Makị 15 - Ika

Isi Nke Mmisẹn E We Wẹ Jesu Jẹnni Paịleti

¹ Hụn eki gihụ fọn, ndị-isi nchụn-ẹjan lẹ ndị-isi lẹ ndị-nkuzi Iwu lẹ ndị ile rị Ndị-isi Nkịkwama nọ zu, tụgbama iroro. Wẹ nọ kẹn Jesu ẹgbụn, duru ẹ pụ, wẹ ẹ ye Paịleti, Gọvanọ rị a kịdọnni ndị Rom.

² Paịleti nọ jụma a, sị, “Ịyụ wụ Eze ndị Ju?” Jesu nọ sị a, “Y'e kuọl'a.”

³ Ndị-isi nchụn-ẹjan nọ kinmẹ ihiẹn bu ọda wẹ sị nị ya k'o mẹ.

⁴ Paịleti nọ sị a, “Y'e nwọn ihiẹn y'a shịarị? Lee ihiẹn ile wẹ rị e kin nị ịya k'i mẹ.”

⁵ Kanị Jesu ashịarịkwọnị ihiẹn ọwụlẹ; ọ tụ Paịleti ẹnya.

A Ma Wẹ Jesu Ikpe-ọnwụn

⁶ Mmẹmmẹ-nghafe ọwụlẹ, Paịleti e wepụhanị wẹ onyẹ-ngan ohu wẹ rịọ a.

⁷ Mmẹmmẹ-nghafeni, okẹnnyẹ ohu w'a kpọ Barabasị rị imẹ ngan, ịya lẹ ndị gbu ọchụn ogẹn ọgbaghara ndị rị a lụsọn ndị-ọkịkị.

⁸ Ya kẹ igunrun hụ nọ nwan bịa d'a rịọ Paịleti n'o mẹni wẹ k'o dọn e mẹ.

⁹ Paịleti nọ jụ wẹ, “Ụnụ a chọghọ nị m hapụnị ụnụ Eze ndị Ju?”

¹⁰ (Paịleti jụ wẹ ẹrịra makẹni ọ marịngụọ nị iwe-ẹnya haịn ndị-isi nchụn-ẹjan gi we Jesu ye ẹ.)

¹¹ Ndị-isi nchụn-ẹjan nọ sị igunrun hụ gwa a n'o wepụhanị wẹ Barabasị hụn nkẹ o gi wepụha Jizọsị.

¹² Paịleti nọzị jụ wẹ, “Kị ụnụ chọ nwan nị m gi okẹnnyẹni ụnụ a kpọ ‘Eze ndị Ju’ mẹ?”

¹³ Wẹ nọ yi oro, sị a, “Kpọgbu ẹ!”

¹⁴ Paịleti nọ jụ wẹ, sị, “Kị haịn? Elee njọ k'o mẹ?” Kanị, wẹ nọ yikẹnmẹdẹ, “Kpọgbu ẹ!!”

¹⁵ Makẹni Paịleti chọ n'o mẹ n'ọ sụọ igunrun hụ, ọ nọ hapụnị wẹ Barabasị; ọ fịangụ Jesu mkpịnsịn, ọ nọ w'ẹ ye ndị jẹnkọ d'a kpọgbun'ẹ.

Kẹ Ndị-agha Dọn Gi Jesu Gu Egu

¹⁶ Ya ndị-agha rị okpuru Gọvanọ wụ Paịleti nọ weri Jesu shi ezi-ọgwa Paịleti; wẹ nọ kpọgbama itu-agha wẹ.

¹⁷ Wẹ nọ yimẹ ẹ ẹwuru okẹn-ịhịan; wẹ nọ gi ogun kpa okpu-eze, bu ẹ che ẹ isi.

¹⁸ Ya wẹ nọ kelemẹ ẹ, “Eze ndị Ju, isi i chei!”

¹⁹ A fịan w'a mkpịnsịn isi, jụ a ẹsọn; e gbuni w'ẹ osekpu, e liyen'ẹ ẹka.

²⁰ A mụgụ w'a ẹmụ hụ, wẹ nọ yipụ a ẹwuru okẹn-ịhịan hụ, yimẹzi ẹ nke ẹ. Ya wẹ nọ weri ẹ jẹnmẹ ebe wẹ k'a nọ kpọgbu ẹ.

A Kpọma Wẹ Jesu Elu Obe

²¹ E ru wẹ ụzọ, ndị-agha hụ nọ wa obe ahụn wẹ jẹnkọ d'e gi kpọgbu Jesu ye okẹnnyẹ ohu w'a kpọ Saịmọnụ olu buru. Saịmọnụ gha alị ọfịa lala imẹ obodo. (Saịmọnụ wụ nẹdi Alẹzanda lẹ Rufọsụ; onyẹ alị Saịrini k'ọ wụ).

²² Wẹ nọ we Jesu shi ebe w'a kpọ Gọgọta, hụn wụ “Ebe Okpokomisi.”

²³ Wẹ nọ ye ẹ manya wẹ buche Maa e lu ilu n'ọ ra, kanị Jizọsị aran'a.

²⁴ Ya wẹ nọ kpọma a elu obe. Wẹ nọ kebe ẹkwa a, gi ịtụ-nkpọ hanrịn a.

²⁵ Ọkụrọkụ itenẹi ụtụntụn kẹ wẹ gi kpọma a elu-obe.

²⁶ Ihiẹn wẹ deye obe hụ nị ịya kẹ wẹ gi ma a ikpe wụ “Eze ndị Ju.”

²⁷ O nwọn ndị ohin ẹbụọ wẹ kpọma elu obe cheni Jizọsị; onyẹ ohu rị elu obe rị Jizọsị ẹka-ihiẹn, hụn-ẹbọ rị elu-obe rị Jizọsị ẹka-ekpẹn,

²⁸ Ya kẹ ihiẹn Ẹkụkwọ-nsọ ku gi mẹzu, makẹni Ẹkụkwọ-nsọ sị, “Wẹ gụn a yeni ndị a dan iwu.”

²⁹ Ndị ghafekọnị hụ e finfin isi, a kpari ẹ, a sị, “Ẹhẹn! Ẹlẹ ị sị n'i jẹnkọ d'e tikpọ Ụlọ-nsọ, gi akpọhịn ẹtọ tụndọnzi ẹ?!

³⁰ Zụọpụha nwan enwẹn i! Gha nwan elu obe hụ hidan.”

³¹ Ndị-isi nchụn-ẹjan lẹ ndị-nkuzi Iwu hụzị a mụ a ẹmụ, a sị ibe wẹ, “Ọ zụọpụha ndị ọzọ, kanị ọ sanị ẹka zụọpụha enwẹn ẹ!

³² Onyẹ nwẹn sị n'ọ wụ Kraịstị, Eze ndị Izrẹlụ, ya gha nwan elu obe hidan, kẹni ẹnyi hụn a, kweri!” Ndị wẹ kpọma wẹ lẹ ịya elu obe hụzịkwọ a kpari ẹ.

Kẹ Jizọsị Dọn Nwụn

³³ O ru ogẹn ẹnyanwụn gi a rị isi, alị hụ ile nọ gba ishi mgbahunmẹ ọkụrọkụ ẹtọ.

³⁴ Ihiẹn nọkẹ ọkụrọkụ ẹtọ, Jesu nọ weshi olu elu, yi, “Ẹlọị! Ẹlọị!! Lama Sabakitani?!” hụn wụ “Chuku m! Chuku m!! Kị haịn i gi gbakitọ m azụụn?!”

³⁵ Ụfọdụ ndị wuzo ebẹhụ a nụ ihiẹn o ku, wẹ nọ sị, “Gọn ni ntịn, ọ rị a hị Ẹlaịja!”

³⁶ Onyẹ ohu imẹ wẹ nọ gbajẹn d'e gi ẹru suru manya rụ-ụka, fa a ye ọnụnụ mkpịnsịn, ye ẹ ra, sị, “Cheri ni, nị ẹnyi lele kẹ Ẹlaịja k'a bịa d'e wetu ẹ elu obe!”

³⁷ Jesu e yigụzị okẹn oro, ọ nọ kwọnbepụ.

³⁸ Ẹkwa wẹ gi gbọnbepụ Ebẹhụ Kachanrịn Nsọ imẹ Ụlọ-nsọ nọ gbawa ẹbụọ gha elu d'e ru alị.

³⁹ Ọkị-agha hụn wuzo ihun ẹ ebẹhụ a hụn kẹ Jesu dọn nwụnhụn, ọ nọ sị, “Ezioku-ezioku, onyẹni wụ Nwa Osolobuẹ.”

⁴⁰ O nwọnzighọ ikpoho gha ebe teni e lecheni ihiẹn rị e mẹni; ndị hụ imẹ wẹ wụ Meri onyẹ Magidala lẹ Salomi lẹ Meri nnẹ Jemisi hụn-nta lẹ Josisi.

⁴¹ Ikpoho ndịnị e sọn Jesu kẹ ọ rị Galili, e yen'ẹ ẹka, e jẹnn'ẹ ozi. Ikpoho ndị ọzọ bu ọda sọn ẹ bịa Jerusalẹm rịzịkwọ ebahụn.

Kẹ Wẹ Dọn Li Jesu

⁴² Ẹnyasị hụ, ebe o mẹni Ụhụọhịn ikwademẹ Ezumikẹn rọ, ya wụ nị ọhị gbahụ Ezumikẹn e bidọn,

⁴³ Josẹfụ onyẹ obodo Arịmatịa nọ jẹn d'e kunrun Paịleti. Josẹfụ wụ onyẹ wẹ marịn amarịn imẹ Ndị-isi Nkịkwama. Ọ rịzịkwọ ndị rị e che ọbịbịa Alị-eze Osolobuẹ. Ọ nọ rikin obi d'e kunrun Paịleti, sị a ye ẹ ẹhụ Jesu.

⁴⁴ Ọ tụ Paịleti ẹnya, ọ nọ sị kẹ Jesu a nwụnhụngụọlẹ. Ọ nọ kpọ ọkị-agha hụ, jụ a kẹ Jesu a nwụnọlẹ.

⁴⁵ Ogẹn o gi nụgụ ọnụ ọkị-agha hụ, ọ nọ sị Josẹfụ jẹn d'e buru ẹhụ hụ.

⁴⁶ Josẹfụ nọ ṅọnrin ẹkwa linẹ, butu ẹhụ Jesu elu obe, gi ẹkwa hụ fụma a, bu ẹ che ili wẹ gu rịkẹ mmughẹ ye imẹ ọmụma kẹ wẹ dọn e mẹ. Ya ọ nọ gi ọmụma hi ogbe nukin ọnụ ili hụ.

⁴⁷ Meri onyẹ Magidala lẹ Meri nnẹ Josisi rị ebahụn e lee ile, wẹ nọ marịn ebe wẹ buche ẹhụ Jesu.