Maịka 1 - Ika

Isi Nke Ohu

¹ Ọnwan wụ oku Osolobuẹ, hụn bịanị Maịka onyẹ obodo Morẹshẹti ogẹn Jọtam lẹ Ahazị lẹ Hezikaya gisọnmẹ kị alị Juda; ihiẹn ndịnị kẹ Maịka hụn banyeni obodo Sameria lẹ obodo Jerusalẹm.

² Gọn ni ntịn, ndị alị ile; ụnụ ile, gọn ni ntịn! Elu-ụwa lẹ ihiẹn ile rịn'a, gọn ntịn! Gọn ni ntịn, nị Osolobuẹ nwọnni ẹnyi shịagbu ụnụ ẹri; n'ọ gha Ụnọ-NSỌ a rị nsọ ku ihiẹn ụnụ mẹ!

³ Lee ẹ! Osolobuẹ gha ebe obibi ẹ pụla: o hidanla d'a zọpịpịasọnmẹ ebe ile jẹn elu elu-ụwa.

⁴ Ugu ichẹn-ichẹn jẹnkọ d'a rịnranpụtọ okpuru ụkụ a, ọdanmgbugbu ichẹn-ichẹn e tiwa, rịkẹ ebe ọkụn nọ rịnranpụ ofugbọn, nọkẹ ebe mirin rị e hutu mkpọtu òke.

⁵ Wẹ ile lala makẹni ụmụ Jekọpụ mẹfie emẹfie, wẹ lala makẹ njọ ikpụlọ Izrẹlụ mẹsọnmẹ. Kị wụ njọ ụmụ Jekọpụ? Ẹlẹ obodo Sameria k'ọ rị? Elebe kẹ ukpo-mmọn jun imẹ Juda? Ẹlẹ Jerusalẹm?

⁶ M jẹnkọ d'e tikpọ Sameria, o họnrin mkpọkọ-ụlọ mkpọkọ-ụlọ, họnrin ọfịa wẹ nọ a rụn vaịnị; e kpọn m ọmụma a ile ye imẹ ọdanmgbugbu, a hụnchanrịn wẹ iyetọ a.

⁷ Wẹ k'a kụkpọ mmọn ile ndị Sameria kpụ, dụnpụ ihiẹn ile wẹ gi njọ wẹ nwọnhẹn ọkụn; m k'e tikpọ mmọn wẹ ile la iwi. Ihiẹn wẹ gi ịgbaraja nwọnhẹn kẹ wẹ wụ, ịgbaraja kẹ wẹ k'a gha la.

⁸ Ufiri ihiẹnni, m jẹnkọ d'a kwan, goo; m jẹnkọ d'e gi ọtọ lẹ ụkụ mmaka a ghahunmẹ! M k'e yisọnmẹ nọkẹ nkitẹ-ọfịa; m k'e wo nọkẹ ozuzu!

⁹ Makẹni alị Sameria a rụgụọ eje ẹhụ nwọnlẹni ọgụn! Ihiẹn ohu ahụn e kunrungụọ Juda! O rugụọdẹ nwan ọnụ-mgbọn ndị nke m, o rugụọdẹ Jerusalẹm.

¹⁰ Agwakwọlẹ ni wẹ ẹ imẹ obodo Gatị! Akwankwọlẹ ni ẹkwan kaka! Ndị rị Bẹt-Lafra, kperemẹdẹ ni alị!

¹¹ Ndị bi Shafiri, gi ni ifẹnrẹn ghaferi, ụnụ lẹ ọtọ ndị bi Zaananị apụhakwọlẹ ni, makẹni ndị Bẹt-Ẹzẹlụ nkẹ rị e goo; eyekọzịnị wẹ ụnụ ẹka.

¹² Uhue e d'e huegbu ndị bi Marọtụ, ebe wẹ rị e ro kẹ w'a dọn hụn isi, yeni nsọngbu Osolobuẹ zila ọnụ-mgbọn Jerusalẹm!

¹³ Ndị bi Lakishi, kwademẹ nị nwan ụgbọ-ẹshin agha ụnụ. Makẹni, Lakishi kẹ Zayọnụ mụnarịn eje-ihiẹn, imẹ ẹ kẹ njọ ndị hụ gha Izrẹlụ bịa bu ụzọ rị.

¹⁴ Ufiri ẹ, ihiẹn wẹ gi a sị “Koghoo” k'i jẹnkọ d'e ye obodo Morẹshẹti rị Gatị. Ndị obodo Akizibu dufie ndị-nze Izrẹlụ.

¹⁵ Ụnụ ndị Maresha, m welazịnị ụnụ onyẹ k'a kpụnrụn ụnụ; ndị alị Izrẹlụ gi dọn ẹnya k'a gbashi Adulam d'a warị.

¹⁶ Kọ nị nwan ntutu, kwanma makẹ ụmụ ụnụ hụn ụnụ e mẹni nwa; kpụnchanpụ nị ntutu nọkẹ udele makẹni wẹ lala d'a dọkpụnrụn ụmụ ụnụ we wẹ shi alị ọzọ!