Matiu 1 - Ika

Isi Nke Ohu

¹ Ọnwan wụ ẹkụkwọ banyeni Jizọsị wụ Kraịstị hụn wụ nwa Defidi, nwa Ebraham.

Gha Ebraham D'e ru Defidi

² Ebraham wụ nẹdi Aziki, Aziki wụ nẹdi Jekọpụ, Jekọpụ wụ nẹdi Juda lẹ umunẹ ẹ ikẹnnyẹ.

³ Juda wụ nẹdi Pẹrẹzi lẹ Zẹra. Nnẹ wẹ wụ Tama. Pẹrẹzi wụ nẹdi Hẹzrọnụ, Hẹzrọnụ wụ nẹdi Aram,

⁴ Aram wụ nẹdi Aminadabụ, Aminadabụ wụ nẹdi Nashọnụ, Nashọnụ wụ nẹdi Salụmọnụ,

⁵ Salụmọnụ wụ nẹdi Bụazị, nnẹ Bụazị wụ Rehabụ. Bụazị wụ nẹdi Obẹdi, nnẹ Obẹdi wụ Rutu. Obẹdi wụ nẹdi Jese.

Gha Defidi D'e ru Ogẹn Wẹ Gi Kpụnshi Wẹ Babilọnụ

⁶ Jese wụ nẹdi Defidi hụn wụ eze. Eze wụ Defidi wụ nẹdi Solomọnụ hụn nnẹ ẹ te wụ nwunyẹ Yuria.

⁷ Solomọnụ wụ nẹdi Rehobụam, Rehobụam wụ nẹdi Abija; Abija wụ nẹdi Asafụ,

⁸ Asafụ wụ nẹdi Jehoshẹfatị; Jehoshẹfatị wụ nẹdi Joram; Joram wụ nẹdi Uzịa.

⁹ Uzịa wụ nẹdi Jọtam, Jọtam wụ nẹdi Ahazị; Ahazị wụ nẹdi Hezikaya.

¹⁰ Hezikaya wụ nẹdi Manasẹ, Manasẹ wụ nẹdi Amọnụ; Amọnụ wụ nẹdi Josaya.

¹¹ Josaya nọ mụ Jekọnaya lẹ umunẹ ẹ ikẹnnyẹ. Ogẹn Jekọnaya lẹ umunẹ ẹ ikẹnnyẹ kẹ wẹ gi kpụn wẹ shi alị Babilọnụ.

Kẹ Wẹ Kpụnshi Wẹ Babilọnụ D'e Ru Ogẹn Kraịstị

¹² Ogẹn wẹ gi kpụngụ wẹ shi alị Babilọnụ, Jekọnaya nọ mụ Shiẹtiẹlụ; Shiẹtiẹlụ wụ nẹdi Zerubabẹlụ,

¹³ Zerubabẹlụ wụ nẹdi Abiyudu, Abiyudu wụ nẹdi Ẹliakim, Ẹliakim wụ nẹdi Azọ,

¹⁴ Azọ wụ nẹdi Zadọkụ, Zadọkụ wụ nẹdi Akịm, Akịm wụ nẹdi Ẹlayudu,

¹⁵ Ẹlayudu wụ nẹdi Ẹliẹza, Ẹliẹza wụ nẹdi Matanị, Matanị wụ nẹdi Jekọpụ,

¹⁶ Jekọpụ wụ nẹdi Josẹfụ; Josẹfụ wụ di Meri — onyẹ hụn mụ Jizọsị hụn w'a kpọ “Kraịstị.”

¹⁷ Ya wụ, gha ogẹn Ebraham d'e ru ogẹn Defidi, wẹ ile rị agbọ mmẹnọ, gha ogẹn Defidi d'e ru ogẹn wẹ gi kpụn wẹ shi alị Babilọnụ wụ agbọ mmẹnọ; gha ogẹn wẹ gi kpụn wẹ shi alị Babilọnụ d'e ru ogẹn Kraịstị wụ agbọ mmẹnọ.

Ọmụmụ Kraịstị Onyẹ Nzụọpụha hụ Osolobuẹ Tumẹ

¹⁸ Ẹnịna kẹ wẹ dọn mụ Jizọsị Onyẹ Nzụọpụha hụ Osolobuẹ tumẹ: Meri hụn jẹnkọ d'a mụn'a lẹ Josẹfụ a kwademẹchanrịngụọ nị wẹ lụ, kanị, nị wẹ d'a nọgbama, Meri a tụrụgụọ imẹ ghahanị ikẹn Mmọn-nsọ.

¹⁹ Josẹfụ hụn jẹnkọ d'a lụn'a wụ onyẹ ezi-omumẹ. Kanị Josẹfụ achọnị n'ọ fa a idẹnya ịhịan ile, ọ nọ bu ẹ obi n'o sikọ d'a gwa a nzuzue n'ọ lụkọzị a.

²⁰ Kanị, ogẹn o gi rị e ro ihiẹnni, ọ nọ rọhụn mmọn-ozi Di-nwọnni-ẹnyi k'ọ bịa d'e kunrun ẹ, sị, “Josẹfụ nwa Defidi, atụlẹ egun; lụma Meri, makẹni nwa ọ rị imẹ ẹ gha ẹka Mmọn-nsọ bịa.

²¹ O k'a mụ okẹnnyẹ. I jẹnkọ d'a gụn nwa hụ Jesu (Jizọsị) makẹni ịya jẹnkọ d'a zụọpụha ndị nke ẹ imẹ njọ wẹ.”

²² Ihiẹn ndịnị ile mẹ kẹni wẹ gi mẹzu ihiẹn Onyẹ-nwọnni-ẹnyi ku ghahanị onyẹ-amụma, sị,

²³ “Lee ẹ, okpoho kelẹni marịn okẹnnyẹ jẹnkọ d'a tụ imẹ, mụ okẹnnyẹ; wẹ k'a kpọ nwa hụ ‘Imanuẹlụ’, ya wụ, ‘Osolobuẹ rị imẹ igunrun ẹnyi.’ ”

²⁴ Ogẹn Josẹfụ gi tẹnhin, ọ nọ mẹ ihiẹn mmọn-ozi Di-nwọnni-ẹnyi gwa a, lụma Meri;

²⁵ kanị, aranhịnnị wẹ nke di lẹ nwunyẹ d'e ru ogẹn Mẹri gi mụgụ okẹnnyẹ ibuzọ a hụ. Josẹfụ nọ gụn nwa hụ Jizọsị.