Matiu 10 - Ika

Isi Nke Iri Ndị-ozi Mmẹbụọ Pụ-ichẹn (Ndị Apọstụ)

¹ Ya kẹ Jizọsị nọ kpọ ndị nsọnmazụụn a mmẹbụọ, ye wẹ ikẹn w'e gi chụpụ eje-mmọn lẹ ikẹn w'e gi zụọ ụdị emu ile lẹ ọrịa ile.

² Ndịnị wụ ẹfan ndị-ozi mmẹbụọ hụ pụ-ichẹn: onyẹ ibuzọ wụ Saịmọnụ hụn w'a kpọ Pita, Andrụ nwẹnẹ ẹ, Jemisi nwa Zẹbẹdi lẹ Jọnụ nwẹnẹ ẹ,

³ Filipu lẹ Batolomi, Tamọsị lẹ Matiu (Matiu hụn te a na ụgwọ-isi), Jemisi nwa Alịfịọsụ lẹ Tadịọsụ,

⁴ Saịmọnụ hụn te rị ndị gi ẹka-ikẹn e mẹ ni wẹ chụpụ ndị Rom rị a kị alị wẹ lẹzi Judas Iskarọtụ hụn re Jizọsị ogẹn ikpanzụụn.

Ọrụn Ndị-ozi Hụ Pụ-ichẹn

⁵ Ya Jizọsị nọ ye madụ mmẹbụọnị ikẹn, zipụ wẹ: ọ sị wẹ, “Ejẹnkwọlẹ ni d'e kunrun ndị wụlẹni ndị Ju; abanyekwọlẹ ni obodo ọwụlẹ rị alị Sameria.

⁶ Ka jẹnmẹ ni d'e kunrun atụnrụn Izrẹlụ huni.

⁷ Ụnụ jẹnkọnị, e zi ni oziọma, a sị, ‘Alị-eze elu-igwee a rịgụọ nsue.’

⁸ Zụọ nị ndị emu, kpọtiẹn ni ndị nwụnhụnnị, zụọ nị ndị oti, chụpụ nị eje-mmọn. Ụnụ nwọnhẹn ẹ ọfẹ, ye n'ẹ ọfẹ.

⁹ Ewerilẹ ni egho ọwụlẹ.

¹⁰ Ebulẹ ni ẹkpa; ewerilẹ ni ẹwuru mọbụ akpụkụ ọzọ cheni hụn ụnụ yi; ebulẹ ni ọkpọ. Makẹni, o furu ni wẹ e ye ndị-ọrụn ihiẹn wẹ gi e bi.

¹¹ “Obodo ọwụlẹ ụnụ banye, kẹ hụn hi ogbe kẹ hụn mẹ ẹkẹrẹ, chọrị nị onyẹ furuni. Nọdị nị iwe ẹ d'e ru ogẹn ụnụ e gi gha obodo ahụn pụ.

¹² Ụnụ bankọnị imẹ ụlọ hụ, kele ni wẹ, sị, ‘Ya rịnị ụnụ mma.’

¹³ Omẹni ndị rị ụlọ hụ e furughọ nke-esi, ụw'ọma ụnụ kele a bọ wẹ; kanị omẹni efuruni wẹ, ụw'ọma ụnụ kele e kinhẹnni ụnụ.

¹⁴ Onyẹ ọwụlẹ mọbụ obodo ọwụlẹ nabanhanlẹni ụnụ mọbụ jụ n'o gọnkọ ozi ụnụ ntịn, gha nị iwe onyẹ hụ mọbụ obodo hụ pụ, ụnụ e tichanpụ ẹjan rị ụnụ ụkụ tọn'a.

¹⁵ Ezioku kẹ m rị a gwa ụnụ, o sikọ d'a ka obodo hụ njọ karị alị Sodọm lẹ Gomora Ụhụọhịn Ikin-ikpe.

Ukpokpo Hụn Lalanị

¹⁶ “Lee n'ẹ, m zikọ ụnụ kẹ atụnrụn wẹ ziye imẹ igunrun ẹwọrọ. E gi ni uche e bi — rịkẹ agwọ, ka rị nị kẹ nduru hụn ghalẹni a rụ ịhịan ẹhụ.

¹⁷ Kpachanpụ nị nị ịhịan ẹnya, makẹni wẹ jẹnkọ d'e wejẹn ụnụ ọgwa rị ichẹn-ichẹn, fịan ụnụ mkpịnsịn imẹ ụlọ-ofufe wẹ.

¹⁸ Wẹ sikọ d'e gi ufiri m we ụnụ jẹnni ndị Gọvanọ lẹ ndị-nze. Kanị o k'a wụ oghere ịshịanị m ẹri idẹnya wẹ lẹ ndị alị ọzọ ile.

¹⁹ “Kanị ogẹn w'e gi we ụnụ jẹnni wẹ, ehuelẹ ni uhue ihiẹn ụnụ k'e ku mọbụ kẹ ụnụ a dọn ku ẹ, makẹni ụnụ k'e nwọnhẹn ihiẹn ụnụ k'e ku ogẹn hụ.

²⁰ Makẹni ẹlẹ ụnụ jẹnkọ d'e ku; Mmọn Nẹdi ụnụ jẹnkọ d'e gi ụnụ ku.

²¹ “Nwẹnẹ k'e we nwẹnẹ ye wẹ gbu; nẹdi k'e we nwa a ye wẹ gbu; ụmụ k'e bunụmanị ndị mụnị wẹ, mẹ wẹ gbu wẹ.

²² Ize ụnụ k'a ban ịhịan ile makẹ ufiri ẹfan m, kanị onyẹ hụn din ndidin d'e ru isi ẹ jẹnkọ d'e nwọn nzụọpụha.

²³ Wẹ kpokpo ọnụ imẹ obodo ohu, gbashi ni hụn-ẹbọ. M rị a gwa ụnụ ezioku nị ụnụ gini d'e jẹnchanrịngụ obodo ile rị Izrẹlụ, Nwa nke Ịhịan sikọ d'a bịa.

²⁴ “Onyẹ wẹ rị a zụn akanị onyẹ rị a zụnn'a; odibo akanị di-nwọnn'ẹ.

²⁵ O higụọ nị onyẹ wẹ rị a zụn n'ọ rị kẹ onyẹ rị a zụnn'a; o higụọ nị odibo n'ọ rị kẹ di-nwọnn'ẹ. Omẹni wẹ kpọ onyẹ nwọn ụlọ ‘Onyẹ-isi eje-mmọn’, kị wẹ jẹnkọ d'a kpọ ndị ikpụlọ a?!

Onyẹ Hụn Furu W'a Tụ Egun Ẹ

²⁶ “Ya wụ, atụlẹ ni nwan egun wẹ. Makẹni, onwọnni ihiẹn kpumẹni hụn jẹnkọlẹni d'e kpupụ mọbụ ihiẹn zuerini hụn jẹnkọlẹni d'a wa.

²⁷ Ihiẹn m gwa ụnụ imẹ ishi, ku n'ẹ ifọnrin-ifọn; ihiẹn wẹ kagwa ụnụ, gi n'ẹ yi oro elu ụlọ.

²⁸ Atụlẹ ni egun ndị hụn sikọ d'a saẹka gbu ẹhụ bụ asa wẹ ẹka gbu umẹ-ndụn; ka tụ nị egun onyẹ hụ k'a saẹka tikpọ kẹ umẹ-ndụn kẹ ẹhụ imẹ ọkụn-mmọn.

²⁹ Ẹlẹ ẹbụọ ịkọbọ kẹ w'e re achụ? Kanị onwọnni achụ ohu sikọ d'a dan alị omẹni Nẹdi ụnụ anịn'a dan.

³⁰ D'e rudẹ ntutu rị ụnụ isi, Osolobuẹ a gụngụọ wẹ.

³¹ Atụlẹ ni nwan egun, ụnụ ka mkpa a rị karịdẹ achụ bu ọda.

Ikupụ A Nị Ị Wụ Nke Kraịstị Lẹ Ịghọrị Nị Y'ẹlẹ Nke Ẹ

³² “Ya wụ, onyẹ nọ idẹnya ịhịan ku ẹ n'ọ wụ nke m, mmẹ nwẹn jẹnkọ d'a nọ idẹnya Nẹdi m rị elu-igwee kuzikwọ a n'ọ wụ nke m.

³³ Kanị onyẹ nọ ebe ịhịan rị sị n'ọ marịn m, mmẹ nwẹn jẹnkọ d'a nọzị ebe Nẹdi m rị elu-igwee sị nị amarịn m'a.

Ẹlẹ Udọn Kanị Ọpịa-agha

³⁴ “Erokwọlẹ ni nị m bịa d'e mẹ ni udọn rị elu ụwa. Mba, ezioku kẹ m rị a gwa ụnụ, ẹlẹ udọn kanị ọpịa-agha.

³⁵ Makẹni m bịa d'e kebe okẹnnyẹ lẹ nẹdi ẹ, okpoho lẹ nnẹ ẹ, nwunyẹ-nwa lẹ nnẹ-di ẹ.

³⁶ Ndị ikpụlọ ịhịan jẹnkọ d'a wụ ndị-iṅẹnrẹn ẹ.

³⁷ “Onyẹ hụn nwọn ihiẹn-ọsụsụọ nẹdi ẹ mọbụ nnẹ ẹ karị hụn o nwọnni m efuruni m; onyẹ ọwụlẹ nwọn ihiẹn-ọsụsụọ nwa a okẹnnyẹ mọbụ nwa a okpoho karị hụn o nwọnni m efuruni m.

³⁸ Onyẹ hụn burulẹni obe ẹ sọnmẹ m e furuni m.

³⁹ Onyẹ ọwụlẹ chọ n'ọ ghe isi ẹ, isi ẹ a tọ a, kanị onyẹ hụn gi ufiri m tuhu ndụn a jẹnkọ d'a hụn a.

Ụgwọ-ọrụn Ndị-ozi Jesu Lẹ Ndị Nabanhannị Wẹ

⁴⁰ “Onyẹ nabanhan ụnụ, mmẹ k'ọ nabanhan; onyẹ nabanhannị m nabanhan onyẹ zihẹni m.

⁴¹ Onyẹ nabanhan onyẹ-amụma makẹni ọ wụ onyẹ-amụma jẹnkọ d'e nwọnhẹn ụgwọ-ọrụn onyẹ-amụma; onyẹ nabanhan onyẹ ezi-omumẹ makẹni ọ wụ onyẹ ezi-omumẹ jẹnkọ d'e nwọnhẹn ụgwọ-ọrụn onyẹ ezi-omumẹ.

⁴² Onyẹ yedẹ onyẹ ohu imẹ ndịnị mẹ ẹkẹrẹ mkpu mirin-oyi ohu makẹni ọ wụ onyẹ nsọnmazụụn m, m rị a gwa ụnụ ezioku, ụgwọ-ọrụn a etuhukọ.”