Maịka 6 - Ika

Isi Nke Isin Ihiẹn Rị E We Osolobuẹ Iwe

¹ Gọnkwọ nị ntịn ihiẹn Osolobuẹ ku. Ọ sị, “Pụha nị nwan d'e kin; d'e kinghọsị nị ugu ndịnị; d'e kin ni nị òke ndịnị nụ ọnụ ụnụ!

² “Ugu ndịnị, gọn ni ntịn-o, nị Osolobuẹ chọ n'o kin! Iyetọ ụwa hụn turusọnmẹni, gọn ni ntịn-o — nị Osolobuẹ kpe ndị nke ẹ, n'o kin ihiẹn wẹ mẹ:

³ “Kịnị kẹ m mẹ ụnụ, ndị nke m? Kị m mẹ ndụn m gi gụ ụnụ? Za nị m nwan!

⁴ Mmẹ gha alị Ijiptu wepụha ụnụ, mmẹ gbapụha ụnụ imẹ ụlọ igbọn hụ: mmẹ zi Mozizi lẹ Ẹrọnụ lẹ Miriam d'e du ụnụ.

⁵ Heuu, ndị nke m! Nyanhankwọ nị eje ihiẹn Balakị eze Mụabụ te romẹni ụnụ lẹ ihiẹn Balaam nwa Bioru za a. Nyanhanzị nị ihiẹn mẹ ẹgbata alị Shitim lẹ alị Gil'galụ! Gi n'ẹ marịn ihiẹn ile rị mma Osolobuẹ mẹni ụnụ.”

Ihiẹn Osolobuẹ Chọ

⁶ Kị m'e gi bịa ihun Osolobuẹ? Kị m'e gi bịa d'a rịọ Chuku rị elu-igwee? Nị m wẹhẹn'ẹ ẹjan w'a kpọ ọkụn? Nị m chụnyen'ẹ ẹjan nwa-efin ahụa ohu?

⁷ Nị ebulu nnụ-uku sụọ Osolobuẹ ụsụọ? Ra ofigbọn-olivu rị e hu kẹ iyi nnụ ole-lẹ-ole? Nị m chụnyen'ẹ nwa-ibuzọ m gi kụ ụgwọ njọ m? Nị m gi nwa gha m ẹhụ pụha kụ ụgwọ njọ gha imẹ obi m pụha?

⁸ Ịhịan, Osolobuẹ agwagụọ ị ihiẹn rị mma i k'e mẹ. Kị Osolobuẹ chọ ẹka ị karị iye ịhịan ihiẹn ẹ lẹ ihiẹn-ọsụsụọ lẹ iwelụa enwẹn i alị bini Chuku i?

⁹ Gọn ni ntịn olu Osolobuẹ, ọ rị a gwa ndị obodoni oku — Onyẹ marịn ihiẹn ya tụkwọ egun i, Osolobuẹ. “Gọn ni ntịn, ebọn Izrẹlụ lẹ ndị zu ebeni!

¹⁰ Echẹn kẹ ihiẹn ndị-njọ gi njọ kpajun iwe wẹ rịkwọ a, ịya lẹ eje mkpu ụnụ gi a zụ afịa?

¹¹ Nị m bupụ ẹnya azụụn mkpu ụnụ gi a zụ afịa lẹ ọfịhutọ ile ụnụ a fịhutọ ihiẹn ụnụ gi a zụ afịa?

¹² Ndị mmẹgbu lẹ ẹka-ikẹn kẹ ndị ịdanfịn ụnụ wụ; ntụ a mụmarịngụọ ndị obodo ụnụ; ntụ-ntụ jun wẹ ọnụ.

¹³ Mmẹ nwẹn sikọ nwan d'e ye ụnụ afụnfụn jọgbu enwẹn ẹ, m k'a napụchanrịn ụnụ ihiẹn ile ụnụ nwọn.

¹⁴ Ụnụ jẹnkọ d'e ri ihiẹn-oriri, kanị ẹfọ ejunkọ ụnụ; ẹgụn k'a rị a ta ụnụ ẹfọ! Ụnụ k'a kpatọ, kanị ọ tọkọ; m k'e we ihiẹn ụnụ kpatọ ye agha ripụ.

¹⁵ Ụnụ jẹnkọ d'a kụn ihiẹn ugbo, kanị ẹlẹ ụnụ k'a ghọrị a: ụnụ k'a pịnpụha udẹn-olivu, kanị ẹlẹ ụnụ k'a kwọ udẹn ahụn; ụnụ k'a pịnpụha manya vaịnị, kanị, ụnụ ahụnkọ manya vaịnị ra.

¹⁶ Makẹni ụnụ e sọngụọ ụzọ Omri lẹ ikpụlọ Ehabụ nẹdi ẹ, ụnụ e gigụọ ihiẹn wẹ kuzi ụnụ bi. M k'e gi ufiri ẹ tikpọchanrịn Jerusalẹm, ndị bi imẹ ẹ e họnrin ndị w'a mụ ẹmụ; yụ wụ Jerusalẹm k'e buru ifẹnrẹn ndị nke m.”