Makị 2 - Ika

Isi Nke Ẹbụọ Kẹ Jesu Dọn Zụọ Onyẹ-ọrọ

¹ O mẹpụ akpọhịn ole, Jesu nọ kinhẹn Kapanọm, ọ nọ kpọgbarị n'ọ rị ụlọ.

² Ndị bu ọda nọ ruhẹ, nke wụnị ụzọ eruzini wẹ, kẹ imẹ ụlọ kẹ ihun-ezi. Jesu hụ a gwa wẹ oku-Chuku.

³ Ya kẹ ikẹnnyẹ ẹnọ nọ buhẹn'ẹ okẹnnyẹ ọrọ kinmin.

⁴ Kanị ahụnnị wẹ nwan ebe w'a gha d'e kunrun Jesu makẹni ịhịan jun ebẹhụ, wẹ nọ nyinrin elu ụlọ. E bemẹ wẹ oghe ye ẹ elu ebe Jesu rị. E begụ wẹ oghe hụ, wẹ nọ gha ebẹhụ dọ onyẹ hụ ọrọ kinmin lẹ ute ẹ ye ihun Jesu.

⁵ Jizọsị a hụn okukwe wẹ, ọ nọ sị onyẹ hụ ọrọ kinmin, “Nwa m, a gbagharịgụọ wẹ i njọ ị.”

⁶ O nwọn ndị-nkuzi Iwu nọdị alị ebahụn; wẹ hụ e ro ihiẹnni o ku imẹ obi wẹ, a sị,

⁷ “Kị okẹnnyẹni rị e kudẹni arụ?! Onyẹ a s'ẹka a gbagharị njọ wezụka Osolobuẹ sụọ!?”

⁸ Mmọn Jesu nọ gwa a ihiẹn wẹ rị e ro imẹ obi wẹ. Ọ nọ sị wẹ, “Kị haịn ụnụ gi e ro ihiẹn nọ ẹnịna imẹ obi ụnụ?

⁹ Elee hụn ka nfe: ịsị onyẹ-ọrọnị, ‘A gbagharịgụọ wẹ i njọ ị.’ Ra, ịsị a, ‘Lihi ọtọ heri ute i jẹnmẹ ijẹn?’

¹⁰ Kanị, nị m ghọsị ụnụ nị Nwa nke Ịhịan nwọn ikẹn o gi a gbagharị njọ elu-ụwa.” Ọ nọ sị onyẹ-ọrọ hụ,

¹¹ “M sị ị, lihi ọtọ, heri ute i lama iwe i!”

¹² Ọ nọ lihi ọtọ, heri ute ẹ ozigbo, gha ebahụn pụ — idẹnya wẹ ile, nke wụnị ọ tụ wẹ ile ẹnya, wẹ nọ jama Chuku mma, a sị, “Ẹnyi ahụntuni ihiẹn nọ ẹnịna mbụ!”

Kẹ Jesu Dọn Kpọ Livaị Wụ Matiu

¹³ Ya Jesu nọ jẹnmẹzi mkpẹnrẹn mirin Galili. Igunrun ịhịan nọ fihunmẹ ẹ, ọ nọ kuzi wẹ.

¹⁴ Ebe ọ ghafekọ, ọ nọ hụn Livaị nwa Alịfịọsụ k'ọ nọdị alị ọdụ ndị ụgwọ-isi, ọ nọ sị a, “Sọnmẹ m.” Livaị nọ lihi ọtọ, sọnmẹ ẹ.

¹⁵ Ogẹn Jesu gi rị e ri ihiẹn-oriri iwe Livaị, ndị bu ọda imẹ ndị ụgwọ-isi lẹ ndị ọzọ wẹ gi njọ marịn hụ e sọn Jesu lẹ ndị nsọnmazụụn a e ri ihiẹn-oriri, makẹni ndị rị e sọnn'ẹ bu ọda.

¹⁶ Ndị-nkuzi Iwu hụn rị imẹ ndị Itu-Farisi a hụn nị Jesu lẹ ndị ahụn wẹ gi njọ marịn lẹ ndị ụgwọ-isi rị e ri ihiẹn-oriri, wẹ nọ sị ndị nsọnmazụụn a, “Kị haịn o gi e du ndị a na ụgwọ-isi lẹ ndị wẹ gi njọ marịn e ri, a ra?”

¹⁷ Jesu a nụ a, ọ nọ sị wẹ, “Ndị ẹhụ rị ikẹn ara chọ dibiẹ kanị ndị emu rị a kụ; ẹlẹ ndị ezi-omumẹ kẹ m bịa d'a kpọ kanị ndị njọ.”

A Jụ Wẹ Jesu Oku Ibu-ọnụ

¹⁸ O nwọn ogẹn ndị nsọnmazụụn Jọnụ lẹ ndị Itu-Farisi gi rị e bu ọnụ. Wẹ nọ bịa d'a jụ Jesu, “Kị haịn ndị nsọnmazụụn Jọnụ lẹ ndị nsọnmazụụn ndị Itu-Farisi gi e bu ọnụ bụ ndị nsọnmazụụn ị ara bu?”

¹⁹ Jizọsị nọ sị wẹ, “Ndị bịa agbamẹkụkwọ e budẹ nwan ọnụ ebe okẹnnyẹ rị a gba ẹkụkwọ rị imẹ igunrun wẹ ra? Mba nụ! Ebe wẹ lẹ okẹnnyẹ hụ rị a gba ẹkụkwọ rị, ebukọ wẹ ọnụ.

²⁰ Kanị, ogẹn wẹ k'e gi wepụ okẹnnyẹ hụ rị a gba ẹkụkwọ lala, ogẹn hụ, e bumẹ wẹ ọnụ.

²¹ “Onwọnni onyẹ e gi ẹkwa ọhụn hụn a kụkụmanị a kwakin ẹkwa akan. O gi ẹ kwakin ẹ, nke ọhụn a dọkapụ, ebahụn a jọwaye njọ.

²² “Onwọnzikwọnị onyẹ e gi ihiẹn akan a gbaye manya ọhụn. O gi ẹ gbaye ẹ, manya a gbawapụ a, kẹ manya kẹ ihiẹn wẹ gi gbaye ẹ a la iwi. Gi nwan ihiẹn ọhụn gbaye manya ọhụn.”

A Jụ Wẹ Jesu Oku Ụhụọhịn Ezumikẹn

²³ Ụhụọhịn Ezumikẹn ohu, Jesu ghakọ imẹ ugbo ọka-witi. Kẹ wẹ ghakọ imẹ ugbo hụ, ndị nsọnmazụụn a nọ ghọrịma ọka-witi.

²⁴ Ya ndị Itu-Farisi nọ sị Jesu, “Kị wẹ rị a dannị iwu Ezumikẹn?”

²⁵ Ya Jesu nọ sị wẹ, “Ya wụ, ụnụ agụntuni ihiẹn Defidi mẹ ogẹn mkpa gi rịn'a, ogẹn ẹgụn gi rị a gụn ịya lẹ ndị ya lẹ wẹ wị?

²⁶ K'o dọn banye ụlọ Osolobuẹ, ogẹn Abiata gi wụ onyẹ-isi nchụn-ẹjan, ri brẹdi-nsọ hụ w'e bupụhanị Osolobuẹ, brẹdi Iwu sị nị onyẹ ọzọ erikọ a mmanị ndị nchụn-ẹjan; kanị Defidi ri ẹ, yezikwọ ndị ya lẹ wẹ wị.”

²⁷ Ya Jesu nọ nwan sị, “Ọrịrịmma ịhịan kẹ wẹ tumẹni Ụhụọhịn Ezumikẹn, ẹlẹ wẹ ke ịhịan makẹ Ụhụọhịn Ezumikẹn.

²⁸ Ya wụ nị mmẹ wụ Nwa nke Ịhịan nwọn ku ihiẹn wẹ e mẹ Ụhụọhịn Ezumikẹn.”