Makị 12 - Ika

Isi Nke Mmẹbụọ Ndị Wẹ Ye Ugbo Lepụ Ẹnya

¹ Ya kẹ Jesu nọ tanị wẹ ilu, sị, “Okẹnnyẹ ohu nwọn alị vaịnị tụnhunmẹ ẹ mgbọn, gutọ olu wẹ nọ a pịnpụha manya-vaịnị, tụn ụlọ nche ye imẹ ẹ. Ọ nọ bu alị vaịnị hụ che ẹka ndị sikọ d'a rụnn'a ya egbu-eke, ya ọ nọ jẹnmẹ alị-ịhịan.

² O ru ogẹn vaịnị, ọ nọ zi odibo ẹ d'e kunrun ndị hụ ugbo hụ rị ẹka d'e wẹhẹ hụn run'ẹ.

³ Wẹ nọ kwọndọn odibo hụ o zi, gbu e ili, gbama a ẹka chụpụ.

⁴ Okẹnnyẹ hụ nọ zizi odibo ọzọ, wẹ nọ ti ẹ ihiẹn isi, gbe ifẹnrẹn ye ẹ ihun.

⁵ O zizi odibo ọzọ, wẹ nọ gbu ẹ. Ẹrịra kẹ wẹ mẹsọnmẹ ndị bu ọda o zi; e gbu wẹ ụfọdụ ili, gbu ụfọdụ ozun.

⁶ “O nwọnzighọ onyẹ ohu o k'e zi: ezi nwa a. Omẹgụ, ọ nọ zi nwa a jẹnni wẹ, sị, ‘Wẹ jẹnkọ d'a gbaye nwa m.’

⁷ Kanị ndị hụ o buche ugbo hụ ẹka nọ sị ibe wẹ, ‘Onyẹni ya k'a kwarị ukuu ẹ. Nị ẹnyi gbu ẹ nwan kwarị ukuu ẹ!’

⁸ Ya wẹ nọ kwọndọn nwa a hụ, gbu ẹ, gha imẹ ugbo hụ ma a tuhu.

⁹ “Kị onyẹ hụ nwọn ugbo jẹnkọ d'e mẹ? O sikọ d'a bịa d'e gbupụ ndị ahụn, o we alị vaịnị hụ ye ndị ọzọ lepụ ẹnya.

¹⁰ Ụnụ e ke gụntu ẹ imẹ Ẹkụkwọ-nsọ nị ‘Ọmụma hụ ndị rị a tụn ụlọ jụ a wụrụgụọ nwan ọmụma gi ụlọ.

¹¹ Di-nwọnni-ẹnyi mẹ ihiẹnni, ọ tụka ẹnyi ẹnya!’ ”

¹² Ndị-ndu ndị Ju te nọ chọ nị wẹ nwụnrụn a, makẹni a ghọtagụọ wẹ nị uwẹ haịn o gi ta ilu hụ, kanị egun ndị rị ebahụn anịnị wẹ. Wẹ nọ la a tọ, gha ebahụn pụ.

A Jụ Wẹ Jesu Oku Ịkụ Ụgwọ-isi

¹³ Ya ndị-ndu nọ zi ụfọdụ ndị Itu-Farisi lẹ ndị itu Hẹrọdụ d'a chọ ihiẹn rị Jesu ọnụ, nị wẹ gi ẹ kwọndọn ẹ.

¹⁴ Wẹ nọ bịa d'e kunrun Jesu, sị a, “Onyẹ-nkuzi, ẹnyi a marịnghọ n'ị wụ onyẹ ezioku, nị y'a ra lee ịhịan ẹnya ihun, y'a ra gbeyeni ịhịan, kama, y'a kuzichanrịn ụzọ Osolobuẹ k'ọ rị. Gwa ẹnyi nwan, ọ hụghọ mma nị ẹnyi kụ eze-kanị wụ Siza ụgwọ-isi ra ọ rị mma? Nị ẹnyi kụ ra ẹnyi akụlẹ?”

¹⁵ Kanị, Jesu a hụngụọ a nị wẹ gi ẹro bịa, ọ nọ sị wẹ, “Kị haịn ụnụ gi a kpọnị m ọnyan? Wẹhẹni ni m akpụrụ egho dinarịọsụ nị m hụn a.”

¹⁶ Wẹ nọ wẹhẹn'ẹ akpụrụ egho dinarịọsụ. Ọ nọ sị wẹ, “Isi lẹ ẹfan onyẹ wụ hụnnị?” Wẹ nọ sị a, “Nke Siza rọ.”

¹⁷ Jizọsị nọ sị wẹ, “We ni ihiẹn Siza ye Siza, ụnụ e we ihiẹn Osolobuẹ ye Osolobuẹ.” Azịza a nọ tụ wẹ ẹnya ọda-ọda.

A Jụ Wẹ Jizọsị Oku Ịgha Ọnwụn Lihi

¹⁸ O nwọn ndị Itu-Sadusi bịa d'e kunrun Jesu. (Ndị Itu-Sadusi sị ndị nwụnhụn nị ara lihi). Wẹ nọ jụ Jizọsị ụtaa, sị a,

¹⁹ “Onyẹ-nkuzi, Mozizi ye ẹnyi iwu, sị, ‘Okẹnnyẹ nwụnhụn, latọ nwunyẹ ẹ, bụ ọ mụnị nwa, nwẹnẹ y'a lụma nwunyẹ nwẹnẹ ẹ hụ, kẹni ọ mụdọnni nwẹnẹ ẹ nwa.’

²⁰ “O te nwọn umunẹ ikẹnnyẹ ẹsa rịnị; onyẹ ibuzọ imẹ wẹ a lụ nwunyẹ, omẹgụ ọ nọ nwụnhụn ọ mụnị nwa.

²¹ Hụn mẹ ẹbụọ nọ lụma okpoho hụ. Ọ nwụnhụnzị ọ mụnị nwa. Ẹrịra kẹ hụn mẹ wẹ ẹtọ jẹnzi.

²² Wẹ mmadụ ẹsa lụgbarị okpoho hụ, nwụnhụn, amụnị wẹ nwa. Omẹgụ okpoho hụ nkẹ nọ nwụnhụn.

²³ Ogẹn ndị nwụnhụnnị e gi lihi, onyẹ k'o jẹnkọ d'a wụ nwunyẹ ẹ, hụnnị wẹ ẹsa lụgbarị a?”

²⁴ Jesu nọ sị wẹ, “Ẹlẹ amarịn Ẹkụkwọ-nsọ lẹ amarịn ikẹn Osolobuẹ rị e dufie ụnụ ihiẹnni?

²⁵ Ogẹn ndị nwụnnị sikọ d'e gi lihi, alụkọ wẹ di lẹ nwunyẹ; wẹ jẹnkọ d'a rị kẹ ndị mmọn-ozi rị elu-igwee.

²⁶ O mẹ nke iweli ndị nwụnhụnnị, ụnụ e ke gụn a imẹ Ẹkụkwọ Mozizi, ebẹhụ ọ nọ ku oku akụ-ọfịa hụ rị e nwụn ọkụn, nị Osolobuẹ sị Mozizi, ‘Mmẹ wụ Chuku Ebraham, Chuku Aziki, Chuku Jekọpụ’?

²⁷ Ya wụ ẹlẹ Chuku ndị nwụnnị k'ọ wụ kanị nke ndị rị ndụn. Amarịnnị e dufiechanrịngụọ ụnụ!!”

Iwu Kachanrịn Mkpa

²⁸ Onyẹ-nkuzi Iwu a pụha ebẹhụ, nụ kẹ wẹ wẹ rị a dọ, hụnzị nị Jesu za wẹ ọhụnma, ọ nọ jụ Jesu ụtaa, sị, “Elee iwu kachanrịn mkpa?”

²⁹ Jesu nọ za a, “Hụn kachanrịnnị wụ ọnwan: ‘Ndị Izrẹlụ, gọn ni ntịn! Di-nwọnni-ẹnyi wụ Chuku ẹnyi, ịya sụọ wụ Chuku.

³⁰ I jẹnkọ d'e gi obi i ile lẹ umẹ-ndụn ị ile lẹ uche i ile lẹ ikẹn i ile nwọn ihiẹn-ọsụsụọ Di-nwọnni-ẹnyi wụ Chuku i.’

³¹ Hụn mẹ ẹ ẹbụọ wụ ọnwan: ‘Ihiẹn ibe i sikọ d'a sụọrịrị ị kẹ ihiẹn enwẹn i dọn a sụọ ị.’ Onwọnni iwu ọzọ ka ndịnị.”

³² Onyẹ-nkuzi Iwu hụ nọ sị Jizọsị, “Y'e kughọ ọhụnma, onyẹ-nkuzi. Ezioku k'i ku nị Di-nwọnni-ẹnyi sụọ wụ Chuku, Chuku ọzọ arịa,

³³ lẹni igi obi i ile lẹ nghọta ị ile lẹ ikẹn i ile nwọn ihiẹn-ọsụsụọ Osolobuẹ lẹ ịnị ihiẹn ibe i a sụọ ị kẹ ihiẹn enwẹn i dọn a sụọ ị kachanrịn mkpa a rị karị ẹjan ile wẹ dụn ọkụn lẹ ẹjan ndị ọzọ ile.”

³⁴ Jizọsị a hụn a n'ọ za ọhụnma, ọ nọ sị onyẹ-nkuzi Iwu hụ, “Y'a nọkunmẹgụọ Alị-eze Osolobuẹ.” Ọnwan e mẹgụ, onwọnzini onyẹ egun nị jụ Jesu ajụjụ.

Kẹ Kraịstị Dọn Kọwa Onyẹ Kraịstị Wụ

³⁵ Ya kẹ Jesu nọ kuzimẹzi imẹ Ụlọ-nsọ ebẹhụ. Ọ jụ ụtaa, sị, “Kị haịn ndị-nkuzi Iwu gidẹ e ku ni Kraịstị wụ nwa Defidi?

³⁶ Bụ Defidi lẹ enwẹn ẹ ku oku ghahanị ikẹn Mmọn-nsọ, sị, ‘Di-nwọnni-ẹnyi sị Di-nwọnni m, “Nọdị alị ẹka-nni m d'e ru mgbe m bugụ ndị iṅẹnrẹn i che okpuru ụkụ ị.” ’

³⁷ Defidi lẹ enwẹn ẹ kpọ a ‘Di-nwọnni m,’ nanị k'o dọn nwan wụrụ nwa Defidi?” Ọ hụ e ku, ọ hụ a sụọ igunrun hụ.

Jesu Sị Wẹ Kpachanpụnị Ndị-nkuzi Iwu Ẹnya

³⁸ K'o dọn rị a kuzi, ọ sị, “Kpachanpụnị nị ndị-nkuzi Iwu ẹnya: ọ sụọ wẹ nị w'e yi ẹkwa tueni a ghahunmẹ lẹ ni w'e gi mgbaye e kele wẹ ogbe;

³⁹ ọ sụọ wẹ nị w'a nọdị isi-ocho imẹ ụlọ-ofufe lẹ ebe wẹ nọ e ri oriri.

⁴⁰ W'e rigbu ikpoho di wẹ nwụn, e gi ekpere sueni e kpumẹ ẹ. Uwẹ sikọ d'a narịn afụnfụn ka njọ.”

Ogbẹnnyẹ Hụn Yechanrịn Ihiẹn O Nwọn

⁴¹ Jesu nọdị alị bu ihun zinmẹ ẹkpẹti oyiye, e lee kẹ igunrun rị Ụlọ-nsọ rị e buche egho. Ndị ịdanfịn bu ọda hụ e buche egho hini.

⁴² Ya kẹ ogbẹnnyẹ ohu di ẹ nwụnhụngụ nọ bịa d'e buche afụ ẹbụọ.

⁴³ Jizọsị nọ kpọ ndị nsọnmazụụn a, sị wẹ, “Ogbẹnnyẹni di ẹ nwụnhụn buchekarị ịhịan ile rị e buche egho imẹ ẹkpẹti oyiye hụ.

⁴⁴ Makẹni wẹ ile gha ọda wẹ nwọn ye, kanị ya nwẹn, k'o mẹhan ogbẹnnyẹ, o yechanrịn ihiẹn ile o nwọn o gi bi.”