Luku 13 - Ika

Isi Nke Mmẹtọ Ị Jụ Nị Y'e Rogharịkọ, Y'a La Iwi

¹ Ogẹn ohu hụ kẹ ụfọdụ ndị rị ebẹhụ gi gwa Jesu oku ndị Galili hụ Paịleti gbu ebe wẹ rị a chụnyeni Osolobuẹ ẹjan, gi ẹdeke wẹ gwọ ẹjan ahụn.

² Jesu nọ shịarị wẹ, sị, “Ụnụ rịdẹ nwan e ro ni ihiẹn mẹ ndị Galili hụ ghọsị nị uwẹ ka ndị Galili ile họdụnị njọ e mẹ ra?

³ Mba! M rị a gwa ụnụ, omẹni ụnụ lẹ enwẹn ụnụ erogharịnị, ụnụ ile sikọ d'a lazịkwọ iwi kẹ wẹ.

⁴ Ra ụnụ ro ni mmadụ mmẹsatọ ahụn ụlọ-uku rị Silụam dangbu ka ndị ọzọ ile bi imẹ Jerusalẹm njọ e mẹ?

⁵ Mba! M rị a gwa ụnụ, omẹni ụnụ erogharịnị, ụnụ ile jẹnkọ d'a la iwi kẹ wẹ.”

Ilu Jesu Gi Osisi Figi Mịlẹni Mkpụrụ Ta

⁶ Ya Jesu nọ tanị wẹ iluni: “Okẹnnyẹ ohu kụn figi imẹ alị vaịnị a. Ọ hụ a chọha mkpụrụ elu figi hụ, ọ hụnnị.

⁷ Ọ nọ sị onyẹ hụn e lepụn'a alị vaịnị hụ ẹnya, ‘Lee ẹ, kete ahụa ẹtọ ịnwaịn kẹ m bịama d'a chọ mkpụrụ elu figini, ahụnnị m. Gbutu ẹ! K'ọ rị e wiwini alị?’

⁸ Kanị, onyẹ e lepụ ugbo hụ ẹnya nọ sị a, ‘Diọkpa, dodo hapụzị a ahụa ohu sụọ, nị m hụn ụzọ guhunmẹ ukun ẹ, buche ẹ fẹtalaịza.

⁹ Ọ mị mkpụrụ akan-ile, ọ hụ mma; kanị, omẹni ọ mịnị, n'i sikọ d'e gbutu ẹ, y'e gbutu ẹ.’ ”

Jizọsị A Zụọ Okpoho Eje-mmọn Hiemẹ

¹⁰ Ụhụọhịn Ezumikẹn ohu, Jesu rị ụlọ-ofufe, a kuzi.

¹¹ Okpoho ohu eje-mmọn rị imẹ ẹ rị ebẹhụ. Eje-mmọn hụ hiemẹ ẹ kete ahụa mmẹsatọ; ara saẹka tịnpụ.

¹² Ogẹn Jizọsị gi hụn a, ọ kpọchen'ẹ, sị, “Okpoho, Osolobuẹ a tọpụgụọ ị imẹ emuni rị a kụn'ị!”

¹³ O bu ẹka kwasị a, okpoho hụ nọ tịnpụ ozigbo, jama Osolobuẹ mma.

¹⁴ Kanị iwe nọ we onyẹ-isi ụlọ-ofufe nị Jizọsị zụọ ịhịan Ụhụọhịn Ezumikẹn. Ọ nọ gwama ndị rị ebẹhụ oku, “Akpọhịn isin rị a hụn furu ẹnyi e gi rụn ọrụn. Bịa nị ogẹn hụ d'a zụọ isi, ẹlẹ Ụhụọhịn Ezumikẹn!”

¹⁵ Di-nwọnni-ẹnyi nọ sị, “Ndị ihunnaị! Imẹ ụnụ, onyẹ ghalẹni a tọpụ efin ẹ mọbụ jaki ẹ ebe o limẹtọ a Ụhụọhịn Ezumikẹn, e wejẹn ẹ d'a ra mirin?”

¹⁶ “Lee ni nwan okpohoni: nwa Ebraham hụn Ekwensụ kẹn ẹgbụn kete ahụa mmẹsatọ; o runi hụn w'a tọpụ Ụhụọhịn Ezumikẹn?”

¹⁷ Ogẹn o gi ku ihiẹnni, ifẹnrẹn nọ mẹ ndị iṅẹnrẹn ẹ. Kanị igunrun ahụn rị ebẹhụ hụ a ghọghọ makẹ ihiẹn atụmẹnya ile ọ rị e mẹ.

Ilu Jesu Gi Mkpụrụ Mọstadị Ta

¹⁸ Ya Jesu nọ nwan sị, “Kị Alị-eze Osolobuẹ yi? Kị m'e gi ghọsị k'ọ nọ?

¹⁹ Ọ nọ kẹ ebe onyẹ ohu nọ weri mkpụrụ mọstadị, kụn a ye ugbo-nta a, o sue, han kẹ osisi, nnụnụ a bịa d'a kụ ẹkụụ e ye agalaba a.”

Ilu Jesu Gi Yisti Brẹdi Gi A Fụ Ta

²⁰ Jesu nọ sịzị, “Kị m'e gi ghọsị kẹ Alị-eze Osolobuẹ nọ?

²¹ Ọ nọ kẹ ebe okpoho ohu nọ weri ẹkẹrẹ yisti brẹdi gi a fụ, gwọgbama ya lẹ ọka wẹ gwe hụn jun adana ẹtọ d'e ru ni yisti hụ a ghagbarị ọka ahụn ile.”

Ọnụmụzọ Hụn Mẹ Warara

²² Jesu rị ụzọ o gi jẹnkọ Jerusalẹm; ọ hụ a banyesọnmẹ obodo uku lẹ ndị mẹ ẹkẹrẹ, jẹnkọ, a kuzi ndị rị imẹ wẹ.

²³ Onyẹ ohu nọ jụ a ajụjụ, sị, “Di-nwọnni-ẹnyi, ndị k'e nwọn nzụọpụha ebukọ ọda?” Jizọsị sị wẹ,

²⁴ “Shikwọ nị ọnwụn nị ụnụ banye ọnụmụzọ hụ mẹ warara! Makẹni ndị bu ọda jẹnkọ d'a lịlịma nị wẹ banye, kanị asakọ wẹ ẹka.

²⁵ “Makẹni, onyẹ nwọn ụlọ ma ama gụnma ụzọ, ụnụ e turu ezi ebahụn dụma ẹka ọnụmụzọ, a sị, ‘Di-nwọnni-ẹnyi, dodo gụnpụnị ẹnyi ụzọ!’ O jẹnkọ d'a za ụnụ, sị, ‘Amarịn m ebe ụnụ gha bịa!’

²⁶ Ogẹn hụ, ụnụ k'a gha a sị, ‘Ẹlẹ ẹnyi lẹ ịyụ wị ri, ẹlẹ ẹnyi lẹ ịyụ wị ra? Y'a nọgụọdẹ ọgbara-ogbe ẹnyi kuzi!’

²⁷ Kanị o k'a sị, ‘Amarịn m ebe ụnụ gha bịa! Pụnị nị m, ụnụ ile hụn e mẹ njọ!’

²⁸ Ịkwan-ẹkwan lẹ ịta nkwẹnrẹn-eze jẹnkọ d'a rị ogẹn ụnụ e gi hụn Ebraham lẹ Aziki lẹ Jekọpụ lẹ ndị-amụma ile imẹ Alị-eze Osolobuẹ, kanị a tụ wẹ ụnụ lẹ enwẹn ụnụ ye ezi!”

²⁹ “Ịhịan jẹnkọ d'a gha ẹbamịn ẹnọ rị ụwa bịa d'e ri oriri imẹ Alị-eze Osolobuẹ.

³⁰ Eziẹ, o nwọnghọ ndị kpan azụụn ogẹnni jẹnkọ d'a wụ ibuzọ ogẹn ahụn lẹ ndị bu ụzọ kikẹnni jẹnkọ d'a wụ ikpanzụụn.”

Kẹ Jerusalẹm Rịhan Jizọsị Obi

³¹ Ogẹn hụzịkwọ, ụfọdụ ndị Itu-Farisi nọ bịa d'e kunrun Jizọsị, sị a, “Ghakwọ ebeni pụ, makẹni Hẹrọdụ chọ n'o gbu i!”

³² Jesu nọ sị wẹ, “D'a gwanị nị m ufu ahụn e mẹ ẹro nị m sị, ‘Gọn ntịn, m rị a chụpụ eje-mmọn tannị, a zụọ ndị emu rị a kụ; ekile e mẹzi m ẹrịra; nke akpọhịn ẹtọ, a rụnchanrịn m ọrụn m.’

³³ K'osilẹrị, m pụkọ apụkọ, makẹni m k'a rịrịrị ụzọ tannị lẹ ekile lẹ nwẹnẹ-eki hụn m gi jẹnkọ Jerusalẹm, makẹni w'a ra gbu onyẹ-amụma ụzọ ọzọ mmanị Jerusalẹm.

³⁴ “Heuu Jerusalẹm! Jerusalẹm!! Obodo hụn e gbu ndị-amụma, e gi ọmụma a magbu ndị wẹ zihẹn'ẹ! Mgbe ole-lẹ-ole kẹ m chọpụ nị m kpọnkikomẹ ndị rị imẹ i kẹ nneku-ọhụhụ dọn e kpọnkikomẹ ụmụ a e ye okpuru nku ẹ, kanị y'a nịnị m!

³⁵ Lee ẹ, a la wẹ nwan Ụlọ ị tọn'ị! M rị a gwa ị, y'a hụnkọzị m d'e ru ogẹn i jẹnkọ d'a sị ‘Ngọzi ya rịnị onyẹ ahụn gi ẹfan Di-nwọnni-ẹnyi lala.’ ”