Maịka 4 - Ika

Isi Nke Ẹnọ Ugu Osolobuẹ Sikọ D'e Nwọnnahịn Ugu Ile Ọghọ

¹ Kanị o ru ogẹn ikpanzụụn, ugu ụlọ-nsọ Osolobuẹ sikọ d'e weri ọnọdị, nwọnnahịn ugu lẹ òke ile ọghọ; ndị alị ichẹn-ichẹn jẹnkọ d'a rị e rujẹn ẹ.

² Alị bu ọda k'a rị a sị ibe wẹ, “Bịa nị, nị ẹnyi jẹn Ugu Osolobuẹ; nị ẹnyi jẹn ni ụlọ Chuku Jekọpụ, n'ọ kuzi ẹnyi uche ẹ, nị ẹnyi hụn ụzọ bimẹ k'ọ chọ.” Ẹghẹẹ, makẹni nkuzi k'a gha Zayọnụ a pụha, oku Osolobuẹ k'a gha Jerusalẹm a pụha.

³ Osolobuẹ k'a rị a hannị alị lẹ alị eṅẹn, e dọnzidẹni okẹn alị ndị tegbu enwẹn wẹ oku. Alụbehi wẹ agha: gi ọpịa agha mẹmẹrin ọpịa ọka, gi obo wẹ mẹmẹrin ọpịa ẹkụ. Alị ebukọzịnị ibe ẹ ọpịa-agha, amụkọzi wẹ agha!

⁴ Onyẹ-onyẹ k'e gi udọn lẹ ndọnkwa biri iwe ẹ, nwọnrin vaịnị lẹ figi nke ẹ; onwọnni onyẹ k'e rọn wẹ egun. Osolobuẹ ihiẹn ile rị okpuru ẹ e kugụọ a!

⁵ Ndị alị ọzọ ile nwọn ikẹn gi ẹfan mmọn wẹ e bi, ẹnyi nwẹn k'e gi ẹfan Osolobuẹ wụ Chuku ẹnyi bi jẹnrin ejẹn.

⁶ Osolobuẹ sị, “O ru ogẹn hụ, m jẹnkọ d'e welụa ndị nọ nwan kẹ ngụrọ; m k'e welụa ndị nke m hụn m jụ lẹ ndị m rụ ẹhụ.

⁷ E gi m ndị te wụ ngụrọ pumẹzi alị wẹ, gi ndị nwẹn m te jụ họnrin okẹn alị; mmẹ wụ Osolobuẹ a nọ Ugu Zayọnụ kị wẹ jẹnrin ejẹn.”

⁸ Ịyụ nwẹn, Jerusalẹm, Okẹn ụlọ-nche atụnrụn Osolobuẹ, Ebẹhụ zeni ndị Zayọnụ a gbaban, ọkịkị hụn te wụ nke i lalazị, Jerusalẹm k'e rizi eze!

⁹ K'ị rị e yini nwan, a kwan ụya? Eze i arịzịa? Onyẹ hụn a dụn ị ọdụn a nwụnhụngụọ ra, o gi a fụ ị ẹnịna, nọkẹ onyẹ imẹ rị e mẹ?

¹⁰ A fịkọkwọ nwan, obodo Zayọnụ; nọkẹ onyẹ imẹ rị e mẹ, makẹni ụnụ k'a pụgụ nwan obodoni, ranhịngụ ogbe, gha ebẹhụ shi alị Babilọnụ. Ebẹhụ kẹ w'a nọ gbapụha ụnụ; ebẹhụ kẹ Osolobuẹ k'a nọ gbapụha ụnụ ẹka ndị-iṅẹnrẹn ụnụ.

¹¹ Alị bu ọda e zugụọn'ị nwan, a sị “Gba nị Jerusalẹm ọtọ nị ẹnyi hụn ọtọ a!”

¹² Kanị amarịn wẹ ihiẹn Osolobuẹ romẹ, aghọtanị wẹ uche ẹ; aghọtanị wẹ n'o kpọnhẹn wẹ d'a kụkpọ kẹ ọka!

¹³ Osolobuẹ sị, “Lihi nwan Zayọnụ, n'ị kụkpọma wẹ kẹ ọka: m k'e ye i mpịn igwe, ye i akpụkụ igwe-bronzu. Ị k'a kụkpọchanrịn alị ichẹn-ichẹn; we eje akụ-lẹ-ụba wẹ kwanị Osolobuẹ, we ihiẹn ile wẹ nwọn kwanị Onyẹ hụ nwọn ụwa ile.”