Luku 5 - Ika

Isi Nke Isẹn Ndị nsọnmazụụn Ibuzọ Jesu Kpọ

¹ Ụhụọhịn ohu, Jesu turu mkpẹnrẹn Iyi Gẹnẹsarẹtị, igunrun ịhịan hụ a fụfa a, kẹni wẹ nụ oku-Osolobuẹ.

² Ọ hụn ụgbọ-mirin ẹbụọ wẹ limẹ mkpẹnrẹn mirin ebahụn, ndị gi wẹ e gbu azụn latọ wẹ d'a sụ ọga wẹ.

³ Jesu nọ banye ohu hụn wụ nke Saịmọnụ, ọ nọ sị a gha mkpẹnrẹn ebẹhụ nyanzụkazị a ẹkẹrẹ. Ya Jesu nọ nọdị alị imẹ ụgbọ hụ, gha ebẹhụ kuzimẹ igunrun hụ.

⁴ Ogẹn o gi kuzigụ wẹ, ọ nọ sị Saịmọnụ, “Nyanshi ụgbọ ebe mini, ụnụ a tụye ọga ụnụ, kẹni ụnụ nwụn azụn.”

⁵ Saịmọnụ nọ sị a, “Diọkpa, ẹnyi nọ ebeni eki e we fọn, ẹnyi anwụnnị ihiẹn-anaị. Kanị, ebe o mẹni y'e kuọlẹ, m jẹnkọ d'a tụye ọga ndị hụ.”

⁶ Wẹ nọ tụyesọnmẹ ọga wẹ: wẹ nọ nwụn azụn ọda-ọda, ọga wẹ e te tikamadẹ.

⁷ Ya wẹ nọ fe ibe wẹ rị ụgbọ hụn-ẹbọ ẹka d'e yeni wẹ ẹka. A bịa wẹ, wẹ ile nọ kpọn azụn kpọnjun ụgbọ ẹbụbụọ hụ, wẹ lẹ ụgbọ te nọ rubanmadẹ imẹ mirin.

⁸ Saịmọnụ wụ Pita a hụn ihiẹn mẹni, ọ nọ gbuni Jesu osekpu, sị, “Pụnị m, Di-nwọnni-ẹnyi, nị m wụ onyẹ njọ!”

⁹ Ọ tụka ya lẹ ndị ile ya lẹ wẹ wị ẹnya haịn o gi ku ẹ, makẹni azụn wẹ gbu e bukẹ ọda.

¹⁰ Ẹrịra k'ọ tụzịkwọ ụmụ Zẹbẹdi wụ Jemisi lẹ Jọnụ ndị wẹ lẹ Saịmọnụ gba a rụn ọrụn ẹnya. Ya Jesu nọ sị Saịmọnụ, “Atụlẹ egun; gha kikẹnni jẹnmẹ, ịhịan k'ị k'a gha e wẹhẹ rịkẹ azụn.”

¹¹ A dọkpụnpụhagụ wẹ ụgbọ wẹ mkpẹnrẹn mirin, wẹ nọ la ihiẹn ile tọ, sọnmẹ Jesu.

Jesu A Zụọ Onyẹ-oti

¹² Ogẹn Jesu gi rị obodo ohu, okẹnnyẹ ohu oti fụkpo ẹhụ ile hụn rị imẹ obodo hụ nọ bịa d'e kunrun ẹ. Ogẹn o gi hụn Jesu, ọ nọ gbun'ẹ osekpu, rịọma a, “Diọkpa, omẹni y'a chọghọ, i k'a s'ẹka zụọ m, nị m wụbehi onyẹ rụnị!”

¹³ Jesu nọ tịnpụ ẹka, mẹtụ a, sị a, “A chọghọ m, wụbehi onyẹ rụnị!” Ọrịa hụ nọ pụ okẹnnyẹ ahụn ẹhụ ozigbo.

¹⁴ Jesu nọ sị a, “Agwakwọlẹ onyẹ ọwụlẹ; ka jẹn d'e kunrun onyẹ nchụn-ẹjan ozigbo, n'o lele i, y'a chụn ẹjan ahụn Mozizi ku, n'i gi ẹ ghọsị ịhịan ile nị y'a dịnhịngụọ.”

¹⁵ Kanị, oku Jesu nọ kpọkarịdẹ k'ọ kpọhan mbụ; igunrun ịhịan hụ e ruhẹ nị wẹ gọn ẹ ntịn lẹ n'ọ zụọ wẹ emu.

¹⁶ Kanị ọ pụ ogẹn ile d'e mẹ ekpere ebe ịhịan bilẹni.

Jizọsị A Zụọ Onyẹ-ọrọ

¹⁷ Ụhụọhịn ohu, ebe Jesu rị a kuzi, ndị Itu-Farisi lẹ ndị-nkuzi Iwu hụn gha ụmụ-alị ile rịsọnmẹ Galili lẹ Judia bịa lẹ ndị gha Jerusalẹm bịa rị ebẹhụ. Ikẹn Di-nwọnni-ẹnyi wụ Osolobuẹ hụ a hụn Jesu e gi zụọ ọrịa.

¹⁸ Ogẹn ahụn hụra, ikẹnnyẹ nọ gi ute wẹ gi e bu ọkụnmụ buhẹ okẹnnyẹ ohu ọrọ kinmin; wẹ hụ a nwan nị wẹ bubanhan a imẹ ụlọ d'e bu ẹ tọ ihun Jesu,

¹⁹ kanị, ahụnnị wẹ ụzọ bubanhan a yeni igunrun ịhịan jun ebẹhụ. Ya wẹ nọ nyinrin elu ụlọ hụ, be oghe ye okpukpu ẹ, gha ebahụn dọ ya lẹ ute ẹ ye etintinnaị igunrun hụ ihun Jesu.

²⁰ Jesu a hụn okukwe wẹ, ọ nọ sị okẹnnyẹ hụ, “Ọwụ m, a gbagharịgụọ wẹ i njọ ị.”

²¹ Ya kẹ ndị-nkuzi Iwu hụ lẹ ndị Itu-Farisi nọ jụma ibe wẹ, “Onyẹ wụ hụnnị rị e ku arụ?! Onyẹ a saẹka a gbagharị njọ wezụka Osolobuẹ?!”

²² Jesu a marịngụọ ihiẹn rị wẹ obi, ya ọ nọ sị wẹ, “Kị haịn ụnụ gi e ro iroro nọ ẹnịna?

²³ Elee hụn ka nfe okuku: ịsị, ‘A gbagharịgụọ wẹ i njọ ị’ ra ịsị, ‘Lihi ọtọ n'i jẹnmẹ ijẹn’?

²⁴ M jẹnkọ nwan d'a ghọsị ụnụ nị Nwa nke Ịhịan nwọn ikẹn o gi a gbagharị njọ imẹ ụwa.” Ya ọ nọ sị okẹnnyẹ hụ ọrọ kinmin, “M sị ị lihi ọtọ, heri ute i n'ị lama!”

²⁵ Okẹnnyẹ hụ nọ lihi ọtọ ozigbo, idẹnya wẹ ile rị ebahụn, heri ute hụ o te gi dinẹ, jakọ Chuku mma lakọ.

²⁶ Ọ nọ tụ wẹ ile ẹnya ọda-ọda, wẹ nọ jama Osolobuẹ mma. Ọ tụka wẹ egun; wẹ hụ a sị, “Ẹnyi a hụnọlẹ ihiẹn atụmẹnya tannị!”

Kẹ Jizọsị Dọn Kpọ Onyẹ Ụgwọ-isi wụ Livaị (Matiu)

²⁷ Ọnwan e mẹgụ, Jizọsị nọ pụ; ya ọ nọ hụn onyẹ w'a kpọ Livaị hụn a na ụgwọ-isi kẹ ọ nọdị alị imẹ ọdụ wẹ n'a na ụgwọ-isi. Jizọsị nọ sị a, “Sọnmẹ m.”

²⁸ Livaị nọ lihi ọtọ, latọ ihiẹn ile, sọnmẹ ẹ.

²⁹ Ya kẹ Livaị nọ kpọnị Jizọsị oriri hi-ogbe iwe ẹ; igunrun ndị ụgwọ-isi lẹ ndị ọzọ hụzị teburu ebẹhụ e du wẹ e ri ihiẹn-oriri.

³⁰ Ndị Itu-Farisi lẹ ndị-nkuzi Iwu wẹ hụn rị itu ndị Farisi nọ dẹnwịnnwịnghọsịma ndị nsọnmazụụn Jizọsị, sị wẹ, “Kị haịn ụnụ gi e du ndị ụgwọ-isi lẹ ndị-njọ e ri, a ra?”

³¹ Jizọsị nọ shịarị wẹ, sị, “Ẹlẹ ndị rị ikẹn a chọ dibiẹ, kanị ndị emu rị a kụ.

³² Ẹlẹ ndị ezi-omumẹ kẹ m bịa d'a kpọ nị wẹ rogharị, kanị ndị-njọ.”

A Jụ Wẹ Jizọsị Oku Ibu-ọnụ

³³ Ya wẹ nọ sị Jesu, “Ndị nsọnmazụụn Jọnụ e bu ọnụ mbụ-lẹ-ẹbụọ, e mẹ ekpere; ndị nsọnmazụụn ndị Itu-Farisi e mẹzikwọ ẹrịra; kanị ndị nsọnmazụụn ị e ri, a ra.”

³⁴ Jesu nọ shịarị wẹ, sị, “Nị ụnụ sa ẹka mẹ ndị bịa oriri agbamẹkụkwọ bu ọnụ ebe wẹ lẹ okẹnnyẹ rị a gba ẹkụkwọ rị?

³⁵ Ogẹn w'e gi wepụ okẹnnyẹ ahụn rị a gba ẹkụkwọ lala; ogẹn hụ kẹ w'e gi bu ọnụ.”

³⁶ Jizọsị nọzị tụnị wẹ iluni: “Onwọnni onyẹ e gi mpekele ẹkwa ọhụn a kwakin nke akan. O m'ẹ, nke ọhụn ahụn e tikapụ; mpekele ẹkwa ọhụn lẹ nke akan adangbamakọ.

³⁷ Onwọnni onyẹ e gi ihiẹn-manya akan a gbaye manya ọhụn. Makẹni, o m'ẹ, manya ọhụn hụ sikọ d'a gbawa ihiẹn-manya hụ, manya hụ a kwanhu, ihiẹn-manya hụ a la iwi.

³⁸ Gba nwan manya ọhụn ye imẹ ihiẹn-manya ọhụn!

³⁹ Onwọnni onyẹ a ragụ manya akan, chọma nke ọhụn; makẹni o jẹnkọ d'a sị, ‘Nke akan hụ mma.’ ”