Luku 17 - Ika

Isi Nke Mmẹsa Njọ Lẹ Ịgbagharị-njọ

¹ Jizọsị nọ sị ndị nsọnmazụụn a, “Ihiẹn a han ịhịan e mẹ njọ jẹnkọ d'a bịarịrị; kanị, nsọngbu rị e che onyẹ wẹ k'a gha ẹka a bịa!

² Ọ ka onyẹ hụ mma nị wẹ kẹnmẹ ọlọ y'ẹ olu, tụ a ye imẹ ohimin karị n'ọ han onyẹ ohu imẹ ndị ntanị mẹ njọ.

³ “Kpachanpụ nị nwan ẹnya! Nwẹnẹ i mẹ njọ, jụgbọ a; o rogharị, y'a gbagharị a.

⁴ Ọsụọn'a n'o mẹ i njọ mgbe ẹsa imẹ ụhụọhịn, n'ọ bịachanrịn mgbe ẹsa hụ d'a sị ị, ‘E mẹọlẹ m njọ; e kpelẹ,’ ị sikọ d'a gbagharịrịrị a.”

Okukwe

⁵ Ndị-ozi hụ pụ-ichẹn nọ sị Di-nwọnni-ẹnyi, “Mẹ okukwe ẹnyi zewaye.”

⁶ Di-nwọnni-ẹnyi nọ sị wẹ, “Omẹni i nwọn okukwe handẹ kẹ mkpụrụ mọstadị mẹgbu enwẹn ẹ ntịn, ị jẹnkọ d'a sa ẹka sị osisi sịkamọnị higbu enwẹn ẹ ogbe rị ebeni, ‘Hueri d'a gbọrị imẹ ohimin,’ o sikọ d'a gbaye i.

Agụngụn Furu Ezigbo Odibo

⁷ “Gwadẹle ni m: igbọn i gha ugbo mọbụ ebe ọ rị e du atụnrụn lụaha, n'ị sị a, ‘Bịa ozigbo d'a nọdị alị n'i ri ihiẹn-oriri’?

⁸ Mba nụ! I jẹnkọ d'a sị a, ‘Mẹmẹni m ihiẹn-oriri ẹnyasị, y'e buye m'ẹ; y'e cheri m ni m rigụ, ra, n'ị kịpụ ihiẹn; i kebe ri, ra.’

⁹ N'i kelemẹ igbọn hụ n'o mẹ ihiẹn ị sị a mẹ?

¹⁰ “Ẹrịrazị, ụnụ nwẹn, ụnụ mẹchanrịngụ ihiẹn ile wẹ sị ụnụ mẹ, sị nị, ‘Igbọn mmakalaka kẹ ẹnyi wụ, ogbo ẹnyi sụọ kẹ ẹnyi rụn hụ.’ ”

Onyẹ Hụn Bịa D'a Kpanmịn Jizọsị

¹¹ Ogẹn Jizọsị gi jẹnkọ Jerusalẹm, ọ nọ ghashi ẹgbata Sameria lẹ Galili.

¹² Hụn o gi banyekọ obodo ohu mẹ ẹkẹrẹ, ndị oti iri nọ bịa d'e kunrun ẹ, turu ebe teyezi ẹkẹrẹ;

¹³ yi, “Jizọsị! Di-nwọnni-ẹnyi! Mẹ omikẹn ẹnyi!”

¹⁴ Jizọsị a hụn wẹ, ọ nọ sị wẹ, “We ni enwẹn ụnụ d'a ghọsị ndị nchụn-ẹjan kẹni wẹ gwa wẹ nị ụnụ a dịnhịngụọ.” E ru wẹ ụzọ, wẹ nọ dịnhịn, wụbehi ndị rụnị.

¹⁵ Ogẹn onyẹ ohu imẹ wẹ gi hụn a n'ọ rịgụọ mma, ọ nọ kin azụụn, yikọ, jakọ Osolobuẹ mma.

¹⁶ Ọ dannị Jizọsị alị, kpanmịn a. Onyẹ Sameria k'ọ wụ.

¹⁷ Jizọsị nọ sị, “Ẹlẹ mmadụ iri kẹ m zụọ, mẹ wẹ wụbehi ndị rụnị? Elebe kẹ itenẹi họdụnị rị?

¹⁸ Onwọnni nwan onyẹ kin azụụn d'a ja Osolobuẹ mma wezụka onyẹ alị ọzọnị?”

¹⁹ Ya Jizọsị nọ sị okẹnnyẹ hụ, “Lihi ọtọ n'ị lama; okukwe i a zụọgụọ ị.”

Kẹ Alị-eze Osolobuẹ Dọn A Bịa

²⁰ Ndị Itu-Farisi jụ Jesu kẹ ele ogẹn kẹ Alị-eze Osolobuẹ e gi bịa. Ọ nọ sị wẹ, “Ẹlẹ ẹnya kẹ wẹ gi a marịn nị Alị-eze Osolobuẹ a bịalẹ d'e weri ọnọdị.

²¹ Ẹlẹ hụn w'a sị, ‘Lee ẹ, ebeni k'ọ rị,’ mọbụ ‘Ebẹhụ k'ọ rị,’ makẹni, eziẹ, Alị-eze Osolobuẹ e werigụọlẹ ọnọdị imẹ ụnụ.”

²² Ya ọ nọ sị ndị nsọnmazụụn a, “Ogẹn lala hụn o gi rị ụnụ ọda-ọda nị ụnụ lẹ Nwa nke Ịhịan nọdịzị, ọsụọn'a akpọhịn ohu, kanị ụnụ ahụnkọ a.

²³ Wẹ k'a sị ụnụ, ‘Lee ẹ ebenẹi!’ mọbụ ‘Lee ẹ ebeni!’ Ka esọnkwọlẹ ni wẹ; a chọhunmẹlẹ n'ẹ.

²⁴ Makẹni, kẹ amụma dọn e be elu-igwere, a hụn w'a azụụn ile, ẹrịra kẹ Nwa nke Ịhịan jẹnkọ d'a nọ ụhụọhịn o k'a bịa.

²⁵ Kanị, o jẹnkọ d'a tagụ afụnfụn bu ọda, agbọnị a jụgụ a.

²⁶ “K'ọ rị ogẹn Nụa k'o jẹnkọ d'a rị ogẹn Nwa nke Ịhịan e gi bịa.

²⁷ Ịhịan ile hụ e ri, a ra, a lụ di lẹ nwunyẹ d'e ru ụhụọhịn ahụn Nụa banye imẹ ụgbọ-mirin ahụn pụ-ichẹn, okẹn mirin hụ nọ bịa, gbupụchanrịn wẹ ile.

²⁸ “Ẹrịra k'o mẹzi ogẹn Lọtụ: Ịhịan ile hụ e ri, a ra; e ṅọn, e re; a kụn, a tụn.

²⁹ Kanị, ụhụọhịn hụ Lọtụ gha Sodọm pụ, ọkụn lẹ nsịn-ẹnyanwụn nọ gha elu-igwee zuetu kẹ mirin, gbuchanrịn wẹ ile.

³⁰ Ẹrịra k'o jẹnkọ d'a rị ụhụọhịn hụ Nwa nke Ịhịan jẹnkọ d'a bịa.

³¹ “Ụhụọhịn hụ, onyẹ rị elu ụlọ a hụn nwọn ihiẹn mmụlọ y'e hidangụkwọlẹ banyemẹ d'e weri ẹ. Ẹrịrazịkwọ, onyẹ rị imẹ ugbo y'a lashikwọlẹ ụlọ n'o jẹnkọ d'e weri ihiẹn.

³² Nyanhankwọ nị ihiẹn mẹ nwunyẹ Lọtụ!

³³ Onyẹ chọ n'o ghe isi ẹ, isi ẹ a tọ a; onyẹ tuhu ndụn a k'a zụọpụha a.

³⁴ M rị a gwa ụnụ, o ru uhinhin hụ, mmadụ ẹbụọ k'a rị bẹdi ohu, e weri wẹ onyẹ ohu, la hụn-ẹbọ tọ.

³⁵ Ikpoho ẹbụọ k'a rị ụzọ ohu a kwọ ihiẹn, e weri wẹ onyẹ ohu, a la wẹ hụn-ẹbọ tọ.

³⁶ Ikẹnnyẹ ẹbụọ jẹnkọ d'a rị ugbo a rụn ọrụn, e weri wẹ onyẹ ohu, a la wẹ hụn-ẹbọ tọ.”

³⁷ Ndị nsọnmazụụn a nọ jụ a, “Di-nwọnni-ẹnyi, elebe kẹ ihiẹnni jẹnkọ d'a nọ mẹ?” Jizọsị nọ sị wẹ, “Ebe ọwụlẹ ozun rị kẹ udele a gbakikomẹ!”