Luku 22 - Ika

Isi Nke Ẹbụọ-kwasị-ọgụn E Zuni Wẹ Jesu Eje-umẹ

¹ Ogẹn Mmẹmmẹ ahụn wẹ gi e ri Brẹdi nwọnlẹni yisti hụn w'a kpọzị Mmẹmmẹ-Nghafe gi rumẹ,

² ndị-isi nchụn-ẹjan lẹ ndị-nkuzi Iwu rị a chọ nị wẹ gbu Jizọsị hụ a chọ kẹ w'a dọn mẹ ẹ, makẹni egun ndị alị rị a tụ wẹ.

Judasị E Kweri N'o K'e Re Jesu

³ Ekwensụ nọ banye imẹ Judasị w'a kpọ Iskarọtụ, onyẹ ohu imẹ ndị nsọnmazụụn a mmẹbụọ hụ.

⁴ Ọ nọ pụ, jẹnmẹ d'e sọn ndị-isi nchụn-ẹjan lẹ ndị-isi ndị-nche Ụlọ-nsọ ku kẹ o dọn re Jesu ye wẹ.

⁵ Ẹfọ nọ sụọ wẹ ụsụọ, wẹ nọ kweri nị wẹ jẹnkọ d'e ye ẹ egho.

⁶ Ya ọ nọ kweri, chọma ezigbo oghere o jẹnkọ d'e gi we Jesu ye wẹ ebe ịhịan rịkalẹni.

Oriri-nghafe

⁷ O ru ụhụọhịn hụ wẹ gi e bidọn Mmẹmmẹ wẹ gi e ri Brẹdi nwọnlẹni yisti, ụhụọhịn ahụn wẹ gi e gbu nwa-ebulu Nghafe,

⁸ Jizọsị nọ zi Pita lẹ Jọnụ, sị wẹ, “Jẹnmẹ ni d'e dọnkwama ihiẹn nị ẹnyi ri Oriri-nghafe.”

⁹ Wẹ nọ jụ a, sị, “Elebe k'ị chọ nị ẹnyi dọnkwama?”

¹⁰ Ọ nọ sị wẹ, “Gọn ni ntịn: ụnụ banyekọnị imẹ obodo, okẹnnyẹ ohu bu ite-mirin jẹnkọ d'e kunrun ụnụ. Sọnn'ẹ banye ụlọ o k'a banye.

¹¹ Ụnụ a sị onyẹ nwọn ụlọ hụ, ‘Onyẹ-nkuzi sị ị, “Elee hụn wụ mmughẹ onyẹ-ọbịa ahụn mmẹ lẹ ndị nsọnmazụụn m k'a nọ ri ihiẹn-oriri Nghafe rị?” ’

¹² O sikọ d'a ghọsị ụnụ mmughẹ ohu shịanị rị ibe elu, hụn oche lẹ teburu rị; ebẹhụ kẹ ụnụ k'e dọnkwama.”

¹³ Ya wẹ nọ jẹnmẹ. Wẹ nọ hụnchanrịn ihiẹn ile k'o dọn gwa wẹ, ya wẹ nọ dọnkwama ihiẹn w'e gi ri Oriri-nghafe.

Oriri-nsọ

¹⁴ Ogẹn e ru, Jizọsị nọ weri oche, ndị-ozi hụ pụ-ichẹn nọ sọn ẹ nọdị alị nị wẹ ri Oriri hụ.

¹⁵ Jizọsị nọ sị wẹ, “A chọkẹnmẹkẹ m nị mmẹ lẹ ụnụ ri Oriri-nghafeni m gini d'a ta afụnfụn!

¹⁶ Makẹni onwọnni ogẹn m'e gi rizi ẹ d'e ru mgbe w'e gi ri ẹ imẹ Alị-eze Osolobuẹ.”

¹⁷ Ya ọ nọ weri mkpu, ọ kpanmịngụ Osolobuẹ, ọ nọ sị, “Weri ni rarịsọnmẹ.

¹⁸ M rị a gwa ụnụ, arakọzị m manya vaịnị d'e ru mgbe Alị-eze Osolobuẹ bịa.”

¹⁹ Ya ọ nọ weri ogbe brẹdi, ọ kpanmịn Osolobuẹ, bebe ẹ, we ẹ ye wẹ, sị, “Ọnwan wụ ẹhụ m, hụn wẹ rị e gi ufiri ụnụ e ye. E mẹ ni ihiẹnni e gi a nyanhan m.”

²⁰ Ẹrịra k'o dọnzikwọ weri mkpu hụ ogẹn wẹ gi rigụ, ye wẹ, sị, “Mkpuni wụ nkwerigbama ọhụn Osolobuẹ; ẹdeke m hụn m rị e gi ufiri ụnụ e ye kẹ wẹ gi biye ẹ ẹka.”

²¹ “Ka lee n'ẹ, mmẹ lẹ onyẹ jẹnkọ d'e reni m rị ebeni e ri ihiẹn-oriri!

²² Nwa nke Ịhịan lakọ kẹ Osolobuẹ dọn ku, kanị nsọngbu rịnị onyẹ ren'ẹ!”

²³ Ya wẹ nọ jụma ibe wẹ kẹ onyẹ imẹ wẹ jẹnkọ d'e mẹ ihiẹnni.

Onyẹ Kachanrịn?

²⁴ O nwọnzighọ ogẹn ndị-ozi ahụn pụ-ichẹn gi rị a dọ onyẹ wẹ k'e weri nị ị ya kachanrịn imẹ wẹ ile.

²⁵ Jizọsị nọ sị wẹ, “Ndị-nze ụwa a kị wẹ nkịgbu; ndị ọkịkị wẹ e ri nzere ‘Omẹ-ọghọ!’

²⁶ Kanị nke ụnụ ẹlẹ ẹrịra. Kama, onyẹ kachanrịnnị imẹ ụnụ ya mẹmẹ kẹ nwata; onyẹ-ndu ya nọ kẹ ojẹn-ozi.

²⁷ Onyẹ kadẹ ibe ẹ? Hụn rị e ri ihiẹn-oriri ra hụn rị e jẹn ozi rịn'a? Ẹlẹ hụn rị e rini? Kanị mmẹ nwẹn rị nwan e bi imẹ igunrun ụnụ nọkẹ onyẹ e jẹn ozi.

²⁸ “Ụnụ e sọngụọ m nọdị hụnnị ile wẹ lele m:

²⁹ m rị nwan e ye ụnụ ọkịkị kẹ Nẹdi m dọn ye m alị-eze kị,

³⁰ kẹni ụnụ sọn m ri, ra imẹ alị-eze m; onyẹ-onyẹ imẹ ụnụ sikọ d'a nọdị ukpo-eze, a hannị ikpụlọ mmẹbụọ rị Izrẹlụ eṅẹn.

Jizọsị E Ku Ẹ Nị Pita Jẹnkọ D'a Ghọrị N'ọ Marịn A

³¹ “Saịmọnụ, Saịmọnụ! Gọn ntịn! Ekwensụ a sịgụọ wẹ we ụnụ ile che ẹ ẹka, n'ọ yọ ụnụ kẹ ọka.

³² Kanị, e mẹgụọnị m'ị ekpere Saịmọnụ, amamgbe okukwe i a dan. I rogharịgụ, y'e yeni umunẹ i ẹka turu.”

³³ Kanị Pita nọ sị, “Di-nwọnni-ẹnyi, ihiẹn ọ k'a wụ ya wụrụ, m k'e sọn i jẹn ngan, sọndẹ i nwụnhụn!”

³⁴ Jizọsị nọ sị a, “M rị a gwa ị ezioku Pita, ọkpa gini d'a kwan tannị, i sikọ d'a ghọrị mgbe ẹtọ nị y'a marịn m.”

Ẹkụkwọ-nsọ K'a Nọ Ẹhụ Jesu Bụn

³⁵ Ya Jesu nọ jụ ndị nsọnmazụụn a ajụjụ, sị, “Ogẹn m gi zipụ ụnụ, sị ụnụ ewerilẹ egho mọbụ ẹkpa mọbụ akpụkụ, o nwọnghọ ihiẹn kọnị ụnụ?” Wẹ nọ sị a, “Mba, onwọnni.”

³⁶ Jesu nọ sị wẹ, “Kanị ujeni, onyẹ nwọn egho ya weri ẹ, onyẹ nwọn ẹkpa ya buruzikwọ a. Onyẹ nwọnlẹni ọpịa-agha ya re ẹwuru o yiye elu ẹ, gi ẹ ṅọnrin ọpịa-agha.

³⁷ M rị a gwa ụnụ, ihiẹn ahụn Ẹkụkwọ-nsọ ku, nị ‘Wẹ jẹnkọ d'a gụn a yeni ndị a dan iwu’ jẹnkọ d'a nọ ẹhụ m bụn. Eziẹ, ihiẹn Ẹkụkwọ-nsọ ku banyeni m hụ e mẹ.”

³⁸ Ya kẹ ndị nsọnmazụụn a nọ sị a, “Di-nwọnni-ẹnyi, e lee ọpịa-agha ẹbụọ ebeni!” Ọ nọ sị wẹ “O higụọ!”

Kẹ Jesu Dọn Mẹ Ekpere Elu Ugu Olivu

³⁹ Jesu nọ gha imẹ Jerusalẹm pụ, shi Ugu Olivu k'o dọn e mẹ mbụ, ndị nsọnmazụụn a nọ sọnmẹ ẹ.

⁴⁰ O ru ebẹhụ, ọ nọ sị wẹ, “Mẹ ni ekpere makẹ ụnụ gha a danban imẹ ọnwụnwan.”

⁴¹ Ya ọ nọ jẹnshi ihun ẹkẹrẹ, ihiẹn rịkẹ ebe mbụrụ e ru, gbu osekpu, mẹ ekpere,

⁴² sị, “Baba, omẹni y'a chọghọ, napụ m mkpu afụnfụn lẹ ọnwụnnị; kanị, uche i ya mẹ, ẹlẹ nke m.”

⁴³ Ya mmọn-ozi elu-igwee nọ pụha d'e yechen'ẹ ikẹn.

⁴⁴ Ọ nọ gi okẹn-ụfụ ọ rị mẹkẹnmẹ ekpere; ọbanje ẹ nọ kẹ ẹdeke rị a tantuni.

⁴⁵ Ogẹn o gi gha ebahụn ọ rị e mẹ ekpere lihi, ọ nọ bịa d'e kunrun ndị nsọnmazụụn a; ọ nọ hụn nị wẹ rị ụran — ẹhụ rọ wẹ makẹni wẹ rị a kwan.

⁴⁶ Ya ọ nọ sị wẹ, “Kị ụnụ rị a ranhịnnị? Lihi ni mẹmẹ ekpere, amamgbe ụnụ a danban imẹ ọnwụnwan.”

Kẹ Judasị Dọn Re Jizọsị

⁴⁷ Ebe Jizọsị rịkwọ e ku oku, idẹnmizi, igunrun ịhịan nọ bịa. Onyẹ hụ w'a kpọ Judasị hụn rị imẹ ndị-ozi pụ-ichẹn mmẹbụọ hụ duhẹ wẹ. Ọ nọ jẹnburu Jizọsị d'e susu ẹ ọnụ.

⁴⁸ Kanị Jizọsị nọ sị a, “Judasị, isusu-ọnụ k'i gi e re Nwa nke Ịhịan?”

⁴⁹ Ogẹn ndị nsọnmazụụn Jesu ya lẹ wẹ wị gi hụn ihiẹn jẹnkọ d'e mẹni, wẹ nọ sị Jesu, “Di-nwọnni-ẹnyi, nị ẹnyi gi ọpịa-agha mẹ wẹ ihiẹn?!”

⁵⁰ Onyẹ ohu imẹ wẹ nọ gi ọpịa-agha banpụ odibo onyẹ-isi nchụn-ẹjan ntịn ẹka-ihiẹn.

⁵¹ Jesu nọ sị wẹ, “Kụsị nị ihiẹnni!” Ya ọ nọ mẹtụ okẹnnyẹ hụ ẹka ntịn, zụọ a.

⁵² Ya Jizọsị nọ sị ndị-isi nchụn-ẹjan lẹ ndị-isi ndị-nche Ụlọ-nsọ lẹ ndị-isi hụn wẹ ile gba bịa ebẹhụ d'a nwụnrụn a, “Kị ụnụ buhẹni ọpịa-agha lẹ ẹgbe, rịkẹ sị m wụ onyẹ-ohin?

⁵³ Mmẹ lẹ ụnụ rị imẹ Ụlọ-nsọ ụhụọhịn ile, ụnụ anwụnrụnnị m. Kanị hụnnị wụ ogẹn ụnụ lẹ ogẹn ishi gi a kị!”

Pita A Ghọrị, Sị Ọ Marịnzị Jizọsị

⁵⁴ Ya wẹ nọ nwụnrụn Jesu, duru ẹ shi iwe onyẹ-isi nchụn-ẹjan. Pita hụ ebe teni e sọn wẹ d'e ru ebẹhụ.

⁵⁵ Ogẹn ndị rị ebẹhụ gi fiye ọkụn ahanmahan ezi-ọgwa onyẹ-isi nchụn-ẹjan hụ, fihunmẹ ẹ a nyan a, Pita nọ nọdịyeni wẹ.

⁵⁶ Ogẹn nwagbọọ ohu wụ odibo gi gi ọkụn ahụn wẹ fiye legha Pita k'ọ nọdị ebahụn a nyan a, ọ nọ bu ẹnya tụma Pita, sị, “Okẹnnyẹni rịzị ndị wẹ lẹ Jizọsị te wị!”

⁵⁷ Kanị Pita nọ ghọrị, sị, “Okpoho, amarịn m'a!”

⁵⁸ O tebe ẹkẹrẹ, onyẹ ọzọ a hụn Pita, ọ nọ sị a, “Yụ lẹ wẹ wị!” Pita nọ sị a, “Di-ẹnyi, ẹlẹ mmẹ!”

⁵⁹ Ihiẹn nọ kẹ mgbahunmẹ ọkụrọkụ ohu a ghagụ, onyẹ ọzọ nọzị sị, “Ịrụ-ụka arịa, okẹnnyẹni lẹ Jesu wị, makẹni onyẹ Galili k'ọ wụ!”

⁶⁰ Pita nọ sị a, “Di-ẹnyi, amarịn m ihiẹn i rị e ku!” Ebe Pita rị e ku okuni, ọkpa nọ kwan.

⁶¹ Ya Di-nwọnni-ẹnyi nọ gbehutọ ebe ọ rị, bu ẹnya zinmẹ Pita. Pita nọ nyanhan ihiẹn Di-nwọnni-ẹnyi ku, k'o dọn sị a, “Ọkpa gini d'a kwan tannị, i k'a ghọrị mgbe ẹtọ nị y'a marịn m.”

⁶² Pita nọ pụ, kwan ezigbo ẹkwan.

E Gbu Wẹ Jizọsị Ili, Gi Ẹ Gu Egu

⁶³ Ikẹnnyẹ ndị ahụn gi Jesu nọ gi ẹ gumẹ egu, e gbu ẹ ili.

⁶⁴ E kẹnkin wẹ ẹ ẹnya, sị a, “Bu amụma gwa ẹnyi, onyẹ fịan ị ihiẹn?!”

⁶⁵ A gwasọnmẹ w'ẹ eje-oku bu ọda.

E We Wẹ Jizọsị Shi Ọgwa Ndị-isi Nkịkwama

⁶⁶ Eki e fọn, Ndị-isi ile nọ zu, kẹ ndị-isi nchụn-ẹjan kẹ ndị-nkuzi Iwu. Ya wẹ nọ wẹhẹ Jizọsị Ọgwa Ndị-isi nkịkwama.

⁶⁷ Wẹ nọ sị a, “Omẹni ịyụ wụ Kraịstị, gwa ẹnyi?” Ọ sị wẹ, “M gwa ụnụ, ụnụ ekwerikọ;

⁶⁸ m jụ ụnụ ajụjụ, ụnụ azakọ.

⁶⁹ Kanị, gha kikẹnni jẹnmẹ, Nwa nke Ịhịan jẹnkọ d'a nọdị alị ẹka-nni Chuku Onyẹ nwọn ikẹn ile.”

⁷⁰ Wẹ ile nọ sị, “Ịyụ wụ nwan Nwa Chuku?” Ọ nọ sị wẹ, “Ụnụ e kugụọ a nị ya kẹ m wụ.”

⁷¹ Wẹ nọ sị, “Kị ẹnyi rị a chọzịnị ọshẹri! Ẹnyi a nụgụọ a ọnụ a!”