Maịka 7 - Ika

Isi Nke Ẹsa K'osilẹrị, M K'e Cheri Chuku.

¹ Ụya e gbuẹ m! M nọ nwan kẹ onyẹ chọha figi ogẹn figi, kanị a ghọgụọ w'a, ghọdọnzi! Akpụrụ figi-ibuzọ rị a gụnnị m arịa!

² Ndị e mẹ uche Osolobuẹ arịzị alịnị; onwọnzini onyẹ kụrụ ọtọ. Onyẹ ọwụlẹ hụ e che n'o gbu ibe ẹ; onyẹ-onyẹ hụ e shitọnị ibe ẹ ọnyan.

³ Wẹ ile buchanrịn ẹka ẹbụbụọ che eje-ihiẹn, ọ hụ a gha wẹ ẹka. Ndị isi hụ e gi ọnụ a dọ egho-azụụn, ndị ọka-ikpe hụzị a na; Ndị uku hụ e gi ọnụ wẹ a chọ nke wẹ; wẹ ile hụ e kịgbama e mẹ eje-ihiẹn.

⁴ Mma wẹ e mẹ nọ kẹ ogun; onyẹ hụn kụrụ ọtọ imẹ wẹ akanị ụgba ogun-lẹ-ọkịnkan mma. Kanị ogẹn ahụn ndị-nche ụnụ gwatọ ụnụ a bịagụọ, ogẹn m'e gi ye ụnụ afụnfụn; o sikọ d'a gba ụnụ ngharị-ẹnya!

⁵ Egikwọlẹ onyẹ ịyụ lẹ ya gba a wị dọn ẹnya; egikwọlẹ ọwụ ị dọn ẹnya; marịnkwọ ihiẹn y'e ku ebe nwunyẹ i rị.

⁶ Makẹni, okẹnnyẹ rị nwan e legberi nẹdi ẹ; okpoho rị e bu a nụmanị nnẹ mụn'a; nwunyẹ-nwa rị e bu a nụmanị nnẹ-di ẹ; ndị rị ikpụlọ ịhịan wụ nwan ndị iṅẹnrẹn ẹ.

⁷ Kanị, mmẹ nwẹn, Osolobuẹ kẹ m'e lee; m k'e cheri Chuku hụn a zụọpụhanị m; Chuku m jẹnkọ d'a za m.

⁸ Onyẹ iwe, amụlẹ m ẹmụ, makẹni, ọsụọn'a nị m dan adan, m k'e lihizi; ọsụọn'a nị m rị imẹ ishi, Osolobuẹ jẹnkọ d'a wụrụnị m ukpẹ.

⁹ Nị m narịn afụnfụn Osolobuẹ ye m makẹ njọ m mẹ ẹ, d'e ru n'o leban ẹnya ọnọdị m, hannị mmẹ lẹ ndị o gi e ye m afụnfụn eṅẹn. O wepụhazị m ebe ukpẹ rị, a hụn m nzụọpụha a.

¹⁰ Ogẹn hụ, eṅẹnrẹn m a hụn a, ifẹnrẹn e mẹgbu ẹ onyẹ nwẹn te sị m “Elebe Osolobuẹ wụ Chuku i rị nwan?!” Ẹnya m k'a hụn k'ọ dan; o họnrin ihiẹn w'a zọ ụkụ nọkẹ ịkpọtọ rị ụzọ.

Osolobuẹ K'a Tụndọnzi Alị Izrẹlụ

¹¹ Jerusalẹm, ogẹn w'e gi rụndọnzi mgbọn i lala! O ru ogẹn ahụn, wẹ k'e weshịa alị ị.

¹² O ru ogẹn hụ, a gha wẹ Asiria lẹ obodo rịsọnmẹ Ijiptu lụaburu i, gha Ijiptu d'e ru Iyi Yufretisi lụaburu i, gha ebe ile ohimin ru lẹ ugu ile lụaburu i.

¹³ Kanị ụwa k'e mẹ mkpọkọ-mkpọkọ, yeni ihiẹn ndị rịn'a rị e mẹ.

Osolobuẹ K'e Mẹzi Omikẹn ndị Nke Ẹ

¹⁴ Osolobuẹ dodo, gi ọkpọ ị du ndị nke i, atụnrụn ị hụn wẹ sụọ bi imẹ ọfịa, ọsụọn'a nị wẹ rị adamada ogige mẹ wokowoko. Dodo nịzị wẹ kpa nni imẹ Bashanị lẹ Gilẹdị kẹ wẹ e mẹ mbụ-mbụ.

¹⁵ Kẹ m dọn mẹ ogẹn ahụn, gi ẹ wepụha ụnụ imẹ alị Ijiptu, m jẹnkọ nwan d'a rụnghọsị wẹ ọrụn-atụmẹnya.

¹⁶ Alị ndị ọzọ jẹnkọ d'a hụn a, ifẹnrẹn e mẹgbu wẹ nị ikẹn ile wẹ kpa enwọn ihiẹn ọ wụ, e gi wẹ ẹka kpumẹ ọnụ, ntịn a kụkin wẹ;

¹⁷ a ra wẹ uzunzun nọkẹ agwọ nọkẹ ihiẹn a rịnị; a ma wẹ piripiri rụpụhasọnmẹ ebe wẹ te gi dọn ẹnya, gi egun buruhẹ Osolobuẹ, Chuku ẹnyi, a tụ egun ụnụ.

¹⁸ Elee mmọn nọ kẹ yụ wụ Osolobuẹ, hụn a gbagharị njọ? Ịyụ hụn jẹnkọ d'e bupụ ẹnya njọ ndị nke i ndị nke hụn k'a họdụnị? Osolobuẹ ara wesọnmẹ iwe jẹnrin ejẹn, makẹni ihiẹn-ọsụsụọ wụ ihiẹn a sụọn'a.

¹⁹ O jẹnkọ d'e mẹzi omikẹn ẹnyi; o jẹnkọ d'a zọ njọ ẹnyi ụkụ. O k'a ma njọ ile ndị nke ẹ mẹ ye imẹ-imẹ ohimin.

²⁰ I jẹnkọ d'e gi ezioku sọn odibo i wụ Jekọpụ; gi ihiẹn-ọsụsụọ sọn Ebraham kẹ i dọn kun enwẹn i kwe wẹ ndị nẹdi ẹnyi kanị nkwa ogẹn mbụ.