Luku 23 - Ika

Isi Nke Ẹtọ-kwasị-ọgụn E Duru Wẹ Jizọsị Jẹnni Gọvanọ Wụ Paịleti

¹ Ya kẹ Ndị-isi Nkịkwama hụ ile nọ lihi ọtọ, we Jizọsị jẹnni Paịleti, Gọvanọ rị a kịnị ndị Rom.

² Wẹ nọ kinmẹ, sị, “Ẹnyi nwụn okẹnnyẹni k'ọ rị e dufie ndị alị ẹnyi, a sị wẹ akụzịlẹ eze-kanị wụ Siza ụgwọ-isi, a kpọ enwẹn ẹ Kraịstị hụn wụ eze.”

³ Paịleti nọ jụ Jesu, sị, “Ịyụ wụ eze ndị Ju?” Ọ nọ sị a, “Y'e kugụọ a.”

⁴ Ya kẹ Paịleti nọ sị ndị-isi nchụn-ẹjan lẹ igunrun hụ, “Ahụnnị m ihiẹn m'e gi ma okẹnnyẹni ikpe.”

⁵ Kanị, a tọ wẹ e ku ẹ, a sị, “O gi nkuzi ẹ e se isusu alị Judia ile. Galili k'ọ gha bidọn; o rugụọ nwan ebeni.”

Paịleti A Sị Wẹ We Jesu Jẹnni Hẹrọdụ

⁶ Ogẹn Paịleti gi nụ ihiẹnni, ọ nọ jụ wẹ kẹ onyẹ Galili rọ.

⁷ Ogẹn o gi marịn nị azụụn Hẹrọdụ rị a kị k'ọ gha bịa, ọ nọ zi ẹ jẹnni Hẹrọdụ. Hẹrọdụ nkẹ rị imẹ Jerusalẹm ogẹn hụ.

⁸ Ogẹn Hẹrọdụ gi hụn Jesu, ẹfọ nọ sụọ a ụsụọ ọda-ọda, makẹni o tekẹ ọ chọma n'ọ hụn a. Makẹni, ọ nụgụọ otiti ẹ, a tụ ẹnya n'ọ hụn a ebe ọ rị a rụn ọrụn-atụmẹnya.

⁹ Ya ọ nọ jụma Jizọsị ajụjụ bu ọda, kanị Jizọsị a shịarịn'a ihiẹn ọwụlẹ.

¹⁰ Ndị-isi nchụn-ẹjan lẹ ndị-nkuzi Iwu turuhụkwọ ebahụn e kin, e kinshi ikẹn.

¹¹ Hẹrọdụ lẹ ndị-agha a nọzị gi Jesu gu egu, mụ a ẹmụ. Ya Hẹrọdụ nọ yimẹ ẹ ẹkwa ma mma, zikinni Paịleti ya.

¹² Ya kẹ Hẹrọdụ lẹ Paịleti nọ sụọkin ụhụọhịn hụ; wẹ te wụ eṅẹnrẹn mbụ.

E Wẹhẹ Wẹ Jizọsị Ebe Ịhịan Ile Rị

¹³ Paịleti nọ kpọgbama ndị-isi nchụn-ẹjan lẹ ndị-ọkịkị lẹ ndị alị hụ ile,

¹⁴ sị wẹ, “Ụnụ wẹhẹni m okẹnnyẹni n'ọ rị e dufie ndị alịnị. E lelegụọ m'a nwan idẹnya ụnụ; ahụnnị m eje-ihiẹn ndị hụ ụnụ sị nị ya k'o mẹ.

¹⁵ Hẹrọdụ lẹ enwẹn ẹ ahụnzịkwọnị eje-ihiẹn ọwụlẹ o mẹ, ya k'o gi zikinni ẹnyi ya. Lee ẹ, onwọnni ihiẹn okẹnnyẹni mẹ hụn wẹ e gi gbu ẹ.

¹⁶ M jẹnkọ nwan d'a sị wẹ fịan a mkpịnsịn, a hatu m'ẹ.”

¹⁷ Ogẹn Mmẹmmẹ-nghafe ọwụlẹ Paịleti e wepụharịrị nị wẹ onyẹ-ngan ohu.

¹⁸ Kanị igunrun hụ ile nọ yimẹ, “Wepụ onyẹni elu-ụwa! Wepụhanị ẹnyi Barabasị!”

¹⁹ (Barabasịnị rị ngan makẹ isusu o se imẹ obodo hụ lẹ ọchụn o gbu.)

²⁰ Makẹni Paịleti te chọ n'ọ hapụ Jizọsị ye, ọ nọ gwazị igunrun hụ oku.

²¹ Kanị wẹ ile a tọkwọ e yi, “Kpọgbu ẹ! Kpọgbu ẹ!”

²² Paịleti nọ gwazị wẹ hụn mẹ mgbe ẹtọ, sị, “Kị haịn? Elee eje-ihiẹn k'o mẹ? Ahụnnị m ihiẹn ọwụlẹ o mẹ hụn wẹ e gi gbu ẹ! M jẹnkọ nwan d'a fịan a mkpịnsịn, hatu ẹ ye.”

A Ma Wẹ Jesu Ikpe-ọnwụn

²³ Kanị wẹ hụkwọ e yi, a sị a kpọgbu Jizọsị. Oro wẹ a karị ẹka, nke wẹ nọ bụn.

²⁴ Ya Paịleti nọ ma Jizọsị ikpe hụ wẹ chọ n'ọ ma a.

²⁵ Ọ nọ hatu onyẹ hụ wẹ chọ, onyẹ nwẹn wẹ tụ ngan makẹ isusu lẹ igbu-ọchụn. Ọ nọ we Jizọsị ye wẹ nị wẹ kpọgbu ẹ ọkpọgbu ahụn wẹ chọ.

E Duru Wẹ Jesu D'a Kpọgbu Elu Obe

²⁶ Ebe ndị-agha dukọ a, wẹ nọ kwọndọn Saịmọnụ, onyẹ alị Saịrini, hụn gha alị-ọfịa lala imẹ obodo, buye ẹ obe hụ, sị a buru ẹ sọnmẹ Jesu.

²⁷ Igunrun ịhịan hụ e sọn Jizọsị, wẹ lẹ ikpoho ndị rị a kwannị Jizọsị ẹkwan, e goo.

²⁸ Jesu nọ gbehutọ, sị wẹ, “Ikpoho Jerusalẹm! Akwanlẹ ni ni m ẹkwan, ka kwanmanị nị enwẹn ụnụ lẹ ụmụ ụnụ ẹkwan.

²⁹ Makẹni ogẹn zeni lala hụn wẹ e gi sị, ‘Ndị-agan lẹ ikpoho mụlẹni ụmụ lẹ ndị yetulẹni nwa ẹran e nwọnkẹ ngọzi.’

³⁰ Ogẹn hụ, ịhịan k'a gha a sị ugu, ‘Dodo, dankwasị ẹnyi’, a sị òke, ‘Dodo, kpumẹ ẹnyi!’

³¹ Makẹni, omẹni ihiẹnni kẹ wẹ rị e mẹ osisi rị ndụn, kị wẹ k'e mẹ hụn kpọgụ nkụn?”

A Gụn W'a Yeni Ndị Njọ

³² O nwọnzi ikẹnnyẹ ẹbụọ ndị mẹ eje-ihiẹn wẹ duru wẹ lẹ Jesu d'a kpọgbu.

A Kpọma Wẹ Jesu Ye Elu Obe

³³ E ru wẹ ebẹhụ w'a kpọ “Okpokomisi”, wẹ nọ nọ ebẹhụ kpọma Jesu ye elu obe, ịya lẹ ndị hụ mẹ eje-ihiẹn: onyẹ ohu rị a ẹka-nni, hụn-ẹbọ rị a ẹka-ekpẹn.

³⁴ Jesu nọ sị, “Baba, gbagharị wẹ, n'a marịn wẹ ihiẹn wẹ rị e mẹ.” Ogẹnni kẹ ndị-agha kpọgbun'ẹ gi tụ nkpọ, gi ẹ keri ẹkwa a.

³⁵ Igunrun ịhịan turu ebẹhụ, e lee ile; kanị, ndị-isi ndị Ju hụ a mụ a ẹmụ, a sị, “Ọ zụọgụọ ndị ọzọ, ya zụọ nwan enwẹn ẹ, omẹni ịya wụ Kraịstị Osolobuẹ, Onyẹ hụ Osolobuẹ họrị!”

³⁶ Ndị-agha a mụzịghọ a ẹmụ: A bịa wẹ d'e kunrun ẹ, ye ẹ manya rụ-ụka,

³⁷ sị a, “Omẹni ịyụ wụ eze ndị Ju, zụọpụha enwẹn i!”

³⁸ O nwọnzikwọ ihiẹn wẹ deye obe hụ. Ihiẹn wẹ de wụ, “Ọnwan wụ eze ndị Ju.”

³⁹ Onyẹ ohu imẹ ndị hụ mẹ eje-ihiẹn wẹ kpọma elu obe nọ kparimẹ ẹ, a sị a, “Ẹlẹ yụ wụ Kraịstị? Zụọpụha nwan enwẹn i, y'a zụọpụhazịkwọ ẹnyi!”

⁴⁰ Hụn-ẹbọ nọ jụgbọ hụn ku ihiẹnni, sị, “Y'a ra tụdẹ egun Osolobuẹ, ebe o mẹ ni ikpe ohu kẹ wẹ mazị yụ nwẹn?

⁴¹ Ikpe wẹ ma ẹnyi hụghọ mma, makẹni ihiẹn ẹnyi chọ kẹ ẹnyi rị a hụn; kanị onwọnni ihiẹn okẹnnyẹni mẹ.”

⁴² Ya ọ nọ sị Jesu, “Jesu, ogẹn y'e gi bịa rịkẹ eze, dodo nyanhankwọ m!”

⁴³ Jesu nọ sị a, “M rị a gwa ị ezioku, mmẹ lẹ yụ sikọ d'a rị Alị Ezumikẹn wụ Paradaịsị tannị.”

Kẹ Jizọsị Dọn Nwụn

⁴⁴ Ihiẹn nọkẹ ọkụrọkụ mmẹbụọ efinnaị ẹnyanwụn gi a rị isi, ọhịhị nọ gbagbarị alị hụ ile d'e ru ọkụrọkụ ẹtọ efinnaị,

⁴⁵ anwụn amụnị. Ogẹnni kẹ Ẹkwa wẹ gi gbọnbepụ Ebẹhụ Kachanrịn Nsọ imẹ Ụnọ-NSỌ gi gbawa ẹbụọ.

⁴⁶ Ya Jesu nọ gi okẹn olu yi, “Baba, e bu m mmọn m che i ẹka!” O kugụ ihiẹnni, ọ nọ kwọnbepụ.

⁴⁷ Ogẹn onyẹ-isi agha ahụn kị ndị-agha kpọgbun'ẹ gi hụn ihiẹn mẹni, ọ nọ ja Osolobuẹ mma, sị, “Ezioku-ezioku, ẹka okẹnnyẹni rị ọchan!”

⁴⁸ Ogẹn ndị hụ ile gbakikomẹ ebahụn e lee ilee gi hụngụ ihiẹn mẹni, wẹ nọ lama fịankọ ẹka obi.

⁴⁹ Ndị ile marịn Jesu ọhụnma lẹ ikpoho ndị ahụn gha Galili sọnhẹn ẹ nọtezi ẹkẹrẹ, e lee ihiẹn ndị rị e mẹni.

Kẹ Wẹ Dọn Li Jizọsị

⁵⁰ O nwọn okẹnnyẹ ohu ẹfan a wụ Josẹfụ hụn wụ onyẹ ohu imẹ Ndị-isi Nkịkwama. Onyẹ obodo Arịmatịa rị Judia k'ọ wụ; ezigbo ịhịan kụrụ ọtọ rọ.

⁵¹ O kweyenini ndị-isi ibe ẹ nị wẹ mẹ Jesu ihiẹn wẹ mẹ ẹ. Ọ rị ndị rị e che ọbịbịa Alị-eze Osolobuẹ.

⁵² Ọ nọ jẹn d'e kunrun Paịleti, sị a buye ẹ ẹhụ Jizọsị.

⁵³ Ya ọ nọ butu ẹ elu obe, gi ẹkwa linẹ kwama a, bu ẹ che imẹ ili wẹ liyetulẹni ịhịan hụn wẹ gu rịkẹ mmughẹ ye imẹ ọmụma kẹ w'e mẹ.

⁵⁴ Ụhụọhịn wẹ gi a kwademẹ Ezumikẹn rọ, Ụhụọhịn Ezumikẹn e d'e bidọn ẹnyasị hụ.

⁵⁵ Ikpoho ndị ahụn gha Galili sọnhẹn Jizọsị nọ sọnmẹ Josẹfụ, wẹ nọ hụn ili hụ, hụnzị kẹ wẹ dọnmẹ ẹhụ Jizọsị.

⁵⁶ Ya wẹ nọ lama d'a chọtọ udẹn lẹ ihiẹn ndị ọzọ wẹ gi a kwama ozun. O ru Ụhụọhịn Ezumikẹn, wẹ nọ zu ikẹn kẹ Iwu dọn ku.