Luku 24 - Ika

Isi Nke Ẹnọ-kwasị-ọgụn Jesu A Gha Ọnwụn Lihi

¹ Kanị, ụzụtụntụn biribiri ụhụọhịn ibuzọ imẹ izuka, ikpoho ndị ahụn nọ weri ihiẹn ndị ahụn e shin ọhụnma wẹ chọtọ, shi ili hụ.

² Wẹ nọ hụn a nị e nupụgụọ wẹ ọmụma wẹ te gi nukin ọnụ ili hụ.

³ A banye wẹ ẹ, ahụnnị wẹ ẹhụ Di-nwọnni-ẹnyi wụ Jesu.

⁴ Ebe wẹ rị e ro ihiẹnni, ikẹnnyẹ ẹbụọ ẹwuru wẹ rị e be nwaịn-nwaịn nọ wuzoyeni wẹ idẹnmizi.

⁵ Okẹn egun nọ tụma wẹ, ya wẹ nọ bu ihun kọma alị. Ikẹnnyẹ hụ nọ sị wẹ, “Kị ụnụ rị a chọnị onyẹ rị ndụn imẹ igunrun ndị nwụnnị?

⁶ Ọ rịzị ebeni; ọ ghagụọ ọnwụn lihi. Nyanhan nị k'ọ dọn gwa ụnụ k'ọ rị Galili, sị,

⁷ ‘Wẹ jẹnkọ d'e bu Nwa nke Ịhịan che ẹka ndị njọ, a kpọgbu wẹ ẹ; kanị hụn m'ẹ akpọhịn ẹtọ, o k'a gha ọnwụn lihi.’ ”

⁸ Ya kẹ ikpoho hụ nọ nyanhan ihiẹn Jesu ku.

⁹ A gha wẹ ili ahụn lụa, wẹ nọ gwa ndị-ozi mmanaị hụ pụ-ichẹn lẹ ndị ọzọ ile họdụnị.

¹⁰ Ikpoho hụ jẹn ili ahụn wụ Meri onyẹ Magidala lẹ Juana lẹ Meri nnẹ Jemisi; uwẹ lẹ ikpoho ndị ọzọ wẹ ile wị gba gwa ndị-ozi hụ pụ-ichẹn ihiẹn ndịnị.

¹¹ Kanị, ndị-ozi hụ pụ-ichẹn egini oku wẹ dọn makẹni wẹ weri ẹ kẹ oku nwọnlẹni isi.

¹² Kanị Pita nọ lihi ọtọ, gbashi ili ahụn; o hulụa alị, nyọnye, ọ nọ hụn ẹkwa linẹ hụ sụọ, ẹkwa hụ we te gi kwama ozun Jesu. Ọ nọ pụ, e ro ihiẹn rị e mẹni.

Jesu E Kunrun Ndị nsọnmazụụn A Ẹbụọ Jẹnkọ Ẹmaụsụ

¹³ Ụhụọhịn ahụn daị, ndị nsọnmazụụn Jesu ẹbụọ jẹnkọ obodo ohu mẹ ẹkẹrẹ w'a kpọ Ẹmaụsụ. Gha Jerusalẹm d'e ru Ẹmaụsụ wụ ihiẹn rị kẹ maịlị ẹsa.

¹⁴ Wẹ hụ e ku oku ihiẹn ndị hụ ile mẹni.

¹⁵ Hụn ahụn wẹ rị e ku, e shi inyẹnrẹn, Jizọsị lẹ enwẹn ẹ nọ nọchimẹ wẹ, sọn wẹ jẹnkọ;

¹⁶ kanị Osolobuẹ anịnị wẹ kọma a ẹnya.

¹⁷ Ya Jizọsị nọ sị wẹ, “Elee inyẹnrẹn kẹ ụnụ shikọ ihiẹnni ile jẹnkọ?” Wẹ nọ biwuzo, rọnmẹ ihun.

¹⁸ Ya onyẹ ohu imẹ wẹ ẹfan a wụ Klopasị nọ sị a, “Ọ nọkẹ sị yụ sụọ imẹ ndị ile bịa Jerusalẹm marịnlẹni ihiẹn ndị mẹ ebahụn kete ụhụọhịnnị?”

¹⁹ Jesu nọ sị, “Kịnị mẹ?” Wẹ nọ sị a, “Oku Jesu onyẹ Nazarẹtị: Okẹnnyẹ hụn gi ọrụn a lẹ oku-ọnụ a ghọsịchanrịn n'ọ wụ okẹn onyẹ-amụma, kẹ ebe Osolobuẹ rị kẹ ebe ịhịan rị —

²⁰ lẹ oku ihiẹn ndị-isi nchụn-ẹjan lẹ ndị-isi ẹnyi mẹ — kẹ wẹ dọn we ẹ ye wẹ d'a ma a ikpe-ọnwụn kpọgbu;

²¹ bụ ẹnyi te rị a tụ ẹnya nị ịya jẹnkọ d'a gbapụha Izrẹlụ! “O mẹgụọdẹ nwan akpọhịn ẹtọ ihiẹn ndịnị mẹ.

²² Ọzọzị, o nwọn ikpoho ndị itu ẹnyi mẹ ihiẹn tụ ẹnyi ẹnya: wẹ jẹn ili ẹ ụzụtụntụnnị,

²³ ahụnnị wẹ ẹhụ a. E kinhẹn wẹ, wẹ nọ gwa ẹnyi nị wẹ hụndẹ ndị mmọn-ozi gwa wẹ n'ọ hụ ndụn.

²⁴ O nwọn ndị itu ẹnyi jẹn ili hụ, wẹ nọ hụn a n'ọ rịchanrịn kẹ ikpoho ndị hụ dọn ku; wẹ nwẹn ahụnzịkwọn'a.”

²⁵ Ya Jizọsị nọ sị wẹ ẹbụbụọ, “Ụnụ e zuzukẹ! Ihiẹn ile ndị-amụma ku imẹ Ẹkụkwọ-nsọ a fụka ụnụ ọrụn okweri!

²⁶ Ẹkụkwọ-nsọ ekugụọn'a nị Onyẹ-nzụọpụha Ahụn Osolobuẹ Tumẹ wụ Kraịstị jẹnkọ d'a tagụ afụnfụn ndịnị o kebe nwọnrin ọghọ a?”

²⁷ Ya Jizọsị nọ gha ihiẹn Mozizi de imẹ Ẹkụkwọ-nsọ lẹ ihiẹn ndị-amụma ile de kọwachanrịn nị wẹ ihiẹn ile Ẹkụkwọ-nsọ ku banyeni enwẹn ẹ.

²⁸ Hụn wẹ gi rumẹ ẹhụ obodo hụ wẹ jẹnkọ, Jizọsị nọ mẹ rịkẹ sị ọ ghafekọ aghafekọ;

²⁹ wẹ nọ rịọ a ọda-ọda, sị a, “Dodo, du ẹnyi nọdị, nị ọhị a gbamagụọ, ụhụọhịn tannị a gụmagụọ.” Ya ọ nọ banye d'e sọn wẹ nọdị.

³⁰ Ogẹn ya lẹ wẹ gi nọdị alị nị wẹ ri ihiẹn-oriri, ọ nọ weri brẹdi ahụn wẹ jẹnkọ d'e ri, kpanmịn Osolobuẹ; ọ nọ bebe ẹ, we ẹ ye wẹ.

³¹ Ebẹhụ kẹ ẹnya wẹ nọ shịapụ, wẹ nọ marịn nị ịya rọ. Ya ọ nọ fori!

³² Wẹ nọ sị ibe wẹ, “Ẹhẹn! Ịya haịn obi gi rị a nụ ẹnyi ọkụn ogẹn o gi rị a gwa ẹnyi oku, a kọwanị ẹnyi Ẹkụkwọ-nsọ kẹ ẹnyi rị ụzọ!”

³³ Ya wẹ nọ lihi ọtọ ozigbo hụ, kinzi Jerusalẹm; wẹ nọ hụn ndị nsọnmazụụn a mmanaị hụ lẹ ndị ọzọ rị itu wẹ kẹ wẹ zu,

³⁴ a sị, “Ezioku rọ! Di-nwọnni-ẹnyi e lihigụọ, Saịmọnụ a hụngụọ a!”

³⁵ Wẹ ẹbụbụọ nọ nwan gwa wẹ ihiẹn mẹ ụzọ lẹ kẹ wẹ dọn ghọha nị ya rọ ogẹn o gi bebe brẹdi.

Ndị nsọnmazụụn Jesu A Hụn Jesu K'ọ Ghagụ Ọnwụn Lihi

³⁶ Ebe mmadụ ẹbụọ hụ rị a gwa wẹ ihiẹnni, ya kẹ Jizọsị lẹ enwẹn nọ turu imẹ igunrun wẹ idẹnmizi, sị wẹ, “Udọn ya rị nị ụnụ.”

³⁷ Wẹ ile nọ jụsọhị, okẹn egun nọ tụma wẹ; wẹ ro n'a hụn wẹ onyẹ-mmọn.

³⁸ Ya ọ nọ sị wẹ, “Kị egun rị a tụnị ụnụ? Kị ụnụ rị e nwọnni obi-ẹbụọ?

³⁹ Lee ni ẹka m lẹ ụkụ m: Mmẹ rọ! Hụatụ nị m ẹka nị ụnụ hụn a nị mmẹ rọ; onyẹ-mmọn ara nwọn uru lẹ ọkpụkpụ ụnụ rị a hụn m ẹhụ.”

⁴⁰ Ọ hụ e ku ihiẹnni, ọ hụ a ghọsị wẹ ẹka a ẹbụbụọ lẹ ụkụ a ẹbụbụọ.

⁴¹ Ufiri ni ekwerini wẹ makẹni ọ tụka wẹ ẹnya lẹzi makẹni ịghọghọ jun wẹ obi, Jesu nọ sị wẹ, “Ụnụ e nwọnghọ ihiẹn-oriri ọwụlẹ ebeni?”

⁴² Wẹ nọ ye ẹ mkpikpi azụn wẹ shi,

⁴³ ọ nọ narịn wẹ ya ri idẹnya wẹ.

⁴⁴ Ya ọ nọ sị wẹ, “Ihiẹn ndịnị kẹ m gwa ụnụ ogẹn mmẹ lẹ ụnụ gi rị: nị ihiẹn ile wẹ de banyeni m imẹ Iwu Mozizi lẹ imẹ ihiẹn ndị-amụma de lẹ imẹ Ẹbụ-ọma jẹnkọ d'e mẹrịrị.”

⁴⁵ Ya ọ nọ shịapụ wẹ obi kẹni wẹ saẹka ghọta Ẹkụkwọ-nsọ,

⁴⁶ sị wẹ, “Ọnwan wụ ihiẹn wẹ de: nị Onyẹ-nzụọpụha sikọ d'a nwụnhụn, nke akpọhịn ẹtọ ọ gha ọnwụn lihi;

⁴⁷ nị wẹ jẹnkọ d'e gi ẹfan a zi ndị alị ile ozi w'e gi rogharị kẹni Osolobuẹ gbagharị wẹ njọ; nị Jerusalẹm kẹ wẹ jẹnkọ d'a gha bidọn.

⁴⁸ Ụnụ nwọn shịa ẹri ihiẹn ndịnị ile.

⁴⁹ Lee n'ẹ, m zilanị ụnụ Mmọn-nsọ ahụn Nẹdi m kwe nkwa a. Ka cherikwọ nị imẹ obodo ebeni d'e ru n'e yimẹgụ wẹ ụnụ ikẹn ahụn gha Elu-igwee bịa.”

Jizọsị E Shi Elu-igwee

⁵⁰ Ọ nọ gha imẹ obodo hụ we wẹ rukwọrị Bẹtani; e ru wẹ ebẹhụ, ọ nọ kịshi ẹka elu, gọzi wẹ.

⁵¹ Ebe ọ rị a gọzi wẹ, ọ nọ gha imẹ wẹ buli, Osolobuẹ nọ we ẹ shi elu-igwee.

⁵² Ya wẹ nọ kụn'a isi alị, gi okẹn ịghọghọ lakin Jerusalẹm.

⁵³ Wẹ hụ a nọ imẹ Ụlọ-nsọ ogẹn ile, a ja Osolobuẹ mma.