Luku 3 - Ika

Isi Nke Ẹtọ Ozi Jọnụ Hụn E Mẹ Mirin-Chuku Zi

¹ Ọ rị nwan ahụa mmisẹn eze-kanị wụ Siza Taịberiasị kịma alị ile rị okpuru ndị Rom. Pọntius Paịleti wụ Gọvanọ rị a kịnị Rom alị Judia. Imẹ Judia, Hẹrọdụ hụ a kị Galili hụn wụ azụụn ohu; Filipu nwẹnẹ ẹ hụ a kị azụụn ẹbụọ — Ituria lẹ Trakọnitisi; Lisanịasị hụ a kị Abilẹni hụn mẹ wẹ azụụn ẹnọ.

² Anasị lẹ Kayafasị wụ ndị-isi nchụn-ẹjan. Ogẹn hụ kẹ Osolobuẹ gi gwa Jọnụ nwa Zẹkaraya oku imẹ atụ.

³ Ya Jọnụ nọ ghagbama ẹgbẹrẹ Iyi Jọdanị, e ku oku-Chuku, a sị wẹ bịa d'e mẹ mirin-Chuku, gi ẹ ghọsị n'e rogharịgụọ wẹ — kẹni Osolobuẹ hụn ụzọ gbagharị wẹ njọ.

⁴ Ẹrịra kẹ wẹ de ẹ imẹ ẹhụhụọ Azaya onyẹ-amụma, nị, “Olu ohu rị imẹ atụ a hị, a sị, ‘Kwa nị nị Di-nwọnni-ẹnyi ụzọ; mẹmẹ ni ụzọ a n'o zinrin.

⁵ Wẹ jẹnkọ d'e hukin ọdanmgbugbu ile, gukpọchanrịn ugu lẹ òke ile; wẹ jẹnkọ d'e mẹ ụzọ ngịrịgọ ile zinrin, mẹ ụzọ mkpọke ile riẹn,

⁶ ịhịan ile a hụn nzụọpụha Osolobuẹ!’ ”

⁷ Jọnụ hụ a sị igunrun ndị hụ rị a bịa n'o mẹ wẹ mirin-Chuku, “Igunrun ẹjụ-alị! Onyẹ sị ụnụ gbanahịn iwe lẹ ọnụma Osolobuẹ lalanị?!

⁸ Mịkwọ nị nwan mkpụrụ ghọsị nị ụnụ e rogharịgụọ! Asịkwọlẹ ni enwẹn ụnụ, ‘Ebraham wụ nẹdi ẹnyi!’ Makẹni, ezioku kẹ m rị a gwakwọ ụnụ, Osolobuẹ k'a saẹka gi ọmụma ndịnị ye Ebraham ụmụ.

⁹ Anyụn a rịgụọlẹ nwan ukun osisi, e che: osisi ọwụlẹ mịlẹni mkpụrụ rị mma, e gbutu w'ẹ, tụ a ye imẹ ọkụn.”

¹⁰ Igunrun ndị ahụn hụ a sị a, “Kị ẹnyi e mẹ nwan?”

¹¹ Ọ nọ sị wẹ, “Onyẹ nwọn ẹwuru ẹbụọ jẹnkọ d'e werịrị ohu ye onyẹ nwọnlẹni; onyẹ nwọn ihiẹn-oriri ya mẹzikwọ ẹrịra.”

¹² Ndị a na ụgwọ-isi hụn bịazịkwọ d'e mẹ mirin-Chuku nọ jụ a, sị, “Onyẹ-nkuzi, kị ẹnyi k'e mẹ?”

¹³ Ọ sị wẹ, “Anakarịlẹ ni ihiẹn wẹ sị ụnụ na.”

¹⁴ Ndị-agha nọzị jụ a, sị, “Ẹnyi nwẹn? Kị ẹnyi k'e mẹ?” Ọ nọ sị wẹ, “Egilẹ ni ikẹn narịn ịhịan ihiẹn ẹ; ebuokinlẹ ni ịhịan ọnụ; a nị nị ụgwọ-ọrụn ụnụ e jun ụnụ ẹfọ.”

¹⁵ Makẹni wẹ rị a tụ ẹnya Kraịstị, Onyẹ-nzụọpụha Hụ Osolobuẹ kwe nkwa n'o jẹnkọ d'e zihẹ, wẹ hụ a jụ enwẹn wẹ kẹ Jọnụ rọ.

¹⁶ Jọnụ nọ sị wẹ, “Mirin mmaka kẹ m gi rị e mẹ ụnụ mirin-Chuku, kanị onyẹ kanị m lala: erudẹni m onyẹ a tọpụ a eriri akpụkụ! O sikọ d'e gi Mmọn-nsọ lẹ ọkụn mẹ ụnụ mirin-Chuku.

¹⁷ O gi ihiẹn o gi a fụchan ọka: o jẹnkọ d'a fụchanchanrịn ọka ile rị ebe ọ nọ a kụkpọ ọka, kpọn akpụrụ a ye ebe o kpọntọ ọka, kpọnkikomẹ ẹfịfịa kpọnye imẹ ọkụn ghalẹni a nị e tinyụn.”

¹⁸ Oku ndịnị lẹ ndị ọzọ o gi dụn wẹ ọdụn kẹ Jọnụ gi zi wẹ oziọma.

¹⁹ O mẹgụ, Jọnụ nọ jụgbọ eze wụ Hẹrọdụ makẹni o jẹn d'a lụrụ Hẹrọdịasị nwunyẹ-nwẹnẹ ẹ lẹzi makẹ eje-ihiẹn ndị ọzọ ile Hẹrọdụ mẹ.

²⁰ Ya kẹ Hẹrọdụ nọ mẹcheni ndị hụn o mẹ mbụ: ọ kpọkin Jọnụ ye ụlọ-ngan.

Kẹ Jọnụ Dọn Mẹ Jizọsị Mirin-Chuku

²¹ Ogẹn wẹ gi rị e mẹ ịhịan ile mirin-Chuku, e mẹgụ wẹ Jizọsị nkẹ, ebe ọ rị e mẹ ekpere, elu-igwee nọ kpupụ,

²² Mmọn-nsọ nọ gi ẹhụ nduru hidan, bekwasị a. Olu nọ gha elu-igwee sị, “Ịyụ wụ ezi Nwa m; ihiẹn i a sụọka m.”

Ndị Mụ Jizọsị

²³ Jizọsị rị ihiẹn rịkẹ nwa ahụa iri-kwasị-ọgụn k'o bidọn ọrụn a. Wẹ weri Jizọsị kẹ nwa Josẹfụ. Josẹfụ wụ nwa Heli,

²⁴ Heli wụ nwa Matitatị, Matitatị wụ nwa Livaị, Livaị wụ nwa Mẹl'ki, Mẹl'ki wụ nwa Janaị, Janaị wụ nwa Josẹfụ,

²⁵ Josẹfụ wụ nwa Matatịasị, Matatịasị wụ nwa Emọsụ, Emọsụ wụ nwa Nahum, Nahum wụ nwa Es'li, Es'li wụ nwa Nagaị,

²⁶ Nagaị wụ nwa Maatị, Maatị wụ nwa Matatịasị, Matatịasị wụ nwa Sẹmẹini, Sẹmẹini wụ nwa Josẹkị, Josẹkị wụ nwa Jọda,

²⁷ Jọda wụ nwa Johananị, Johananị wụ nwa Resa, Resa wụ nwa Zerubabẹlụ, Zerubabẹlụ wụ nwa Shiẹtiẹlụ, Shiẹtiẹlụ wụ nwa Neri,

²⁸ Neri wụ nwa Mẹl'ki, Mẹl'ki wụ nwa Adi, Adi wụ nwa Kosam, Kosam wụ nwa Ẹl'madam, Ẹl'madam wụ nwa Eri,

²⁹ Eri wụ nwa Joshụa, Joshụa wụ nwa Ẹliẹza, Ẹliẹza wụ nwa Jorim, Jorim wụ nwa Matitatị, Matitatị wụ nwa Livaị,

³⁰ Livaị wụ nwa Simiọnụ, Simiọnụ wụ nwa Juda, Juda wụ nwa Josẹfụ, Josẹfụ wụ nwa Jonam, Jonam wụ nwa Ẹliakim,

³¹ Ẹliakim wụ nwa Mẹlịa, Mẹlịa wụ nwa Mẹna, Mẹna wụ nwa Matata, Matata wụ nwa Natanị, Natanị wụ nwa Defidi,

³² Defidi wụ nwa Jese, Jese wụ nwa Obẹdi, Obẹdi wụ nwa Bụazị, Bụazị wụ nwa Salụmọnụ, Salụmọnụ wụ nwa Nashọnụ,

³³ Nashọnụ wụ nwa Aminadabụ, Aminadabụ wụ nwa Adimini, Adimini wụ nwa Anị, Anị wụ nwa Hẹzrọnụ, Hẹzrọnụ wụ nwa Pẹrẹzi, Pẹrẹzi wụ nwa Juda,

³⁴ Juda wụ nwa Jekọpụ, Jekọpụ wụ nwa Aziki, Aziki wụ nwa Ebraham, Ebraham wụ nwa Tẹra, Tẹra wụ nwa Nahọ.

³⁵ Nahọ wụ nwa Sẹrugu, Sẹrugu wụ nwa Rewu, Rewu wụ nwa Pẹlẹgị, Pẹlẹgị wụ nwa Ẹba, Ẹba wụ nwa Shẹla,

³⁶ Shẹla wụ nwa Kaịnanị, Kaịnanị wụ nwa Afasadị, Afasadị wụ nwa Shẹm, Shẹm wụ nwa Nụa, Nụa wụ nwa Lamẹki,

³⁷ Lamẹki wụ nwa Mẹtusẹla, Mẹtusẹla wụ nwa Ẹnọkụ, Ẹnọkụ wụ nwa Jarẹdi, Jarẹdi wụ nwa Mahalalẹlụ, Mahalalẹlụ wụ nwa Kenanị,

³⁸ Kenanị wụ nwa Ẹnọshị, Ẹnọshị wụ nwa Sẹtị, Sẹtị wụ nwa Adam, Adam wụ nwa Osolobuẹ.