Luku 9 - Ika

Isi Nke Itenẹi Jesu E Zi Ndị-ozi Ẹ Pụ-ichẹn D'e Zi Ozi Alị-eze

¹ Jesu kpọkikomẹ ndị nsọnmazụụn a mmẹbụọ, ye wẹ ikẹn hụn eje-mmọn ile e gi rị okpuru wẹ lẹ hụn wẹ e gi zụọ ọrịa.

² Ya ọ nọ zi wẹ d'e zi ozi Alị-eze Osolobuẹ lẹni wẹ d'a zụọ ndị emu rị a kụ.

³ Ọ nọ sị wẹ, “Ụnụ jẹnkọnị, ewerilẹ ni ihiẹn ọwụlẹ: kẹ ọkpọ kẹ ẹkpa kẹ ihiẹn-oriri kẹ egho; ewerilẹ ni ẹwuru ọzọ cheni hụn ụnụ yi.

⁴ Ụlọ ọwụlẹ nabanhan ụnụ, nọdị nị ebahụn d'e ru mgbe ụnụ gha obodo hụ pụ.

⁵ Ebe ọwụlẹ wẹ nọlẹni nabanhan ụnụ, ụnụ pụkọnị obodo hụ, kpukpupụ nị ẹjan rị ụnụ ụkụ n'ọ wụrụ ihiẹn wẹ e gi shịagbu wẹ ẹri.”

⁶ Ndị nsọnmazụụn hụ nọ jẹnmẹ, a ghasọnmẹ wẹ ụmụ-alị ichẹn-ichẹn, e zi oziọma, a zụọ ọrịa ebe ile wẹ ru.

Obi Eruzini Eze Galili Wụ Hẹrọdụ Alị

⁷ Ogẹn Hẹrọdụ, hụn rị a kị ẹgbẹrẹ Galili gi nụ ihiẹn ile rị e mẹni, obi eruzin'ẹ alị kaka. Makẹni o nwọn ndị rị a sị nị Jọnụ hụn e mẹ mirin-Chuku a ghagụọ ọnwụn lihi,

⁸ ndị ọzọ sị nị Ẹlaịja a pụhagụọ, ndị ọzọ sịzị nị onyẹ ohu imẹ ndị-amụma mbụ e lihigụọ.

⁹ Hẹrọdụ nọ sị, “Mmẹ bepụ Jọnụ isi; onyẹ wụzị nwan onyẹni m rị a nụ otiti ẹ?” Ya ọ nọ chọma n'ọ hụn Jizọsị.

Jesu E Ye Igunrun Hi-ogbe Ihiẹn-oriri

¹⁰ Ndị-ozi hụ pụ-ichẹn a lụaha ebe wẹ jẹn d'e zi ozi Alị-eze, wẹ nọ gwa Jesu ihiẹn ile wẹ mẹ. Ọ nọ gi nzuzue weri wẹ pụ, wẹ nọ shi obodo w'a kpọ Bẹtisaịda.

¹¹ Kanị ogẹn igunrun ndị ahụn gi nụ a, wẹ nọ rusọnmẹ ẹ. Ọ nọ nabanhan wẹ, gwa wẹ oku Alị-eze Osolobuẹ, zụọ ndị hụn chọ nzụọrị.

¹² Ogẹn anwụn gi rọma, ndị nsọnmazụụn a mmẹbụọ hụ nọ bịa d'e kunrun ẹ, sị a, “Sị igunrunni lama, nị wẹ jẹn obodo ndị mẹ ẹkẹrẹ-ẹkẹrẹ lẹ alị-ọfịa rị ẹgbẹrẹni d'a chọrị ebe wẹ k'a ranhịn lẹ ihiẹn-oriri, makẹni onwọnni onyẹ bi ebeni ẹnyi rị.”

¹³ Kanị Jizọsị nọ sị ndị nsọnmazụụn a, “Yeni wẹ ihiẹn-oriri.” Ndị nsọnmazụụn a nọ sị a, “Ogbe brẹdi isẹn lẹ azụn ẹbụọ sụọ kẹ ẹnyi nwọn, mmanị ẹnyi jẹnkọ d'e ṅọnni ndịnị ile ihiẹn-oriri.”

¹⁴ Wẹ ku ẹrịra makẹni ndị rị ebẹhụ rị ihiẹn nọ kẹ ikẹnnyẹ nnụ-uku isẹn (5,000). Ya ọ nọ sị ndị nsọnmazụụn a, “Sị nị wẹ nọdị ọkụdụ-ọkụdụ, ihiẹn nọ kẹ iri-kwasị-ọgụnnaị, iri-kwasị-ọgụnnaị.”

¹⁵ Ndị nsọnmazụụn a nọ mẹ ẹ, ndị hụ ile nọ nọdị alị ẹrịra.

¹⁶ Jesu nọ weri ogbe brẹdi isẹn hụ lẹ azụn ẹbụọ hụ, lee ẹnya elu-igwee, kpanmịn Osolobuẹ; ya ọ nọ bebe wẹ, weye ndị nsọnmazụụn a nị wẹ kesọnmẹni igunrun hụ.

¹⁷ Wẹ ile nọ rijunchanrịn ẹfọ. E kpọnkikomẹ wẹ irinrin ẹ, o jun ụkpalị mmẹbụọ.

Pita E Ku Onyẹ Jesu Wụ

¹⁸ Ụhụọhịn ohu, Jesu sụọ nọdị e mẹ ekpere. Ndị nsọnmazụụn a nọkunmẹ ẹ. Ọ nọ sị wẹ, “Onyẹ kẹ wẹ sị nị ịya kẹ m wụ?”

¹⁹ Wẹ nọ sị, “O nwọn ndị sị ị wụ Jọnụ hụn e mẹ mirin-Chuku; ndị ọzọ sị ị wụ Ẹlaịja; ndị ọzọ sị ị wụ onyẹ amụma mbụ-mbụ hụn gha nwan ọnwụn lihi.”

²⁰ Ọ nọ nwan sị wẹ, “Ụnụ nwẹn, onyẹ kẹ ụnụ sị nị ịya kẹ m wụ?” Pita nọ za, “Ịyụ wụ Kraịstị, Onyẹ-nzụọpụha ahụn Osolobuẹ Tumẹ.”

Jesu E Ku Ẹ N'o K'a Ta Afụnfụn, Nwụnhụn, Lihizi

²¹ Ya Jizọsị nọ dọ wẹ ẹka-ntịn wẹ agwakwọlẹ onyẹ ọwụlẹ ihiẹnni.

²² Ọ nọzị sị wẹ, “Nwa nke Ịhịan jẹnkọ d'a tarịrị okẹn afụnfụn ẹka ndị-isi lẹ ndị-isi nchụn-ẹjan lẹ ndị-nkuzi Iwu. Wẹ sikọ d'a jụ a, gbu ẹ, kanị, nke akpọhịn ẹtọ Osolobuẹ e weli ẹ.”

²³ Ọ nọ sị wẹ, “Onyẹ chọ n'o sọn m, ya jụ enwẹn ẹ, buru obe ẹ ụhụọhịn ile, sọnmẹ m.

²⁴ Makẹni onyẹ chọ n'o ghe isi ẹ, isi ẹ a tọ a; kanị, onyẹ hụn gi ufiri m tuhu ndụn a k'e nwọnhẹn ẹ.

²⁵ Elee erere k'ọ bannị ịhịan, omẹni o nwọnchanrịngụ ụwa ile, ya lẹ enwẹn ẹ e tuhu?

²⁶ “Makẹni, onyẹ mẹ ifẹnrẹn mmẹ lẹ oku-ọnụ m, mmẹ wụ Nwa nke Ịhịan sikọ d'e mẹzi ifẹnrẹn ẹ ogẹn m'e gi gi ọghọ m lẹ nke Chuku-Nẹdi lẹ nke ndị mmọn-ozi nsọ bịa.

²⁷ M rị a gwa ụnụ ezioku, imẹ ndị turu ebeni o nwọn ndị jẹnkọlẹni d'a nwụnhụn d'e ru ni a hụn wẹ Alị-eze Osolobuẹ.”

Kẹ Jizọsị Dọn Nwọnhutọ

²⁸ Ọ rị ihiẹn nọkẹ akpọhịn ẹsatọ Jesu ku ihiẹn ndịnị, ọ nọ weri Pita lẹ Jọnụ lẹ Jemisi shi elu ugu d'e mẹ ekpere.

²⁹ Ebe ọ rị e mẹ ekpere, ihun ẹ nọ nwọnhutọ, ẹkwa o yi nọ gbukemẹ.

³⁰ Idẹnmizi ya lẹ ikẹnnyẹ ẹbụọ nọ kumẹ oku. Ikẹnnyẹ ẹbụọ hụ wụ Mozizi lẹ Ẹlaịja;

³¹ wẹ gi ọghọ elu-igwee pụha, e ku oku ọnwụn Jizọsị hụn o sikọ d'a nwụn imẹ Jerusalẹm gi mẹzu uche Osolobuẹ.

³² Ụran te gi Pita lẹ ibe ẹ ya lẹ wẹ wị, kanị ogẹn o gi fọn wẹ ẹnya kẹ wẹ gi hụn ọghọ Jizọsị lẹ ikẹnnyẹ ẹbụọ ahụn turuyenin'ẹ.

³³ Ogẹn ikẹnnyẹ ẹbụọ hụ gi gha ebe Jesu rị pụkọ, Pita nọ sị Jesu, “Di-nwọnni-ẹnyi, ọ rịka mma nị ẹnyi nọdịchanrịn ebeni! Nị ẹnyi tụn ọdụ ẹtọ: nke i wụ ohu, nke Mozizi wụ ohu, nke Ẹlaịja wụ ohu.” (Pita amarịn ihiẹn o rị e ku.)

³⁴ Okuni rịkwọ Pita ọnụ kẹ orukpu pụha d'e kpumẹ wẹ. Egun tụ ndị nsọnmazụụn ẹtọ hụ ogẹn orukpu hụ gi rị e kpumẹ wẹ.

³⁵ Olu nọ gha imẹ orukpu hụ sị, “Ọnwan wụ Nwa m, Onyẹ hụn m họrị, gọnn'ẹ ntịn!”

³⁶ Ogẹn olu hụ gi kugụ, Jesu sụọ kẹ wẹ hụnzị. Ndị nsọnmazụụn a ẹtọ hụ ekupụhanị ihiẹnni wẹ hụn ogẹn hụ wẹ gi hụn a; onwọnni onyẹ wẹ gwa ihiẹn wẹ hụn.

Jesu A Zụọ Nwata Eje-mmọn Rị Imẹ Ẹ

³⁷ Eki e fọn, ogẹn Jesu lẹ ndị nsọnmazụụn a ẹtọ ahụn gi gha elu ugu hụ hidan, igunrun hi-ogbe nọ bịa d'e kunrun Jesu.

³⁸ Okẹnnyẹ ohu nọ gha imẹ igunrun hụ yi, “Onyẹ-nkuzi! Dodo, lee nwa m! Ịya sụọ kẹ m mụ!

³⁹ O nwọn eje-mmọn e kwọndọnn'ẹ. O kwọndọn ẹ, ọ dọbepụ oro, ụfọfọ a gbọma a ọnụ; a ra yen'ẹ efe; ẹhụ ẹhụ k'ọ rụsọnmẹ ẹ!

⁴⁰ A rịọlẹ m ndị nsọnmazụụn ị nị wẹ chụpụ a, asanị wẹ ẹka.”

⁴¹ Jesu nọ, sị, “Eje-agbọ nwọnlẹni okukwe! Elebe mmẹ lẹ ụnụ k'a nọru?! Elebe kẹ m k'e dinruni ụnụ ndidin?!” Ya ọ nọ sị okẹnnyẹ hụ, “Wẹhẹ nwa ị ebeni.”

⁴² Ogẹn nwata-okẹnnyẹ ahụn gi pụla, eje-mmọn hụ nọ we ẹ gbe alị, dọma a. Kanị Jesu nọ jụgbọ eje-mmọn hụ, zụọ nwata hụ, we ẹ ye nẹdi ẹ.

⁴³ Ogẹn ndị ahụn gi hụn ikẹn Osolobuẹ, ọ tụ wẹ ẹnya ọda-ọda. Hụn ahụn ihiẹn ile Jesu rị e mẹ rịkwọ a tụ ịhịan ile ẹnya, ọ nọ sị ndị nsọnmazụụn a,

Jizọsị E Kudọnzi Oku Ọnwụn A

⁴⁴ “Azọkwọlẹ ni ihiẹnni m jẹnkọ d'a gwa ụnụ kikẹnni: Wẹ sikọ d'e re Nwa nke Ịhịan ye wẹ.”

⁴⁵ Kanị ndị nsọnmazụụn a aghọtanị oku hụ. Wẹ zuemẹni wẹ ya, amamgbe w'a ghọta a, kanị egun anịnị wẹ jụ a ihiẹn o gi ẹ ku.

Onyẹ Kachanrịn Ibe Ẹ

⁴⁶ Onwọn ogẹn ndị nsọnmazụụn Jesu gi rị a dọ onyẹ kachanrịnnị imẹ wẹ.

⁴⁷ Jizọsị a marịngụọ ihiẹn wẹ rị e ro imẹ obi wẹ, ya kẹ ọ nọ wezụhan nwa-ndu ohu ebe ọ rị,

⁴⁸ ọ nọ sị wẹ, “Onyẹ gi ufiri ẹfan m nabanhan nwata nọ ẹnịna, mmẹ k'ọ nabanhan; onyẹ nabanhannị m nabanhan onyẹ zini m. Ya wụ, onyẹ hụn kachanrịn ẹkẹrẹ imẹ ụnụ ile, ịya wụ onyẹ hụn kachanrịnnị.”

Onyẹ Ghalẹni A Nọkin Ụnụ Ụzọ Rị Azụụn Nke Ụnụ

⁴⁹ Ya kẹ Jọnụ nọ sị Jizọsị, “Di-nwọnni-ẹnyi, ẹnyi hụn okẹnnyẹ ohu rị e gi ẹfan ị a chụpụ eje-mmọn, ẹnyi nọ sị a kụsị a, makẹni ara sọn ẹnyi.”

⁵⁰ Kanị Jesu nọ sị wẹ, “Akụsịlẹ n'a, makẹni onyẹ ghalẹni a nọkin ụnụ ụzọ rị azụụn nke ụnụ.”

Obodo Jụ Jesu

⁵¹ O rumẹ ogẹn wẹ e gi we Jizọsị shi elu-igwee, ọ nọ buchanrịn ihun zinmẹ Jerusalẹm, o leni ẹnya azụụn.

⁵² Ọ nọ zi ndị o zi burun'ẹ ụzọ. Wẹ nọ banye obodo ohu rị Sameria d'a kwademẹn'ẹ ihiẹn.

⁵³ Kanị ekwerini wẹ n'ọ banhan makẹni Jerusalẹm kẹ ẹnya a rị.

⁵⁴ Ogẹn ndị nsọnmazụụn a wụ Jemisi lẹ Jọnụ gi hụn ihiẹnni, wẹ nọ sị, “Di-nwọnni-ẹnyi, y'a chọghọ nị ẹnyi gha elu-igwee kpọtu ọkụn n'o ripụ wẹ [kẹ Ẹlaịja dọn mẹ]?”

⁵⁵ Kanị Jesu nọ gbehutọ, jụgbọ wẹ, sị, [“Ụnụ amarịn ụdị obi ụnụ nwọn.”

⁵⁶ Mmẹ wụ Nwa nke Ịhịan abịanị d'e gbu ịhịan, kama, m bịa d'a zụọpụha wẹ.] Ya lẹ wẹ nọ shi alị ọzọ mẹ ẹkẹrẹ.

Ndị Hụn Chọ Nị Wẹ Sọnmẹ Jizọsị

⁵⁷ Ogẹn wẹ gi jẹnkọ, okẹnnyẹ ohu nọ sị Jesu, “M k'e sọn i ebe ọwụlẹ i jẹnkọ.”

⁵⁸ Jesu nọ sị a, “Ufu nwọn okporo; nnụnụ nwọnzikwọ ẹkụụ; kanị mmẹ wụ Nwa nke Ịhịan enwọn ebe m'e buche isi.”

⁵⁹ Jesu sị okẹnnyẹ ọzọ, “Sọnmẹ m.” Kanị okẹnnyẹ hụ nọ sị, “Diọkpa, nị m d'e ligụ nẹdi m.”

⁶⁰ Ya Jesu nọ sị, “Hapụ ndị nwụnhụnnị nị wẹ li ndị nke wẹ nwụnhụnnị. Ịyụ nwẹn, jẹnmẹ d'e zi ozi Alị-eze Osolobuẹ.”

⁶¹ Onyẹ ọzọ sịzị, “Diọkpa, m jẹnkọ d'e sọn i, kalẹ, nị m d'a gwagụ ezi-lẹ-ụlọ m, ‘Nọdị nị ọhụnma.’ ”

⁶² Kanị Jizọsị nọ sị a, “Onyẹ hụn e bu ẹka e che ọrụn e lee ẹnya azụụn efuruni Alị-eze Osolobuẹ.”