Luku 20 - Ika

Isi Nke Ọgụn A Jụ Wẹ Jesu Kẹ Onyẹ Zi Ẹ

¹ Ụhụọhịn ohu, ebe Jesu rị a kuzi, e zi oziọma imẹ Ụlọ-nsọ, ndị-isi nchụn-ẹjan lẹ ndị-nkuzi Iwu lẹ ndị-isi nọ pụha,

² sị a, “Gwa ẹnyi, onyẹ gwa ị mẹ ihiẹn ndịnị ị rị e mẹ? Onyẹ zi i?”

³ Jesu nọ za wẹ, sị, “Mmẹ nwẹn jẹnkọ d'a jụ ụnụ ajụjụ ohu: gwa nị m,

⁴ onyẹ sị Jọnụ mẹ Mirin-Chuku o mẹ? Chuku rị elu-igwee zi ẹ, ra ịhịan?”

⁵ Ya wẹ nọ tụgbama iroro, sị ibe wẹ, “Ẹnyi sị, ‘Ọ gha elu-igwee bịa,’ o k'a sị, ‘Kị haịn ụnụ gilẹni gi oku ẹ dọn?’

⁶ Kanị ẹnyi sị, ‘Ọ gha ẹka ịhịan bịa,’ wẹ jẹnkọ d'e gi ọmụma magbu ẹnyi makẹni wẹ ile kweri ni Jọnụ wụ onyẹ-amụma.”

⁷ Ya wẹ nọ sị a, “Ẹnyi amarịn ebe ọ gha bịa.”

⁸ Ya Jizọsị nọ sị wẹ, “Mmẹ nwẹn agwakọ ụnụ onyẹ sị m mẹ ihiẹn ndịnị.”

Ilu Jesu Gi Ndị Wẹ Ye Ugbo-vaịnị Rụn Ta

⁹ Ya kẹ Jesu nọ tanị ndị ile rị ebahụn iluni: “Okẹnnyẹ ohu nwọn ugbo-vaịnị, ya k'ọ nọ we ẹ ye ndị jẹnkọ d'a rụnn'a e-gbu-e-ke, ọ nọ shi alị-ịhịan d'a nọbie.

¹⁰ Ogẹn vaịnị e ru, ọ nọ zi odibo ohu jẹnni ndị hụ rị a rụn ugbo hụ nị wẹ ye ẹ hụn run'ẹ; kanị, ndị hụ nọ gbu odibo ẹ ili, gba a ẹka la.

¹¹ Ọ nọ zijẹn odibo ọzọ; kanị wẹ nọzị gbu ẹ ili, gbe ifẹnrẹn ye ẹ ihun, gba ya nwẹn ẹka la.

¹² O zijẹn odibo hụn mẹ wẹ ẹtọ; wẹ nọ rụdẹ ọhụn ẹhụ, chụpụ a.

¹³ Onyẹ hụ nwọn ugbo-vaịnị hụ nọ sị, ‘Kị m'e mẹ nwan? M jẹnkọ d'e zi ezi nwa m, ikẹnkwọ nị wẹ gbayeghọ a!’

¹⁴ Kanị, ogẹn ndị hụ gi hụn a, wẹ nọ sị ibe wẹ, ‘Ọnwan wụ hụn sikọ d'e nwọnrin ugboni omẹgụ, nị ẹnyi gbu ẹ nwan kẹni ihiẹn nkẹ e ru ẹ ẹka họnrin nke ẹnyi!’

¹⁵ Ya wẹ nọ gha imẹ ugbo-vaịnị hụ dọkpụnpụ a, gbu ẹ. “Jesu nọ sị: Kị onyẹ hụ nwọn ugbo jẹnkọ d'e mẹ ndị hụ rị a rụnn'a?

¹⁶ O sikọ d'a bịa d'e gbu wẹ, we ugbo hụ ye ndị ọzọ.” A nụ wẹ ihiẹnni, wẹ nọ sị, “Chuku a jụ!”

¹⁷ Kanị, Jesu e bu ẹnya zinmẹ wẹ, sị, “Kị wẹ den'ẹ nwan imẹ Ẹkụkwọ-nsọ nị ‘Ọmụma hụ ndị rị a tụn ụlọ jụ e họnringụọ ọmụma gi ụlọ’?

¹⁸ Ọmụma hụ jẹnkọ d'e tikpọ onyẹ ọwụlẹ dankwasịn'a; kanị o jẹnkọ d'e gweriẹn onyẹ ọwụlẹ ọ dankwasị.”

¹⁹ Ya kẹ ndị-nkuzi Iwu lẹ ndị-isi nchụn-ẹjan nọ mẹ nị wẹ nwụnrụn Jesu ozigbo, makẹni a ghọtagụọ wẹ nị uwẹ k'ọ tụnị ilu hụ; kanị, egun igunrun ahụn anịnị wẹ.

A Jụ Wẹ Jesu Oku Ụgwọ-isi

²⁰ Ya kẹ wẹ nọ kemẹ Jesu nke. Wẹ nọ zi ndị wẹ zi d'e kunrun ẹ, sị wẹ mẹ nọkẹ sị wẹ gi ezioku bịa kẹni wẹ hụn ụzọ gi ihiẹn o k'e ku kwọndọn ẹ, bu ẹ che ẹka Gọvanọ hụn ndị Rom tumẹ.

²¹ Wẹ nọ sị a, “Onyẹ-nkuzi, ẹnyi a marịnghọ nị oku-ọnụ ị lẹ nkuzi i kụrụ ọtọ; y'a ra lee ịhịan ẹnya ihun, kama, y'a kuzi ụzọ Osolobuẹ k'ọ rịchanrịn.

²² Gwa ẹnyi, Iwu ẹnyi e kwerighọ nị ẹnyi kụ eze-kanị wụ Siza ụgwọ-isi ra o kwerini?”

²³ Kanị, Jizọsị a ghọtagụọ nị ẹro kẹ wẹ gi bịa, ọ nọ sị wẹ,

²⁴ “Ghọsịdẹle ni m akpụrụ egho dinarịọsụ: isi onyẹ lẹ ẹfan onyẹ rị a?” Wẹ nọ sị a, “Siza.”

²⁵ Ya Jesu nọ sị wẹ, “We ni nwan ihiẹn Siza ye Siza; ụnụ e we nke Osolobuẹ ye Osolobuẹ.”

²⁶ A sanị wẹ nwan ẹka gi oku-ọnụ a nwụndọn ẹ idẹnya ndị ahụn. Oku hụn ọ shịarị wẹ a tụ wẹ ẹnya ọda-ọda, wẹ nọ kpumẹ ọnụ.

A Jụ Wẹ Jesu Oku Ịgha ọnwụn lihi

²⁷ Omẹgụ, ụfọdụ ndị Itu-Sadusi nọ bịa d'e kunrun Jesu. (Ndị Itu-Sadusi sị nị ndị nwụnnị ara lihi.)

²⁸ Wẹ nọ jụ a ajụjụ, sị a, “Onyẹ-nkuzi, Mozizi deni ẹnyi ya imẹ Ẹkụkwọ Iwu nị: ‘Omẹni okẹnnyẹ a nwụnhụn bụ nwunyẹ ẹ amụnị nwa, nwẹnẹ ẹ sikọ d'a lụrụ nwunyẹ ẹ, mụdọnni ẹ nwa.’

²⁹ O nwọn nwan umunẹ ikẹnnyẹ ẹsa. Nke ibuzọ a lụrụ nwunyẹ kanị ọ mụnị nwa o we nwụnhụn;

³⁰ hụn mẹ ẹbụọ nọzị lụrụ okpoho hụ, ọ nwụnhụn, ọ mụnị nwa;

³¹ hụn mẹ ẹtọ nọ lụrụzị a, ẹrịra k'ọ rịzị ndị ọzọ ile họdụnị d'e ru nị wẹ ẹsa a lụgbarị okpoho hụ, a nwụnhụnchanrịn wẹ, bụ amụnị wẹ nwa.

³² Omẹgụ, hụn okpoho hụ nkẹ nọ nwụnhụn.

³³ O ru ogẹn ndị nwụnnị e gi lihi, nwunyẹ onyẹ kẹ okpoho hụ jẹnkọ d'a wụ imẹ wẹ ile, ebe o mẹ ni wẹ ẹsa lụgbarị a?”

³⁴ Jesu nọ sị wẹ, “Ndị ogẹnni sụọ a lụ di lẹ nwunyẹ;

³⁵ kanị ọ rịkọ ẹrịra ogẹn hụ lalanị. Makẹni, ndị hụ Osolobuẹ jẹnkọ d'e weri nị wẹ furu efuru, ndị hụn o k'a gha ọnwụn weli kẹni wẹ bi ogẹn hụ, alụkọ di lẹ nwunyẹ.

³⁶ Wẹ sikọ d'a nọ kẹ ndị mmọn-ozi; anwụnkọzị wẹ. Wẹ wụ ụmụ Osolobuẹ — makẹni wẹ wụ ndị gha ọnwụn lihi.

³⁷ O mẹ nke iweli ndị nwụnnị, Mozizi lẹ enwẹn ẹ e kugụọd'a ebe ọ nọ ku oku akụ-ọfịa hụ, ebẹhụ ọ nọ kpọ Di-nwọnni-ẹnyi ‘Chuku Ebraham, Chuku Aziki, Chuku Jekọpụ’.

³⁸ Chuku ndị rị ndụn k'ọ wụ, ẹlẹ nke ndị nwụnnị, makẹni ịhịan ile rị ndụn ẹnya a.”

³⁹ Ụfọdụ ndị-nkuzi Iwu nọ sị, “Onyẹ-nkuzi, y'a zagụọ ọhụnma!”

⁴⁰ Egun anịnị wẹ jụzị a ajụjụ.

Nwa Onyẹ Kẹ Kraịstị Wụ?

⁴¹ Ya Jesu nọ sị wẹ, “Kị haịn wẹ gi e ku ni Kraịstị wụ nwa Defidi?

⁴² Bụ Defidi lẹ enwẹn ẹ e kuọlẹ imẹ ẹhụhụọ Ẹbụ-ọma, sị, ‘Di-nwọnni-ẹnyi sị Di-nwọnni m, “Nọdị alị ẹka-nni m,

⁴³ d'e ru mgbe m gigụ ndị iṅẹnrẹn i họnrin ihiẹn i gi a tụkwasị ụkụ.” ’

⁴⁴ O mẹ nwan nị Defidi kpọ Kraịstị ‘Di-nwọnni m’, nanị k'o dọnzi nwan wụrụ nwa Defidi?”

Jizọsị A Dọ Wẹ Ẹka-ntịn Banyeni Ndị-nkuzi Iwu

⁴⁵ Ebẹhụ ịhịan ile rị e gọn ẹ ntịn, Jizọsị nọ sị ndị nsọnmazụụn a,

⁴⁶ “Kpachanpụnị nị ndị-nkuzi Iwu ẹnya: ọ sụọ wẹ nị w'e yi ẹwuru tueni a ghahunmẹ lẹ ni w'e kele wẹ ọhụnma ogbe lẹ nị wẹ a nọdị isi-oche imẹ ụlọ-ofufe lẹ ebe wẹ nọ e ri oriri.

⁴⁷ W'e rigbu ikpoho di wẹ nwụn, e gi ekpere sueni e kpumẹ ẹ! Wẹ jẹnkọ d'a narịn afụnfụn kanị.”