Malakaị 2 - Ika

Isi Nke Ẹbụọ

¹ “Nị m gwa nwan ụnụ ndị nchụn-ẹjan ihiẹn m sikọ d'e mẹ ụnụ:

² ụnụ jụ nị ụnụ egọnkọ m ntịn, nị ụnụ egikọ oku iye ẹfan m ọghọ dọn, m k'a bụ ụnụ ọnụ; m k'e gi ịbụ-ọnụ nọkin ngọzi ụnụ — e mẹgụọdẹ m'a, makẹni ụnụ egini oku iye ẹfan m ọghọ dọn. Ya kẹ Osolobuẹ ihiẹn ile rị okpuru ẹ ku.

³ “M k'e ye ụmụ ụnụ afụnfụn, e te m ụnụ nsịn anụ ihun, anụ hụ ụnụ gi chụn ẹjan, e kpọnpụ wẹ ụnụ lẹ nsịn hụ.

⁴ Ogẹn ahụn, ụnụ a marịn nị mmẹ ku ihiẹnni makẹ nkwa m kwe ebọn Livaị. Ya kẹ Osolobuẹ ihiẹn ile rị okpuru ẹ ku.

⁵ “Nkwa m hụn rị ẹgbata mmẹ lẹ ebọn Livaị e ye ndụn lẹ ọrịrịmma. E yegụọ m wẹ ya. Wẹ nwẹn e te gbayeghọ m, egini wẹ ẹfan m gu egu;

⁶ wẹ te hụ a kuzi ihiẹn wụ ezioku; onwọnni onyẹ nụ eje-ihiẹn ọnụ wẹ; e gi wẹ ihumẹchanrịn isi lẹ ezioku sọn m — mẹ ndị bu ọda bibehi eje-obibi.

⁷ Makẹni ọnụ onyẹ nchụn-ẹjan kẹ wẹ nọ a hụn amamihiẹn, ọnụ a kẹ wẹ nọ a mụnrụn Iwu Osolobuẹ — makẹni ụkọ Osolobuẹ k'ọ wụ.

⁸ “Kanị ụnụ nwẹn a ghagụọ ụzọ pụ; ụnụ e gigụọ eje-ihiẹn ụnụ rị a kuzi mẹ ndị bu ọda kpọgburu; ụnụ e tikpọgụọ iwu hụn m ye ndị Livaị. Ya kẹ Osolobuẹ ihiẹn ile rị okpuru ẹ ku.

⁹ Mmẹ nwẹn e mẹgụọ nwan ụnụ wụrụ ndị wẹ e legberi, e welụagụọ m ụnụ alị ẹnya alị ile, ebe o mẹni ụnụ ara gha ụzọ m, ụnụ e lee ịhịan ẹnya ihun a kuzi iwu m.”

¹⁰ Ẹlẹ nẹdi ohu mụ ẹnyi ile? Ẹlẹ Osolobuẹ ohu ke ẹnyi ile? Kị haịn nwan ẹnyi gi a tụ ibe ẹnyi ntụ, e tikpọ iwu Osolobuẹ ye ndị nẹdi ẹnyi?

¹¹ Ndị Juda rị e gi ntụ e fe Osolobuẹ; ịhịan rị e mẹ arụ imẹ Izrẹlụ ile lẹ imẹ Jerusalẹm! Ndị alị Juda hụ e mẹrụ Ụlọ-nsọ Osolobuẹ hụn a sụọ Osolobuẹ ụsụọ, a lụ ikpoho alị ọzọ e fe mmọn wụlẹni Osolobuẹ!

¹² Osolobuẹ ya wepụ onyẹ ọwụlẹ mẹ ihiẹnni lẹ ndị bikinni wẹ imẹ ebọn Jekọpụ wụ Izrẹlụ — ọsụọn'a nị hụnyẹ hụkwọ a chụnyeni Osolobuẹ ihiẹn ile rị okpuru ẹ ẹjan.

¹³ Eje-ihiẹn ọzọ ụnụ e mẹ wụ nị ụnụ a kwan ẹnya-mirin e kpu ukpo nchụn-ẹjan Osolobuẹ, a kwan ụya, nị a ra narịnzị oyiye ụnụ, nị ihiẹn ụnụ wẹhẹ arịzị a sụọ a.

¹⁴ Ụnụ hụ a jụ, “Kị haịn Osolobuẹ gilẹni a narịn oyiye ẹnyi?” Osolobuẹ rị a shịagbu i ẹri haịn, ọ rị a hannị ịyụ lẹ nwunyẹ-ụtụntụn ị eṅẹn ebe ị nọ la a tọ, ọsụọn'a nị ịyụ lẹ ịya rị kete-kete, ọsụọn'a n'i kwe nkwa lụrụ a.

¹⁵ Ẹlẹ ẹhụ ohu kẹ Osolobuẹ mẹ wẹ wụrụ — o mẹ mmọn a nọdị imẹ ẹ? Kị Osolobuẹ chọkọ o gi mẹ ẹ? O mẹ ẹ kẹni ụmụ ụnụ wụrụ nke Osolobuẹ nkesi. Kpachanpụ nwan ẹnya, amamgbe y'a latọ nwunyẹ-ụtụntụn ị.

¹⁶ Osolobuẹ wụ Chuku Izrẹlụ sị mkpechan e ze ẹ ize, nị onyẹ mẹn'ẹ rị e gi eje-ihiẹn e kpumẹ ẹwuru ẹ. Ya kẹ Osolobuẹ wụ Chuku Izrẹlụ ku. Kpachanpụ nị nwan ẹnya ihiẹn ụnụ rị e ro — alatọkwọlẹ ni nkwa hụ ụnụ gi lụ.

¹⁷ Ụnụ e kusọnmẹ ihiẹn ndụn ụnụ gi a gụ Osolobuẹ. Kanị ụnụ sị, “Nanị kẹ ẹnyi dọn ku ndụn-ọgụgụ ye ẹ obi?” Ụnụ a sị, “Ndị ile e mẹ eje-ihiẹn wụ ezigbo ịhịan ẹnya Osolobuẹ; ihiẹn wẹ a sụọd'a a sụọ,” mọbụ “Elebe kẹ Osolobuẹ hụn a han ezigbo eṅẹn rị?”