Makị 13 - Ika

Isi Nke Mmẹtọ Jesu E Ku Ẹ Nị Wẹ K'e Tikpọ Ụlọ-nsọ Jerusalẹm

¹ Ogẹn Jizọsị gi gha Ụlọ-nsọ pụkọ, onyẹ ohu imẹ ndị nsọnmazụụn a nọ sị a, “Onyẹ-nkuzi, lee ihiẹn ọmụma ndịnị hi-ogbe-o! Lee okẹn ụlọ ndịnị magbu enwẹn wẹ mma-o!”

² Jesu nọ sị a, “Y'a hụn okẹn ụlọ ndịnị? Onwọnni ogbe ọmụma ohu k'a họdụ elu ibe ẹ, wẹ jẹnkọ d'a kụtuchanrịn wẹ ile.”

Nsọngbu Lẹ Ukpokpo Lalanị

³ Ebe Jesu sụọ nọdị alị elu Ugu Olivu hụn bu ihun zinmẹ ihun Ụlọ-nsọ, Pita, Jemisi, Jọnụ lẹ Andrụ nọ bịa d'a jụ a ajụjụ, sị a,

⁴ “Gwa ẹnyi, elee ogẹn kẹ ihiẹn ndịnị sikọ d'e mẹ? Kị wẹ e gi marịn nị ihiẹn ndịnị ile e d'e mẹmẹ?”

⁵ Jesu nọ gwama wẹ, sị, “Kpachanpụkwọ nị ẹnya amamgbe w'e dufie ụnụ.

⁶ Ndị bu ọda jẹnkọ d'e gi ẹfan m bịa, a sị, ‘Mmẹ wụ Kraịstị, Onyẹ Ahụn Osolobuẹ Tumẹ!’ Wẹ sikọ d'e gi ẹ dufie ndị bu ọda.

⁷ Ogẹn ụnụ jẹnkọ d'e gi nụ oku agha — kẹ hụn wẹ rị a lụ kẹ hụn wẹ kelẹni lụma; atụkwọlẹ ni egun. Ihiẹn ndịnị jẹnkọ d'e mẹ bụ ọgụgụ-ogẹn e ke ru.

⁸ “Alị sikọ d'a lụsọn alị; alị-eze a lụsọn alị-eze, alị k'e mẹhunmẹ ụzọ ile; ụnwụn sikọ d'a rị; kanị, ihiẹn ndịnị nọ kẹ ebe imẹ nọhụ mẹmẹ okpoho.

⁹ “Ụnụ nwẹn, kpachanpụkwọ nị ẹnya; makẹni wẹ jẹnkọ d'e wejẹn ụnụ ọgwa ichẹn-ichẹn, gbu ụnụ ili imẹ ụlọ-ofufe ichẹn-ichẹn; ụnụ jẹnkọ d'e wuzo ihun ndị Gọvanọ lẹ ndị-nze makẹ ufiri m; ọ wụrụ oghere ụnụ e gi shịanị m ẹri.

¹⁰ “Wẹ k'e zigbarịgụ ndị alị ile oziọma.

¹¹ Wẹ nwụnrụn ụnụ, we ụnụ shi ọgwa, ehuelẹ ni uhue ihiẹn ụnụ jẹnkọ d'e ku, ka ku ni ihiẹn ọwụlẹ Osolobuẹ jẹnkọ d'e ye ụnụ ogẹn hụ, makẹni ẹlẹ ụnụ jẹnkọ d'e ku kanị Mmọn-nsọ.

¹² “Umunẹ jẹnkọ d'e we umunẹ wẹ ye wẹ gbu; ndị nẹdi k'e we ụmụ wẹ ye wẹ gbu; ụmụ k'e bunụmanị ndị mụnị wẹ, mẹ wẹ gbu wẹ.

¹³ Ize ụnụ jẹnkọ d'a ban ịhịan ile makẹ ufiri m. Kanị onyẹ din ndidin d'e ru njẹndemẹ kẹ Osolobuẹ sikọ d'a zụọpụha.

Eje-ụrụ Hụ

¹⁴ “Kanị, hụn ụnụ gihụ hụn ‘Eje-ụrụ ahụn’ k'o wuzo ebe furulẹni n'ọ rị (onyẹ hụn rị a gụn ihiẹnni ya ghọha a), ndị rị Judia ogẹn hụ wẹ gbashi elu-ugu.

¹⁵ Onyẹ hụn rị elu ụlọ ya ehidangụkwọlẹ banyemẹzi imẹ ụlọ n'o jẹnkọ d'e weri ihiẹn ọwụlẹ.

¹⁶ Onyẹ rị ugbo ya ekinhẹnkwọlẹ d'e weri ẹkwa a.

¹⁷ O jẹnkọ d'a fụ ndị rị imẹ lẹ ndị pa nwa ọrụn ogẹn hụ!

¹⁸ E mẹ ni ekpere amamgbe o mẹ ogẹn oyi!

¹⁹ Makẹni okẹn afụnfụn jẹnkọ d'a rị ogẹn hụ — ụdị hụn rịtulẹni kete Osolobuẹ e kelẹ ụwa; ụdị hụn jẹnkọlẹni d'a rịzị.

²⁰ Omẹni Di-nwọnni-ẹnyi e te belụanị ogẹn hụ, onwọnni onyẹ sikọ d'a s'ẹka wanahịn. Kanị, o belụagụọ ogẹn hụ makẹ ufiri ndị ọ họrị, ndị nke ẹ.

²¹ “Ogẹn hụ, onyẹ sị ụnụ, ‘Lee ẹ, Kraịstị rị ebeni!’ Mọbụ, ‘Lee ẹ, ọ rị ebahụn,’ ekwerikwọlẹ ni.

²² Ndị kpọ enwẹn wẹ Kraịstị lẹ ndị amụma-ntụ jẹnkọ d'a pụha. Wẹ jẹnkọ d'a rụnsọnmẹ ihiẹn ahịma lẹ ọrụn-atụmẹnya kẹni wẹ dufie ịhịan, kẹni wẹ dufiedẹ ndị Osolobuẹ họrị — omẹni o te k'a nị mẹ.

²³ Kpachanpụ nị nwan ẹnya; a gwatọgụọkwọ m ụnụ ihiẹn ile!

Ọbịbịa Jesu

²⁴ “Ogẹn hụ, ogẹn afụnfụn hụ ghafegụhụ, ẹnyanwụn jẹnkọ d'a gba ishi, ifọn etibehi;

²⁵ kokisẹ jẹnkọ d'a gha elu-igwere a danye alị, ikẹn ndị rị elu jẹnkọ d'e mẹhunmẹ.

²⁶ Ogẹn hụ kẹ ịhịan ile k'e gi hụn Nwa nke Ịhịan k'ọ rị imẹ orukpu o gi lala ya lẹ ikẹn hi ogbe lẹ ọghọ o k'e gi bịa.

²⁷ O jẹnkọ d'e zi ndị mmọn-ozi ẹ ye imẹ ụwa ile d'e wegbama ndị Osolobuẹ họrị ebe-lẹ-ebe wẹ rị.

Ihiẹn Jesu Gi Osisi Figi Kuzi

²⁸ “Gi ni osisi figi mụnrụn ihiẹn: Hụn o gihụ fọrịma, ụnụ a marịn nị udu-mirin e d'e bidọn.

²⁹ Ẹrịra k'ọ rịzịkwọ, ụnụ hụn kẹ ihiẹn ndịnị rị e mẹ, ụnụ a marịn nị Nwa nke Ịhịan a rịgụọ ẹhụ nsue, o rugụọ ọnụmụzọ.

³⁰ Ezioku kẹ m rị a gwa ụnụ, agbọnị a ghafegụkọ ihiẹn ndịnị kebe mẹzu.

³¹ Igwere lẹ ụwa k'a gụ, kanị oku m k'a bụnrịrị.

Onwọnni Onyẹ Marịn Ụhụọhịn O K'a Wụ

³² “O mẹ nke ụhụọhịn o k'a wụ mọbụ ogẹn o k'a wụ ụhụọhịn hụ, onwọnni onyẹ marịnnị, kẹ ndị mmọn-ozi rị elu-igwee kẹ mmẹ Nwa-Chuku; Chuku-Nẹdi sụọ marịn.

³³ Kpachanpụ nị nwan ẹnya; mụnrụn nị ẹnya, makẹni ụnụ amarịn ogẹn o k'a wụ.

³⁴ Ọbịbịa Nwa nke Ịhịan jẹnkọ d'a rị kẹ ebe okẹnnyẹ ohu jẹnkọ alị-ịhịan nọ bu ihiẹn ẹ che ẹka idibo ẹ, onyẹ lẹ ọrụn a, onyẹ lẹ ọrụn a, sị onyẹ-nche ya chemẹ nche.

³⁵ Mụnrụn nị nwan ẹnya, makẹni ụnụ amarịn ogẹn di-nwọnni ụnụ hụn ụnụ rị iwe ẹ k'e gi lụa — kẹ ogẹn ẹnyasị rọ-o, kẹ imẹ abalị rọ-o, kẹ ọkpa kwan rọ-o, kẹ eki fọnmẹ rọ-o, onwọnni onyẹ marịnnị.

³⁶ Amamgbe ọ lụa idẹnmizi, ọ hụn ụnụ kẹ ụnụ rị a ranhịn ụran.

³⁷ Ihiẹn m rị a gwa ụnụ kẹ m rị a gwa onyẹ ọwụlẹ: mụnrụn nị ẹnya!”