Maịka 3 - Ika

Isi Nke Ẹtọ Osolobuẹ K'e Mẹgwarị Ndị Rị A Kịgbu Ndị Nke Ẹ

¹ M nọ sị: Gọnkwọ nị ntịn, ụnụ ndị-isi ebọn Jekọpụ, ụnụ ndị-ọkịkị alị Izrẹlụ! Ụnụ te furu hụn a marịn ihiẹn rị mma.

² Ụnụ ndị ihiẹn rị mma e ze ize, eje-ihiẹn a sụọ ụsụọ. Ụnụ hụ a gba ndị nke m akpụkpọ ebe wẹ rị ndụn, a han wẹ ọkpụkpụ;

³ e ri uru-ẹhụ wẹ, e he wẹ akpụkpọ, a kpagichanrịn ọkpụkpụ wẹ, a jakịka wẹ kẹ anụ wẹ k'e ghe imẹ ugbẹgbẹ, e shi wẹ kẹ wẹ e shi anụ rị ite.

⁴ O ru ogẹn hụ, ụnụ jẹnkọ d'a kwanghọsị Osolobuẹ, kanị ọ zakọ ụnụ; o k'e fepụ ụnụ ẹnya yeni eje-ihiẹn ụnụ rị e mẹ.

Ihiẹn Chuku K'e Mẹ Ndị-amụma Ụgha

⁵ Lee ni ihiẹn Osolobuẹ ku banyeni ndị-amụma hụn rị e dufie ndị nke m: onyẹ ye wẹ ihiẹn, e buni w'ẹ amụma rị mma. Kanị onyẹ yelẹni wẹ ihiẹn e bu wẹ nụman'a.

⁶ Ọhịhị k'a gbakin ụnụ ẹnya, ụnụ ahụnkọzị ọhụn; ishi k'a gbakin ụnụ ẹnya, ụnụ eleghakọzị ẹfa gba; anwụn k'a rọnahịn ndị-amụma hụ, eki e ginahịn wẹ.

⁷ Ndị ahụn rị a hụnnị ụnụ ụzọ k'a fa; ifẹnrẹn k'e mẹgbu ndị rị a gbanị ụnụ ẹfa. Wẹ ile jẹnkọ d'e kpumẹ ihun wẹ, makẹni onwọnni ihiẹn Osolobuẹ ghọsị wẹ.

⁸ Kanị, o mẹ nke m, m nwọn ikẹn ọda-ọda, ịya lẹ Mmọn Osolobuẹ lẹ ezioku lẹ ndụn, hụn m gi a gwapụ ebọn Jekọpụ nị wẹ rị a dan iwu, hụn m gi a gwa ndị Izrẹlụ nị wẹ rị e mẹ njọ.

⁹ Gọnkwọ nị ntịn, ụnụ ndị-isi ebọn Jekọpụ! Ụnụ ndị-ọkịkị Izrẹlụ! Ụnụ ndị ezigbo eṅẹn e ze ize, hụn e bu ihiẹn ile kụrụ ọtọ isi a kpọma alị,

¹⁰ hụn gi igbu-ọchụn a tụn Zayọnụ, hụn gi mmẹgbu a tụn Jerusalẹm.

¹¹ Onyẹ ye ndị-isi egho-azụụn, o ri eṅẹn! Onyẹ kụ ndị nchụn-ẹjan ụgwọ, a kuzi w'ẹ. Ndị-amụma ebukọ amụma mmanị egho ban wẹ ẹkpa; kanị wẹ ile hụkwọ a hị ẹfan Osolobuẹ, a sị, “Osolobuẹ nọyeni ẹnyi anọyeni, onwọnni ihiẹn jẹnkọ d'e mẹni ẹnyi.”

¹² Ufiri ẹ, obodo Zayọnụ jẹnkọ d'a nọ kẹ ọfịa wẹ sụn dụkpọ, Jerusalẹm jẹnkọ d'e mẹ mkpọkọ-mkpọkọ; uguni ụlọ-nsọ rị elu ẹ jẹnkọ d'e họnrin ẹgboko rị elu ugu.