Maịka 2 - Ika

Isi Nke Ẹbụọ Osolobuẹ K'e Mẹshi Ndị-mmẹgbu Ikẹn

¹ Ọ rịkọnị ụnụ mma, ụnụ ndị e chu ụran elu-ukpo, e rotọ eje-ihiẹn, eki fọn, e mẹ w'ẹ makẹni ọ rị wẹ ẹka.

² Wẹ chọ alị mọbụ ugbo ịhịan, a narịn w'a ya; omẹni ụlọ rọ, e weri w'ẹ; wẹ hụ a bịangbu ịhịan, e weri ụlọ a; a bịangbu ịhịan, e weri ukuu ẹ.

³ Ufiri ẹ, Osolobuẹ e sị, “M rị nwan a mama ihiẹn m k'e mẹ ebọnni; isi ụnụ k'a tọ a; ụnụ ebọnmẹkọzị, makẹni o jẹnkọ d'a wụ eje-ogẹn.

⁴ O ru ogẹn hụ, wẹ k'a gba ị ẹbụ, sị, ‘Heuu, nke ẹnyi a gụ-o! Osolobuẹ e hutọgụọ ezigbo ọnọdị ndị nke ẹnyi! Ọ napụgụọ ẹnyi ihiẹn ẹnyi; o wegụọ alị lẹ ugbo ẹnyi keni ndị ghalẹni e fe ẹ!’

⁵ M mẹgụ nwan ụnụ ihiẹn m k'e mẹ ụnụ ụnụ enwẹkọzị onyẹ a hanpụhanị ụnụ alị imẹ ozuzu ndị nke Osolobuẹ.”

⁶ Kanị, ụnụ hụ a sị, “Ekuzilẹ! Ebuzilẹ amụma nọ ẹrịra! Ụya erikọ ẹnyi.

⁷ Heuu, ikpụlọ Jekọpụ, ụnụ hụ e sị nị ndụn ndidin ara gụ Osolobuẹ, nị ẹlẹ Osolobuẹ ku ihiẹn ndịnị. Kanị, oku-ọnụ m hụ a rị ndị kụrụ ọtọ mma ẹhụ. Ẹlẹ ya?

⁸ Ikpanzụụnnị, ụnụ rị e mẹ ndị nke m kẹ eṅẹnrẹn: a napụ ịhịan ẹwuru o yi ẹhụ, nwa ịhịan ghafekọ nke ẹ rịlẹni e ro oku, nọkẹ ndị gha agha lala.

⁹ Ụnụ a chụpụ ikpoho alị m iwe wẹ obi gi a sụọ wẹ ụsụọ, a napụ ụmụ wẹ ọghọ m ye wẹ, a napụchanrịn.

¹⁰ Lihi ni! Pụ nị; nị ẹlẹ ebeni kẹ ẹhụ ahụn a nọ fuzi ụnụ, makẹni ụnụ e mẹrụọlẹ ebeni hụn wẹ jẹnkọ d'e gi tikpọ a eje ntikpọ;

¹¹ nọkẹ sị onyẹ-amụma ntụ te pụha a sị ndịnị, ‘Manya lala — kẹ hụn a tụnị,’ onyẹ-amụma nọ ẹrịra ya nwọn a sụọ ndịnị!

Osolobuẹ Mẹgụ, O Wegbamazị Ụmụ Jekọpụ

¹² “Omẹgụ, m sikọ d'e wegbamazịrịrị ụnụ, ụmụ Jekọpụ; m jẹnkọ d'e wegbamazị ndị k'a hụn isi. M k'e wegbama wẹ ile, a nọ wẹ kẹ atụnrụn rị ebe wụ nke wẹ, nọkẹ igunrun atụnrụn rịchanrịn ebe wẹ nọ a kpa nni hụn wụ nke wẹ; ụzụn k'e jun alịnị yeni ndị bu ọda rịn'a.”

¹³ Onyẹ hụn e tikpọnị wẹ mgbọn sikọ d'e buruni wẹ ụzọ; wẹ k'a gha ọnụ-mgbọn alị gini wẹ zụnkpọpụha, la alị hụ tọ. Eze wẹ k'e buruni wẹ ụzọ, Osolobuẹ k'a rị wẹ ihun.