Makị 11 - Ika

Isi Nke Mmanaị Jizọsị A Banhan Jerusalẹm Nọkẹ Eze

¹ E rumẹ wẹ Jerusalẹm, pụha ẹhụ Bẹtifeji lẹ Bẹtani, ukun Ugu Olivu, Jesu nọ zi ndị nsọnmazụụn a ẹbụọ ozi,

² sị wẹ, “Jẹn ni imẹ obodo ntanị rị ụnụ ihun: hụn ụnụ gihụ banye, ụnụ jẹnkọ d'a hụn nwa-jaki wẹ nyintulẹni wẹ limẹtọ; tọpụn'a, ụnụ e wẹhẹni m'ẹ.

³ Onyẹ sị ụnụ, ‘Kị ụnụ rị e mẹni ihiẹnni?’ Sị n'a hụ, ‘Onyẹ-nwọnni-ẹnyi chọ a, o jẹnkọ d'e wekinhẹn ẹ kikẹnni.’ ”

⁴ Wẹ nọ jẹnmẹ, e ru wẹ ọgbara-ogbe wẹ ru, wẹ nọ hụn nwa-jaki wẹ limẹtọ ihun-ezi ẹhụ ọnụmụzọ. Ogẹn wẹ gi rị a tọpụ a,

⁵ ụfọdụ ndị wuzo ebẹhụ nọ sị wẹ, “Kị ụnụ rị a tọpụnị nwa-jaki hụ?”

⁶ Wẹ nọhụ ku ihiẹn Jesu sị wẹ ku; wẹ nọ nị wẹ weri ẹ.

⁷ E wẹhẹni wẹ Jesu nwa-jaki hụ, ya wẹ nọ gbama ẹwuru wẹ ye elu ẹ, Jesu nọ nọdị alị elu ẹ.

⁸ Ndị bu ọda nọ gbama ẹwuru w'e yiye elu ẹ ye ụzọ, ndị ọzọ nọ gha ọfịa tigirisọnmẹ agalaba osisi, gbama wẹ ye ụzọ.

⁹ Ndị rị ihun lẹ ndị rị e sọnn'ẹ hụ e yi, “Hozana! Ngọzi ya rịnị Onyẹ hụn gi ẹfan Di-nwọnni-ẹnyi lala!

¹⁰ Chuku ya gọzi Alị-eze hụ lalanị — Alị-eze nẹdi ẹnyi Defidi. Ọjịja-mma ya rịnị Osolobuẹ ebahụn kachanrịn elu e jẹn!”

¹¹ Ya Jizọsị nọ banye Jerusalẹm, shi Ụlọ-nsọ. O lehunmẹchanrịngụ ihiẹn ile, ọ nọ pụ makẹni ọhịhị a gbagụọ, ya lẹ ndị nsọnmazụụn a mmẹbụọ nọ shi Bẹtani.

Kẹ Jesu Dọn Bụ Osisi Figi Ohu Ọnụ

¹² Eki e fọn, ebe wẹ gha Bẹtani lala Jerusalẹm, ẹgụn hụ a gụn Jesu.

¹³ O lecheni figi ẹhụhụọ jun elu ẹ, ọ nọ jẹn d'e lele kẹ mkpụrụ hụ a. Kanị, o ru ẹ, ọ nọ hụn a nị ẹhụhụọ sụọ rị elu ẹ, makẹni ogẹn figi eke ru.

¹⁴ Ọ nọ sị figi hụ, “Onwọnzini onyẹ k'a hụn mkpụrụ ị ri!” Ndị nsọnmazụụn a a nụghọ kẹ o ku ẹ.

Ihiẹn Jizọsị Mẹ Ndị Rị A Zụ Afịa Imẹ Ụlọ-nsọ

¹⁵ Ogẹn wẹ gi ru Jerusalẹm, Jesu nọ shi imẹ Ụlọ-nsọ, chụpụma ndị rị a zụ afịa ebẹhụ — kẹ ndị rị e reni kẹ ndị rị e ṅọnni. Ọ nọ hukpumẹ teburu ndị a gbahutọ egho lẹ oche ndị rị e re oluikuku.

¹⁶ Onwọnni onyẹ ọ nị bugha ihiẹn ọwụlẹ imẹ Ụlọ-nsọ.

¹⁷ Ọ hụ a kuzi ndị rị ebẹhụ, a sị, “E deni w'ẹ imẹ Ẹkụkwọ-nsọ nị, ‘Wẹ sikọ d'a kpọ Ụlọ m ụlọ alị ile nọ e mẹ ekpere?’ Kanị ụnụ e gigụọ a họnrin ebe ndị ohin a warị!”

¹⁸ Ogẹn ndị-isi nchụn-ẹjan lẹ ndị-nkuzi Iwu gi nụ ihiẹnni, wẹ nọ chọma kẹ w'a dọn gbu Jesu makẹni egun ẹ rị a tụ wẹ ebe o mẹni nkuzi ẹ e werigụọ igunrun hụ ile.

¹⁹ O ru ẹnyasị hụ, Jizọsị lẹ ndị nsọnmazụụn a nọ gha imẹ Jerusalẹm pụ.

Jesu E Gi Osisi Ọ Bụ Ọnụ Kuzi Okukwe

²⁰ Ụzụtụntụn, ebe wẹ ghakọ ụzọ hụ, wẹ nọ hụn a nị figi hụ a kpọgụọ nkụn d'e ru nkpọgụn a.

²¹ Pita a nyanhan, ọ nọ sị Jesu, “Onyẹ-nkuzi, lee-o, osisi hụ i bụ ọnụ a kpọgụọ nkụn!”

²² Jesu nọ sị wẹ, “Kweri ni nị Osolobuẹ k'a saẹka mẹ ihiẹn ile.

²³ Ezioku kẹ m rị a gwa ụnụ, onyẹ sị uguni, ‘Wẹ buli i elu tụye ohimin’ nị hụnyẹ enwọnni obi ẹbụọ, kama o kweri nị ihiẹn o ku jẹnkọ d'e mẹ, o jẹnkọ d'a rịn'a ẹrịra.

²⁴ Ya haịn m gi sị ụnụ nị ụnụ mẹ ekpere rịọ ihiẹn ọwụlẹ, kweri ni nị ụnụ e nwọnhẹngụọ a, ụnụ k'e nwọnhẹn ẹ.

²⁵ Ụnụ gha e mẹ ekpere, gbagharị nị, omẹni o nwọn onyẹ mẹ ụnụ eje-ihiẹn, kẹni Nẹdi ụnụ rị elu-igwee gbagharị ụnụ mmẹfie ụnụ.”

²⁶ Kanị, omẹni ụnụ agbagharịnị, Nẹdi ụnụ rị elu-igwee agbagharịkọ ụnụ.

A Jụ Wẹ Jizọsị Kẹ Onyẹ Zi Ẹ

²⁷ A banhanzị wẹ Jerusalẹm. Ebe Jesu jẹnkọ ijẹn imẹ Ụlọ-nsọ, ndị-isi nchụn-ẹjan lẹ ndị-nkuzi Iwu lẹ ndị-isi ndị Ju nọ bịa d'e kunrun ẹ.

²⁸ Wẹ nọ sị a, “Onyẹ sị ị mẹ ihiẹn ndịnị ị rị e mẹ? Onyẹ zi i?”

²⁹ Jesu nọ sị wẹ, “M jẹnkọ d'a jụ ụnụ akpụ ụtaa ohu; ụnụ za m'a, a gwa m ụnụ onyẹ sị m mẹ ihiẹn ndịnị:

³⁰ Onyẹ sị Jọnụ mẹ Mirin-Chuku o mẹ? Chuku rị elu-igwee zi ẹ, ra ịhịan? Za nị m'a?”

³¹ Wẹ wẹ nọ tụgbama iroro, sị, “Kị ẹnyi k'e ku nwan? Ẹnyi sị, ‘Elu-igwee k'ọ gha bịa,’ ọ k'a sị, ‘Kị haịn ụnụ gilẹni nwan gi oku ẹ dọn?’

³² Kanị ẹnyi asịkọkwọ, ‘Ọ gha ẹka ịhịan bịa.’ ” (Egun rị a tụ wẹ makẹni ịhịan ile marịn nị Jọnụ wụ onyẹ-amụma nke-esi.)

³³ Ya wẹ nọ za Jesu, sị, “Ẹnyi amarịn.” Jesu nọ sị wẹ, “Mmẹ nwẹn agwakọ ụnụ onyẹ sị m mẹ ihiẹn ndịnị.”