Makị 14 - Ika

Isi Nke Mmẹnọ E Zuni Wẹ Jesu Eje-umẹ

¹ Ogẹn o gi họdụ akpọhịn ẹbụọ nị Mmẹmmẹ-Nghafe lẹ Mmẹmmẹ Brẹdi nwọnlẹni yisti ru, ndị-isi nchụn-ẹjan lẹ ndị-nkuzi Iwu hụ a chọ kẹ w'a dọn gi nzuzue nwụnrụn Jesu d'e gbu.

² Wẹ nọ sị, “Ẹnyi emẹkọkwọ a ogẹn Mmẹmmẹ, amamgbe isusu a rị.”

E Hukpu Wẹ Jesu Udẹn

³ Ogẹn Jesu gi rị obodo Bẹtani, iwe Saịmọnụ hụn emu oti te kụ, e ri ihiẹn-oriri, okpoho ohu nọ buhẹ ọgọ alabasta udẹn e kun fuẹin jun imẹ ẹ; udẹn ahụn ṅanran ọda-ọda, nadị kẹ wẹ gi mẹmẹ ẹ. Ọ nọ kụke ọgọ hụ, hu udẹn hụ ye Jesu isi.

⁴ Kanị ụfọdụ ndị rị ebahụn nọ wemẹ iwe, a sị ibe wẹ, “Kị wẹ rị e wiwini udẹnni ṅanrannị?

⁵ Nkẹ e re wẹ udẹnni hụn egho ọrụn akpọhịn ọgụn-mmisẹn ye ndị igbẹnnyẹ.” Ya wẹ nọ kọrịamanị okpoho hụ ọda-ọda.

⁶ Kanị, Jesu nọ sị wẹ, “Hapụn'a! Kị ụnụ rị e sọngbun'ẹ? Ihiẹn rị mma k'o mẹni m.

⁷ Ụnụ lẹ ndị igbẹnnyẹ rị ebeni ogẹn ile, ụnụ nwọn ikẹn mẹni wẹ ọhụnma ogẹn ọwụlẹ ụnụ chọ; kanị mmẹ nwẹn esọnkọ ụnụ nọdị ebeni ogẹn ile.

⁸ Okpohoni a nwangụọ ikẹn ẹ; o hukpuọlẹ m udẹn wẹ te k'e te m wẹ gha a kwama ozun m.

⁹ Nị m gwa ụnụ, ebe ọwụlẹ wẹ sikọ d'e zi oziọma imẹ ụwa, wẹ jẹnkọ d'e ku ihiẹnni o mẹ, e gi ẹ a nyanhan a.”

Judasị E Kweri N'o Re Jesu

¹⁰ Judasị nwa Iskarọtụ, onyẹ ohu imẹ ndị nsọnmazụụn Jesu mmẹbụọ hụ, nọ jẹn d'e kunrun ndị-isi nchụn-ẹjan kẹni o re Jesu ye wẹ.

¹¹ Ogẹn wẹ gi nụ ihiẹn ọ bịanị, ọ sụọ wẹ; wẹ nọ kwe ẹ nkwa nị wẹ k'e ye ẹ egho. Ya k'ọ nọ chọma oghere o k'e gi we Jesu ye wẹ.

Kẹ Jesu Lẹ Ndị nsọnmazụụn A Dọn Ri Oriri-nghafe

¹² O ru ụhụọhịn ibuzọ Mmẹmmẹ Brẹdi nwọnlẹni yisti o gi a fụ, ụhụọhịn hụ wẹ gi e gbu ebulu Oriri-nghafe, ndị nsọnmazụụn Jesu nọ jụ a, sị, “Elebe k'i chọ nị ẹnyi dọnkwama hụn y'a nọ ri Oriri-Nghafe?”

¹³ Ya Jesu nọ zi mmadụ ẹbụọ imẹ ndị nsọnmazụụn a, sị wẹ, “Jẹn ni imẹ obodo, okẹnnyẹ ohu bu ite-mirin jẹnkọ d'e kunrun ụnụ; sọnmẹn'ẹ.

¹⁴ Sị nị onyẹ nwọn ụlọ ahụn ọ banye, ‘Onyẹ-nkuzi sị, “Elee mmughẹ wụ nke m hụn mmẹ lẹ ndị nsọnmazụụn m k'a nọ ri Oriri-nghafe?” ’

¹⁵ O jẹnkọ d'a ghọsị ụnụ mmughẹ ohu shịanị hụn rị ibe elu wẹ butọgụ oche lẹ teburu; ebẹhụ kẹ ụnụ sikọ d'e dọnkwamanị ẹnyi.”

¹⁶ Ya kẹ ndị nsọnmazụụn a hụ nọ shi imẹ obodo, wẹ nọ hụn ihiẹn ile kẹ Jesu dọn ku; wẹ nọ kwademẹ ihiẹn mmẹmmẹ Nghafe.

¹⁷ O ru ẹnyasị, Jesu lẹ ndị nsọnmazụụn a mmẹbụọ nọ bịa ebẹhụ.

¹⁸ Ebe wẹ rị e ri ihiẹn-oriri, Jesu nọ sị wẹ, “M rị a gwa ụnụ ezioku, onyẹ ohu imẹ ụnụ jẹnkọ d'e re m, onyẹ mmẹ lẹ ya rị e ri ihiẹn-oriri.”

¹⁹ Ẹfọ asụọzịnị ndị nsọnmazụụn a ụsụọ; onyẹ-onyẹ hụ a sị a, “Ẹlẹkwọ mmẹ! Mmẹ rọ?”

²⁰ Jesu nọ sị wẹ, “Onyẹ ohu imẹ ụnụ mmẹbụọ rọ, onyẹ hụn mmẹ lẹ ịya rị nwan e suru brẹdi imẹ afẹrẹ ohu.

²¹ Ẹghẹẹ, Nwa nke ịhịan lakọ nwan kẹ Ẹkụkwọ-nsọ dọn ku, kanị nsọngbu rị e che onyẹ sikọ d'e re Nwa nke Ịhịan! O te ka onyẹ hụ mma nị amụnị w'a!”

Oriri-nsọ

²² Ebe wẹ rị e ri ihiẹn-oriri ahụn, Jesu nọ weri brẹdi, ọ kpanmịngụ Osolobuẹ, ọ nọ bebe ẹ, w'ẹ ye ndị nsọnmazụụn a, sị, “Weri n'ẹ; ọnwan wụ ẹhụ m.”

²³ Ọ nọ weri mkpu, ọ kpanmịngụ Osolobuẹ, ọ nọ buye wẹ ya. Wẹ ile nọ rarịsọnmẹ.

²⁴ Ọ nọ sị wẹ, “Ọnwan wụ ẹdeke m wẹ gi ufiri ndị bu ọda hupụ; ẹdeke m wẹ gi biye ẹka nkwerigbama Osolobuẹ tumẹ ẹgbata ya lẹ ndị nke ẹ.

²⁵ M rị a gwa ụnụ ezioku, arakọzị m manya vaịnị d'e ru ogẹn m jẹnkọ d'a ra nke ọhụn a imẹ Alị-eze Chuku.”

²⁶ Wẹ nọ bụ ẹbụ, ya wẹ nọ nwan gha ebahụn jẹnmẹ Ugu Olivu.

Jesu E Ku Ẹ Nị Pita Jẹnkọ D'a Sị N'ọ Marịn A

²⁷ Jesu nọ sị wẹ, “Ụnụ ile jẹnkọ d'a gba m tọ. Makẹni, Ẹkụkwọ-nsọ sị, ‘M jẹnkọ d'e gbu onyẹ-ndu atụnrụn, atụnrụn ile a gbayịya!’

²⁸ Kanị m ghagụ ọnwụn lihi, e shi m Galili d'e cheri ụnụ.”

²⁹ Pita nọ sị a, “Alakọ m'ị tọ! Ọsụọn'a nị ndị ọzọ ile a gba ị tọ!”

³⁰ Jesu nọ sị Pita, “M rị a gwa ị ezioku, nị tannị, imẹ abalịnị, ọkpa gini d'a kwan mgbe ẹbụọ, i jẹnkọ d'a ghọrị mgbe ẹtọ nị y'a marịn m.”

³¹ Kanị, Pita nọ kushid'ẹ ikẹn, sị, “Onwọnni ogẹn m'e gi la ị tọ, ọsụọn'a nị mmẹ lẹ yụ k'a nwụn!” Ndị nsọnmazụụn a ile họdụnị nọ kuzikwọ ẹrịra.

Kẹ Jesu Dọn Mẹ Ekpere Imẹ Gẹtisẹmani

³² Ya wẹ nọ shi ebe w'a kpọ Gẹtisẹmani. Jesu nọ sị ndị nsọnmazụụn a, “Nọdị nị alị ebeni, nị m jẹn d'e mẹ ekpere.”

³³ Ọ nọ weri Pita lẹ Jemisi lẹ Jọnụ jẹnmẹ. Ẹhụ efuzin'ẹ kaka; obi eruzin'ẹ alị.

³⁴ Ọ nọ sị wẹ, “Obi e d'a gbawapụ m. Nọdị nị ebeni, ụnụ e we ẹnya ru alị.”

³⁵ Ọ nọ jẹnzụka, tụha enwẹn ẹ ye alị, kpe ekpere, nị omẹni ọ rị nfe, ogẹn afụnfụn hụ ya ghafe ẹ,

³⁶ ọ sị, “Baba; Baba Nẹdi m! Onwọnni ihiẹn ị ghalẹni a s'ẹka e mẹ. Napụ m mkpu afụnfụn lẹ ọnwụnnị. Kanị uche i ya mẹ, ẹlẹ nke m.”

³⁷ Ogẹn o gi kin azụụn, ọ hụn wẹ kẹ wẹ rị ụran. Ọ nọ sị Pita, “Saịmọnụ, ị rị ụran? Ya wụ y'a s'ẹka mụ ẹnya ogẹn nọ ẹnịna?”

³⁸ Ọ nọ sị wẹ, “Mụnrụn nị ẹnya; e mẹ ni ekpere, amamgbe ụnụ a danban imẹ ọnwụnwan; mmọn ịhịan a chọghọ, kanị ndụn gụ ẹhụ.”

³⁹ Ọ nọ pụzị, mẹzikwọ ekpere ohu hụ.

⁴⁰ O kinhẹn ebe ndị nsọnmazụụn a rị, hụnzị wẹ kẹ wẹ rị a ranhịn, asadẹni wẹ ẹka shịapụ ẹnya. Amarịnzị wẹ ihiẹn wẹ sikọ d'a sị a.

⁴¹ O kinhẹn nke mgbe ẹtọ, ọ nọ sị wẹ, “Ụnụ rịkwọ nwan a ranhịn, e zuru ikẹn? Ogẹn e rugụọ. Lee n'ẹ, e we wẹ Nwa nke Ịhịan che ẹka ndị-njọ.

⁴² Lihi ni nị ẹnyi jẹnmẹ. Lee n'ẹ, onyẹ rị e reni m e rugụọ ebeni!”

A Nwụnrụn Wẹ Jesu

⁴³ Jesu rịhụ e ku oku hụ kẹ Judasị hụn wụ onyẹ ohu imẹ ndị nsọnmazụụn a bịa; ya lẹ igunrun busọnmẹ ọpịa-agha lẹ ẹgbe. Ndị-isi nchụn-ẹjan lẹ ndị-nkuzi Iwu lẹ ndị-isi zi wẹ.

⁴⁴ Judasị rị e ren'ẹ gwatọ wẹ ihiẹn wẹ sikọ d'e gi marịn Jesu, sị, “Onyẹ hụn m jẹnkọ d'e susu ọnụ, ịya wụ onyẹ ụnụ chọkọ; nwụnrụn n'a, ụnụ e kwọnkẹnmẹ ẹ, duru ẹ jẹnmẹ.”

⁴⁵ Ogẹn Judasị gi nwan bịa, ọ nọ jẹnburu Jizọsị, sị a, “Onyẹ-nkuzi!” O susu ẹ ọnụ.

⁴⁶ Ya ndị hụ o duhẹ nọ kwọndọn Jesu, nwụnrụn a.

⁴⁷ Kanị, onyẹ ohu imẹ ndị nsọnmazụụn a ndị ahụn turu ebẹhụ nọ sepụha ọpịa-agha, banpụ odibo Onyẹ-isi nchụn-ẹjan ntịn.

⁴⁸ Jesu sị wẹ, “Kị ụnụ buhẹni ọpịa-agha lẹ ẹgbe d'a nwụnrụn m, nọkẹ sị m wụ onyẹ-ohin?

⁴⁹ Mmẹ lẹ ụnụ rị imẹ Ụlọ-nsọ ụhụọhịn ile kẹ m rị a kuzi, ụnụ anwụnrụnnị m. Kanị ihiẹn ndịnị rị e mẹ kẹni ihiẹn Ẹkụkwọ-nsọ ku mẹzu.”

⁵⁰ Ndị nsọnmazụụn a ile nọ la a tọ, gbama ọsọ.

⁵¹ Okorọbịa ohu yihụ ẹkwa linẹ w'e yiye elu ẹ nọ sọnmẹ Jesu. A dọdọn w'ẹ ẹkwa hụ, chọ nị wẹ nwụnrụn a,

⁵² kanị ọ nọ la ẹkwa tọnị wẹ, gi ọtọ gbapụ.

E We Wẹ Jesu Jẹnni Ndị-isi Nkịkwama

⁵³ Wẹ nọ weri Jesu shi iwe onyẹ-isi nchụn-ẹjan. Ndị-isi nchụn-ẹjan lẹ ndị-nkuzi Iwu lẹ ndị-isi ile zu ebẹhụ.

⁵⁴ Pita sọnkọ Jizọsị; kanị ẹgbata wẹ e teyezighọ. Ọ nọ sọn ẹ banye ezi ọgwa onyẹ-isi nchụn-ẹjan, sọn ndị-nche rị ebẹhụ nọdị alị, nyanma ọkụn.

⁵⁵ Ndị-isi nchụn-ẹjan lẹ Ndị-isi Nkịkwama ile hụ a chọ ihiẹn w'e gi hangbu Jizọsị eṅẹn kẹni wẹ gbu ẹ, kanị ahụnnị wẹ;

⁵⁶ ọsụọn'a nị ndị bu ọda e buokingụọ Jesu ọnụ, oku wẹ adangbamanị.

⁵⁷ Ya kẹ ụfọdụ ndị rị ebẹhụ nọ lihi ọtọ, buokinzi Jesu ọnụ, sị,

⁵⁸ “Ẹnyi nụ k'o ku n'o jẹnkọ d'e tikpọ Ụlọ-nsọnị wẹ gi ẹka tụn, gi akpọhịn ẹtọ tụn hụn wẹ gilẹni ẹka tụn.”

⁵⁹ Kanị, ẹri ndịnị shịa adangbamazịkwọnị.

⁶⁰ Ya kẹ onyẹ-isi nchụn-ẹjan nọ nwan lihi ọtọ ihun wẹ ile, jụ Jesu ajụjụ, “Y'e nwọn ihiẹn y'a shịarị imẹ ihiẹnni ile wẹ rị e kin?”

⁶¹ Kanị Jesu nọ gba nkịtịn, ọ shịarịnị ihiẹn ọwụlẹ. Onyẹ-isi nchụn-ẹjan nọzị sị a, “Ịyụ wụ Kraịstị, Nwa Onyẹ Hụ Rịchanrịn Mma?”

⁶² Jesu nọ sị, “Mmẹ rọ; ụnụ jẹnkọ d'a hụndẹ Nwa nke Ịhịan ebe ọ nọdị alị ẹka-nni Osolobuẹ Onyẹ nwọn ikẹn ile, hụnzị a k'ọ rị elu orukpu o gi lala!”

⁶³ Ya kẹ onyẹ-isi nchụn-ẹjan nọ tika ẹkwa ye enwẹn ẹ olu, sị, “Kị ẹnyi rịzị a chọnị ọshẹri?!

⁶⁴ Ụnụ a nụgụọ arụnị o ku. Kị wụ uche ụnụ?” Wẹ ile nọ sị nị ikpe-ọnwụn a magụọ a.

⁶⁵ Ụfọdụ nọ jụma Jesu ẹsọn, kpumẹ ẹ ẹnya, fịan a ihiẹn, sị a, “Bu amụma!” Ndị-nche nọzị weri ẹ, gbu ẹ ili.

Kẹ Pita Dọn Ghọrị N'ọ Marịn Jizọsị

⁶⁶ Pita rị ibe alị imẹ ezi-ọgwa hụ, okpoho ohu imẹ idibo onyẹ-isi nchụn-ẹjan nọ bịa ebẹhụ.

⁶⁷ Ọ hụn Pita ebe ọ rị a nyan ọkụn, ọ nọ bu ẹnya tụma a, sị a, “Ịyụ lẹ Jizọsị onyẹ Nazarẹtị wị.”

⁶⁸ Kanị Pita nọ ghọrị, sị, “Amarịn m ihiẹn ị rị e ku; aghọtanị m ihiẹn i rị e ku!” Ọ nọ pụ ebẹhụ, shi ọnụ-mgbọn. Ya kẹ ọkpa nọ kwan.

⁶⁹ Okpoho-odibo hụ a hụnzị a ebahụn, ọ nọ gwama ndị wuzo ebẹhụ, “Okẹnnyẹni wụ onyẹ nke wẹ!”

⁷⁰ Kanị Pita a ghọrịzị. O tebe, ndị turu ebahụn nọzị sị Pita, “Ezioku-ezioku, ị wụ onyẹ nke wẹ, makẹni ị wụ onyẹ Galili.”

⁷¹ Kanị, Pita nọ bụma enwẹn ẹ ọnụ, e kundẹ Osolobuẹ, a sị, “Amarịn m okẹnnyẹni ụnụ rị e ku oku ẹ.”

⁷² Ya kẹ ọkpa nọ kwan nke mgbe ẹbụọ, ya Pita nọ nyanhan oku Jesu gwa a, “Ọkpa gini d'a kwan mgbe ẹbụọ, i jẹnkọ d'a ghọrị mgbe ẹtọ nị y'a marịn m.” Ndụn a gụ a, ọ nọ kwanma ẹkwan.