Luku 21 - Ika

Isi Nke Ohu-kwasị-ọgụn Ihiẹn Ogbẹnnyẹ Di Ẹ Nwụn Ye

¹ Jesu nọ lee ẹnya, hụn kẹ ndị ịdanfịn rị e buche oyiye ebe w'e buche ẹ imẹ Ụlọ-nsọ;

² ọ hụnzị ogbẹnnyẹ mgbeleke ohu di ẹ nwụn k'o buche ịkọbọ ẹbụọ ebẹhụ.

³ Ya kẹ Jesu nọ sị, “Ezioku kẹ m rị a gwa ụnụ nị ogbẹnnyẹ mgbelekeni di ẹ nwụn yekarị wẹ ile.

⁴ Makẹni, wẹ ile yeni nwọn ọda, kanị ya hụn nwọnlẹni yechanrịn ihiẹn ile o gi e bi.”

Jizọsị E Ku Ẹ Nị Wẹ K'e Tikpọ Ụlọ-nsọ Rị Jerusalẹm

⁵ Ụfọdụ rị e ku oku ọmụma ndị magbu enwẹn wẹ mma lẹ ihiẹn ile rịgbu enwẹn ẹ mma wẹ ye Osolobuẹ hụn wẹ gi chọ Ụlọ-nsọ mma. Jizọsị nọ sị wẹ,

⁶ “Ihiẹn ndịnị ụnụ rị e leghanị, ogẹn lala hụn wẹ e gi tituchanrịn ọmụma ile wẹ gi tụn Ụlọ-nsọnị, alatọkọ wẹ akpụ ohu elu ibe ẹ.”

Nsọngbu Lẹ Ukpokpo Lalanị

⁷ Wẹ nọ jụ a, sị, “Onyẹ-nkuzi, elee ogẹn kẹ ihiẹn ndịnị e gi mẹ? Elee ahịma kẹ w'e gi marịn nị wẹ e d'e mẹ?”

⁸ Jesu nọ sị wẹ, “Dọnrin ni ẹnya makẹ wẹ gha e dufie ụnụ. Makẹni, ndị bu ọda sikọ d'e gi ẹfan m bịa, a sị, ‘Mmẹ wụ Kraịstị;’ a sịzị, ‘Ogẹn hụ e rugụọ!’ Ka esọnkwọlẹ ni wẹ.

⁹ Ụnụ nụ ukwere agha lẹ ndị rị a lụsọn ndị ọkịkị ọgụn, anịkwọlẹ ni egun tụ ụnụ. Makẹni, ihiẹn ndịnị jẹnkọ d'e bugụ ụzọ mẹ, kanị ọgụgụ-ogẹn erukọ ozigbo ahụn.”

¹⁰ Ya ọ nọzị sị wẹ, “Alị lẹ alị jẹnkọ d'a lụ agha; alị-eze a lụsọn alị-eze;

¹¹ okẹn alị-ọmahihie lẹ ụnwụn lẹ eje-emu e gbuni sikọ d'a rị. Ihiẹn egun lẹ ihiẹn atụmẹnya jẹnkọ d'a pụhasọnmẹ elu igwere.

¹² “Kanị, ihiẹn ndịnị ile gini d'e mẹ, wẹ jẹnkọ d'e mẹshi ụnụ ikẹn, kpokpo ụnụ, we ụnụ ye wẹ kin ikpe imẹ ụlọ-ofufe, tụ ụnụ ngan; wẹ sikọ d'e gi ufiri ẹfan m we ụnụ jẹnni ndị-nze lẹ ndị Gọvanọ.

¹³ Ọnwan sikọ d'a wụ oghere ụnụ e gi shịanị m ẹri.

¹⁴ Kwademẹ ni nwan obi nị ụnụ erotọkọ ihiẹn ụnụ e gi kinrin ọnụ ụnụ.

¹⁵ Makẹni m sikọ d'e ye ụnụ amamihiẹn lẹ oku-ọnụ hụn ndị ikpe ụnụ jẹnkọlẹni d'a saẹka shịarị mọbụ papụ.

¹⁶ “Ndị mụnị ụnụ lẹ umunẹ ụnụ ikẹnnyẹ lẹ ikpoho lẹ ndị nke ụnụ lẹ ndị ọwụ ụnụ jẹnkọ d'e redẹ ụnụ. Wẹ jẹnkọ d'e gbudẹ ndị wẹ k'e gbu imẹ ụnụ.

¹⁷ Ize ụnụ k'e ze ịhịan ile makẹ ẹfan m.

¹⁸ Kanị onwọnni akpụ ntutu ohu rị ụnụ isi hụn k'a la iwi.

¹⁹ Ndidin kẹ ụnụ k'e gi nwọn nzụọpụha.

²⁰ “Kanị, ụnụ hụn kẹ ndị-agha fihunmẹ Jerusalẹm, ụnụ a marịn nị ogẹn w'e gi tikpọ a a rịgụọ nsue.

²¹ Ogẹn hụ, ndị rị Judia wẹ gbashi elu-ugu ndị rị ebẹhụ; ndị rị imẹ Jerusalẹm wẹ pụ; ndị rịlẹni imẹ ẹ wẹ abanyelẹ.

²² Makẹni ogẹn mmẹgwarị rọ, ogẹn w'e gi mẹzuchanrịn ihiẹn ile wẹ de imẹ Ẹkụkwọ-nsọ.

²³ O jẹnkọ d'a fụ ndị rị imẹ lẹ ndị pa nwa ọrụn ụhụọhịn hụ. Makẹni, okẹn nsọngbu sikọ d'a rị alịnị; wẹ k'e gi okẹn ọnụma sọn ndịnị.

²⁴ Wẹ k'e gi ọpịa-agha gbu wẹ, kpụnrụn wẹ shi alị ile rị ichẹn-ichẹn. Alị ndị ọzọ jẹnkọ d'a zọ Jerusalẹm ụkụ d'e ru nị ogẹn alị ndị ọzọ e zu.

Ọbịbịa Nwa Nke Ịhịan

²⁵ “Wẹ jẹnkọ d'a hụn ihiẹn ahịma ihun ẹnyanwụn lẹ ifọn lẹ kokisẹ rị igwere. Imẹ ụwa, alị ichẹn-ichẹn jẹnkọ d'a rị imẹ nsọngbu, makẹ okẹn ụzụn ohimin rị a zụn lẹ k'o dọn rị e mẹhunmẹ ọda-ọda; o sikọ d'a gba wẹ ngharị-ẹnya.

²⁶ Ndụn k'a gụ ịhịan yeni egun ihiẹn lalanị ụwa ile, makẹni ikẹn ndị rị igwere jẹnkọ d'e mẹhunmẹ.

²⁷ Ogẹn hụ kẹ wẹ jẹnkọ d'e gi hụn Nwa nke Ịhịan k'ọ rị imẹ orukpu o gi lala, ya lẹ ikẹn lẹ ọghọ hi-ogbe.

²⁸ Ogẹn ihiẹn ndịnị e gi bidọn, turu ni ọtọ, ụnụ e weshi isi elu, makẹni ogẹn wẹ k'e gi gbapụha ụnụ a rịgụọ nsue!”

Ihiẹn Jesu Gi Osisi Figi Kuzi

²⁹ Ya Jizọsị nọ tụnị wẹ ilu: “Lekpọ nị osisi figi lẹ osisi ndị ọzọ ile:

³⁰ Hụn wẹ gihụ fọma ẹhụhụọ, ụnụ e gi ẹnya ụnụ a hụn a, marịn nị udu-mirin e d'e bidọn.

³¹ Ẹrịrazịkwọ, ụnụ hụn kẹ ihiẹn ndịnị rị e mẹ, ụnụ a marịn nị alị-eze Osolobuẹ a rịgụọ nsue.

³² “M rị a gwa ụnụ ezioku, ndị rị ogẹnni agụkọ ihiẹn ndịnị kebe mẹ.

³³ Elu-igwere lẹ ụwa jẹnkọ d'a gụ, kanị, ihiẹn m ku k'a bụn.

Kwademẹ Enwẹn I!

³⁴ “Kpachanpụ nị nwan ẹnya, amamgbe iri-ụwa lẹ ịra-manya lẹ oku-elu e mẹ ụhụọhịn hụ kunrun ụnụ idẹnmizi nọkẹ ọnyan.

³⁵ Makẹni, ụhụọhịn hụ sikọ d'e kunrun ịhịan ile rị elu-ụwa.

³⁶ We ni nwan ẹnya ru alị ogẹn ile; e mẹ ni ekpere nị Osolobuẹ mẹ ụnụ saẹka wanahịn ihiẹn ndịnị ile jẹnkọ d'e mẹni, lẹni ụnụ sazịkwọ ẹka turu ihun Nwa nke Ịhịan.”

³⁷ Ụhụọhịn ile, Jesu hụ a kuzi imẹ Ụlọ-nsọ, kanị ọhị gba, ọ pụ, shi ugu ahụn w'a kpọ Olivẹtị d'a nọdị.

³⁸ Ụzọ ụtụntụn ile, ịhịan ile hụ a bịa d'e kunrun ẹ imẹ Ụlọ-nsọ, e gọn ẹ ntịn.