Makị 6 - Ika

Isi Nke Isin Ndị Obodo Nazarẹtị A Jụ Jizọsị

¹ Jizọsị a gha ebẹhụ pụ, ọ nọ shi obodo ọ nọ sue wụ Nazarẹtị, ndị nsọnmazụụn a nọ sọnmẹ ẹ.

² O ru Ụhụọhịn Ezumikẹn, ọ nọ kuzimẹ imẹ ụlọ-ofufe. Ọ tụ ndị bu ọda rị a nụn'a ẹnya, wẹ hụ a sị, “Elebe kẹ okẹnnyẹni nọ nwọnhẹn ihiẹn ndịnị ile? Elee ụdị amamihiẹn kẹ wẹ ye ẹ ihiẹnni? Elebe k'ọ nọ nwọnhẹn ikẹn o gi a rụn okẹn ọrụn-atụmẹnya ndịnị ọ rị a rụn?

³ Ọnwan ẹlẹ Kapịnta, nwa Meri? Ọnwan ẹlẹ nwẹnẹ Jemisi lẹ Josisi lẹ Judasị lẹ Saịmọnụ? Ẹlẹ ẹnyi lẹ umunẹ-ẹ-ikpoho rị ebeni?” Ya wẹ nọlẹni kweyen'ẹ.

⁴ Jizọsị nọ sị wẹ, “W'a gbaye onyẹ-amụma agbaye ebe ọwụlẹ wezụka imẹ obodo ẹ lẹ imẹ igunrun ndị nke wẹ lẹ imẹ ezi-lẹ-ụlọ a.”

⁵ Ọ sanị ẹka rụn ọrụn-atụmẹnya ebẹhụ wezụka ndị bulẹni ọda emu rị a kụ o bu ẹka kwasị zụọ.

⁶ Ọ hụ a tụ a ẹnya nị enwọn wẹ okukwe. Ya kẹ Jesu nọ jẹnsọnmẹmẹ ụmụ-alị rị ẹgbẹrẹ hụ, a kuzi wẹ.

Jesu E Zipụ Ndị-ozi Pụ-ichẹn Mmẹbụọ

⁷ Ọ nọ kpọ ndị nsọnmazụụn a mmẹbụọ hụ, zipụ wẹ mmadụ ẹbụọ-ẹbụọ, ye wẹ ikẹn w'e gi a chụpụ eje-mmọn.

⁸ Ọ sị wẹ ewerilẹ ihiẹn ọwụlẹ wẹ jẹnkọnị mmanị ọkpọ: wẹ ewerilẹ ihiẹn-oriri mọbụ egho, wẹ ebulẹ ẹkpa.

⁹ Wẹ yiri akpụkụ; kanị wẹ ewerilẹ ẹwuru ọzọ cheni hụn wẹ yi.

¹⁰ Ọ sịzị wẹ, “Ụlọ ọwụlẹ ụnụ banye, nọdị nị ebahụn d'e ru mgbe ụnụ gha obodo hụ pụ.

¹¹ Kanị, obodo ọwụlẹ nabanhanlẹni ụnụ mọbụ jụ nị egọnkọ wẹ ụnụ ntịn, ụnụ pụkọnị, kpukpupụ nị ẹjan rị ụnụ ụkụ tọnị wẹ — n'ọ wụrụ ihiẹn wẹ gi shịagbu wẹ ẹri.”

¹² Wẹ nọ jẹnmẹ d'e kumẹ oku-Chuku, a sị wẹ rogharị;

¹³ a chụpụ wẹ eje-mmọn bu ọda, a tankpu ndị emu rị a kụ udẹn-olivu, a zụọ wẹ.

Ọnwụn Jọnụ Hụn E Mẹ Mirin-Chuku

¹⁴ Eze wụ Hẹrọdụ nọ nụ ihiẹn ndịnị Jesu rị e mẹ — makẹni ẹfan Jesu a kpọgbarịọlẹ. O nwọn ndị rị a sị, “Jọnụ hụn e mẹ mirin-Chuku rọ, ọ ghagụọ ọnwụn lihi, ya haịn o gi nwọn ikẹn o gi a rụn ọrụn-atụmẹnya ndịnị.”

¹⁵ O nwọn ndị sị, “Ẹlaịja rọ.” Ndị ọzọ sị, “Onyẹ-amụma nọ kẹ ndị-amụma mbụ rọ.”

¹⁶ Kanị, ogẹn Hẹrọdụ gi nụ a, ọ sị, “Jọnụ hụn m bepụ isi a ghaọlẹ ọnwụn lihi.”

¹⁷ Hẹrọdụ ku ẹnịna makẹni Hẹrọdụ lẹ enwẹn ẹ zi wẹ d'a nwụnrụn Jọnụ, kẹn ẹ ẹgbụn, kpọkin ẹ ye ụlọ-ngan, makẹ ufiri Hẹrọdịasị nwunyẹ Filipu nwẹnẹ Hẹrọdụ hụn Hẹrọdụ jẹn d'a lụma,

¹⁸ hụn Jọnụ gi a sị Hẹrọdụ, “Iwu Osolobuẹ ekwerini n'i weri nwunyẹ nwẹnẹ i lụma.”

¹⁹ Iwe Jọnụ hụ e we okpoho hụ wụ Hẹrọdịasị; ọ hụ a chọ n'o gbu Jọnụ, kanị ọ sanị ẹka,

²⁰ makẹni egun Jọnụ a tụ Hẹrọdụ atụ, Hẹrọdụ a marịnghọ nị Jọnụ wụ onyẹ ezi-omumẹ lẹ onyẹ rị nsọ; Hẹrọdụ anịnị wẹ gbu ẹ. Ọ sụọ Hẹrọdụ n'o gọn ntịn ihiẹn Jọnụ rị e ku ọsụọn'a n'o gbu ẹ mgbu obi ogẹn ọwụlẹ o gi nụ a.

²¹ Ụhụọhịn wẹ gi a nyanhan ọmụmụ Hẹrọdụ e ru, Hẹrọdịasị nọ hụn oghere ọ chọkọ. Hẹrọdụ kpọ okẹn-oriri ụhụọhịn ahụn, kpọ ndị-isi Ọrụn lẹ ndị ọkị-agha lẹ ndị wẹ marịn amarịn imẹ Galili oriri hụ.

²² Nwa okpoho Hẹrọdịasị nọ pụha, tẹn egu: ọ sụọ Hẹrọdụ lẹ ndị ọbịa a ọda-ọda; Hẹrọdụ nọ sị nwata hụ, “Rịọ m ihiẹn sụọn'ị, m jẹnkọ d'e ye i y'ẹ.”

²³ Ọ nọ kunn'ẹ iyi, sị, “Ihiẹn ọwụlẹ i rịọ m, m sikọ d'e ye i y'ẹ, ọsụọn'a ahanmahan alị-eze m.”

²⁴ Nwata okpoho hụ nọ jẹn d'a jụ nnẹ ẹ, sị, “Kị m'a rịọ a?” Nnẹ ẹ nọ sị, “Isi Jọnụ hụn e mẹ mirin-Chuku.”

²⁵ Nwata hụ nọ gbakin ebe eze rị ozigbo, sị a, “M chọ n'ị gi mgbadọn ye m isi Jọnụ hụn e mẹ mirin-Chuku kikẹnni-kikẹnni!”

²⁶ Ihiẹnni nọ fụ eze; kanị ufiri iyi o kun lẹ ndị ọbịa a, ọ nịn'a sị nwata-okpoho hụ mba.

²⁷ Ọ nọ zi onyẹ-agha ohu e che ẹ nche d'e behẹ isi Jọnụ. Onyẹ-agha hụ nọ jẹn imẹ ụlọ-ngan, bepụ Jọnụ isi,

²⁸ gi mgbadọn buhẹ ẹ, bu ẹ ye nwata-okpoho hụ, ọ nọ bu ẹ jẹnni nnẹ ẹ.

²⁹ Ogẹn ndị nsọnmazụụn Jọnụ gi nụ ihiẹnni, wẹ nọ bịa d'e buru ẹhụ a li.

Jesu E Ye Igunrun Hi-ogbe Ihiẹn-oriri

³⁰ Ogẹn ndị-ozi hụ pụ-ichẹn gi lụa, wẹ nọ fihunmẹ Jizọsị, gwa a ihiẹn ile wẹ rụn lẹ ihiẹn ile wẹ kuzi.

³¹ Ọ nọ sị wẹ, “Pụha nị, nị ẹnyi shi ebe ịhịan bilẹni nị ụnụ d'e zu ikẹn ẹkẹrẹ!” Jesu ku ihiẹnni makẹni ndị bu ọda rị a bịa, a la, nke wụnị ya lẹ ndị nsọnmazụụn a ahụndẹni efe ri ihiẹn-oriri.

³² Ịya lẹ wẹ sụọ nọ banye ụgbọ-mirin, shi ebe ịhịan bilẹni.

³³ Ndị bu ọda hụn wẹ kẹ wẹ jẹnkọ, wẹ nọ marịn nị uwẹ rọ, ya wẹ nọ gha obodo ichẹn-ichẹn weri ụkụ gbama ọsọ, buni wẹ ụzọ ru ebahụn.

³⁴ Ogẹn Jesu gi nwan gha imẹ ụgbọ pụha, ọ hụn igunrun ahụn hi-ogbe, omikẹn wẹ nọ mẹ ẹ, makẹni wẹ nọ kẹ atụnrụn nwọnlẹni onyẹ-ndu; ọ nọ kuzimẹ wẹ ihiẹn bu ọda.

³⁵ Eki e gimẹ, ndị nsọnmazụụn a nọ bịa d'e kunrun ẹ, sị, “Onwọnni onyẹ bi ebeni ẹnyi rị bụ ọhịhị a gbamagụọ;

³⁶ gbashịa ndịnị nị wẹ shi alị-ọfịa lẹ ụmụ-alị rị ẹhụ ebeni d'e ṅọnrin ihiẹn-oriri.”

³⁷ Jesu nọ sị wẹ, “Ye ni wẹ ihiẹn-oriri.” Wẹ nọ jụ a, “Nị ẹnyi d'e gi egho-ọrụn akpọhịn ọgụn-iri ṅọnye ndịnị ile brẹdi ri?”

³⁸ Jesu nọ sị wẹ, “Ogbe brẹdi ole kẹ ụnụ gi? D'e lele ni.” E lele wẹ, wẹ nọ sị a, “Ogbe isẹn lẹ azụn ẹbụọ.”

³⁹ Jesu nọ sị ndị hụ wẹ nọdị alị ọkụdụ-ọkụdụ elu irurue ndụn rị ebẹhụ.

⁴⁰ Igunrun hụ nọ nọdịsọnmẹ ọkụdụ-ọkụdụ: o nwọn ndị rị ọgụn-isẹn, ọgụn-isẹn, o nwọn ndị rị iri-kwasị-ọgụnnaị, iri-kwasị-ọgụnnaị.

⁴¹ Jesu nọ weshi ogbe brẹdi isẹn hụ lẹ azụn ẹbụọ hụ enu, lee ẹnya elu-igwee, kpanmịn Osolobuẹ. O bebe brẹdi ndị hụ buye ndị nsọnmazụụn a d'e ye wẹ. O kezikwọnị wẹ azụn ẹbụọ hụ.

⁴² Wẹ ile nọ rijun ẹfọ.

⁴³ A tụtụkomẹ wẹ brẹdi lẹ azụn wẹ rihọdụ, o jun ụkpalị mmẹbụọ.

⁴⁴ Ikẹnnyẹ rị imẹ ndị ri ihiẹn-oriri hụ wụ mmadụ nnụ-uku isẹn.

Jesu E Jẹn Ijẹn Elu Mirin

⁴⁵ Jesu nọ chụ ndị nsọnmazụụn a ye imẹ ụgbọ ozigbo-ozigbo sị wẹ nje Bẹtisaịda nfetu ohimin n'ọ lala. Ọ nọ gi ẹka a gbashịa igunrun hụ.

⁴⁶ Ọ gbashịagụ wẹ, ọ nọ shi elu ugu d'e mẹ ekpere.

⁴⁷ O ru ẹnyasị, ụgbọ e rugụọ etintinnaị mirin ahụn; Jesu sụọ rị akpakalị.

⁴⁸ Ọ hụn a nị ụgbọ rị a fụ wẹ ọrụn ịnyanshi ihun makẹni ufere rị e bukin wẹ azụụn. Ihiẹn rịkẹ ọkụrọkụ ẹtọ ụzụtụntụn biribiri, ọ nọ jẹnhẹn ijẹn elu mirin d'e kunrun wẹ. O te chọ n'ọ ghafe wẹ.

⁴⁹ A hụn w'a k'o jẹnkọ ijẹn elu mirin, wẹ nọ ro ni onyẹ-mmọn rọ, ya wẹ nọ yi oro —

⁵⁰ makẹni egun tụma wẹ ile kẹ wẹ hụn a. Jesu nọ kuyeni wẹ oku ozigbo, sị, “Mmẹ rọ, atụlẹ ni egun!”

⁵¹ Ya ọ nọ banyeni wẹ imẹ ụgbọ, ufere hụ nọ kụsị. Ọ nọ tụ ndị nsọnmazụụn a ẹnya ọda-ọda,

⁵² makẹni aghọtanị wẹ ọrụn-atụmẹnya ahụn o gi brẹdi rụn. Obi wẹ ze e ze.

Emu Jesu Zụọ Imẹ Gẹnẹsarẹtị

⁵³ Ogẹn wẹ gi fetugụ mirin hụ, pụha Gẹnẹsarẹtị, wẹ nọ limẹ ụgbọ-mirin wẹ ebẹhụ.

⁵⁴ Hụn wẹ gihụ gha ụgbọ-mirin pụha, ndị rị ebẹhụ nọ marịn nị Jesu rọ.

⁵⁵ Wẹ nọ gi ọsọ ghagbama ẹgbẹrẹ hụ ile, gi ute buhẹmẹ ndị emu rị a kụ ebe ọwụlẹ wẹ nụ nị Jesu rị.

⁵⁶ Ebe-lẹ-ebe Jesu jẹn — kẹ obodo mẹ ntịn kẹ hụn shịa ẹfọ kẹ alị-ọfịa; wẹ hụ e bu ndị emu rị a kụ a tọ imẹ afịa, a rịọ Jesu nị wẹ mẹtụhụ ntịn ẹwuru ẹ ẹka. Ndị ile hụn mẹtụ a ẹka hụ a dịnhịn.