Malakaị 1 - Ika

Isi Nke Ohu

¹ Ọnwan wụ ozi Osolobuẹ sị Malakaị zi ndị Izrẹlụ.

Izrẹlụ Rị Osolobuẹ Ụda

² Osolobuẹ sị ndị Izrẹlụ, “A ghọsịghọlẹ m ụnụ nị ụnụ rị m ụda.” Kanị ụnụ hụ a sị, “Nanị kẹ ẹnyi dọn rị ị ụda?” Mmẹ wụ Osolobuẹ sị, “Ẹlẹ umunẹ kẹ Isọ lẹ Jekọpụ wụ? Kanị Jekọpụ rị m ụda,

³ Isọ arịnị m ụda, m nọ mẹ alị Isọ lẹ ugu ile ọ rị elu ẹ gba okpokoro, bu ukuu ẹ tọnị nkitẹ-ọfịa a kpa imẹ atụ.”

⁴ Ndị alị Isọ wụ Ẹdọm, jẹnkọ d'a sị, “E tikpọgụọ wẹ ẹnyi ru alị, kanị ẹnyi k'a tụndọnzi ihiẹn tikpọnị.” Kanị Osolobuẹ Ihiẹn ile rị okpuru ẹ, sị, “Wẹ tụndọnzi, e tikpọzị m'a — d'e ru nị a kpọma w'a, ‘Eje-alị, alị Osolobuẹ k'e busọn olulu jẹnrin ejẹn.’

⁵ Ụnụ ndị Izrẹlụ k'e gi ẹnya ụnụ hụn ihiẹn ndịnị, ụnụ e gi ọnụ ụnụ sị, ‘Osolobuẹ e hikẹkwọ ogbe! Ẹlẹkwọ imẹ alị Izrẹlụ sụọ — kẹ imẹ alị ndị ọzọ!’

Mban Hụn Osolobuẹ Bannị Ndị-ọrụn A

⁶ “Nwa a gbaye nẹdi ẹ; odibo a gbaye di-nwọnn'ẹ. Omẹni nẹdi kẹ m wụ, mgbaye m? Omẹni di-nwọnni ụnụ kẹ m wụ, mgbaye m? Ya kẹ Osolobuẹ ihiẹn ile rị okpuru ẹ rị a jụ ụnụ ndị nchụn-ẹjan rị e budan ẹfan m. Ụnụ hụ a sị kẹ nanị ụnụ dọn budan ẹfan m?

⁷ Ẹjan ndịnị rụnị ụnụ rị a chụnyeni m elu ukpo nchụn-ẹjan m kẹ ụnụ gi e budan ẹfan m. “Ụnụ sị, ‘Nanị ẹnyi dọn mẹrụ ihiẹn i?’ Teburu Osolobuẹ ụnụ rị a kpọ ihiẹn mmakalaka kẹ ụnụ gi e mẹrụ ihiẹn m.

⁸ “Hụn ahụn ụnụ gi anụ ẹnya kpọhị a chụnyeni m ẹjan — ẹlẹ eje-ihiẹn rọ? Hụn ahụn ụnụ a chụnyeni m anụ dan ngụrọ lẹ anụ rịlẹni ikẹn — ẹlẹ eje-ihiẹn rọ? Welele ni anụ nọ ẹrịra ye Gọvanọ ụnụ. Nị ihiẹn ụnụ sụọ a? N'o mẹni ụnụ ihiẹn ụnụ rịọ a? Ya kẹ Osolobuẹ ihiẹn ile rị okpuru ẹ ku.

⁹ “Rịọnị ẹnyi nwan Chuku, n'o yeni ẹnyi ẹka. Ị rịọ a, n'o kweri narịn ụnụ ihiẹn nọ ẹnịna mẹ ihiẹn ụnụ rịọ a? Ya kẹ Osolobuẹ ihiẹn ile rị okpuru ẹ ku.

¹⁰ K'ọ rị m nwan, onyẹ ohu imẹ ụnụ a gụnma ụzọ Ụlọ-nsọ, amamgbe ụnụ ghazị a mụye ọkụn nwọnlẹni ihiẹn m gi ẹ e mẹ elu ukpo nchụn-ẹjan m! Ihiẹn ụnụ rị e mẹ asụọnị m kaka; anarịnkọ m ẹjan ụnụ. Ya kẹ Osolobuẹ ihiẹn ile rị okpuru ẹ ku.

¹¹ “Alị ndị ọzọ a gbaye ẹfan m — gha ebe anwụn nọ a wa d'e ru ebe ọ n'a dan; ndị ile rị ebe ọwụlẹ a mụnị m nsẹnsi e gi a chụnyeni m ẹjan rụlẹni, makẹni ẹfan m nwọn ọghọ ọda-ọda imẹ alị ndị ọzọ.

¹² Kanị ụnụ hụ e budan ẹfan m ebe ụnụ rị e mẹ teburu Onyẹ-nwọn ihiẹn ile nọkẹ ihiẹn rụnị, e lelịa ihiẹn-oriri ẹ;

¹³ ụnụ e sị, ‘Ihiẹnni a gụ ndụn!’ Ụnụ e shin ẹ. Ya kẹ Osolobuẹ ku. “Ụnụ e wẹhẹsọnmẹ ihiẹn ụnụ narịn ịhịan mọbụ anụ dan ngụrọ mọbụ hụn rịlẹni ikẹn — wẹ ile kẹ ụnụ gi e ye oyiye! Nị m kweri narịn ụnụ ya? Ya kẹ Osolobuẹ ku.

¹⁴ “Ọ rịkọnị onyẹ-ntụ hụ mma, onyẹ hụn nwọn ebulu rị mma imẹ anụ a, kwe nkwa nị ịya k'o k'a chụnyeni Osolobuẹ, kanị ogẹn ru ọ chụnyen'ẹ hụn ẹhụ a zulẹni! Makẹni, okẹn Eze w'a gbaye ẹfan a imẹ alị ndị ọzọ kẹ m wụ. Ya kẹ Osolobuẹ ihiẹn ile rị okpuru ẹ ku.”