Makị 4 - Ika

Isi Nke Ẹnọ Ilu Jesu Gi Onyẹ-ugbo Ta

¹ O nwọnzi ogẹn Jesu gi kuzimẹzi mkpẹnrẹn mirin Galili. Igunrun higbu enwẹn ẹ nọ fihunmẹ ẹ, nke wụnị ọ nọ banye imẹ ụgbọ rị imẹ mirin ebahụn d'a nọdị alị, igunrun hụ ile nọ nọdị mkpẹnrẹn mirin ebahụn.

² Ọ nọ gi ilu kuzi wẹ ihiẹn bu ọda. Ebe ọ rị a kuzi wẹ, ọ sị wẹ,

³ “Gọn ni ntịn! O nwọn onyẹ-ugbo jẹn d'a gha mkpụrụ imẹ ugbo.

⁴ Ogẹn o gi rị a gha a, ndị danye ọkpụzọ a danye, nnụnụ nọ bịa d'e ripụ wẹ;

⁵ ndị ọzọ a danye alị ọmụma ẹjan rịkalẹni. E pupụha wẹ ozigbo makẹni ẹjan emini.

⁶ Anwụn a wa, ma wẹ, wẹ nọ shinwụn, makẹni mkpọgụn arịa;

⁷ ndị ọzọ a danye ebe ogun rị, ogun e sue, dụngbu wẹ, amịzịnị wẹ mkpụrụ;

⁸ kanị o nwọnghọzị ndị danye alị rị mma, e pupụha wẹ, sue, du, mị mkpụrụ mmagi-mmagi: ụfọdụ ụzọ iri kwasị ọgụn, ụfọdụ ụzọ ọgụn ẹtọ, ụfọdụ ụzọ ọgụn isẹn.”

⁹ “Onyẹ nwọn ntịn, ya nụ!”

Ihiẹn Haịn Jesu Gi E Gi Ilu A Kuzi

¹⁰ Ogẹn ya sụọ gi nọdị, ndị fihunmẹn'ẹ lẹ ndị nsọnmazụụn a mmẹbụọ hụ nọ sị a kọwanị wẹ ilu hụ.

¹¹ Ọ nọ sị wẹ, “Ụnụ kẹ w'a nị marịn ihiẹn-nzuzue Alị-eze Osolobuẹ, kanị nke ndị rị ogbe, ilu kẹ wẹ gi a gwa wẹ ihiẹn ile;

¹² kẹni ọ wụrụ nị ‘Wẹ hụ e lee ilee-ilee kanị eleghakọ wẹ ụzọ; wẹ hụ a nụ ọnụnụ-ọnụnụ kanị aghọtakọ wẹ; amamgbe w'e rogharị, Osolobuẹ a gbagharị wẹ.’ ”

Kẹ Jesu Dọn Kọwa Ilu Onyẹ-ugbo

¹³ Ya ọ nọ sị wẹ, “Ụnụ aghọtanị iluni? Elee ilu kẹ ụnụ k'a sazị nwan ẹka ghọta?

¹⁴ Mkpụrụ hụ wẹ ghaye wụ oku-Chuku.

¹⁵ Ọkpụzọ hụ mkpụrụ danye wụ ndị hụ nụ oku-Chuku, Ekwensụ a bịa ozigbo d'e wepụ oku-Chuku hụ wẹ ghaye imẹ wẹ.

¹⁶ Alị ọmụma wẹ ghaye mkpụrụ wụ ndị hụ nụ oku-Chuku, e gi wẹ ịghọghọ nabanhan a ozigbo,

¹⁷ kanị, enwọn wẹ nkpọgụn; w'a tọhụ ẹkẹrẹ sụọ. Hụn oku-Chuku gihụ wẹhẹ nsọngbu mọbụ ukpokpo, a danpụ wẹ.

¹⁸ Ogun hụ wẹ ghaye mkpụrụ wụ ndị hụ nụ oku-Chuku,

¹⁹ kanị oku elu lẹ ẹkpịrị akụ-lẹ-ụba lẹ ẹgụn ihiẹn ichẹn-ichẹn a banhan, wẹ ile a kpangbu oku-Chuku hụ, ọ mịzịnị mkpụrụ.

²⁰ Kanị alị hụ rị mma wẹ ghaye mkpụrụ wụ ndị hụ nụ oku-Chuku, nabanhan a, mị mmagi-mmagi: onyẹ ohu, ụzọ iri kwasị ọgụn; onyẹ ohu, ụzọ ọgụn-ẹtọ; onyẹ ohu, ụzọ ọgụn-isẹn.”

W'ara Zuemẹ Ukpẹ

²¹ Jizọsị nọ sịzị wẹ, “Onyẹ e wẹhẹ ukpẹ e bu ẹ e che okpuru afẹrẹ mọbụ okpuru bẹdi? Ẹlẹ elu obu-ukpẹ kẹ w'e butọ a?

²² Onwọnni ihiẹn zuerini hụn jẹnkọlẹni d'a pụha ifọn, mọbụ ihiẹn wẹ kpumẹ hụn jẹnkọlẹni d'a wa.

²³ Onyẹ nwọn ntịn, ya nụ!”

²⁴ Ya ọ nọ sị wẹ, “E gikwọ nị ihiẹn ụnụ nụ e dọn! Mkpu i gi mayeni ịhịan ihiẹn kẹ wẹ jẹnkọ d'e gi mayeni i, dụyedẹn'i y'ẹ.

²⁵ Makẹni, onyẹ nwọnni kẹ w'e yecheni; kanị onyẹ nwọnlẹni, a napụdẹ w'a hụn o nwọn.”

Kẹ Ihiẹn Osolobuẹ Dọn E Sue

²⁶ Jesu nọ sịzị wẹ, “Alị-eze Osolobuẹ nọ kẹ ebe okẹnnyẹ ohu nọ ghaye mkpụrụ imẹ ugbo, jẹnmẹ.

²⁷ Ọ hụ a ranhịn e tẹnhin, uhinhin lẹ efinnaị, ihiẹn ọ kụn e pu, sue, a ra marịn k'o dọn mẹ.

²⁸ Alị e gi ẹka a e mẹ ihiẹn: o pu, o sue mị mkpụrụ, ọ ka.

²⁹ Ọ kagụhụ, o weri ọpịa d'a ghọma a, makẹni ogẹn wẹ gi a ghọ a e rugụọ.”

Ihiẹn Jesu Gi Mkpụrụ Mọstadị Kuzi

³⁰ Jizọsị nọ sịzị, “Kị ẹnyi e gi jeni Alị-eze Chuku? Elee ilu kẹ ẹnyi e gi kọwa a?

³¹ Ọ nọ kẹ mkpụrụ mọstadị hụn o mẹ ni ịya kachanrịn mkpụrụ osisi ile ntịn kẹ wẹ kụn a;

³² kanị wẹ kụngụ a, o sue, o hi-ogbe karị ihiẹn ile w'a kụnye ugbo, ọ wadẹ agalaba hi-ogbe, nke wụnị nnụnụ a bịadẹ d'a kụ ẹkụụ e ye elu ẹ.”

Ilu-ilu Kẹ Jizọsị Gi E Ku Oku

³³ Jesu gi ilu bu ọda nọ ẹrịra gwa wẹ oku-Chuku; ọ gwa wẹ hụn a nị wẹ a ghọta;

³⁴ ọ gwanị wẹ oku mmaka; ilu sụọ k'o gi gwachanrịn wẹ oku; kanị, ya lẹ ndị nsọnmazụụn a sụọ nọdị, ọ kọwachanrịnnị wẹ ihiẹn ile.

Jizọsị A kụsị Ẹbiri-mirin

³⁵ Ẹnyasị hụ, Jizọsị nọ sị ndị nsọnmazụụn a, “Nị ẹnyi fetu ni mirinni.”

³⁶ Ya lẹ wẹ nọ latọ igunrun ahụn: ụgbọ hụ ọ rị imẹ ẹ a kuzi kẹ ndị nsọnmazụụn a gi buru ẹ pụ. O nwọnghọzị ụgbọ ndị ọzọ sọnmẹn'ẹ.

³⁷ Idẹnmizi, okẹn ufere nọ kpọma! Mirin nọ timẹ ụgbọ hụ, jundẹ imẹ ẹ.

³⁸ Kanị Jizọsị rị ibe azụụn ụgbọ, firi isi, a ranhịn. Ya kẹ ndị nsọnmazụụn a nọ kpọtiẹn ẹ, sị, “Di-nwọnni-ẹnyi, y'a hụnn'a nị ẹnyi e d'a la iwi?!”

³⁹ Jizọsị nọ tẹnhin, jụgbọ okẹn ufere hụ, sị ohimin hụ, “Kụsị! Mẹ jụụ!” Ufere a kụsị, ụzọ ile e mẹ rajụụ.

⁴⁰ Ya Jesu nọ sị ndị nsọnmazụụn a, “Kị ụnụ rị a tụnị egun? Ụnụ eke nwọnkwọ nwan okukwe?”

⁴¹ Egun nọ tụma wẹ ọda-ọda, wẹ nọ jụma ibe wẹ, sị, “Onyẹ wụdẹ onyẹni ufere lẹ ohimin rị e humẹn'ẹ isi?”