Luku 18 - Ika

Isi Nke Mmẹsatọ Imẹ Ekpere Ogẹn Ile

¹ Jizọsị nọ gi ilu ghọsị ndị nsọnmazụụn n'o furu nị wẹ e mẹ ekpere e mẹsọnmẹ, anịnị wẹ ndụn gụ wẹ.

² Ọ sị, “O nwọn okẹnnyẹ ohu oku rị ẹka imẹ obodo ohu. Ara tụ egun Osolobuẹ, ara gbaye ịhịan.

³ Okpoho ohu di ẹ nwụn rịzị obodo hụ; ọ hụ a bịa d'a rịọ okẹnnyẹ hụ, ‘Dodo, d'a hannị mmẹ lẹ onyẹ rị e mẹgbuni m eṅẹn!’

⁴ Okẹnnyẹ hụ a jụbe n'o lekọ a ẹnya ihun, ọ nọ sị enwẹn ẹ, ‘Ọsụọn'a nị m'a ra tụ egun Osolobuẹ mọbụ gbaye ịhịan,

⁵ m sikọ d'e gi ufiri nsọngbuni okpohoni di ẹ nwụn rị e ye m mẹ wẹ ye ẹ ihiẹn run'ẹ, makẹ ẹhụ gha a ghanahịn m yeni ọbịbịanị ọ rị a bịa ogẹn ile!’ ”

⁶ Di-nwọnni-ẹnyi nọ sị, “Ụnụ a nụgụọ ihiẹn eje okẹnnyẹ ahụn oku rị ẹka ku.

⁷ Osolobuẹ emẹkọ wẹ ye ndị nke ẹ rị a kwanghọsị a uhinhin lẹ efinnaị ihiẹn runi wẹ? N'o biekẹ d'e yeni wẹ ẹka?

⁸ “M rị a gwa ụnụ, o jẹnkọ d'e mẹ wẹ ye wẹ ihiẹn runi wẹ, mẹdẹ ẹ ngwa. Kanị Nwa nke Ịhịan bịa, n'ọ hụn ndị nwọn okukwe imẹ ụwa?”

Ilu Jesu Tanị Ndị Ro N'a Rịka Wẹ Mma

⁹ Jizọsị ta iluni makẹ ndị ahụn rị e lelịa ndị ọzọ makẹni wẹ ro n'a rịka wẹ mma:

¹⁰ Ọ sị, “Ikẹnnyẹ ẹbụọ jẹn Ụlọ-nsọ d'e mẹ ekpere: ohu wụ onyẹ Farisi, hụn-ẹbọ wụ onyẹ a na ụgwọ-isi — onyẹ wẹ gi njọ marịn.

¹¹ Onyẹ Itu-Farisi e jẹnzụka, mẹ ekpereni: ‘Osolobuẹ, a kpanmịn m'ị nị anọnị m kẹ ndị ọzọ: m'a ra tụnarịn ịhịan ihiẹn ẹ, m'a ra tụ ntụ, m'a ra ghẹrẹ; anọdẹni m kẹ onyẹ ụgwọ-isi hụ rị ebẹhụ.

¹² M hụ e bu ọnụ mgbe ẹbụọ imẹ izuka, e ye i ohu-imẹ-iri ihiẹn ile m nwọn.’

¹³ “Kanị, onyẹ ụgwọ-isi nọ wuzo ebe teni; ọ sadẹni ẹka bu ihun zinmẹ elu-igwee, kama, ọ hụ a fịan ẹka obi, a sị, ‘Osolobuẹ, dodo mẹ omikẹn m, onyẹ njọ kẹ m wụ!’

¹⁴ “Jesu nọ sị: M rị a gwa ụnụ nị onyẹ ụgwọ-isi hụ kẹ Osolobuẹ kuni ọhụnma n'o d'a lama iwe ẹ, ẹlẹ onyẹ Itu-Farisi hụ. Makẹni, onyẹ bushi enwẹn ẹ elu, e welụa w'ẹ alị; onyẹ welụa enwẹn ẹ alị, e bushi wẹ ẹ elu.”

Ẹnya Jesu Gi E Lee Ụmụẹka

¹⁵ O nwọn ndị rị e wẹhẹ ụmụ wẹ pa ẹka kẹni Jesu hụatụ wẹ ẹka, gọzi wẹ. Kanị, ndị nsọnmazụụn a a hụn ihiẹnni, jụgbọma wẹ.

¹⁶ Ya Jizọsị nọ sị wẹ wẹhẹ ụmụẹka hụ; ọ nọ sị, “Nị nị ụmụ-ndu bịa d'e kunrun m; akụsịlẹ ni wẹ, makẹni Alị-eze Osolobuẹ wụ nke ndị nọ ẹrịra.

¹⁷ M rị a gwa ụnụ ezioku, onyẹ nabanhanlẹni Alị-eze Osolobuẹ kẹ nwata abanyekọ a.”

Onyẹ-ndu Ahụn Wụ Ọdanfịn

¹⁸ Onyẹ-ndu ohu jụ Jizọsị ajụjụ, sị a, “Ezigbo onyẹ-nkuzi, kị m'e mẹ nị m nwọn ndụn itẹbitẹ?”

¹⁹ Jizọsị nọ sị a, “K'ị rị a kpọnị m onyẹ-ọma? Onwọnni onyẹ rị mma wezụka Chuku.

²⁰ Ya marịnghọ Iwu ndịnị wẹ: ‘Aghẹrẹlẹ; egbulẹ ọchụn; ezunlẹ ohin; ebuokinlẹ ịhịan ọnụ; gbaye nẹdi i lẹ nnẹ i.’ ”

²¹ Ọ nọ sị Jizọsị, “M hụ e dọnmẹ iwu ndịnị ile kete m marịnlẹ ihiẹn.”

²² Jizọsị a nụ ihiẹn ọ za, ọ nọ sị a, “O nwọn ihiẹn ohu i kelẹni mẹ: repụ ihiẹn ile i nwọn, y'e we egho ẹ ye ndị igbẹnnyẹ, gi ẹ nwọn akụ-lẹ-ụba imẹ elu-igwee; y'a bịa d'e sọnmẹ m.”

²³ Okẹnnyẹ hụ a nụ ihiẹnni, ẹfọ asụọzịn'a ụsụọ kaka, makẹni o hikẹ ọdanfịn.

²⁴ Ogẹn Jizọsị gi hụn nị ẹfọ asụọzịn'a ụsụọ, ọ nọ sị, “Alị-eze Osolobuẹ k'a fụkwọ ndị-ịdanfịn ọrụn ọbanye!

²⁵ O sikọ d'a ka anyịnyan-mkpukpuke wụ kamẹlụ nfe ịgha ẹnya-olodẹn karị nị ọdanfịn banye Alị-eze Osolobuẹ.”

²⁶ Ndị nụ ihiẹnni nọ sị, “Onyẹ k'a sazị nwan ẹka nwọn nzụọpụha?”

²⁷ Jesu nọ sị wẹ, “Ihiẹn ịhịan ghalẹni a sa ẹka e mẹ, Osolobuẹ k'a sa ẹka mẹ ẹ.”

²⁸ Ya Pita nọ sị, “Lee ẹ, ẹnyi a lagụọ ihiẹn ile ẹnyi nwọn tọ sọnmẹ i!”

²⁹ Jizọsị nọ sị wẹ, “M rị a gwa ụnụ ezioku, onwọnni onyẹ gi ufiri Alị-eze Osolobuẹ latọ ụlọ mọbụ nwunyẹ mọbụ umunẹ mọbụ nẹdi lẹ nnẹ mọbụ ụmụ

³⁰ hụn jẹnkọlẹni d'e nwọnhẹn wẹ mmagi-mmagi ogẹnni, nwọnhẹnzikwọ ndụn itẹbitẹ ogẹn ahụn lalanị.”

Jesu E Kudọnzi Ẹ N'o K'a Nwụn, Lihizi

³¹ Jizọsị weri mmadụ mmẹbụọ hụ shi ụsụọ, ọ nọ sị wẹ, “Gọn ni ntịn! Ẹnyi jẹnkọ nwan Jerusalẹm; ihiẹn ile ndị-amụma de banyeni Nwa nke Ịhịan jẹnkọ d'e mẹchanrịn ebẹhụ.

³² “Wẹ sikọ d'e bu ẹ che ẹka ndị alị ọzọ; e gi w'ẹ gu egu, kpari ẹ, jụ a ẹsọn.

³³ Wẹ k'a fịan a mkpịnsịn, gbu ẹ; kanị, hụn mẹ ẹ akpọhịn ẹtọ, o lihi.”

³⁴ Kanị, onwọnni hụn wẹ ghọta; wẹ zuemẹni wẹ ya e zuemẹni.

Jesu A zụọ Onyẹ Ẹnya-ishi

³⁵ Ogẹn Jizọsị gi nọkunmẹmẹ Jẹriko, onyẹ ẹnya-mpịn ohu nọdị alị mkpẹnrẹn ụzọ, a rịọ ụrịọ.

³⁶ Ogẹn onyẹ ẹnya-mpịn hụ gi nụ ukwere igunrun ghafekọnị, ọ nọ jụ wẹ kẹ kị rị e mẹ.

³⁷ Wẹ nọ gwa a nị Jesu onyẹ Nazarẹtị ghafekọ.

³⁸ Ya ọ nọ yi, “Jizọsị, Nwa Defidi, mẹni m omikẹn!”

³⁹ Ndị rị ihun imẹ igunrun hụ nọ jụgbọ a, sị a kpumẹ ọnụ. Kanị, ọ nọ yikẹnmẹdẹ, a sị, “Nwa Defidi, mẹ omikẹn m!”

⁴⁰ Ya Jesu nọ wuzo, sị wẹ wẹhẹ okẹnnyẹ hụ. Ọ nọzụnhan, Jesu nọ sị a,

⁴¹ “K'ị chọ nị m mẹn'i?” Ọ nọ sị, “Di-nwọnni-ẹnyi, m chọ nị m leghama ụzọ.”

⁴² Jizọsị nọ sị a, “Leghama nwan! Okukwe i a zụọgụọ ị.”

⁴³ Ozigbo, ọ nọ leghama ụzọ; ọ nọ sọnmẹ Jizọsị, a ja Osolobuẹ mma. Ịhịan ile hụnn'a nọzịkwọ ja Osolobuẹ mma.