Makị 9 - Ika

Isi Nke Itenẹi

¹ Jesu nọ sịzị wẹ, “Ezioku kẹ m rị a gwa ụnụ, o nwọnghọ ndị wuzo ebeni jẹnkọlẹni d'a nwụnhụn d'e ru mgbe wẹ hụn Alị-eze Osolobuẹ k'o gi ikẹn hi-ogbe bịa.”

Kẹ Jizọsị Dọn Nwọnhutọ

² Akpọhịn isin a ghafegụ, Jesu nọ weri Pita lẹ Jemisi lẹ Jọnụ, we wẹ shi elu-ugu jẹn elu ọda-ọda, ya lẹ wẹ sụọ, ọ nọ nọ idẹnya wẹ nwọnhutọ:

³ ẹkwa a nọ gbukepụma ọda-ọda, onwọnni onyẹ rị elu ụwa k'a saẹka sụnwun ẹkwa ẹrịra.

⁴ Ya kẹ Ẹlaịja lẹ Mozizi nọ nwọnpụha, sọn Jesu kumẹ oku.

⁵ Pita nọ sị Jesu, “Onyẹ-nkuzi, ọ rịka mma nị ẹnyi rị ebeni! Nị ẹnyi mẹmẹ ọdụ ẹtọ, ohu wụ nke i, ohu wụ nke Mozizi, ohu wụ nke Ẹlaịja.”

⁶ (Pita amarịnzị ihiẹn o k'e ku, makẹni egun rị a tụ wẹ).

⁷ Orukpu nọ pụha d'e kpumẹ wẹ; olu nọ gha imẹ orukpu hụ sị, “Ọnwan wụ ezi Nwa m; gọn n'ẹ ntịn!”

⁸ Wẹ nọ lehunmẹ ẹnya ozigbo, kanị ahụnzịnị wẹ onyẹ ọwụlẹ karị Jesu sụọ.

⁹ Ogẹn wẹ lẹ Jizọsị gi gha elu-ugu hụ hidanla, ọ nọ sị wẹ, “Agwakwọlẹ ni onyẹ ọwụlẹ ihiẹn ụnụ hụn d'e ru ni Nwa nke Ịhịan a gha ọnwụn lihi.”

¹⁰ (Agwanị wẹ onyẹ ọwụlẹ; kanị wẹ sụọ nọdị, wẹ hụ e ku ẹ, a jụ ihiẹn wụ “ịgha ọnwụn lihi.”)

¹¹ A jụghọ wẹ Jesu ogẹn ahụn, sị, “Kị haịn nwan ndị-nkuzi Iwu gi sị nị Ẹlaịja k'a bịagụ Kraịstị kebe bịa?”

¹² Ọ nọ sị wẹ, “Ezioku rọ nị Ẹlaịja sikọ d'a bịagụ d'a kwademẹchanrịn ihiẹn ile. Kị ụnụ rozi nwan nị ya haịn Ẹkụkwọ-nsọ gi sị nị Nwa Nke Ịhịan jẹnkọ d'a ta okẹn afụnfụn, nị wẹ sikọ d'e legberi ẹ?

¹³ M rị a gwa ụnụ nị Ẹlaịja a bịagụọ, e mẹ w'ẹ ihiẹn sụọnị wẹ — ihiẹn ile Ẹkụkwọ-nsọ sị wẹ k'e mẹ ẹ.”

Jizọsị A Zụọ Nwata Okẹnnyẹ Eje-mmọn Rị Imẹ Ẹ

¹⁴ Ogẹn wẹ gi ru ebe ndị nsọnmazụụn a ndị ọzọ rị, wẹ nọ hụn igunrun hi-ogbe fihunmẹni wẹ lẹ ndị-nkuzi Iwu rị e sọn wẹ a dọ ndọndọ.

¹⁵ Hụn igunrun hụ ile gihụ hụn Jizọsị, ọ tụ wẹ ẹnya ọda-ọda, ya wẹ nọ gbaburu ẹ d'e kele ẹ.

¹⁶ Jesu nọ jụ ndị nsọnmazụụn a, sị, “Kị ụnụ lẹ wẹ rị a dọ?”

¹⁷ Onyẹ ohu rị igunrun hụ nọ sị a, “Onyẹ-nkuzi, m wẹhẹn'i nwa m okẹnnyẹ; eje-mmọn ghalẹni a nị a e ku oku rị imẹ ẹ:

¹⁸ o kwọndọn ẹ, o bu ẹ gbe alị, ụfọfọ a ghama a ọnụ, ọ tama nkwẹnrẹn-eze, ẹhụ a ile e shiri. M te sị ndị nsọnmazụụn ị chụpụ eje-mmọn hụ, ọ nịnị wẹ.”

¹⁹ Jizọsị nọ sị wẹ, “Agbọ nwọnlẹni okukwe! Elebe mmẹ lẹ ụnụ a nọru?! Elebe m'e dinruni ụnụ?! Wẹhẹni ni m nwata hụ!”

²⁰ Wẹ nọ wẹhẹni Jesu nwata hụ. Hụn eje-mmọn hụ gihụ hụn Jesu, ọ dọma nwata hụ, nwata hụ nọ dan alị, kperemẹ, ụfọfọ a ghama a ọnụ.

²¹ Jesu nọ jụ nẹdi nwata hụ, sị, “Elee mgbe ihiẹnni bidọn ẹ?” Ọ nọ sị, “K'ọ rị nwa-ndu.

²² Ọ tụ a e ye imẹ ọkụn lẹ imẹ mirin mbụ-lẹ-ẹbụọ, n'o gbu ẹ. Omẹni o nwọn ẹka ị k'a saẹka yeni ẹnyi, dodo, mẹni ẹnyi omikẹn.”

²³ Jesu nọ sị a, “Ị sị, ‘Omẹni ị k'a saẹka?’ Onwọnni ihiẹn wẹ ghalẹni a saẹka e mẹni onyẹ nwọn okukwe.”

²⁴ Ya kẹ nẹdi nwata hụ nọ dankpọpụ ẹkwan ozigbo, sị, “E kwerighọ m, yeni m ẹka ebe m nọlẹni nwọn okukwe!”

²⁵ Ogẹn Jesu gi hụn nị igunrun rị a gbaha, ọ nọ jụgbọ eje-mmọn hụ, sị a, “Ịyụ wụ eje-mmọn odin ghalẹni a nị nwatanị e ku oku mọbụ a nụ ihiẹn, m sị ị gha imẹ ẹ pụ! Abanzilẹ imẹ ẹ!”

²⁶ Eje-mmọn hụ nọ yi oro; ọ dọgụ nwata hụ ọda-ọda, ọ nọ gha imẹ ẹ pụha. Nwata hụ emẹhunmẹzini, nke wụnị ndị bu ọda nọ sị, “Ọ nwụnọlẹ!”

²⁷ Kanị, Jesu nọ kwọndọn ẹka nwata ahụn, weli ẹ, ọ nọ turu ọtọ.

²⁸ Ogẹn Jizọsị gi banye imẹ ụlọ, ndị nsọnmazụụn a nọ jụ a nzuzue, sị, “Kị haịn ẹnyi gilẹni saẹka chụpụ a?”

²⁹ Ọ nọ sị wẹ, “Ekpere sụọ kẹ wẹ gi a sa ẹka a chụpụ ụdịnị.”

Jesu E Kuzi Ẹ N'o K'a Nwụn, Lihizi

³⁰ Jizọsị lẹ ndị nsọnmazụụn a nọ pụ ebahụn, ghashi Galili. Jesu achọnị nị ịhịan marịn ebe wẹ rị,

³¹ makẹni ọ rị a kuzi ndị nsọnmazụụn a, a sị wẹ, “Wẹ sikọ d'e we Nwa nke Ịhịan ye ndị k'e gbun'ẹ; kanị, wẹ gbugụ a, o lihi nke akpọhịn ẹtọ.”

³² Kanị aghọtanị wẹ ihiẹn ọ rị e ku, bụ egun anịnị wẹ jụ a ụtaa.

Onyẹ Kachanrịn Ibe Ẹ Imẹ Ndị Nsọnmazụụn Jesu?

³³ E ru wẹ Kapanọm, a banyegụ wẹ mmụlọ, Jizọsị nọ sị ndị nsọnmazụụn a, “Kị ụnụ rịdẹ a dọ kẹ ẹnyi rị ụzọ?”

³⁴ Ya wẹ nọ gba nkịtịn, makẹni kẹ wẹ rị ụzọ, wẹ hụ a dọ onyẹ kachanrịnnị imẹ wẹ ile.

³⁵ Jesu nọ nọdị alị, kpọzụnhan wẹ mmẹbụọ, sị wẹ, “Onyẹ chọ n'ọ wụrụ onyẹ ibuzọ, ya wụrụ onyẹ ikpanzụụn, ya wụrụ odibo ụnụ ile.”

³⁶ Ya ọ nọ weri nwata ohu, bu ẹ tumẹ ihun wẹ. Ọ parị a, sị wẹ,

³⁷ “Onyẹ gi ufiri m nabanhan onyẹ ohu imẹ ndịnị, mmẹ k'ọ nabanhan; onyẹ hụn nabanhannị m ẹlẹ mmẹ k'ọ nabanhan, onyẹ hụn zini m k'ọ nabanhan.”

Onyẹ Rịlẹni A Lụsọn Ụnụ Ọgụn Rị Azụụn Nke Ụnụ

³⁸ Jọnụ nọ sị Jesu, “Onyẹ-nkuzi, ẹnyi hụn okẹnnyẹ ohu k'ọ rị e gi ẹfan ị a chụpụ eje-mmọn, ẹnyi nọ kụsị a, makẹni ara sọn ẹnyi.”

³⁹ Kanị Jesu nọ sị a, “Akụsịlẹ n'a; makẹni onwọnni onyẹ gigụhụ ẹfan m rụn ọrụn-atụmẹnya hụn sikọ d'e kujakẹnrin oku m.

⁴⁰ Makẹni onyẹ rịlẹni a lụsọn ẹnyi ọgụn rị azụụn nke ẹnyi.

⁴¹ Ezioku kẹ m rị a gwa ụnụ, onyẹ ọwụlẹ hụn k'e ye ụnụ mkpu mirin ohu ra makẹni ụnụ rị a za ẹfan Kraịstị jẹnkọ d'a narịn ụgwọ ọrụn a.

Ihiẹn E Buhẹ Njọ

⁴² “Onyẹ han onyẹ ohu imẹ ụmụẹka ndịnị kwerinini m mẹ njọ, ọ ka mma nị wẹ yimẹ ẹ ọlọ hi-ogbe olu, tụ a ye imẹ ohimin.

⁴³ Ya wụ, ẹka ị haịn ị mẹ njọ, bepụ a. Ọ ka mma n'i gi ẹhụ zulẹni oke banye ndụn karị n'ị nwọn ẹka ẹbụọ bụ y'a la ọkụn-mmọn, ọkụn hụ ghalẹni e tinyụn.

⁴⁴ Ọhọrị rị ebahụn ara nwụn; ọkụn rịn'a ara tinyụn.

⁴⁵ Ụkụ ị haịn ị mẹ njọ, bepụ a: ọ ka mma n'ị dan ngụrọ banye ndụn karị n'ị nwọn ụkụ ẹbụọ bụ y'a la ọkụn-mmọn.

⁴⁶ Ọhọrị rị ebẹhụ ara nwụn; ọkụn rịn'a ara tinyụn.

⁴⁷ Ẹnya ị haịn ị mẹ njọ, gụpụ a, ọ ka mma n'i gi ẹnya ohu banye Alị-eze Osolobuẹ karị n'ị nwọn ẹnya ẹbụọ, a tụ wẹ i ye ọkụn-mmọn.

⁴⁸ Ọhọrị rị ebẹhụ a ra nwụn; ọkụn rịn'a ara tinyụn.

⁴⁹ “Wẹ k'e gi ọkụn mẹ ịhịan ihiẹn wẹ gi nnu e mẹ.

⁵⁰ Nnu a rịka mma; kanị, o mẹ nwan n'ọ sụọzịnị ụsụọ, nanị y'a dọn mẹ ẹ sụọmazị ụsụọ? E nwọnni nnu imẹ ndụn ụnụ, e mẹ ni nị udọn a rị ẹgbata ụnụ lẹ ibe ụnụ.”