Luku 14 - Ika

Isi Nke Mmẹnọ Onyẹ Ọzọ Jesu Zụọ Ụhụọhịn Ezumikẹn

¹ Ụhụọhịn Ezumikẹn ohu, Jizọsị jẹn d'e ri ihiẹn-oriri iwe onyẹ-isi ohu imẹ ndị Itu-Farisi; ndị rị e ke Jizọsị nke hụ e ke ẹ.

² Ya kẹ okẹnnyẹ ohu ẹhụ a fun nọ pụha ihun Jizọsị ebẹhụ.

³ Jesu nọ jụ ndị-nkuzi Iwu lẹ ndị Itu-Farisi, sị, “Iwu e kwerighọ nị wẹ zụọ ịhịan emu Ụhụọhịn Ezumikẹn ra o kwerini?”

⁴ Wẹ nọ gba nkịtịn. Ya Jesu nọ weri okẹnnyẹ hụ, zụọ a, sị a lama.

⁵ Ya ọ nọ sị wẹ, “Imẹ ụnụ ile onyẹ kẹ nwa a okẹnnyẹ mọbụ okẹn-efin ẹ k'a danban ọmị Ụhụọhịn Ezumikẹn, o wepụhan'a ozigbo?”

⁶ Kanị, asanị wẹ ẹka za ihiẹn ọwụlẹ.

Iwelụa enwẹn ịhịan Alị Lẹ Imẹni Ndị Igbẹnnyẹ Ọhụnma

⁷ Jesu a hụn kẹ ndị ọbịa rị a họrịsọnmẹ isi-ocho, ọ nọ kuzimẹ wẹ, sị,

⁸ “Wẹ kpọ ị oriri-agbamẹkụkwọ, ejẹnlẹ d'a nọdị isi-ocho. Amamgbe ọ wụrụ n'o nwọn onyẹ kanị ị wẹ kpọzị oriri,

⁹ onyẹ hụ kpọ ụnụ oriri a bịa d'a sị ị, ‘Ọwụ m, lihi ọtọ nị onyẹni nọdị alị.’ Ogẹn hụ y'e gi ifẹnrẹn jẹnmẹ d'a nọdị ocho nwọnlẹni ọghọ.

¹⁰ Kama, wẹ kpọ ị oriri, jẹn d'a nọdị alị oche nwọnlẹni ọghọ; kẹni onyẹ hụn kpọ ị oriri bịa, ọ sị ị, ‘Ọwụ m, bịa d'a nọdị isi-oche.’ Ogẹn ahụn ọghọ e jun i ẹhụ ihun ndị wẹ kpọ yụ lẹ wẹ oriri ahụn.”

¹¹ “Makẹni onyẹ weshi enwẹn ẹ elu, e welụa w'ẹ alị; onyẹ welụa enwẹn ẹ alị, e weshi w'ẹ elu.”

¹² Ya Jizọsị nọ sị onyẹ hụn kpọ a oriri, “Ị gha kpọ oriri, akpọlẹ ndị ọwụ ị mọbụ nwẹnẹ i mọbụ ndị nke ụnụ mọbụ ndị-ịdanfịn ibe i amamgbe w'a kpọgwarị ị, ọhụn a wụrụ ụgwọ-ọrụn ị.

¹³ “Kama, ị kpọ oriri, kpọ ndị igbẹnnyẹ lẹ ndị ngụrọ lẹ ndị ụkụ rịlẹni ikẹn lẹ ndị ẹnya-ishi.

¹⁴ “I jẹnkọ d'e nwọnhẹn ngọzi makẹni asa wẹ ẹka kụkin i y'ẹ, Osolobuẹ sikọ d'a kụkin i y'ẹ ụhụọhịn hụ ndị ezi-omumẹ k'a gha ọnwụn lihi.”

Ilu Jesu Gi Ndị Wẹ Kpọ Oriri Hi-ogbe Ta

¹⁵ Onyẹ ohu imẹ ndị bịa oriri hụ a nụ ihiẹn Jesu ku, ọ nọ sị, “Onyẹ hụn k'e ri oriri hụ imẹ Alị-eze Osolobuẹ, nke ẹ a rịkakwọ mma!”

¹⁶ Jizọsị nọ sị a, “Okẹnnyẹ ohu kpọ oriri hi-ogbe, kpọ ndị bu ọda oriri ahụn.

¹⁷ Ogẹn oriri hụ e ru, ọ nọ zi odibo ẹ d'a sị ndị ọ kpọ oriri, ‘Bịa nị nị e mẹmẹgụọ m ihiẹn ile!’

¹⁸ “Kanị, wẹ ile nọ rịọma a: onyẹ ibuzọ sị odibo hụ, ‘M ṅọnhụ alị, iwu wụ nị m k'e jẹn d'e lele ẹ. Dodo, asa m ẹka bịa.’

¹⁹ Onyẹ ọzọ sị, ‘M ṅọnhụ okẹn-efin iri wẹ gi a rụn ugbo; m jẹnkọ nwan d'e lele wẹ; dodo asa m ẹka bịa.’

²⁰ Onyẹ ọzọ sị, ‘M lụ nwunyẹ nke ọhụn, asa m ẹka bịa.’

²¹ Ya nwata iwe okẹnnyẹ hụ nwọn ụlọ nọ bịa d'a gwa a k'o jẹn. Olulu nọ bu di-nwọnn'ẹ ọ nọ sị odibo ẹ, ‘Jẹnmẹ nwan ọgbara-ogbe lẹ ụzọ ụpụ ile ozigbo d'e wẹhẹsọnmẹ ndị igbẹnnyẹ lẹ ndị ngụrọ lẹ ndị ẹnya-mpịn lẹ ndị ụkụ wẹ rịlẹni ikẹn.’

²² Omẹgụ, odibo hụ nọ bịa, sị a, ‘Diọkpa, e mẹgụọ m ihiẹn i zi m, kanị ebẹhụ eke junkwọ.’

²³ Ya di-nwọnn'ẹ nọ sị a, ‘Shi nwan ụwaya lẹ nwa-ozue: lịlịma n'ị mẹ ịhịan bịa kẹni ụlọ m jun.

²⁴ M rị a gwa ụnụ, onwọnni akpụ onyẹ ohu imẹ ndị hụ wẹ bu ụzọ kpọ hụn jẹnkọ d'a danmịn ihiẹn-oriri m!’ ”

Ihiẹn Rị Isọn Jesu

²⁵ Igunrun hi ogbe sọnkọ nwan Jesu, o gbehutọ, sị wẹ,

²⁶ “Onyẹ bịa d'e kunrunni m bụ ihiẹn m asụọn'a karị ihiẹn nẹdi ẹ lẹ nnẹ ẹ lẹ nwunyẹ ẹ lẹ ụmụ a lẹ umunẹ-ẹ-ikẹnnyẹ lẹ umunẹ-ẹ-ikpoho, ẹghẹẹ, karịdẹ ndụn a, ọ sakọ ẹka wụrụ onyẹ nsọnmazụụn m;

²⁷ onyẹ burulẹni obe nke ẹ sọnmẹ m asakọ ẹka wụ onyẹ nsọnmazụụn m.

²⁸ “Imẹ ụnụ ile, onyẹ k'a chọ n'ọ tụn okẹn ụlọ, o buni ụzọ nọdị alị, chọpụhagụ ihiẹn k'a bann'a kẹni ọ marịn kẹ o nwọnghọ egho k'e zu ẹ rụnchanrịn a?

²⁹ Omẹni o mẹn'ẹ, o gbegụ iyetọ a, nị ọ sanị ẹka tụngụ a, ndị rị a hụnn'a a mụma a ẹmụ,

³⁰ a sị, ‘Onyẹni jẹn d'a tụnma ụlọ, kanị ọ sanị nwan ẹka tụngụ a!’

³¹ “Ra o nwọndẹ eze jẹnkọ d'e kunrun ibe ẹ hụn lala d'a lụsọn ẹ agha, o buni ụzọ nọdị alị lelegụ kẹ n'ọ saẹka gi mmadụ nnụ-uku iri o nwọn che hụn gi mmadụ nnụ-uku ọgụn lala d'a lụsọn ẹ agha?

³² Ọ hụn a n'ọ sakọ ẹka, ọ họrị ịhịan zijẹnni hụn lala d'a lụsọn ẹ agha ebe o kelẹni nọkunmẹ ẹ, ni wẹ d'a rịọ a nị wẹ dọn.

³³ Ẹrịrazịkwọ, onwọnni onyẹ ọwụlẹ imẹ ụnụ hụn k'a s'ẹka wụ onyẹ nsọnmazụụn m mmanị ọ latọchanrịn ihiẹn ile ọ nwọn!

Nnu Tuhu Ụsụọ A

³⁴ “Nnu rị mma; kanị omẹni nnu asụọzịnị ụsụọ, nanị w'e dọn mẹ ẹ n'ọ sụọmazị ụsụọ?

³⁵ Onwọnni erere ọ ban: ọ rịkọ mma alị; ọ rịkọ mma wẹ e gi mẹmẹ fẹtalaịza. W'e kpọn ẹ hụ e tuhu. Onyẹ nwọn ntịn o gi a nụ ihiẹn, y'a nụ.”