Luku 2 - Ika

Isi Nke Ẹbụọ Kẹ Wẹ Dọn Mụ Jizọsị

¹ Ogẹn hụ, eze-kanị wụ Siza Ọgọstusu nọ yi uhi, sị wẹ detuchanrịn ẹfan ịhịan ile rị ụwa — ebe ile rị okpuru ọkịkị ndị Rom.

² (Ọnwan wụ nke ibuzọ wẹ detu ẹfan ịhịan ile. Ogẹn Gọvanọ wụ Kwịrịnọsụ gi rị a kịnị ndị Rom alị ile rị okpuru Siria kẹ wẹ gi detu ẹfannị.)

³ Onyẹ ọwụlẹ hụ e jẹn obodo ẹ d'e deye ẹfan.

⁴ Ya Josẹfụ nọ gha obodo Nazarẹtị rị Galili shi obodo Bẹtilẹhẹm rị Judia, obodo wẹ nọ mụ Defidi, makẹni onyẹ ikpụlọ Defidi k'ọ wụ.

⁵ Ịya lẹ Meri hụn ya lẹ ịya jẹnkọ d'a lụ wị jẹn d'e deye ẹfan. Meri rị imẹ ogẹn hụ.

⁶ Ebe wẹ rị Bẹtilẹhẹm, ọmụmụ nọ ru Meri, imẹ nọ mẹmẹ ẹ.

⁷ Ọ nọ mụ nwa ibuzọ a, mụ a okẹnnyẹ. Ọ nọ gi ẹkwa fụma a, bu ẹ dinẹ imẹ ihiẹn anụ gi e ri ihiẹn-oriri — makẹni ebe wẹ k'a nọdị imẹ ụlọ ndị-ijẹn arịa.

Ozi Ndị Mmọn-ozi Wẹhẹni Ndị Rị E Du Anụ

⁸ Uhinhin ahụn, o nwọn ndị e du anụ rị ọfịa ẹgbẹrẹ ahụn, e lepụ anụ wẹ ẹnya.

⁹ Mmọn-ozi Di-nwọnni-ẹnyi nọ nwọnpụha imẹ igunrun wẹ, ọghọ Di-nwọnni-ẹnyi nọ nwunhunmẹ wẹ nọkẹ ukpẹ, okẹn egun nọ tụma wẹ.

¹⁰ Kanị mmọn-ozi hụ nọ sị wẹ, “Atụlẹ ni egun! Ozi rị mma hụn sikọ d'e wẹhẹni ịhịan ile ẹregede ịghọghọ kẹ m wẹhẹni ụnụ!

¹¹ A mụgụọnị wẹ ụnụ Onyẹ-nzụọpụha tannị imẹ obodo Defidi; ịya wụ Kraịstị, Onyẹ Hụ Osolobuẹ Tumẹ, hụn wụ Di-nwọnni-ẹnyi!

¹² Ihiẹnni kẹ ụnụ jẹnkọ d'e gi marịn a: ụnụ jẹnkọ d'a hụn nwa wẹ gi ẹkwa fụma, bu dinẹ imẹ ihiẹn anụ gi e ri ihiẹn-oriri.”

¹³ Idẹnmizi, igunrun ndị mmọn-ozi elu-igwee nọ nwọnpụha cheni mmọn-ozi ibuzọ hụ, a ja Chuku mma, a sị,

¹⁴ “Ịja-mma ya rịnị Osolobuẹ ebẹhụ kachanrịn elu ejẹn; udọn ya rịnị ndị rị imẹ ụwa, ndị ọ rị e mẹni ọhụnma!”

¹⁵ Mgbe ndị mmọn-ozi hụ gi lagụ wẹ tọ, shi elu-igwee, ndị-ndu anụ hụ nọ sị ibe wẹ, “Nị ẹnyi jẹnru Bẹtilẹhẹm d'a hụn ihiẹnni mẹni, hụn Di-nwọnni-ẹnyi gwa nwan ẹnyi.”

¹⁶ Wẹ nọ jẹnmẹ ebẹhụ ozigbo-ozigbo. Wẹ nọ hụn Meri lẹ Josẹfụ ebẹhụ, wẹ lẹ nwa ahụn wẹ bu dinẹ imẹ ihiẹn anụ gi e ri ihiẹn-oriri.

¹⁷ A hụngụ wẹ wẹ, wẹ nọ gwa wẹ ihiẹn mmọn-ozi hụ gwa wẹ banyeni nwa hụ.

¹⁸ Ihiẹn ndị ahụn e du anụ ku tụ ndị ile nụn'a ẹnya.

¹⁹ Meri nkẹ e bu ihiẹn ndịnị ile tọ imẹ obi ẹ, e ro wẹ.

²⁰ Ndị hụ e du anụ nọ lama, e ye Osolobuẹ ekele, a ja a mma, makẹni ihiẹn ile wẹ nụ lẹ ihiẹn ile wẹ hụn rịchanrịn kẹ mmọn-ozi hụ dọn gwa wẹ.

A Gụn Wẹ Jizọsị Ẹfan

²¹ Nke akpọhịn ẹsatọ, ogẹn wẹ e gi kwa nwata hụ ugun e ru, wẹ nọ gụn a Jizọsị, ẹfan hụ mmọn-ozi hụ ye ẹ nị nnẹ ẹ d'a tụ imẹ ẹ.

Kẹ Ndị Mụ Jizọsị Dọn Papụha A

²² O ru ogẹn Meri e gi fe ẹhụ-ọmụgwọ kẹ Iwu Mozizi dọn ku, ya lẹ Josẹfụ nọ weri nwa hụ shi Jerusalẹm d'a papụhanị Di-nwọnni-ẹnyi ya,

²³ (makẹni ẹrịra kẹ wẹ dọn de ẹ imẹ Iwu Di-nwọnni-ẹnyi, sị, “Wẹ sikọ d'e we nwa-okẹnnyẹ ibuzọ ọwụlẹ wẹ mụ kwanị Di-nwọnni-ẹnyi.”)

²⁴ Wẹ nọ chụn ẹjan kẹ wẹ dọn de ẹ imẹ Iwu Di-nwọnni-ẹnyi, ebẹhụ Iwu nọ sị, “Nduru ẹbụọ mọbụ ụmụ oluikuku ẹbụọ.”

²⁵ Ogẹn hụ, o nwọn okẹnnyẹ ohu w'a kpọ Simiọnụ hụn bi Jerusalẹm. Onyẹ ezi-omumẹ k'ọ wụ; ara gi ofufe Osolobuẹ gu egu, e che ni Osolobuẹ zụọpụha ndị Izrẹlụ. Mmọn-nsọ nọyen'ẹ anọyeni.

²⁶ Mmọn-nsọ mẹ ẹ marịn n'ọ nwụnkọ d'e ru n'ọ hụn Kraịstị, Onyẹ Hụ Di-nwọnni-ẹnyi Tumẹ.

²⁷ Mmọn-nsọ nọ duru Simiọnụ shi imẹ Ụlọ-nsọ. Kẹ ndị mụ nwa hụ wụ Jizọsị wẹhẹ ẹ d'e mẹn'ẹ ihiẹn Iwu ku,

²⁸ Simiọnụ nọ parị a, ja Osolobuẹ mma, sị,

²⁹ “Di-nwọnni-ẹnyi, ị rị nwan a sị odibo i lama udọn-lẹ-ndọnkwa kẹ i dọn kụ;

³⁰ makẹni e gigụọ m ẹnya m hụn nzụọpụha ị,

³¹ hụn ị kwademẹ idẹnya ndị alị ile:

³² Ukpẹ hụn jẹnkọ d'a ghọsị alị ndị ọzọ uche i, wẹhẹni ndị nke i wụ Izrẹlụ ọghọ.”

³³ Ihiẹn wẹ ku banyeni nwata hụ tụ nẹdi ẹ lẹ nnẹ ẹ wụ Josẹfụ lẹ Meri ẹnya.

³⁴ Simiọnụ nọ gọzi wẹ; ya k'ọ nọ sị nnẹ ẹ wụ Meri, “Gọn ntịn, wẹ tumẹ nwatanị n'ọ wụrụ onyẹ wẹ sikọ d'e gi budan ndị bu ọda imẹ Izrẹlụ, bushi ndị bu ọda elu, lẹzi n'ọ wụrụ ahịma wẹ k'a jụ;

³⁵ yụ nwẹn, ihiẹn-ụfụ jẹnkọ d'e zupu i obi nọkẹ agbada; oku nwatanị sikọ d'e wepụha iroro ndị bu ọda ifọn.”

³⁶ O nwọnzighọ okpoho onyẹ-amụma w'a kpọ Ana, nwa Fanụẹlụ, onyẹ ebọn Asha k'ọ wụ; ọ kagụọ ẹgẹdi; ahụa ẹsa sụọ kẹ ịya lẹ di ẹ bi di ẹ nọ nwụnhụn.

³⁷ Ọnọdị ahụn k'ọ rịkwọ nwan d'e ru hụnnị ọ rị nwa ahụa ẹnọ kwasị ọgụn-ẹnọ. Ara gha Ụlọ-nsọ pụ; ọ hụ e fe Osolobuẹ ukinkin lẹ efinnaị, e bu ọnụ, e mẹ ekpere.

³⁸ Ogẹn ohu hụ kẹ ya nwẹn gi pụha ebẹhụ, kpanmịnma Osolobuẹ, e ku oku nwata hụ kẹni ndị ile rị e che ni Osolobuẹ gbapụha Jerusalẹm nụ.

A Lakin Wẹ Nazarẹtị

³⁹ Ogẹn Josẹfụ lẹ Meri gi mẹgụ ihiẹn ile Iwu Di-nwọnni-ẹnyi ku, wẹ nọ lakin Nazarẹtị rị Galili, obodo wẹ bi.

⁴⁰ Nwata ahụn e sue, ka ẹhụ, marịn ihiẹn ọda-ọda, ngọzi Osolobuẹ hụ e sọn ẹ.

Ihiẹn Jesu Mẹ K'ọ Rị Nwata

⁴¹ Ahụa ile kẹ ndị mụ Jizọsị gi e jẹn Jerusalẹm d'e mẹ Mmẹmmẹ-nghafe.

⁴² Ogẹn Jesu gi rị nwa ahụa mmẹbụọ, wẹ nọ jẹnzi mmẹmmẹ hụ kẹ iwu dọn ku.

⁴³ E mẹgụ wẹ mmẹmmẹ hụ, wẹ nọ lama, kanị nwata hụ wụ Jesu nọ dịnọ Jerusalẹm, ndị mụn'a amarịn.

⁴⁴ Wẹ rị e ro n'ọ rị imẹ igunrun wẹ ile wị lakọ, wẹ nọlẹni chọ a d'e ru n'e jẹnpụ wẹ ijẹn akpọhịn ohu gbegbegbe; ya wẹ nọ nwan chọma a imẹ ndị nke wẹ lẹ ndị ọwụ wẹ.

⁴⁵ A chọbe w'ẹ, ahụnnị w'a, ya wẹ nọ chọkin ẹ shi Jerusalẹm.

⁴⁶ Hụn mẹ ẹ akpọhịn ẹtọ kẹ wẹ gi hụn a imẹ Ụlọ-nsọ, ebe ọ nọdịyeni ndị-nkuzi, e gọn wẹ ntịn, a jụ wẹ ụtaa.

⁴⁷ Nghọta a lẹ azịza a a tụ ndị ile rị e gọn ẹ ntịn ẹnya.

⁴⁸ Ogẹn ndị mụn'a gi hụn a, ọ tụ wẹ ẹnya; nnẹ ẹ nọ sị a, “Nwa m, kị mẹni ẹnyi ihiẹnni? Obi e kọnrin mmẹ lẹ nẹdi i elu ẹnyi gi a chọ ị.”

⁴⁹ Ọ nọ sị wẹ, “Kị ụnụ rị chọnị m? Ụnụ amarịn nị m jẹnkọ d'a rịrịrị iwe Nẹdi m?”

⁵⁰ Kanị aghọtanị wẹ ihiẹn ọ za wẹ.

⁵¹ Ya Jesu nọ sọnmẹ wẹ, wẹ ile nọ lashi Nazarẹtị. Ọ hụ e humẹni wẹ isi; nnẹ hụ e bu ihiẹn ndịnị ile e che imẹ obi ẹ.

⁵² Jesu hụ e sue, a ka ẹhụ, a marịnwaye ihiẹn; ihiẹn ẹ hụ a sụọ kẹ Osolobuẹ kẹ ịhịan.