹ, ọ nọ gha ebahụn pụ, ndị bu ọda nọ sọnmẹ ẹ, ọ nọ zụọchanrịn wẹ ile.

¹⁶ Ọ hụ a dọ wẹ ẹka-ntịn w'a nịlẹ ịhịan marịn nị ịya rọ.

¹⁷ Ẹrịra kẹ wẹ dọn mẹzu ihiẹn Osolobuẹ gi Azaya onyẹ-amụma ku, sị,

¹⁸ “Lee odibo m, hụn m tumẹ; ezi odibo m rọ; ihiẹn ẹ a sụọka m. M jẹnkọ d'e bu Mmọn-nsọ m kwasị a; o k'e mẹ alị ndị ọzọ marịn ezioku.

¹⁹ O mẹkọ onyẹ-ndọndọ mọbụ onyẹ-oro; anụkọ wẹ olu ẹ ọgbara-ogbe.

²⁰ Ọ kpagipụkọ achara-iyi rị a kpagini mọbụ tinyụnpụ ukpẹ rị e tinyụnnị, d'e ru n'o ye ezioku mmẹri.

²¹ Ndị alị ndị ọzọ ile k'e gidẹ ẹfan a dọn ẹnya.”

Njọ Chuku Ghalẹni A Gbagharị

²² Ya wẹ nọ wẹhẹn'ẹ onyẹ eje-mmọn rị imẹ ẹ, hụn o mẹni ara legha ụzọ, ara ku oku. Ọ nọ zụọ a, onyẹ ẹnya-mpịn hụ, hụn wụ odin nọ kumẹ oku, leghama ụzọ.

²³ Ọ nọ tụ igunrun hụ ẹnya, wẹ nọ sị, “Ọnwan wụdẹ nwan Nwa Defidi hụ ra?”

²⁴ Kanị ogẹn ndị Itu-Farisi gi nụ a, wẹ nọ sị, “Omẹni ẹlẹ ikẹn Bẹzibọlụ onyẹ-isi eje-mmọn, okẹnnyẹni eke saẹka chụpụ eje-mmọn ndịnị.”

²⁵ Jizọsị a marịngụọ obi wẹ, ọ nọ sị, “Alị-eze ọwụlẹ kebeni k'a dan; obodo mọbụ ikpụlọ ọwụlẹ kebeni atọkọ.

²⁶ O mẹ nwan nị Ekwensụ rị a chụpụ Ekwensụ, o kebegụọ enwẹn ẹ. Nanị alị-eze ẹ e dọn nwan turu?

²⁷ Omẹni ikẹn Bẹzibọlụ kẹ m gi a chụpụ eje-mmọn, ikẹn onyẹ kẹ ndị nke ụnụ gizi a chụpụ? Uwẹ jẹnkọ d'a ma ụnụ ikpe.

²⁸ Kanị, omẹni ikẹn Mmọn-nsọ Osolobuẹ kẹ m gi a chụpụ eje-mmọn, ya wụ nị Alị-eze Osolobuẹ e rugụọlẹ ebe ụnụ rị.

²⁹ Nị ịhịan saẹka banhan iwe dikẹn, kwarị ibu ẹ bụ o buni ụzọ kẹnmẹgụọ a? O kẹnmẹgụ a k'ọ nọ saẹka kwarị ihiẹn rị iwe ẹ.

³⁰ “Onyẹ rịlẹni azụụn nke m rị a lụsọn m ọgụn; onyẹ ghalẹni e sọn m e kpọnkikomẹ rị e kpọnyịya.

³¹ M rị nwan a gwa ụnụ nị wẹ jẹnkọ d'a gbagharị ịhịan njọ lẹ eje-oku ile, kanị agbagharịkọ wẹ onyẹ kuja oku Mmọn-nsọ.

³² Nị wẹ gbagharịghọ onyẹ kuja oku mmẹ wụ Nwa nke Ịhịan; kanị, agbagharịkọ wẹ onyẹ kuja oku Mmọn-nsọ; agbagharịkọ w'a kẹ ogẹnni kẹ ogẹn ahụn lalanị.

Ezigbo Osisi, Ezigbo Mkpụrụ

³³ “I mẹmẹ osisi n'ọ rị mma, mkpụrụ a a rị mma; i mẹmẹ osisi n'ọ jọ njọ, mkpụrụ a a jọ njọ. Makẹni, mkpụrụ osisi kẹ wẹ gi a marịn a.

³⁴ Igunrun agwọ! Nanị ụnụ a dọn ku ihiẹn rị mma ebe ụnụ wụ ndị-njọ? Ihiẹn jun ịhịan obi ya kẹ ọnụ a e ku.

³⁵ Ezigbo ịhịan a gha ihiẹn rị mma o butọ e wepụha ihiẹn rị mma, kanị eje-ịhịan a gha eje-ihiẹn o butọ e wepụha eje-ihiẹn.

³⁶ M rị nwan a gwa ụnụ n'o ru Ụhụọhịn Ichin-ikpe, wẹ k'a jụ ịhịan oku ile nwọnlẹni isi o ku.

³⁷ Makẹni oku-ọnụ ị kẹ w'e gi ma ị ikpe, oku-ọnụ ị kẹ w'e gizikwọ sị ikpe amanị ị.”

A Sị Wẹ Jesu Ghọsị Wẹ Ahịma Pụ-ichẹn

³⁸ Ogẹn ahụn, ụfọdụ ndị-nkuzi Iwu lẹ ndị Itu-Farisi nọ sị Jesu, “Onyẹ-nkuzi, ẹnyi chọ n'ị rụnghọsị ẹnyi ọrụn-atụmẹnya pụ ichẹn hụn ẹnyi e gi kweri.”

³⁹ Kanị ọ nọ sị wẹ, “Eje-agbọ ẹnya rịlẹni ụzọ ohu rị a chọ ahịma! Kanị, onwọnni ahịma wẹ k'a ghọsị wẹ wezụka ihiẹn mẹ Jona onyẹ-amụma!

⁴⁰ Kẹ Jona dọn nọ akpọhịn ẹtọ imẹ ẹfọ azụn hụ hi-ogbe, ẹrịra kẹ mmẹ nwẹn Nwa nke Ịhịan k'a nọ akpọhịn ẹtọ imẹ alị.

⁴¹ “Ndị Ninivẹ jẹnkọ d'a shịagbu agbọnị ẹri ogẹn Okinkin-ikpe, makẹni e rogharịghọ wẹ ogẹn Jona gi zi wẹ ozi Osolobuẹ; ka lee nwan, onyẹ ka Jọnụ rị ebeni!

⁴² “Eze-okpoho alị Shẹba jẹnkọ d'a shịagbu agbọnị ẹri ogẹn Okinkin-ikpe. Makẹni, ọ gha alị tegbu enwẹn ẹ bịa d'e gọn amamihiẹn Solomọnụ ntịn; ka lee nwan, onyẹ ka Solomọnụ rị ebeni!

Ihiẹn E Wekinhẹn Eje-mmọn Wẹ Chụpụgụ

⁴³ “Eje-mmọn gha imẹ ịhịan pụha, ọ ghasọnmẹ alị kpọ nkụn, chọkọ ebe ọ nọ zu ikẹn. Omẹni ọ hụnnị,

⁴⁴ ọ sị enwẹn ẹ, ‘M k'a lakin iwe m hụn m gha pụha.’ O ru ẹ, hụn a nị onwọnni ihiẹn rịn'a, n'a zagụọ w'a, dọnkwama,

⁴⁵ o jẹn ozigbo d'e wẹhẹ eje-mmọn ẹsa ọzọ ka ya nwẹn njọ, a wịrị wẹ ban imẹ onyẹ hụ d'e biri. Ọnọdị hụnyẹ a jọnahịn nwan nke ibuzọ njọ. Ẹrịra k'o k'a rịnị eje-agbọnị.”

Nnẹ Lẹ Umunẹ Jizọsị

⁴⁶ Ogẹn Jizọsị gi rị a gwa igunrun hụ oku, nnẹ ẹ lẹ umunẹ-ẹ-ikẹnnyẹ nọ bịa d'e turu ihun ezi, makẹni wẹ chọ nị wẹ gwa a oku.

⁴⁷ Ya kẹ onyẹ ohu nọ sị a, “Lee ẹ, nnẹ i lẹ umunẹ-i-ikẹnnyẹ turu ihun ezi; wẹ chọ nị wẹ gwa ị oku.”

⁴⁸ Kanị, ọ nọ za onyẹ hụ gwan'a, “Onyẹ wụ nnẹ m? Elee ndị wụ umunẹ-m-ikẹnnyẹ?”

⁴⁹ O zin ndị nsọnmazụụn a ẹka, sị, “Ndịnị rị ebeni, uwẹ wụ nnẹ m lẹ umunẹ-m-ikẹnnyẹ.

⁵⁰ Makẹni, onyẹ hụn e mẹ uche Nẹdi m rị elu-igwee, ịya wụ nwẹnẹ m okẹnnyẹ, ịya wụ nwẹnẹ m okpoho, ịya wụ nnẹ m.”