Makị 16 - Ika

Isi Nke Mmisin Jesu A Gha Ọnwụn Lihi

¹ Eki e fọn, ogẹn Ezumikẹn gi gụ ogẹn ẹnyasị, Meri onyẹ Magidala lẹ Salomi lẹ Meri nnẹ Jemisi nọ jẹn d'e ṅọntọ ihiẹn ndị e kun fuẹin kẹni wẹ jẹn d'e gi ẹ te ẹhụ Jesu.

² Ụzụtụntụn ụhụọhịn ibuzọ imẹ izuka, hụn anwụn gihụ wama, wẹ nọ jẹnmẹ ili Jesu.

³ Wẹ hụ a jụ ibe wẹ, “Onyẹ jẹnkọ d'e nupụnị ẹnyi ọmụma rị ọnụ ili?”

⁴ E ru wẹ ebẹhụ, lee ẹnya, wẹ nọ hụn a nị e nupụgụọlẹ wẹ ọmụma hụ higbu enwẹn ẹ ogbe.

⁵ A banye wẹ imẹ ili, wẹ nọ hụn okorọbịa yi ẹkwa ọchan tueru alị k'ọ nọdị alị ẹka-nni, ọ nọ tụ wẹ ẹnya.

⁶ Okẹnnyẹ hụ nọ sị wẹ, “Atụlẹ ni egun; ụnụ rị a chọ Jesu onyẹ Nazarẹtị, hụn wẹ kpọgbu. O lihigụọ! Ọ rịzị ebeni. Lee ni ebe wẹ te butọ a!

⁷ Jẹn ni nwan d'e zi ndị nsọnmazụụn a lẹ Pita nị ‘O jẹnmẹgụọ Galili d'e cheri ụnụ k'o dọn gwa ụnụ; ụnụ sikọ d'a hụn a ebẹhụ.’ ”

⁸ Ya wẹ nọ gha imẹ ili hụ pụha, gbama ọsọ, makẹlẹ ọ tụ wẹ ẹnya, tụ wẹ egun. Onwọnni onyẹ wẹ gwa ihiẹn ọwụlẹ ụzọ makẹni egun rị a tụ wẹ. Wẹ nọ beni Pita lẹ ndị ya lẹ wẹ wị ihiẹn ndịnị nke-nke. Omẹgụ, Jesu lẹ enwẹn ẹ nọ zi ndị nsọnmazụụn a ebe ile, gha ọwụwa-ẹnyanwụn d'e ru ndịdan ẹnyanwụn, d'a gwasọnmẹ wẹ oku nzụọpụha-itẹbitẹ, ozi hụ rị nsọ, ozi hụ rị ndụn jẹnrin ejẹn. Isẹẹ.

Kẹ Meri Onyẹ Magidala Dọn Hụn Jesu

⁹ [Ụtụntụn ụhụọhịn ibuzọ imẹ izuka, ogẹn Jesu gi ghagụ ọnwụn lihi, Meri onyẹ Magidala k'o buzọ nwọnpụha n'ọ hụn a, Meri hụn ọ chụpụ eje-mmọn ẹsa imẹ ẹ.

¹⁰ Ọ nọ jẹn d'a gwa ibe ẹ ya lẹ wẹ wị e sọn Jesu, ebe wẹ ile sụkụrụ (gbusuru), a kwan ẹkwan.

¹¹ Kanị, ogẹn wẹ gi nụ k'o ku ni Jizọsị rịzị ndụn, n'ọ hụngụọ a, egini w'ẹ dọn.

Jesu E Kunrun Ndị nsọnmazụụn A Ẹbụọ Jẹnkọ Ẹmaụsụ

¹² Omẹgụ, Jesu nọ nwọnhutọ bịa d'e kunrun ndị nsọnmazụụn a ẹbụọ jẹnkọ alị-ọfịa.

¹³ Wẹ nọ kin azụụn d'a gwa ndị nsọnmazụụn a ndị họdụnị, kanị egizikwọnị w'a dọn.

Jesu E Nwọnpụha Ebe Ndị nsọnmazụụn A Mmanaị Zu

¹⁴ Omẹgụzị, Jesu nọ nwọnpụha ebe ndị nsọnmazụụn a mmanaị rị e ri ihiẹn-oriri. Ọ nọ jụgbọ wẹ yeni obi-ẹbụọ wẹ lẹni obi wẹ ze eze, wẹ gilẹni kweri oku ndị hụnn'a n'ọ ghagụọ ọnwụn lihi.

¹⁵ Ọ nọ sị wẹ, “Ghagbama nị ụwa ile d'e zi ihiẹn ile Chuku ke oziọma.

¹⁶ Onyẹ hụn kwerini, e mẹ wẹ ẹ mirin-Chuku, jẹnkọ d'e nwọn nzụọpụha; kalẹ, onyẹ kwerilẹni, ikpe jẹnkọ d'a ma a.

¹⁷ Ahịma ndịnị k'e sọn ndị kwerini: wẹ k'e gi ẹfan m chụpụ eje-mmọn; wẹ k'a sụ asụsụ ndị ọzọ;

¹⁸ wẹ k'e gi ẹka buru agwọ; wẹ ri nshi, ọ ghọkọ wẹ; wẹ k'e bu ẹka kwasị ndị emu rị a kụ, a dịnhịn wẹ.”

Kẹ Jesus Dọn Shi Elu-igwee

¹⁹ Ogẹn Di-nwọnni-ẹnyi wụ Jesu gi kugụ oku ndịnị, Osolobuẹ nọ we ẹ shi elu-igwee d'a nọdị alị ẹka-nni Osolobuẹ.

²⁰ Ya ndị nsọnmazụụn a nọ jẹnmẹ d'e kumẹ oku-Chuku ebe ile, Di-nwọnni-ẹnyi hụ e sọn wẹ a rụn, e gi ọrụn-atụmẹnya o gi rị e sọn wẹ a ghọsị nị oku wẹ wụ ezioku.]