Makị 1 - Ika

Isi Nke Ohu Onyẹ Hụn Jẹnkọ D'a Kwanị Kraịstị Ụzọ

¹ Ẹnịna kẹ oziọma Jizọsị wụ Kraịstị Nwa Osolobuẹ dọn bidọn:

² Kẹ wẹ dọn de ẹ imẹ ẹhụhụọ Azaya onyẹ-amụma, “Lee ẹ, m zila onyẹ-ozi m n'o burun'i ụzọ, n'ọ kwan'ị ụzọ.

³ Olu rị e han imẹ atụ, a sị, ‘Kwa nị nị Di-nwọnni-ẹnyi ụzọ; mẹmẹ ni ụzọ a n'o zinrin!’ ”

Kẹ Jọnụ Onyẹ Mirin-Chuku Dọn Kwanị Jesu Ụzọ

⁴ Jọnụ hụn e mẹ mirin-Chuku pụha, kumẹ oku-Chuku imẹ atụ, a sị wẹ rogharị, nị wẹ mẹ wẹ mirin-Chuku hụn ghọsị nị e rogharịgụọ wẹ, kẹni Osolobuẹ gbagharị wẹ njọ.

⁵ Ndị ile rị ẹgbẹrẹ Judia lẹ ndị Jerusalẹm ile hụ e jẹn d'e kunrun Jọnụ, wẹ hụ e ku njọ wẹ, ọ hụ e mẹ wẹ mirin-Chuku imẹ Iyi Jọdanị.

⁶ Jọnụ yi ẹwuru wẹ gi ẹṅẹnrẹn anyịnyan-mkpukpuke mẹmẹ; akpụkpọ-anụ k'o gi kẹnmẹ ukun ẹ. Ihiẹn o ri wụ igurube lẹ mirin-ẹnwụn rị ọfịa.

⁷ Ọ hụ a sị wẹ, “Onyẹ kanị m lala m mẹmẹgụ, erudẹni m onyẹ e hulụa alị a tọpụ eriri akpụkụ a.

⁸ Mirin mmaka kẹ m gi e mẹ ụnụ mirin-Chuku, kanị, ya nwẹn jẹnkọ d'e gi Mmọn-nsọ mẹ ụnụ mirin-Chuku.”

Kẹ Jọnụ Dọn Mẹ Jesu Mirin-Chuku

⁹ Ogẹn hụ, Jesu nọ gha Nazarẹtị rị Galili bịa, ya kẹ Jọnụ nọ mẹ ẹ mirin-Chuku imẹ Iyi Jọdanị.

¹⁰ Hụn Jesu gihụ gha imẹ mirin pụha, ọ nọ hụn kẹ elu-igwere kpupụ, Mmọn-nsọ e hidan nọkẹ nduru, bịa d'a nọkwasị a.

¹¹ Ya olu nọ gha elu-igwee sị, “Ịyụ wụ ezi Nwa m; ihiẹn i a sụọka m.”

Kẹ Ekwensụ Dọn Nwan Jesu

¹² Mmọn-nsọ nọ nu ẹ ozigbo, shi imẹ atụ.

¹³ Ọ nọ nọdị imẹ atụ akpọhịn ọgụnnaị, Ekwensụ hụ a nwan a. Ịya lẹ eje-anụ ichẹn-ichẹn rị ebẹhụ; ndị mmọn-ozi hụzị e yen'ẹ ẹka.

Jesu E Bidọn Ọrụn A

¹⁴ Ogẹn wẹ gi kpọkingụ Jọnụ ye imẹ ụlọ-ngan, Jesu nọ bịa Galili d'e zimẹ oziọma Osolobuẹ.

¹⁵ Ọ hụ a sị, “Ogẹn e zugụọ, Alị-eze Osolobuẹ a rịgụọ nsue! Rogharị nị, ụnụ e kweri oziọma!”

Jesu A Kpọma Ndị K'e Sọnn'ẹ

¹⁶ Ebe Jizọsị ghakọ mkpẹnrẹn-mirin Odiyiri Galili, ọ nọ hụn Saịmọnụ lẹ Andrụ nwẹnẹ ẹ ebe wẹ rị a tụ ọga e ye imẹ mirin ahụn, makẹni wẹ wụ ndị e gbu azụn.

¹⁷ Jizọsị nọ sị wẹ, “Sọnmẹ ni m, m sikọ d'e mẹ ụnụ wụrụ ndị e wẹhẹ ịhịan rịkẹ azụn.”

¹⁸ Ya wẹ nọ la ọga wẹ tọ ozigbo, sọnmẹ ẹ.

¹⁹ O jẹnshi ihun ẹkẹrẹ, ọ nọ hụn Jemisi lẹ Jọnụ ụmụ Zẹbẹdi kẹ wẹ rị ụgbọ-mirin wẹ e dọnzi ọga wẹ gi e gbu azụn.

²⁰ Ọ nọ kpọ wẹ ozigbo; wẹ nọ la nẹdi wẹ lẹ ndị wẹ we ọrụn tọ imẹ ụgbọ, sọnmẹ ẹ.

Kẹ Jesu Dọn Chụpụ Eje-mmọn Imẹ Ịhịan

²¹ Jesu lẹ ndị nsọnmazụụn a nọ shi Kapanọm. O ru Ụhụọhịn Ezumikẹn, ọ nọ banye ụlọ-ofufe rị ebẹhụ d'a kuzi.

²² Nkuzi ẹ nọ tụ ndị rị ebahụn ẹnya, makẹni ọ kuzi nọkẹ onyẹ oku rị ẹka ẹlẹ nọkẹ ndị-nkuzi Iwu.

²³ Ogẹn hụ daị, o nwọn okẹnnyẹ ohu eje-mmọn rị imẹ ẹ, hụn rị imẹ ụlọ-ofufe wẹ. Okẹnnyẹ hụ nọ yi,

²⁴ “K'i gi ẹnyi e mẹ, Jesu onyẹ Nazarẹtị?! Ị bịa d'e tikpọ ẹnyi?! A marịnghọ m onyẹ ị wụ, Onyẹ-nsọ Osolobuẹ!!”

²⁵ Kanị, Jizọsị nọ jụgbọ eje-mmọn hụ, sị a, “Kpumẹ ọnụ; gha imẹ ẹ pụha!”

²⁶ Eje-mmọn hụ nọ se okẹnnyẹ hụ, gi okẹn olu yi oro, gha imẹ ẹ pụha.

²⁷ Ọ nọ tụ wẹ ile ẹnya, a jụma wẹ ibe wẹ, “Kị wụ hụnnị? Ọnwan wụ nkuzi ọhụn: o ku, ọ bụn! Ọ gwadẹ eje-mmọn oku, wẹ hụ a gbaye ẹ!”

²⁸ Ya kẹ ẹfan a nọ kpọgbarị ẹgbẹrẹ Galili ile ozigbo.

Jizọsị A Zụọ Ndị Bu ọda

²⁹ Hụn Jesu gihụ gha imẹ ụlọ-ofufe ahụn pụ, ịya lẹ Jemisi lẹ Jọnụ nọ banye iwe Saịmọnụ lẹ Andrụ.

³⁰ Emu rị a kụ nnẹ nwunyẹ Saịmọnụ; o dinẹ edinẹ makẹni ẹhụ-ọkụn rị a ẹhụ. Ya kẹ wẹ nọ gwa Jesu oku ẹ ozigbo.

³¹ Jizọsị nọ jẹn d'e kunrun ẹ, kwọndọn ẹka a, weli ẹ elu; ẹhụ ọkụn hụ nọ hapụ a. Ya k'ọ nọ lemẹ Jizọsị wẹ ọbịa.

³² O ru ẹnyasị, ogẹn anwụn gi rọgụ, wẹ nọ wẹhẹn'ẹ ndị ile emu rị a kụ lẹ ndị eje-mmọn rị imẹ wẹ,

³³ nke wụnị ndị obodo hụ ile e jun ọnụmụzọ;

³⁴ Jesu nọ zụọ ndị bu ọda emu ichẹn-ichẹn rị a kụ, chụpụsọnmẹ eje-mmọn bu ọda, ọ nịnị eje-mmọn ndị hụ ku oku makẹni a marịngụọ w'a.

Jizọsị E Zisọnmẹ Oziọma Imẹ Galili

³⁵ Ụzụtụntụn, ebe eki kelẹni fọnchanpụ, ọ nọ zọpụ, shi ebe ịhịan rịlẹni, nọ ebẹhụ mẹmẹ ekpere.

³⁶ Saịmọnụ lẹ ndị ya lẹ wẹ wị nọ chọma a.

³⁷ Ogẹn wẹ gi hụn a, wẹ nọ sị a, “Ịhịan ile rị a chọ ị.”

³⁸ Ọ nọ sị wẹ, “Nị ẹnyi shizi ni ụzọ ọzọ, obodo ndị rị ẹhụ ebeni, kẹni m ku oku-Chuku imẹ wẹ. Makẹni ya kẹ m bịa d'e mẹ.”

³⁹ Ọ nọ ghagbarị Galili ile, e zisọnmẹ oziọma imẹ ụlọ-ofufe wẹ rị ichẹn-ichẹn, a chụpụ eje-mmọn.

Jizọsị A Zụọ Onyẹ-oti

⁴⁰ Okẹnnyẹ ohu oti rị ẹhụ nọ bịa d'e kunrun Jesu, gbu osekpu, rịọma a, sị a, “Omẹni y'a chọghọ, ị k'a s'ẹka zụọ m, a wụbehi m onyẹ rụnị.”

⁴¹ Omikẹn ẹ nọ mẹ Jizọsị, ọ nọ tịnpụ ẹka mẹtụ a, sị a, “A chọghọ m! Dịnhịn, n'ị wụbehi onyẹ rụnị!”

⁴² Ozigbo, oti hụ nọ gha a ẹhụ pụ, ọ nọ wụbehi onyẹ rụnị!

⁴³ Jizọsị a gbagụ okẹnnyẹ hụ mkpịnsịn-ẹka ẹnya ọda-ọda, ọ nọ sị a lama,

⁴⁴ sị a, “A gwakwọlẹ onyẹ ọwụlẹ ihiẹnni; ka jẹn d'e we enwẹn i ghọsị onyẹ nchụn-ẹjan n'o lele i, weri ihiẹn Mozizi ku imẹ Iwu n'o gi fe i ẹhụ, gi ghọsị wẹ nị y'a rụzịnị.”

⁴⁵ Kanị, okẹnnyẹ hụ a pụ, kusọnmẹdẹ ihiẹnni ebe ile, nke wụnị Jesu asazịnị ẹka pụha ebe ịhịan rị, kama, ọ ghasọnmẹ azụụn ịhịan bilẹni, kanị wẹ hụkwọ a gha ebe ile a bịa ebahụn d'e kunrun ẹ.