Luku 4 - Ika

Isi Nke Ẹnọ Kẹ Ekwensụ Dọn Nwan Jesu

¹ Ya Jesu hụn Mmọn-nsọ jun imẹ ẹ nọ gha Iyi Jọdanị lụa; Mmọn-nsọ nọ duhunmẹmẹ ẹ imẹ atụ,

² Ekwensụ nọ nọ ebẹhụ nwan a ọrọgbọ akpọhịn ọgụnnaị. Onwọnni ihiẹn o ri ọrọgbọ hụ ile. Akpọhịn ọgụnnaị ahụn e zugụ, ẹgụn nọ gụnma a.

³ Ekwensụ nọ sị a, “Omẹni ị wụ Nwa Osolobuẹ, sị ọmụmanị họnrin ogbe brẹdi.”

⁴ Jesu nọ sị a, “E degụọ w'a imẹ Ẹkụkwọ-nsọ nị, ‘Ịhịan ara gi ihiẹn-oriri sụọ a rị ndụn.’ ”

⁵ Ya kẹ Ekwensụ nọ w'ẹ shi ebe jẹn elu, gi njube-ẹnya ohu ghọsịchanrịn a alị-eze ile rị elu-ụwa,

⁶ sị a, “M jẹnkọ d'e ye i ihiẹnni ile kịma, y'e nwọnrin ọghọ ile rịn'a, makẹni e bugụọ wẹ uwẹ ile che m ẹka, onyẹ sụọnị m kẹ m'e y'ẹ.

⁷ Ị kụnị m nwan isi alị, ihiẹn ndịnị ile e họnrin nke i.”

⁸ Jesu nọ sị a, “Ẹkụkwọ-nsọ sị, ‘Di-nwọnni-ẹnyi wụ Chuku i k'i k'a kụnị isi-alị; ịya sụọ k'i k'e fe!’ ”

⁹ Ya kẹ Ekwensụ nọ weri Jesu shi Jerusalẹm, bu ẹ che mkpọnụnụ Ụlọ-nsọ, sị a, “Omẹni ị wụ Nwa Osolobuẹ, gha ebeni wụtu.

¹⁰ Makẹni, e degụọ w'a imẹ Ẹkụkwọ-nsọ, sị, ‘O sikọ d'a sị ndị mmọn-ozi ẹ chemẹ i;

¹¹ wẹ jẹnkọ d'a parị ị, amamgbe y'a kpọ ụkụ ọmụma.’ ”

¹² Kanị, Jesu nọ sị a, “Ẹkụkwọ-nsọ sị, ‘Elelekwọlẹ Di-nwọnni-ẹnyi wụ Chuku i.’ ”

¹³ Ekwensụ a nwanchanrịngụ Jesu, ya ọ nọ la a tọ e che oghere ọzọ.

Jizọsị E Bidọn Ọrụn A Imẹ Galili

¹⁴ Ya kẹ Jizọsị nọ kinhẹn Galili, ya lẹ ikẹn Mmọn-nsọ. Ẹfan a nọ kpọgbarị obodo ile rị ẹgbẹrẹ hụ.

¹⁵ Ọ nọ kuzimẹ imẹ ụlọ-ofufe rịsọnmẹ ebahụn, ịhịan ile hụ a ja a mma.

A Jụ Wẹ Jizọsị Imẹ Alị A

¹⁶ Ya Jesu nọ shi Nazarẹtị, ebe ọ nọ sue; o ru Ụhụọhịn Ezumikẹn, ọ nọ jẹn ụlọ-ofufe k'o dọn e jẹn. Ogẹn wẹ gi a gụn Ẹkụkwọ-nsọ e ru, ọ nọ lihi n'ọ gụn,

¹⁷ wẹ nọ y'ẹ ẹkụkwọ Azaya onyẹ-amụma. Ọ shịapụ a, ọ nọ chọrị ebẹhụ wẹ deye nị

¹⁸ “Mmọn Di-nwọnni-ẹnyi rị imẹ m, makẹni o tumẹ m d'e zi ndị igbẹnnyẹ oziọma. O zi m d'a sị ndị rị imẹ ẹgbụn nwọnrin enwẹn wẹ, d'a sị ndị ẹnya-ishi hụnma ụzọ, d'a gbapụha ndị wẹ rị a bịangbu;

¹⁹ d'a ma ọkwa nị ahụa hụ e ruọlẹ hụn Di-nwọnni-ẹnyi e gi mẹni ndị nke ẹ ọhụnma.”

²⁰ Jesu nọ kpumẹzi ẹkụkwọ hụ, we ẹ ye onyẹ k'e butọn'a; ya ọ nọ nọdị alị. Ịhịan ile rị imẹ ụlọ-ofufe e bu ẹnya tụma a,

²¹ ọ nọ gwama wẹ oku, sị, “Ebeni wẹ gụn imẹ Ẹkụkwọ-nsọ e mẹzugụọ tannị kẹ ụnụ rị a nụ a.”

²² Wẹ ile hụ e ku oku ẹ ọhụnma, oku-ọnụ a hụ a tụ wẹ ẹnya. Wẹ nọ sị, “Onyẹni ẹlẹ nwa Josẹfụ?”

²³ Ọ nọ sị wẹ, “A marịngụọ m nị ụnụ sikọ d'a tụnị m iluni: ‘Dibiẹ, zụọ enwẹn i!’ Nọ nwan obodo i ebeni mẹ ihiẹn ẹnyi nụ nị i mẹ imẹ Kapanọm.”

²⁴ M rị a gwa ụnụ ezioku, w'a ra nabanhan onyẹ-amụma imẹ alị a.

²⁵ Kanị, nị m gwa ụnụ ezioku rịn'a: ikpoho di wẹ nwụn e bughọ ọda alị Izrẹlụ ogẹn Ẹlaịja, ogẹn ahụn mirin gilẹni zue ọrọgbọ ahụa ẹtọ lẹ ifọn isin hụn okẹn ụnwụn gi mụgbarị alị ile;

²⁶ kanị, imẹ wẹ, onwọnni hụn Osolobuẹ zi Ẹlaịja d'e kunrun, kama, o zi ẹ alị ọzọ, Zarẹfatị hụn rị alị Sidọnụ, d'e kunrun okpoho di ẹ nwụnhụngụ rị ebẹhụ.

²⁷ “Ndị oti rị alị Izrẹlụ ogẹn Ẹlaịsha onyẹ-amụma e buzighọ ọda; kanị onwọnni hụn ọ zụọ wezụka Nemanị onyẹ alị Siria, onyẹ alị ọzọ.”

²⁸ Ogẹn Jesu gi ku ihiẹnni, olulu nọ bumẹ ndị ahụn rị imẹ ụlọ-ofufe hụ.

²⁹ A fụlihi wẹ, nupụ Jesu imẹ obodo hụ, w'ẹ shi mkpẹnrẹn obodo wẹ ahụn rị elu ugu, kẹni wẹ gha elu ebahụn kwantu ẹ,

³⁰ kanị Jesu nọ ghafe etintinnaị igunrun ahụn, jẹnmẹ ebe o jẹnkọ.

Jizọsị A Zụọ Okẹnnyẹ Eje-mmọn Rị Imẹ Ẹ

³¹ Ya Jesu nọ shi Kapanọm hụn rị Galili. O ru Ụhụọhịn Ezumikẹn, ọ nọ kuzimẹ wẹ;

³² nkuzi ẹ nọ tụ wẹ ẹnya, makẹni o ku kẹ onyẹ oku rị ẹka.

³³ Okẹnnyẹ ohu eje-mmọn rị imẹ ẹ rị ụlọ-ofufe hụ. Ọ nọ yi,

³⁴ “Heuu! K'i gi ẹnyi e mẹ, Jesu onyẹ Nazarẹtị! Ị bịa d'e tikpọ ẹnyi? A marịnghọ m'ị: ịyụ wụ Onyẹ-nsọ Osolobuẹ!”

³⁵ Kanị Jesu nọ jụgbọ eje-mmọn hụ, sị a, “Gba nkịtịn! Gha imẹ ẹ pụ!” Eje-mmọn hụ nọ bu okẹnnyẹ hụ gbe alị idẹnya wẹ ile, gha imẹ ẹ pụ, kanị ọ rụn'a ẹhụ.

³⁶ Ọ tụ ndị hụ ile ẹnya, wẹ hụ a sị ibe wẹ, “Kị wụ ọnwan? O hụ e gi ikẹn ẹ a gwa eje-mmọn oku nọkẹ onyẹ oku rị ẹka, wẹ hụ a pụha.”

³⁷ Ya kẹ oku Jesu nọ kpọgbarị ẹgbẹrẹ hụ ile.

Jizọsị A Zụọ Ọgọ Pita Lẹ Ndị Ọzọ Bu Ọda

³⁸ Jizọsị nọ gha imẹ ụlọ-ofufe hụ pụ, shi iwe Saịmọnụ. Okẹn ẹhụ-ọkụn rị nnẹ nwunyẹ Saịmọnụ ẹhụ; wẹ nọ gwa Jizọsị oku ẹ.

³⁹ Jizọsị nọ jẹn d'e wuzo ebẹhụ o dinẹ, jụgbọ ẹhụ-ọkụn hụ, ẹhụ-ọkụn hụ nọ hapụ a. Ọ nọ lihi ọtọ ozigbo, lemẹ wẹ ọbịa.

⁴⁰ Ogẹn anwụn gi rọma, ndị ile nwọn ndị emu ichẹn-ichẹn rị a kụ nọ wẹhẹ wẹ bịanị Jizọsị, ọ nọ bu ẹka kwasị onyẹ-onyẹ, zụọchanrịn wẹ ile.

⁴¹ Eje-mmọn hụzị a gha imẹ ndị bu ọda a pụ, e yi, “Ịyụ wụ Nwa Osolobuẹ!” Kanị, Jizọsị hụ a jụgbọ eje-mmọn ndị hụ — ọ nịnị wẹ ku oku, makẹni a marịngụọ wẹ nị ya wụ Kraịstị.

Jesu E Zisọnmẹ Oziọma

⁴² Eki e fọn, Jesu nọ pụ, shi ebe ịhịan bilẹni, kanị igunrun ahụn hụ a chọ a. Ogẹn wẹ gi hụn a, wẹ nọ chọ nị wẹ gbọndọn ẹ makẹ ọ gha a la wẹ a tọ.

⁴³ Kanị ọ nọ sị wẹ, “M k'e zirịrị oziọma Alị-eze Osolobuẹ imẹ obodo ndị ọzọ, makẹni ya kẹ Osolobuẹ zi m.”

⁴⁴ Ẹrịra k'o dọn jẹnsọnmẹ, e ku oku-Chuku imẹ ụlọ-ofufe rịsọnmẹ Judia.