Makị 3 - Ika

Isi Nke Ẹtọ Okẹnnyẹ Ẹka Ohu Nwụnhụn

¹ Ya Jizọsị nọ banyezi ụlọ-ofufe. Okẹnnyẹ ohu ẹka ohu nwụnhụn rị ebẹhụ.

² Ya wẹ nọ kemẹ Jesu nke kẹn'ọ zụọ a Ụhụọhịn Ezumikẹn, nị wẹ gi ẹ ma a ikpe.

³ Ya ọ nọ sị okẹnnyẹ hụ ẹka nwụnhụn, “Pụha ihun ebeni.”

⁴ Ọ nọ sị wẹ, “Elee hụn Iwu kwadọn nị wẹ e mẹ Ụhụọhịn Ezumikẹn? Imẹ ihiẹn rị mma ra imẹ eje-ihiẹn? Ịzụọ ịhịan ra igbun'ẹ?” Kanị a gba w'a nkịtịn.

⁵ Jizọsị nọ gi iwe lehunmẹ wẹ, makẹni ọ fụka a nị obi wẹ e zekẹ. Ya ọ nọ sị okẹnnyẹ hụ, “Tịnpụ ẹka ị.” Ọ tịnpụ a, ẹka a nọ rị mma.

⁶ Ndị Itu-Farisi nọ pụ, wẹ lẹ ndị itu Hẹrọdụ nọ zumẹ umẹ ozigbo kẹni wẹ gbu Jesu.

Eje-mmọn Hụn Kọma Jizọsị Ẹnya

⁷ Jesu lẹ ndị nsọnmazụụn a nọ pụ, jẹnmẹ mkpẹnrẹn mirin Galili; igunrun bugbu enwẹn ẹ ọda nọ gha Galili sọnmẹ ẹ, wẹ lẹ ndị gha Judia

⁸ lẹ Jerusalẹm lẹ Idumịa lẹ nfetu Iyi Jọdanị lẹ ẹgbẹrẹ Taya lẹ Sidọnụ bịa. Ndịnị bịa makẹni wẹ nụ ihiẹn ile Jesu rị e mẹ.

⁹ Ọ nọ sị ndị nsọnmazụụn a kwademẹn'ẹ ụgbọ-mirin ufiri igunrun hụ, makẹ wẹ gha a fụfa a.

¹⁰ Makẹni ọ zụọgụọ ndị bụ ọda, ndị ile emu rị a kụ rị a fụfa nị wẹ mẹtụ a ẹka.

¹¹ Ndị eje-mmọn rị imẹ wẹ hụn a, a dannị w'a alị ozigbo, yi, “Ị wụ Nwa Osolobuẹ!”

¹² Ọ hụ a jụgbọ eje-mmọn ndị hụ, sị wẹ ekulẹ onyẹ ọ wụ.

Jizọsị E Tumẹ Ndị-ozi Pụ-ichẹn Mmẹbụọ

¹³ Omẹgụ, Jesu nọ shi elu ugu, kpọ ndị hụn ọ chọ, wẹ nọ bịa d'e kunrun ẹ.

¹⁴ Ọ nọ tumẹ mmadụ mmẹbụọ, kpọ wẹ ndị-ozi pụ-ichẹn, nị wẹ du ẹ nọdị, n'o zipụ wẹ d'e ku oku-Chuku

¹⁵ lẹzi n'o ye wẹ ikẹn w'e gi a chụpụ eje-mmọn.

¹⁶ Mmadụ mmẹbụọ hụ o tumẹ wụ: Saịmọnụ (hụn o tu Pita, ya wụ Ọmụma);

¹⁷ Jemisi nwa Zẹbẹdi lẹ Jọnụ nwẹnẹ Jemisi. Uwẹ k'o tu Bonagẹsị, ya wụ Ụmụ akpara (akpabọ);

¹⁸ ndị ọzọ wụ Andrụ lẹ Filipu lẹ Batolomi lẹ Matiu lẹ Tamọsị lẹ Jemisi nwa Alịfịọsụ lẹ Tadịọsụ lẹ Saịmọnụ hụn te rị ndị gi ẹka-ikẹn e mẹ ni wẹ chụpụ ndị Rom rị a kị alị wẹ,

¹⁹ lẹzi Judasị nwa Iskarọtụ hụn ren'ẹ ogẹn ikpanzụụn.

E Sị Wẹ Nị Eje-mmọn Rị Imẹ Jesu

²⁰ Jesu e mẹmẹgụ, ọ nọ lashi iwe ẹ; igunrun ịhịan nọzị bịa, nke wụnị ya lẹ ndị nsọnmazụụn a ahụndẹni efe ri ihiẹn-oriri.

²¹ Nnẹ lẹ umunẹ Jesu a nụ a, wẹ nọ bịa nị wẹ weri ẹ, makẹni wẹ nụ kẹ wẹ rị e ku oku ẹ, a sị “Ẹra a pụmagụọ a!”

²² Ndị-nkuzi Iwu hụn gha Jerusalẹm bịa hụ a sị, “Onyẹ-isi eje-mmọn ile wụ Bẹzibọlụ rị imẹ ẹ; ikẹn Bẹzibọlụ onyẹ-isi eje-mmọn ile k'o gi a chụpụ eje-mmọn.”

²³ Ya kẹ Jizọsị nọ kpọzụnhan wẹ, gi ilu gwa wẹ oku, sị, “Nanị kẹ Ekwensụ a dọn chụpụ Ekwensụ?

²⁴ Alị-eze ọwụlẹ kebeni, asakọ ẹka turu.

²⁵ Ikpụlọ kebeni, asakọ ẹka turu.

²⁶ O mẹ nwan nị Ekwensụ e bugụọ nụmanị enwẹn ẹ, omẹni o kebegụọ, ọ sakọ nwan ẹka turu; nke ẹ a gụgụọ!

²⁷ “Kanị, onwọnni onyẹ a saẹka a banye iwe dikẹn, kịrị ihiẹn ẹ, mmanị o kẹnmẹgụ a. O kẹnmẹgụ a, ya k'ọ nọ saẹka banye, kịrị ihiẹn ẹ.

²⁸ “M rị a gwa ụnụ ezioku, nị wẹ gbagharịghọ njọ ile ịhịan mẹ lẹ eje-oku ile wẹ ku;

²⁹ kanị onwọnni ogẹn w'e gi gbagharị onyẹ kuja oku Mmọn-nsọ; o mẹọlẹ njọ itẹbitẹ.”

³⁰ Jesu ku ihiẹnni makẹni wẹ sị, “Eje-mmọn rị imẹ ẹ.”

Onyẹ Wụ Nnẹ Lẹ Umunẹ Jesu?

³¹ Nnẹ Jizọsị lẹ umunẹ Jizọsị nọ bịa, turu ihun-ezi, zi wẹ d'a kpọ a.

³² Igunrun nọhunmẹ ẹ; ya wẹ nọ sị a, “Nnẹ i lẹ umunẹ i ikẹnnyẹ lẹ umunẹ i ikpoho rị ihun-ezi, a jụ ukwere i.”

³³ Ọ nọ shịarị wẹ, sị, “Onyẹ wụ nnẹ m? Elee ndị wụ umunẹ m?”

³⁴ Ọ nọ lehunmẹ ndị hụ nọhunmẹn'ẹ, sị, “Lee nnẹ m lẹ umunẹ m ebeni!

³⁵ Onyẹ ọwụlẹ hụn e mẹ uche Osolobuẹ wụ nwẹnẹ m okẹnnyẹ lẹ nwẹnẹ m okpoho lẹ nnẹ m.”