Makị 5 - Ika

Isi Nke Isẹn Jesu A Zụọ Okẹnnyẹ Eje-mmọn Rị Imẹ ẹ

¹ Wẹ nọ fetu mirin Galili, pụha obodo ndị Gẹrasa.

² Hụn Jizọsị gihụ gha imẹ ụgbọ hidan, okẹnnyẹ ohu eje-mmọn rị imẹ ẹ nọ gha ikpẹkpẹ pụha d'e kunrun ẹ.

³ Ikpẹkpẹ ebahụn k'o bi; onwọnni onyẹ a s'ẹka e kwọndọn ẹ, ọsụọn'a nị wẹ kpọma a ẹgan.

⁴ Makẹni mgbe ole-lẹ-ole kẹ wẹ te kpọma a ẹgan ụkụ lẹ ẹka: o tibepụ ẹgan, o gungwọnpụ aba rị a ụkụ. Onwọnni onyẹ a saẹka e kwọndọnn'ẹ.

⁵ Ọ wahunmẹ ikpẹkpẹ lẹ ugu rịsọnmẹ ebẹhụ, e yi oro, e gi ọmụma a dọkịka enwẹn ẹ ẹhụ, kẹ ukinkin kẹ efinnaị.

⁶ O lecheni nwan Jesu, ọ nọ gbaburu ẹ, gbun'ẹ osekpu.

⁷ Ọ hụ e gi okẹn olu e yi, “K'i sikọ d'e gi m mẹ, Jesu Nwa Chuku kachanrịnnị? M rị e gi ẹfan Osolobuẹ a sị ị, eyelẹ m afụnfụn!”

⁸ O ku ihiẹnni makẹni Jesu rị a sị a, “Ịyụ wụ eje-mmọn, gha imẹ okẹnnyẹ ahụn pụha!”

⁹ Ya kẹ Jesu nọ jụ a, sị, “Kị wụ ẹfan ị?” Ọ nọ sị, “Ẹfan m wụ Igunrun, makẹni ẹnyi bu ọda.”

¹⁰ Ya ọ nọ rịọ Jesu ọda-ọda y'a chụpụlẹ wẹ ẹgbẹrẹ hụ.

¹¹ Igwee ezin rị elu okee nọkunmẹ ebahụn, a kpa nni.

¹² Eje-mmọn ndị hụ nọ rịọ a, sị, “Chụ ẹnyi ye imẹ ezin ndịnị; nị ẹnyi ban imẹ wẹ.”

¹³ Ọ nọ nị wẹ; ya eje-mmọn ndị hụ nọ gha imẹ okẹnnyẹ hụ pụha, banyesọnmẹ imẹ ezin ndị hụ, ezin ndị hụ ile nọ gbama ọsọ, kpọtu, zụnban imẹ mirin Galili ebahụn, ragbu enwẹn wẹ. Ezin hụ ile rị ihiẹn nọkẹ nnụ isẹn (2,000).

¹⁴ Ndị-ndu ezin ndị hụ nọ gbajẹn d'a gwa ndị obodo wẹ lẹ ndị bi ụmụ-alị rị ẹgbẹrẹ hụ ihiẹn mẹni. Wẹ ile nọ pụha d'e lee ihiẹn mẹni.

¹⁵ Ya wẹ nọ bịa d'e kunrun Jesu; wẹ nọ hụn onyẹ hụ igunrun eje-mmọn te rị imẹ ẹ: ọ nọdịhụ alị, o yihụ ẹkwa, o gihụ ezigbo uche ẹ. Ya kẹ egun nọ tụma wẹ.

¹⁶ Ndị o mẹye ẹnya nọ gwa wẹ ihiẹn mẹ okẹnnyẹ hụ eje-mmọn te rị imẹ ẹ lẹ ezin ndị hụ.

¹⁷ Ya wẹ nọ rịọma Jesu n'ọ gha ẹgbẹrẹ wẹ pụ.

¹⁸ Ogẹn Jesu gi bankọ imẹ ụgbọ, okẹnnyẹ hụ eje-mmọn te rị imẹ ẹ nọ rịọ a n'o sọnmẹ ẹ.

¹⁹ Kanị Jesu nọ jụ, sị a, “Laburu ndị nke i d'a gwa wẹ okẹn ihiẹn lẹ omikẹn Osolobuẹ mẹni i.”

²⁰ Ya okẹnnyẹni nọ pụ, ghagbama obodo iri hụ nọgbamanị wụ Dikapolisi, a gwa wẹ ihiẹn Jesu mẹn'ẹ. Ọ tụ wẹ ile nụn'a ẹnya.

Okpoho Ihiẹn Rị A Gba Lẹ Nwata Nwụnhụnnị

²¹ Ogẹn Jizọsị gi gi ụgbọ-mirin fetugụzị mirin ahụn, kinhẹnzi azụụn hụn-ẹbọ, igunrun hi-ogbe nọ fihunmẹ ẹ mkpẹnrẹn mirin ebahụn.

²² Onyẹ ohu w'a kpọ Jaịrọsụ, onyẹ ohu imẹ ndị-isi ụlọ-ofufe, nọ bịa; ọ hụn Jesu, ọ nọ dannị Jesu alị,

²³ rịọ a ọda-ọda, sị, “Nwa m okpoho e d'a nwụn. Dodo d'e bu ẹka ị kwasị a n'ị zụọ a, kẹni ọ hụn ụzọ rị ndụn!”

²⁴ Ya Jizọsị nọ sọnmẹ ẹ. Igunrun hi-ogbe nọzị sọnmẹ wẹ, wẹ ile hụ a fụfa Jizọsị.

²⁵ Okpoho ihiẹn rị a gba kete ahụa mmẹbụọ rị igunrun hụ.

²⁶ Ọ hụnjungụọ ẹnya ẹka ndị idibiẹ, d'e ru ni ihiẹn a gụ a ẹka, kanị, hụn nkẹ o gi dịnhịn, ọ hụdẹ a jọwaye njọ.

²⁷ Ọ nụgụọ kẹ wẹ ku oku Jizọsị, ọ nọ gha azụụn nọkunmẹ Jizọsị imẹ igunrun hụ, mẹtụ ẹkwa a ẹka;

²⁸ ọ gwagụọ enwẹn ẹ sị, “M sahụ ẹka mẹtụ ẹkwa a ẹka, m sikọ d'a rị mma.”

²⁹ Hụn o gihụ mẹtụ ẹkwa Jesu ẹka, ihiẹn rị a gban'a nọ kụsị ozigbo; kẹ ẹhụ dọn nọ a, ọ nọ marịn n'ọ dịnhịngụọ.

³⁰ Jesu nkẹ a marịnghọ n'o nwọnọlẹ ikẹn gha imẹ ẹ pụ. O gbehutọ imẹ igunrun hụ, sị, “Onyẹ mẹtụ ẹkwa m ẹka?”

³¹ Ndị nsọnmazụụn a nọ sị a, “Ị hụ a hụn igunrun rị a fụfan'ị, ị hụzị a jụ ‘Onyẹ mẹtụ m ẹka?’ ”

³² Kanị Jizọsị hụkwọ e lehunmẹ ẹnya n'ọ hụn onyẹ ọ wụ.

³³ Okpoho hụ nkẹ hụ a tụ egun, a ma piripiri makẹni ọ marịngụọ ihiẹn mẹn'ẹ, ọ nọ bịa d'e gbuni Jesu osekpu, gwachanrịn a ezioku.

³⁴ Jesu nọ sị a, “Nwa m, okukwe i a zụọgụọ ị; lama, ihiẹn emẹ i; dịnhịnchanrịn emu i.”

³⁵ Ebe Jizọsị rịkwọ e ku, wẹ nọ gha iwe Jaịrọsụ bịa, sị Jaịrọsụ, “Nwa ị a nwụnhụngụọlẹ, k'ị nọzị e sọngbuni onyẹ-nkuzi?”

³⁶ Ihiẹn wẹ rị e ku e feban Jesu ntịn, kanị ọ sịkwọ Jaịrọsụ, “Atụlẹ egun, kwerihụ!”

³⁷ Jesu anịnị ndị ọzọ sọn ẹ karị Pita lẹ Jemisi lẹ Jọnụ nwẹnẹ Jemisi.

³⁸ Ogẹn wẹ gi ru iwe onyẹ-isi ụlọ-ofufe hụ wụ Jaịrọsụ, Jesu a hụn okẹn isusu lẹ ndị rị a kwan ẹkwan, e goo ọda-ọda.

³⁹ Ọ banye imẹ ụlọ, ọ nọ sị wẹ, “Kị wụ isusuni? Kị ụnụ rị a kwannị ẹkwan? Nwata ahụn a nwụnhụnnị, ọ rịhụ ụran!”

⁴⁰ Ya wẹ nọ mụma Jesu ẹmụ. Kanị, ọ nọ chụpụ wẹ ile ezi, weri nẹdi lẹ nnẹ nwata ahụn lẹ ndị nsọnmazụụn a ẹtọ ahụn ya lẹ wẹ wị, wẹ ile nọ wịrị banye mmughẹ nwata hụ rị.

⁴¹ Ya ọ nọ kwọndọn ẹka nwata hụ, sị a, “Talita, kum!” Ya wụ, “Nwata okpoho, m sị ị lihi!”

⁴² Ya kẹ nwata ahụn nọ lihi ọtọ ozigbo, jẹnhunmẹmẹ. (Nwata hụ wụ nwa ahụa mmẹbụọ.) Ọ nọ tụ wẹ ile ẹnya ọda-ọda.

⁴³ Jesu nọ gba wẹ mkpịnsịn-ẹka ẹnya ọhụnma-ọhụnma, sị wẹ agwakwọlẹ onyẹ ọwụlẹ ihiẹn mẹni. Ọ nọ sị wẹ ye nwata hụ ihiẹn-oriri.