Luku 6 - Ika

Isi Nke Isin A Jụ Wẹ Jizọsị Oku Ụhụọhịn Ezumikẹn

¹ Ụhụọhịn Ezumikẹn ohu, Jesu ghakọ imẹ ugbo ọka-witi, ndị nsọnmazụụn a nọ ghọrịma mkpụrụ ọka-witi, e gi ẹka a fụchanpụ wẹ, e ri.

² Ụfọdụ ndị Itu-Farisi nọ sị wẹ, “Kị ụnụ rị e mẹni ihiẹn Iwu sị wẹ emẹlẹ Ụhụọhịn Ezumikẹn?”

³ Jesu nọ shịarị wẹ, sị, “Ụnụ e ke gụntu ihiẹn Defidi mẹ ogẹn ẹgụn gi rị a gụn ya lẹ ndị ya lẹ wẹ wị?

⁴ Ọ banye imẹ ụlọ Osolobuẹ, weri brẹdi-nsọ hụ w'e butọnị Osolobuẹ, ri ẹ, yezi ndị ya lẹ wẹ wị, bụ Iwu sị onwọnni onyẹ e ri brẹdi hụ mmanị ndị nchụn-ẹjan.”

⁵ Ya Jesu nọzị sị wẹ, “Nwa nke Ịhịan nwọn ku ihiẹn w'e mẹ Ụhụọhịn Ezumikẹn.”

Jesu A Zụọ Onyẹ Ẹka Nwụnhụn

⁶ O ruzi Ụhụọhịn Ezumikẹn ọzọ, Jizọsị nọ banye ụlọ-ofufe ohu, kuzimẹ. Okẹnnyẹ ohu ẹka-nni nwụnhụn rị ebẹhụ.

⁷ Ndị-nkuzi Iwu lẹ ndị Itu-Farisi hụ e ke Jesu nke k'o sikọ d'a zụọ ọrịa Ụhụọhịn Ezumikẹn, nị wẹ gi ẹ ma a ikpe.

⁸ Kanị Jizọsị a marịngụọ ihiẹn wẹ rị e ro. Ya k'ọ nọ sị okẹnnyẹ ahụn ẹka a nwụnhụn, “Lihi ọtọ d'e turu ihun ebeni.” Okẹnnyẹ hụ nọ lihi ọtọ, shi ebahụn d'e wuzo.

⁹ Ya Jizọsị nọ sị wẹ, “Nị m jụ ụnụ ajụjụ: Elee hụn Iwu sị ẹnyi mẹ Ụhụọhịn Ezumikẹn? Ihiẹn rị mma ra eje-ihiẹn? Ịzụọ ịhịan ra igbu ịhịan?”

¹⁰ O legụ wẹ ile, ọ nọ sị okẹnnyẹ hụ, “Tịnpụ ẹka ị.” Okẹnnyẹ ahụn nọ tịnpụ a, ẹka a nọ rịzị mma.

¹¹ Kanị, eje-olulu nọ bumẹ ndị-nkuzi Iwu lẹ ndị Itu-Farisi hụ, wẹ nọ zumẹ umẹ, e ku ihiẹn wẹ jẹnkọ d'e mẹ Jizọsị.

Jesu E Tumẹ Ndị-ozi Pụ-ichẹn Mmẹbụọ

¹² Ogẹn hụ, Jesu nọ shi elu ugu d'e mẹ ekpere, nọchanrịn uchinchin hụ ile e mẹ ekpere e jẹnni Osolobuẹ.

¹³ Eki e fọn, ọ nọ kpọ ndị nsọnmazụụn a, họrị mmadụ mmẹbụọ imẹ wẹ, kpọ wẹ ndị-ozi pụ-ichẹn. Wẹ wụ:

¹⁴ Saịmọnụ hụn ọ kpọ Pita, Andrụ nwẹnẹ Pita, Jemisi, Jọnụ, Filipu, Batolomi,

¹⁵ Matiu, Tamọsị, Jemisi nwa Alịfịọsụ; lẹ Saịmọnụ hụn w'a kpọ “Onyẹ itu Gi Ikẹn E Mẹ Ẹ;”

¹⁶ lẹzi Judasị nwa Jemisi lẹ Judas Iskarọtụ hụn re Jesu.

Jesu A Kuzi Ndị Bu Ọda, Zụọ Wẹ Emu

¹⁷ Ogẹn Jizọsị lẹ ndị-ozi hụ pụ-ichẹn gi hidangụ, ọ nọ turu alị-aradan, ya lẹ igunrun ndị nsọnmazụụn a. Imẹrinmẹ ndị ghazị ebe ile rị imẹ Judia lẹ Jerusalẹm lẹ ibẹka Taya-lẹ-Sidọnụ rị mkpẹnrẹn Ohimin bịa rịzịkwọ ebahụn;

¹⁸ wẹ bịa d'e gọn ẹ ntịn lẹn'ọ zụọ wẹ emu ichẹn-ichẹn. Ndị eje-mmọn rị e ye nsọngbu a bịazịghọ, wẹ nọ dịnhịn.

¹⁹ Igunrun hụ ile hụ a chọ nị wẹ mẹtụ a ẹka, makẹni ikẹn rị a gha imẹ ẹ a pụha, a zụọ wẹ ile.

Ndị Nke Wẹ Ka Mma

²⁰ Ọ nọ bu ẹnya zinmẹ ndị nsọnmazụụn a, sị, “Ngọzi wụ nke ụnụ ndị la enwẹn wẹ tọnị Osolobuẹ, makẹlẹ Alị-eze Osolobuẹ wụ nke ụnụ!

²¹ Ngọzi wụ nke ụnụ, ndị ẹgụn rị a gụn ogẹnni, makẹni ẹfọ k'e jun ụnụ! Ngọzi wụ nke ụnụ ndị rị a kwan ẹkwan ogẹnni, makẹni ụnụ sikọ d'a mụ ẹmụ.

²² Ngọzi wụ nke ụnụ wẹ gha e gi ufiri Nwa nke ịhịan e ze ize ụnụ, e nu ụnụ e ye ụsụọ, a kpari ụnụ, e ye ụnụ ẹjan ẹfan!

²³ “A ghọghọ nị, a tụshi elu ogẹn ọwụlẹ wẹ mẹ ụnụ ya! Makẹni ụgwọ ọrụn hi-ogbe rị e che ụnụ imẹ elu-igwee. Makẹni, ẹrịra kẹ ndị nẹdi wẹ mẹ ndị-amụma mbụ ya.

²⁴ Kanị nsọngbu rị e che ụnụ, ndị ịdanfịn, makẹni ụnụ e rigụọ nke ụnụ!

²⁵ Nsọngbu rị e che ụnụ ndị ẹfọ jun ogẹnni, makẹni ẹgụn sikọ d'a gụn ụnụ! Nsọngbu rị e che ụnụ, ndị rị a mụ ẹmụ ogẹnni, makẹni ụnụ jẹnkọ d'a gha a kwan, e goo!

²⁶ Nsọngbu rị e che ụnụ ogẹn ọwụlẹ ịhịan ile rị e ku oku ụnụ ọhụnma, makẹni ẹrịra kẹ ndị nẹdi wẹ mẹ ndị amụma-ụgha mbụ-mbụ.

E Nwọn Ni Ihiẹn-ọsụsụọ Ndị Iṅẹnrẹn Ụnụ

²⁷ “Kanị m rị a gwa ụnụ ndị rị e gọn m ntịn: e nwọn ni ihiẹn-ọsụsụọ ndị iṅẹnrẹn ụnụ; e mẹni ni ndị rị e we iwe ụnụ ihiẹn rị mma;

²⁸ a gọzi ni ndị hụn a bụ ụnụ ọnụ; e mẹni ni ndị e mẹjanị ụnụ ekpere.

²⁹ Onyẹ ma ị ọra nti ohu, y'e zinmẹn'ẹ hụn-ẹbọ; onyẹ napụ ị ẹwuru i yiye elu ẹ, y'e yezi ẹ hụn i yi imẹ ẹ.

³⁰ Onyẹ rịọ ị ihiẹn, y'e ye ẹ. Onyẹ weri ihiẹn i, a dọl'a ya.

³¹ E mẹ ndị ọzọ kẹ ị chọ nị wẹ e mẹ i.

³² “Omẹni ndị ihiẹn i a sụọ kẹ y'e nwọn ihiẹn-ọsụsụọ wẹ, nanị y'a dọn narịn ngọzi? Ndị njọ e nwọnzikwọ ihiẹn-ọsụsụọ ndị ihiẹn wẹ a sụọ!

³³ Omẹni ndị hụn e mẹn'i ọhụnma kẹ y'e mẹni ọhụnma, nanị y'e dọn narịn ngọzi? Ndị njọ e mẹzikwọ ẹrịra!

³⁴ Omẹni ndị k'a kụkinni i sụọ kẹ y'e zinye, nanị y'a dọn narịn ngọzi? Ndị njọ e mẹzikwọ ẹrịra, kẹni wẹ kụkinchanrịn wẹ ihiẹn wẹ zinye wẹ!

³⁵ Mba! Enwọn ni ihiẹn-ọsụsụọ ndị iṅẹnrẹn ụnụ, e mẹni ni wẹ ọhụnma. E zinye ni ịhịan, atụlẹ ni ẹnya ihiẹn ọwụlẹ, ụgwọ-ọrụn ụnụ jẹnkọ d'e hi-ogbe, ụnụ a wụrụ ezigbo ụmụ Onyẹ Hụ Kachanrịnnị. Makẹni, o mẹ ni ndị ọhụnma-ogodan lẹ ndị-njọ ẹfọma.

³⁶ E mẹ ni omikẹn kẹ Nẹdi ụnụ dọn e mẹ omikẹn.

Amalẹ Ndị Ọzọ Ikpe

³⁷ “Ekinlẹ ịhịan ikpe, makẹ Chuku gha e kin i ikpe; amalẹ ịhịan ikpe makẹ Chuku gha a ma ị ikpe; gbagharị, kẹni Osolobuẹ gbagharị ị.

³⁸ “Ye, kẹni Osolobuẹ ye i: i sikọ d'e nwọnhẹn hụn wẹ kpọnjun ọhụnma-ọhụnma, bịantu ẹ, zinzin, o junpụha — e hu wẹ ẹ ye i ngadan. Makẹni, kẹ i yehan ndị ọzọ k'i sikọ d'e nwọnhẹn.”

³⁹ Jizọsị nọzị tụnị wẹ iluni: “Nị onyẹ ẹnya-ishi sa ẹka du onyẹ ẹnya-ishi ibe ẹ? O m'ẹ, ẹlẹ wẹ ẹbụbụọ a danban imẹ mgbugbu?

⁴⁰ Onyẹ wẹ rị a kuzi ara karị onyẹ-nkuzi ẹ; kama, onyẹ wẹ kuzigụ a nọ kẹ onyẹ kuzin'ẹ.

⁴¹ K'ị rị a hụnnị irinrin-nkụn rị nwẹnẹ i ẹnya, bụ y'a hụnnị ogwe-nkụn rị yụ nwẹn ẹnya?

⁴² Nanị ke y'e dọn sị nwẹnẹ i, ‘Nwẹnẹ-onyẹ, nị m wepụ ị irinrin-nkụn rị ị ẹnya,’ bụ y'a hụndẹni ogwe-nkụn rị yụ lẹ enwẹn i ẹnya? Onyẹ ihunnaị! Bu ụzọ bupụ ogwe-nkụn rị i ẹnya, kẹn'i legha ụzọ ọhụnma wepụ irinrin-nkụn rị nwẹnẹ i ẹnya!

Osisi Lẹ Mkpụrụ A

⁴³ “Osisi rị mma ara mị mkpụrụ rịlẹni mma; osisi jọ njọ ara mị mkpụrụ rị mma.

⁴⁴ Mkpụrụ osisi kẹ wẹ gi a marịn a: w'a ra ghọrị figi elu ọgọgọ; w'a ra ghọrị ogbe vaịnị elu abị-ogun.

⁴⁵ Ezigbo ịhịan a gha ezigbo ihiẹn o butọ imẹ obi ẹ e wepụha ezigbo ihiẹn; kanị eje-ịhịan a gha eje-ihiẹn o butọ e wepụha eje-ihiẹn. Makẹni, ihiẹn hụn jun imẹ obi kẹ ọnụ e ku.

Ihiẹn Jesu Gi Ndị Tụn Ụlọ Kuzi

⁴⁶ “Kị haịn ụnụ gi a kpọ m ‘Di-nwọnni-ẹnyi, Di-nwọnni-ẹnyi,’ bụ ụnụ ara mẹ ihiẹn m ku?

⁴⁷ Nị m ghọsị ụnụ kẹ onyẹ hụn bịa d'e kunrunni m, a nụ ihiẹn m rị e ku, e gi ẹ a rụn ọrụn nọ:

⁴⁸ ọ nọ kẹ onyẹ rị a tụn ụlọ, hụn gumi mgbugbu, gbe iyetọ a ye elu ọmụma; ogẹn okẹn mirin gi huru, ide ẹ nọ hukunrun ụlọ hụ, ọ sanị ẹka mẹhunmẹ ẹ, makẹni wẹ tụn a ọhụnma.

⁴⁹ “Kanị, onyẹ hụn a nụ oku m bụ ara gi ẹ rụn ọrụn rị kẹ onyẹ tụn ụlọ ye alị-mmakalaka, o gbeni iyetọ a: hụn mirin ahụn gihụ hukunrun ụlọ ahụn, ọ dan ozigbo, dankpọchanrịn!”